NG'ATUTIK 27 - BUKUIT NE TILIIL Sireet ne Dutero Kanon

Sireetap ng'atuutik ak igoorwek

¹ Ki ng'at anyun `Musa ak poisyegap Israel piik koleenji, “Oriip ng'atuutik tugul che kang'atak rani.

² Ak eng' peetuut ne olandoe Jordan obendi emet ne koonin Kamuktaindet ne Toroor Kamuktaindeng'ung', itononsechigei koik che eecheen, ak imal.

³ Yeityo isirchi koichooto ng'aleek tugul che po ng'atuutyoni ye kailande Jordan, si kobiit iit emet ne nyiitaat cheego ak komi kumyat eng' chaang'indo ne koonin Kamuktaindet ne Toroor Kamuktaindeng'ung' ko uu ye ki iarorun Kamuktaindet ne Toroor, Kamuktaindetap kwanisyeguk.

⁴ Ye kailandae Jordan, ilumde koichooto ang'atiin rani eng' tulweetap Ebal ak imal.

⁵ Iteekyi eng' olooto Kamuktaindet ne Toroor Kamuktaindeng'ung' kaptisisyet ne po koik che ma kiyae karna.

⁶ Teekyi Kamuktaindet ne Toroor Kamuktaindeng'ung' kaptisisyet eng' koik che ma kiwai yeityo igoochi Kamuktaindet ne Toroor Kamuktaindeng'ung' kagoochinoik che kibeelei eng' olooto,

⁷ ak ieny kagoochinoik che po kaalyeet ak iamisye eng' olooto. Si ibaibaitu eng' taitap Kamuktaindet ne Toroor Kamuktaindeng'ung'.

⁸ Yeityo anyun isirchi ng'aleek tugul che po ng'atuutyoni koichooto kotook komyee.”

⁹ Yeityo komwachi `Musa ak tisiik che Lawiik Yahudik tugul koleenji, “Siis ep iit, ee Israel, kaoegu rani chiitap Kamuktaindet ne Toroor Kamuktaindeng'ung'.

¹⁰ Ara anyun kas iit kutitap Kamuktaindet ne Toroor Kamuktaindeng'ung' ak iyai ng'atuutikyik ak kaneetisyosyekyik che kaang'atiin ra.”

Chubeet amu pistoet

¹¹ Ki ng'at anyun `Musa piik peetuunooto koleenji,

¹² “Tonondos Simion, Lawi, Judah, Issakar, Joseph ak Benjamin eng' tulweetap Gerizim si koberuur piik ye kaolandae Jordan.

¹³ Ak ko tonondos Reuben, Gad, Asher, Zebulun, Dan ak Naphtali eng' tulweetap Ebal agobo chubisyet,

¹⁴ ak kowol Lawiik koleenji piik tugul che po Israel eng' kutit ne oo kole,

¹⁵ “Chuboot ne yaei kanamwet ne wechei Kamuktaindet ne Toroor nooto ne kiwaei anan kiy ne kitaanyi eng' musoknateet ak kelumda eng' ung'oot.” Ak kowol piik tugul kole, Amen!

¹⁶ “Chuboot chii ne sasei kwanda anan kamet.” Ak kole piik tugul, “Amen!”

¹⁷ “Chuboot chii ne inaktoe kiwotetap chiitap kokwennyi.” Ak kole piik tugul, “Amen!”

¹⁸ “Chuboot chii ne ibeeti ne koraat.” Ak kole piik tugul, “Amen!”

¹⁹ “Chuboot chii ne imaasi kirwoogetap ne toondet ak ne ma tinyei sigiik ak mosoget.” Ak kole piik tugul, “Amen!”

²⁰ “Chuboot chii ne ibegei ak osotyotap kwandanyi; amu kang'aany aach ngoryeetap kwandanyi.” Ak kole piik tugul, “Amen!”

²¹ “Chuboot chii ne ibegei ak tyony age tugul.” Ak kole piik tugul, “Amen!”

²² “Chuboot chii ne ibegei ak chepkamet ne cheptap kwandanyi anan ne cheptap kamet.” Ak kole piik tugul, “Amen!”

²³ “Chuboot chii ne ibegei ak korgetap yugoi.” Ak kole piik tugul, “Amen!”

²⁴ “Chuboot chii ne pirei chiitap kokwennyi eng' ung'oot.” Ak kole piik tugul, “Amen!”

²⁵ “Chuboot chii ne taachei melekto si kobar chii ne ma tinyei tengek.” Ak kole piik tugul, “Amen!”

²⁶ “Chuboot chii ne ma igimit ng'aleegap ng'atuutyoni koyai.” Ak kole piik tugul, “Amen!”