SIRAK 48 - BUKUIT NE TILIIL Sireet ne Dutero Kanon

Elijah

¹ Ki piit anyun Elijah maotyot ne uu maat, ak ki ikwenyi ng'olyoonnyi ko uu tait.

² Ki ipchi icheeget rubeet, ak eng' kagilennyi pogei ko ki yai `ineendet icheek koek che ng'ering'.

³ Eng' kainetap Kiptaiyat ko ki ker `inee kipsengwet, ak konyil somok ko kichoor maat.

⁴ Ki ii karaaran ne tya inyee, Elijah, eng' poisyoniguk che kikwong'e! Po ng'oo toroornatet ne aechin ak neng'ung'?

⁵ Ki ing'eet musto eng' meet ak eng' ye mi che ki kobek, eng' ng'olyootap Ne Toroor Miising'.

⁶ Ki iyookte laitorinik koba ng'emisyet, ak piik che taagunotiin, ko ki myanso eng' itogusyekwak.

⁷ Ki igas kergong'yet eng' Sinai ak kirwoogutigap mugetuut eng' Horeb.

⁸ Ki iil laitorinik si koyaakta mugetuut, ak maotik si kogeer kebebertang'ung'.

⁹ Ki kiganabin iwe parak eng' kipchurchuryetap maat, eng' chepkichutit kobooto paraisisyegap maat.

¹⁰ Eng' kasarta ne ki kichop, ko siraat keele, inyee ko ichoboot itustus nereegegap Kamuktaindet kotoom komong' eng' chaang'indo, koweech mugulelweegap sigiik koweekyi lagokwak, ak koweek pororyosyegap Jakobo.

¹¹ Poiboi icheek che ki keerin ak ki kilelesanjine chamyeng'ung'! Acheek anyun kesaptosi iman.

Elisha

¹² Kingetuch Elijah eng' kipchurchuryet, ko ki kinyiitee Elisha saboondap Elijah. Ki yai inee kaboorunoik che chaang' kosiir, ak kwang'utik eng' ng'olyoot age tugul ne po kutinnyi. Eng' sabeennyi tugul koma itumtumok eng' taitap pounin age tugul, anan kong'eetyi chii kole koomu ineendet.

¹³ Ma mi kiy ne ki uui eng' ineendet, ak kingo kagome, komaoten poortanyin.

¹⁴ Eng' sabeennyi ko ki yai kwang'utik, ak eng' meennyi poisyonikyik ko kwang'utik.

¹⁵ Agot eng' chuuto tugul koma walak piik, anan kometo icheek tengekwogikwak, agoi kimut icheek ko uu parunenik eng' emennywa, ak ki yesta koba ng'wony tugul. Ki ng'et piik che ng'ering' miising', kobooto pounindet kobun iyoteetap Daudi.

¹⁶ Ki yai alage eng' icheek ne po iman, ago alak ko ki yai tengek konyil ak konyil.

Hezekiah

¹⁷ Ki teech Hezekiah irimoik nganasookyik, ak koree peek kobwa oriit. Ki pal kereruut eng' rwandet kobalee tuguuk karnook, ak kochop keriingonik che po peek.

¹⁸ Eng' peetuusyekyik ko ki ibookyi Sennacherib emet; ki iyookto `inee ne indochin lugeet ak kwo; ki ibookyi `inee Zion, ak kotoroorgei eng' menatennyi.

¹⁹ Ki itumtumok anyun mugulelwekwak ak kobotanso eunekwak, ak ki mi eng' ng'wanindo ko uu kwonyiik che mi sigisyo.

²⁰ Ago kiguur icheek Kiptaiyat ne tinyei riirge, koitoi eunekwak koitechin ineendet. Kogas anyun kochookyi Ineendet ne Tiliil eng' kipsengwet, ak kotyach icheek kobun Isaiah.

²¹ Ki pir `Kiptaiyat nganaseetap piigap Assyria, ak kowoong' icheek malaikayandenyi.

²² Ki yai Hezekiah nooto ibaibai Kiptaiyat, ak ko riip komyee ortinwegap kwandanyi Daudi, ko uu ye ki ng'atei inee `maotyot Isaiah, ne ki oo ak koyanaat eng' ng'ang'utikyik.

Isaiah

²³ Eng' peetuusyegap Isaiah ko kiweekyigei let asiista, ak ko tesyi peetuusyek sabeetap laitoryat.

²⁴ Eng' kimnateennyi ne po kabuuset ko ki keer tuguuk che po kagesunet, ak ko kaigai che ki riirtos eng' Zion.

²⁵ King'aang' inee tuguuk che piitu eng' kasarta ne po let, ak tuguuk che ung'ootiin kotoom koyaak.