KOMONG'U 3 - BUKUIT NE TILIIL Sireet ne Dutero Kanon

Keguurei Musa Kosar Israel.

¹ Eng' pesyo ye ki iyagi Musa akweetap keechiirek che po kapyugoinnyi Jethro, tisiindetap Midian, kokweri koba surkwen komosin, ak ki it tulweetap Kamuktaindet, ne kiguure Horeb.

² Eng' yooto, komong'ji ineendet `malaikaiyatap Kamuktaindet ne Toroor eng' maat ne lalei ne ki mang'une kwenutap keetit ne samum. Kingo keer, kogeer kole, ki ma kolalei keetoto kilale maat.

³ Ak ki le Musa, “Kawe ageer kwang'utyoni tee ni, katepto ano si ma lalei keetit?”

⁴ Ye kingo keer Kamuktaindet ne Toroor kole, kawo kogeer, koguur ineendet `Kamuktaindet eng' kwenutap keetit koleenji; “Musa, Musa!” Kole Musa, “Ami yu.”

⁵ Koleenji, “Ameriigu yu, ireegu kweoniguk eng' keelyeguk amu tiliil yooto itonone.”

⁶ Ak ki leenji, “Aa Kamuktaindet ne po kwandang'ung', aa Kamuktaindetap Abraham, aa Kamuktaindetap Isak, aa Kamuktaindetap Jakobo.” Ki uny Musa togeennyi, amu ki iywei kogeer Kamuktaindet.

⁷ Ki leenji Kamuktaindet ne Toroor; “Koageer iman nyalilwogigap piikyuk che mi Misiri, koagas riirekwak amu chemogenik che usausi icheek ak angen ng'wanindanywa.

⁸ Kachooruge anyun si kobiit asar icheek eng' eunegap Misiriik, ak amutu icheek kotogos komong' eng' emonooto koba emet ne myee ne paraa. Emet ne nyiitaat cheego ak komi kumyat eng' chaang'indo; emetap Kanaanik, Hitik, Amorik, Perisik, Hibik, ak Jebusik.

⁹ Ee, kagobwanjo riiregap piigap Israel, ak koageer kanyaliilet ne inyalili icheek `Misiriik.

¹⁰ Nyoo anyun, si ayookten iwe kap Pharaoh, si kobiit imoong'u piikyuk, piigap Israel eng' Misiri.”

¹¹ Ago ki leenji `Musa Kamuktaindet, “Aa ng'oo, ne tos amuuch awo kap Pharaoh, ak among'u piigap Israel eng' Misiri?”

¹² Ak ki le Kamuktaindet ne Toroor, “Ami kobooten iman ak egu ni kaboorunet ne inae ile kayookten: ye kaimoong'u piik eng' Misiri, oboisyechi Kamuktaindet eng' tulwooni.”

¹³ Ki leenji `Musa Kamuktaindet, “Ye ait ole mi piigap Israel, ak amwachi aleenji, Kagoyokwo Kamuktaindet ne po kwanisyekwok Anyoonjok; ak ngo teebena koleenjo, ‘Kiguure ngo kainennyi?’ Aleenjini nee pichooto?”

¹⁴ Koleenji `Kamuktaindet Musa; “ ‘Aa ne Aa,’ Mwachi piigap Israel ng'olyoondoni, leenji, Kagoyokwo anyoonjok.”

¹⁵ Ak ki leenji `Kamuktaindet Musa kogeny, “Imwachini piigap Israel ng'olyoondoni ileenjini, Kagoyokwo Anyoonjok Kamuktaindet ne po Toroornatet ne po kwanisyekwok, Kamuktaindetap Abraham, Kamuktaindetap Isak, Kamuktaindetap Jakobo; kainennyu niito agoi koigeny, ak kabwaatennyu niito agoi ibinwek tugul.

¹⁶ Ui, iyum poisyegap Israel, ak ileenji icheek, Ki komong'ja Kamuktaindet ne Toroor, Kamuktaindet ne po kwanisyekwok; Abraham, Isak, ak Jakobo, koleenjo: Kaanyonjok iman, ak kaageer nooto ne kiyaiywok eng' Misiri.

¹⁷ Ak kaatil ale, Amutwok otogosu omang'une nyalildap Misiri, agoi oit emetap Kanaanik, Hitik, Amorik, Perisik, Hibik, ak Jebusik, emet ne nyiitaat cheego ak komi kumyat eng' chaang'indo.”

¹⁸ Tuun kasei iit kuting'ung' icheek. Eng' yooto, obe kaplaitoryatap Misiri, inyee kobooto poisyegap Israel, ak oleenji, “Kogetuiye ak Kamuktaindet ne Toroor, Kamuktaindet ne po Yahudik. Ara anyun, kisaain keele ityaachech keebe pandap peetuusyek somok eng' surkwen, si kobiit kigoochi tiseiywot Kamuktaindet ne Toroor, Kamuktaindennyo.

¹⁹ Angen ale ma chamwok laitoryatap Misiri obe, kobatee eng' euut ne kiim.

²⁰ Ara achuule eunnyu abiree Misiriik kwang'utik che amache ayai eng' kwenunnywa ak ye ibata chooto kotyachak obe.

²¹ Ak agoonok onyooru chameet eng' taitap Misiriik si ye obe, koma tuun obe puch.

²² Ingosoom anyun kwondo age tugul chiitap kokwennyi, ak eng' ineendet ne tebee koonnyi, tuguuk che po fedha, ak tuguuk che po thahabu, ak ngoroik. Si olaakyi weeriikwok, ak tiibiikwok, ak onyaban anyun tuguugap Misiriik.”