POISYONIGAP CHE KIYOKTOI 17 - BUKUIT NE TILIIL Sireet ne Dutero Kanon

Komi Thessalonike

¹ Kingo kagobun icheek Amphipoli ak Apolonia, koit Thessalonike, ole ki mi sinagogitap Yahudik.

² Ak ki wo Paulo ole mi icheek, ko uu ye ki cham koyaei, ak kong'alaal kobooto pichooto eng' sabatoisyek somok agobo siruutik,

³ kong'aang'jin ak koboorchin komyee kole kiga nyoljin Kristo konyalil ak kong'eet kogeny eng' che ki pek; ak kole “Jeso niito aamwok, ko Kristo.”

⁴ Ki iyan anyun alage eng' icheek ak konamgei ak Paulo ak Sila. Ki yai ko uu nooto tuiyet ne oo ne po Yunanik che ki konyiti Kamuktaindet ak che chaang' eng' kobogorisyek che taagunotiin.

⁵ Ago ki am ng'etkonda Yahudik, ak ki namgei ak piik che yaacheen che ma tilei kiy ak koiyum tuiyet kole kong'eetyi chemargeet nganaseet. Ye ki cheeng'ei `icheek Paulo ak Silas komachei kole si komut icheek saang' koba ole mi piik, kobookyi kootap Jason.

⁶ Ye ki mata konyoor, kochuut Jason ak tupchosyek alak koba taitap kirwoogigap nganaseet, koboldos koleen, “Pichu ko kowas emet ko kagobwa oli kogeny,

⁷ ak kagotaach `Jason icheek. Yaei pichuuto tugul tuguuk che etei ng'atuutigap Caesarea, komwaei koleen miitei laitoryat age ne ineendet ko Jeso.”

⁸ Ye kingo kas tuguuchuuto, ko ki iim tuiyet ak kirwoogigap nganaseet.

⁹ Ak kingo kagonam `icheek tuguugap katyaget kobun Jason ak piik alak, kounda koba.

Komi Berea

¹⁰ Ak ne matyanit koyookto tupchosyek Paulo ak Sila kemoi koba Berea; ak kingo it olooto, koba sinagogitap Yahudik.

¹¹ Ak ki myachen pichu kosiir chooto po Thessalonike, amu kitaach ng'olyoot ak kocham miising' ak kosyachi siruutik peetuut age tugul, si kobiit konai ngo iman tuguuchu.

¹² Ki iyan anyun che chaang' eng' icheeget ak kobogorisyek che po Yunanik, ak murenik che taagunotiin.

¹³ Ago kingo nai Yahudik che po Thessalonike kole amdoi Paulo ng'olyootap Kamuktaindet eng' Berea agine, koba olooto agine, ak kowas ak konyalil tuiyosyek.

¹⁴ Ki iyookto anyun koma tyanit `tupchosyek Paulo kot koit araraita, ak kita kotebi eng' olooto Sila ak Timoteo.

¹⁵ Ago icheeget che ki imuti Paulo ko ki imut agoi Athens; ak kingo taach ng'atuutyet koipchi Sila ak Timoteo kole koba ole mi ineendet kochook, koba anyun.

Komi Athens

¹⁶ Kingo ta koogeni `Paulo icheek eng' Athens, ko ki iimak eng' oriitinnyi, ye kingo keer nganaseet ko nyiitaat kanamonik.

¹⁷ Kong'alaal anyun eng' sinagogit kobooto Yahudik ak piik che konyiti Kamuktaindet, ak eng' ye mi ole keyae mung'aaret eng' peetuut age tugul kobooto che kituitos ak ineendet.

¹⁸ Ak ki tuiyo kobooto ineendet alak che po ng'amotigap Epikurio ak Stoiko. Ak kole alak, “Mwaei nee kipchang'alaini?” Kole alak, “Uu kabartaindet ne po kamuktaik che teer.” Ki mwa ng'aleechu amu ki amdoi agobo Jeso ak ng'eetyeet.

¹⁹ Ara ki nam `icheek ineendet ak komut kwo agoi Areopago ak kole, “Tos kimuuchi kenai keele nee kaneetisyoni leel, imwae?

²⁰ Amu keipchi iitiikyok tuguuk alak che leelach: nooto anyun kimache kenai kiit ne ibooru tuguuchuuto.”

²¹ Ki ma kotinyei piik tugul che po Athens ak toek che ki mi olooto, poroindo ne po kiy age kobatee komwa anan kogas ng'al che too.

²² Ki tonon anyun Paulo eng' kwenutap Areopago ak kole, “Okweek piigap Athens, kaageer ale eng' tuguuk tugul ogiiligei miising' eng' saautik.

²³ Amu ye ki asiirtoi ak ageer tuguuk che osaae, anyooru agine kapkorosuut ne tinyei siruutichu, ‘Po kamuktain ne ma naei chii.’ Nooto anyun ne osaae amongen, aboorwok anyun niito.

²⁴ Kamuktaindet ne ki yai ng'wony ak tuguuk tugul che miitei olooto, ineendet ko Kiptaiyatap kipsengwet ak ng'wony, koma menyei hekalusyek che ki kiyae eunek.

²⁵ Ama kiboisyechin eng' eunegap piik, ko uu ne panani kiy, amu ineendet ne igoochin tugul saboondo ak kabuuset, ak tuguuk tugul.

²⁶ Ki yai eng' `chiito agenge pororyet age tugul ne po piik si komeny ng'wony komugul, ko kagoboorchi kenyiisyek che ki king'at, ak kiwotosyegap meng'ootennywa;

²⁷ si kobiit kocheeng' Kamuktaindet, komang'u kole tamangap kotamdamat, ak konyoor ineendet, nganda ma loo eng' age tugul eng' acheek.

²⁸ Amu ‘Eng' ineendet kesaptosi ak kebendoti ak kemi’; ko uu ye ki komwa alage eng' siriikwok che po tyenwogigap kalasunet kole, ‘Amu ki lagokyik ak acheek.’

²⁹ Ngo ki lagogap Kamuktaindet anyun, ko manyoljech kibwaat keele kergei Kamuktaindet ak thahabu, anan fedha, anan koita, che ki kiyai eng' musoknateet ak eng' ng'omnatetap piik.

³⁰ Ki ma mage kiy anyun Kamuktaindet peetuusyek che ki ma komi naet; ago kang'at anyun nguno kole kosik piik tugul eng' komosta age tugul.

³¹ Amu Ki kochop peetuut ne tuun irwookyine ng'wony eng' imanda eng' chiichooto ki kolewen; ak agobo niito ko ki koboorchi komyee piik tugul ye ki ing'eet ineendet komong' eng' che ki pek.”

³² Ye kingo kas anyun agobo ng'eetyeetap che ki pek, kochombil alage; ago ki le alak, “Ta kegasun niito peetuut age.”

³³ Eng' yooto ko kimanda anyun Paulo eng' kwenunnywa.

³⁴ Ago ki namgei piik alak ak ineendet ak koyan; ki age eng' icheeget ko Dionusio Areopagindet, ak kobogoryot ne kiguure Damaris, ak alak che ki mi kobooto icheeget.