POISYONIGAP CHE KIYOKTOI 22 - BUKUIT NE TILIIL Sireet ne Dutero Kanon

¹ “Che kitupche ak kwanisyekyok, ogas ng'aleek che amwae nguno eng' taing'wong' che asaruunegei.”

² Ak kingo kas kole ng'alaaljin icheek eng' kutitap Yahudik, kosiisyo miising': ak ki le

³ aa Yahudyot, ki kisikyo Tarsis ne po Cilicia, ago ki anerchi nganasani, ak ki ineeta Gamaliel, ak ki kineta komyee ko uu ole teptoi Ng'atuutyetap kwanisyekyok, ak ki atinye kagiiletapkei eng' Kamuktaindet, ko uu ole oteptoi okweek tugul rani:

⁴ ak ki ausausi Orani agoi meet, arate ak atoorchini korgoreet murenik ak kobogorisyek.

⁵ Ko uu ye paoryanjino tisiindet ne oo, ak kapkirwooget tugul ne po poisyek: che ki anyoorunee paronok, che ki aibe koba kaptupchosyek, ak ki awe Damasko, ale amut icheek che ki mi olooto kobwa Jerusalem ko ratotiin, si kobiit kebir.

Komwaitoi Paulo agobo kayanennyi

⁶ “Ak ye ki awendi, ko kariikyi Damasko, ko katonon asiis, kooluu eng' sainooto lapkeiyet ne oo ne ki punu kipsengwet koluucha komoswek tugul.

⁷ Ak ki abutyi ng'wony, ak agas kutit koleenjo, ‘Saulo, Saulo, amu nee si iusa?’

⁸ Ak ki awolu ale, ‘Ii ng'oo inyee, Kiptaiyat?’ Ak ki leenjo, ‘Aa Jeso ne po Nazareth, ne iuse.’

⁹ Ak ki keer lapkeiyet iman che ki mi kobooto, ago ki ma kas kutitap ineendet ne ki ng'alaalwo.

¹⁰ Ale, Ayai nee anyun, Kiptaiyat? Koleenjo Kiptaiyat, Ng'eet, ui Damasko; si kemwaun eng' olooto tuguuk tugul che kigeng'at iyai.

¹¹ Ak ye ki ma kota amuuchi ageer kiy amu liletap lapkeiyonooto, ait Damasko, konamota euut icheek che ki mi kobooto.

¹² “Ak ki nyo ole ami, chiito age ne keguure Anania, chiito ne po iman eng' riibetap Ng'atuutyet, ne kibaoryanjin Yahudik tugul che ki menyei olooto kole myee.

¹³ Ak ye kitononi eng' ye neegiteena, koleenjo, Ne kitupche Saulo, keerte. Ak eng' sainooto ageer ineendet.

¹⁴ Ak ki le, ‘Ki kolewenin Kamuktaindet ne po kwanisyekyok si kobiit inai magennyi, ak igeer Ineendet ne po Imanda, ak igas ng'olyoot ne punu kutinnyi.

¹⁵ Amu iegu paoryandennyi eng' piik tugul agobo tugul che koigeer ak che koigas.

¹⁶ Ta igeni nee anyun nguno? Ng'eet kibatisanin, ak kiuundo tengekwogiguk iguure kainennyi.’

Kiyooktoi Paulo koamdechi pororyosyek

¹⁷ “Ak kingo kaaweektegei Jerusalem, ak kingo ta asaae eng' Hekaluut, kobutya kiit ne uu rwon,

¹⁸ ageer ineendet koleenjino, ‘Igirgir, chaakte, mande eng' Jerusalem, amu mataachei paornateet eng' inyee agobo anee.’

¹⁹ Ak ki ale, ‘Kiptaiyat, ingen icheeget kole ki arate ak abire eng' sinagogit age tugul eng' icheek che ki iyanin.

²⁰ Ak ye ki ngetumdoi korotiigap Stepano paoryandeng'ung', ko ki atononi agane eng' yooto, ayanjini ak ariibe ngoroigap icheeget che ki parei ineendet.’

²¹ Ak ki leenjo ineendet, ‘Ui, amu ayooktoin iwe ole loo agoi ye mi Pororyosyek.’ ”

²² Koepchi iit anyun icheek ineendet agoi ng'olyoondoniito; yeityo komwa eng' kutit ne oo, kole, “Oiste chiito ne uu niito kwo eng' ng'wony; amu ma nyolu kosap.”

²³ Ak ye kita koboldos, ak kowiirtoi ngoroikwak, ak kowastoi temburyek koba parak,

²⁴ kong'at kiptaiyat ne oo kole kimut ineendet kwo irimeet, kong'at kole, ogine eng' pireet ne po kipcharitisyek, si konai ineendet kiit ne kabolji icheek ko uu nooto agobo ineendet.

²⁵ Ak ye kingo kagorate ineendet anook, koleenji Paulo kiptaiyatap pogol ne kitononi eng' yooto, Tos chamdoi ng'atuutik eng' okweek obir chii ne Romanindet, ama kirwookyi?

²⁶ Ak kingo kas chemogonooto po kiplugotinik pogol, kwo ole mi kiptaiyat ne oo, ak komwachi ineendet koleenji, “Imache iyai nee nguno? Amu Romanindet chiichi.”

²⁷ Konyo anyun kiptaiyat ne oo, ak koleenji ineendet, Mwaiwo, tos ii Romanin? Ak ki le, Ee.

²⁸ Kowol kiptaiyat ne oo kole, “Ki aegu chiitap pororyoni eng' alyet ne oo.” Ak ki le Paulo, Ki kisikyo pororyoniito.

²⁹ Koba anyun eng' sainooto icheek che kimachei kogine ineendet: ak ki iywei agine kiptaiyat ne oo, ye kingo nai kole kaagaa Romanindet ineendet, ak amu kiga korat ineendet.

Koetegei Paulo eng' kapkirwook

³⁰ Ago ye kimachei konai komyee eng' peetuut ne po aeng', kiit ne koitaame Yahudik, kotyach ineendet ak kong'at tisiik che eecheen ak kapkirwooget tugul kotuiyo, ak komut Paulo kochoorgei, ak konde ineendet tainnywa.