Daniel - DAG 9 - BUKUIT NE TILIIL Sireet ne Dutero Kanon

Saaetap Daniel

¹ Eng' kenyiit ne po tai ne po Darius weeriitap Aasuerus, ne kisalu Medik, ne ki kinde koek laitoryat koboi pounatetap Kaldeik;

² eng' kenyiit ne po tai ne po laitornatennyi, aguiye anee Daniel eng' bukuisyek koitetap kenyiisyek che kinyonjine ng'olyootap Kamuktaindet ne Toroor maotyot Jeremiah, agobo kasuldaetap ng'emisyosyegap Jerusalem, chooto ko kenyiisyek tamanwogik tisap.

³ Ki atokyigei Kiptaiyat Kamuktaindet, ale acheeng' ineendet eng' saaet ak somutik kobooto karugutetapkei ak kalaagetap kuniok ak eng' oreek.

⁴ Ki asaa Kamuktaindet ne Toroor Kamuktaindennyu, ak ang'aang'ji ineendet ale, “Ee Kiptaiyat, Kamuktaindet ne oo ne kiywei, ne riibei kayomiset ak rireneet eng' icheek che chamei ineendet ak koriibei ng'atuutikyik,

⁵ ki keyai tengekto, ki keyai kiit ne imaasat, ak ki keyai kiit ne ya kot, ak ki kingelelse, kemaste kemete kaneetisyosyeguk ak kirwoogutiguk.

⁶ Ama kigas iit otwogiguk `maotik, che ki ng'alaalji eng' kaineng'ung' laitorinikyok, pounikyok ak kwanisyekyok, ak piik tugul che po emet.

⁷ Ee Kiptaiyat, neng'ung' imanda, ago nenyo kalilanet, ko uu ra, kobooto piigap Judah, ak piik che menyei Jerusalem ak Israel tugul, che neegit ak che mi ole loo, eng' emotinwek tugul ole ki ionji, amu chalwoktanywa ne kigoyaun.

⁸ Ee Kiptaiyat, nenyo kalilanet kobooto laitorinikyok, pounikyok, ak kwanisyekyok amu kigeyaun tengekto.

⁹ Po Kiptaiyat Kamuktaindennyo rireenosyek ak nyoetap kaat, amu ki kingelelji ineendet,

¹⁰ ama kigas iit kutiitap Kamuktaindet ne Toroor, Kamuktaindennyo, kebendatee ng'atuutikyik, che ki inde tainnyo eng' otwogikyik maotik.

¹¹ Ee, ki kobistoe Israel tugul ng'atuutyeng'ung', komasta ak ma kas iit kuting'ung'. Kigerong'jech anyun chubeet amu nooto, kobooto kayasyoet ne ki kisirchi ng'atuutigap Musa otwogindetap Kamuktaindet, amu kigeyachi ineendet tengekto.

¹² Ki kogimit ng'aleekyik, che ki mwa agobo acheek ak agobo kirwoogikyok, ye ki irwokwech koibwech yaityet ne oo kiit ne ki kiyachi Jerusalem ne tom keyai eng' kurereet komugul ne po kipsengwet.

¹³ Kanyonjech yaityoni tugul ko uu ye siraat eng' ng'atuutigap Musa. Tom kesoom chametap Kamuktaindet ne Toroor, Kamuktaindennyo, si kobiit kemete tengekwogikyok ak kenai ole teptoi imandang'ung'.

¹⁴ Ki riip anyun Kamuktaindet ne Toroor yaityet agoi peetuut ne ki ibwech. Ee po iman Kamuktaindet ne Toroor, Kamuktaindennyo eng' poisyonikyik tugul che yaei, amu ma kigas iit kutiinnyi.

¹⁵ Ara anyun, ee Kiptaiyat Kamuktaindennyo, ne ki imutu piiguk eng' euut ne kiim komong' eng' emetap Misiri, ak ki isikyigei teegisto agoi rani; ki keyai tengekto, ki keyai kiit ne ya kot.

¹⁶ Ee Kiptaiyat, asaain ale ko uu eng' imandang'ung' tugul ko ingoistoegei nereegeguk ak nereegeguk che ng'woneen, nganaseng'ung' Jerusalem, tulweeng'ung' ne tiliil; amu tengekwogikyok ak amu yaitwogigap kwanisyekyok kogi koek Jerusalem kobooto piiguk che kichotei eng' tugul che miitei komoswek tugul.

¹⁷ Ara anyun, ee Kamuktaindennyo, kas saaetap otwogindeng'ung' ak somutikyik, ak amu kaineetap Kiptaiyat, ingoluuchi togeng'ung' oldang'ung' ne tiliil ne kogoguber.

¹⁸ Ee Kamuktaindennyu, ep iit ak igas. Tokyi konyeguk ak igeer panandanyo ak nganaseet ne kimwaitoe kaineng'ung'. Ma kiibu somutikyok kobwa taing'ung' amu imandanyo, ago amu rireenosyeguk che eecheen.

¹⁹ Ee Kiptaiyat, kas; ee Kiptaiyat, nyochi kaat; ee Kiptaiyat, kas ak iyai ak amegagei! Agobo kaineng'ung', ee Kamuktaindennyu, amu kimwaitoe kaineng'ung' nganaseng'ung' ak piiguk.”

Koibu Gabriel wolunet

²⁰ Ak ye kita ang'alaali, ak asaae ak ang'aanye tengektonyu ak tengektap piikyuk Israel, ak aibe somennyu kwo taitap Kamuktaindet ne Toroor Kamuktaindennyu agobo tulweet ne tiliil ne po Kamuktaindennyu;

²¹ ye kita ang'alaali eng' saaet, kotwaa chiichooto Gabriel, ne kitirirenu kochogu, ne kiga ageer eng' tai eng' ng'ang'utyet, konyo kotwaa eng' olo po sait ne kigoitoe kagoochinetap koskoleny.

²² Ki iguiyewa ak koleenjo, “Ee Daniel, kanyo si kobiit agoniin iegu ne utaat eng' kaguiyet.

²³ Kimong' ng'olyoo eng' taunetap somutiguk, ak kanyo amwaun, amu ii chamat miising'. Ibwaat anyun komyee ng'olyoondoni amu nooto, ak iguiye ng'ang'utyet.

²⁴ Kaging'atyi piiguk wigisyek tamanwogik tisap kobooto nganaseng'ung' ne tiliil: si keistee pistoet, keistee tengekwogik, ak keyai katuiyet agobo tengekto, ak keip imanda ne po koigeny, ak keng'och ng'ang'utyet ak maonateet, ak kiil kitabaan ole-tiliil miising'.

²⁵ Nai anyun ak iguiye ile kobooch ngap komong' ng'atuutyet keele kituur ak keteech Jerusalem, keteekyi ineendet ne iilaat, pounindet, koegu wigisyek tisap; ak keteech kogeny eng' wigisyek tamanwogik lo ak aeng', kobooto ooreet ak keriinget ne yiemei nganaseet, ago eng' peetuusyegap nyalil.

²⁶ Ye ibata wigisyek tamanwogik lo ak aeng' keisto ineendet ne iilaat ama kotinyei kiy, ak kobwa piigap pounindet kong'em nganaseet ak ole-tiliil. Nyoonei kagesunennyi kobooto maraneet, ak egu lugeet agoi let; kigeng'at ng'emisyosyek.

²⁷ Ak koyomiskei kobooto piik che chaang' eng' kayomiset ne kiim ne po wigiit agenge, ak kogees tiseiywot ak kagoochinetap peek che ng'ootin eng' kebeberyatap wigiit. Ak konyo age ne ibu ng'emisyet eng' kebepchetap tuguuk che kiwechei; ak keroong'ji ng'emindet nereegek che kigeng'at, agoi kagesunet.”