Daniel - DAG 7 - BUKUIT NE TILIIL Sireet ne Dutero Kanon

Tyong'ik ang'wan

¹ Ki irwotyi Daniel karwotitoet, ak kobwonji metinnyi ng'ang'utik eng' itogunnyi eng' kenyiit ne po tai ne po Belshazzar laitoryatap Babilon. Ki sir anyun ng'aleegap karwotitaonooto, ak komwaita ng'aleek che eecheen che po karwotitaonooto.

² Ki mwa Daniel kole, “Ki ageer eng' ng'ang'utyennyu kemoi, ogeero, ki usyi nyanjet ne oo usoonaik ang'wanu che po kipsengwet.

³ Ak ki togosune nyanjet tyong'ik ang'wanu che eecheen, ki teer age eng' age.

⁴ Ki uu ne po tai ng'etundo ak ki tinyei kebebaik che uu che po kipsiichit. Ki ageer agoi kesul kebebaikyik, ak ki kiganap eng' ng'wony, ak keng'at kotonone kelyeek aeng' ko uu chiito, ak ki kigoochi naet ne uu ne po chiito.

⁵ Ak tyondo age ne po aeng' ne uu keeri. Ki kiganap kotonone komosak, ak ki tinyei karaaswek somok eng' kutiinnyi, ak ki kimwachi ko uu ni keleenji, “Ng'eet, am panyeek che chaang'!”

⁶ Kingobata niito, ageer, ak ogeero, tyondo age ne uu cheplanget. Ki tinyei eng' patai kebebaik ang'wan che uu che po toriityon ak ki tinyei kogeny tyonyooto metowek ang'wan; ak ki kigoochi pounateet.

⁷ Kingobata niito, ageer eng' ng'ang'utik kemoi, tyondo ne po ang'wan ne imuisei ak kogim, ak kotinyei kimnateet ne siirtoot. Ki tinyei keleek che eecheen che po kariik, ki am ak kotonaton, ak kotyechatyech che ki ng'et. Ki teer tyonyooto eng' tyong'ik tugul che ki indoune ineendet, ak ki tinyei kuinoik taman.

⁸ Ki abwaat miising' agobo kuinoichooto, ye ki mong'une kuinet age ne ming'in, ne ki kitutune tainnyi kuinoichooto po tai somok. Ki mi kuinonooto koonyek che uu che po chii, ak kuutiit ne mwaei tuguuk che eecheen.

Kirwooget eng' taitap Ineendet ne po Keny

⁹ Ki ageer kindo ng'echerogap laitornateet, ak ki tebee ng'echeranooto Ineendet ne po Keny, ki leelach ngoroikyik ko uu teluji, ki uu suumeekyik koroorik che tiliileen che po keechiirek; ko po ng'echerennyi ne po laitornateet liplibenosyegap maat, ak ki maat ne lalei cheptirokyik.

¹⁰ Ki piit aineet ne uu maat ne ki mong'une tainnyi. Ki poisyechin ineendet eliphusyek konyil eliphuut, ak ki tonondos eng' tainnyi eliphusyek tamanu konyil eliphusyek taman. Ki kichop kirwooget, ak ki king'aany bukuisyek.

¹¹ Ki atang'any eng' peetuunooto amu ng'aleek che eecheen che ki mwaei kuinonooto. Ki ageer agoi kebar tyonyooto, ak keng'em poortanyi yeityo kigoito kebeel eng' maat.

¹² Ki kiistoe tyong'ik che ki ng'et, pounatennywa, ago ki kitesyi peetuusyegap sabeennywa ak kenyiisyek.

¹³ Ki ageer eng' ng'ang'utigap kemoi, age ne kergei ak weeriitap chii, konyo eng' pooligap kipsengwet. Ki nyo ole mi Ineendet ne po Keny, ak ki kimut ineendet koriik taitap Ineendet ne po Keny.

¹⁴ Ki kigoochi ineendet pounateet, toroornatet ak laitornateet, si koot ineendet piik tugul, pororyosyek tugul, ak che po kutusweek tugul. Pounatennyi ko pounatetap koigeny, ne ma igesugei, ak laitornatennyi ko ma ng'emaksei agoi.

Kaaroretap karwotitoet

¹⁵ Ago ki aragen anee Daniel eng' saboondanyu, ak ki ima ng'ang'utik che ki pwa metinnyu.

¹⁶ Ki ariikyi age eng' chooto ki tonondos eng' yooto, ak ateebee ineendet kaguiyetap tuguchuuto tugul. Komwaiwo anyun, ak koboorwo kaaroretap tuguuchooto.

¹⁷ Tyong'ichuuto ang'wan eecheen, ko laitorinik ang'wan che tuun mong'une ng'wony.

¹⁸ Ago tuun taachei pounateet piik che tiliileen che po Ineendet Ne Toroor Miising', ak konam pounateet kobunji icheek koigeny ak koigeny.

¹⁹ Yeityo amach anai kaguiyetap tyondo ne po ang'wan, ne ki teer eng' tyong'ichun tugul, ne ki imuisei miising', ne ki po keleekyik kariik, ak ki po siyookyik sugunwet; ne ki am ak kotonaton, ak kotyechatyech che king'et;

²⁰ ak ki amach anai agobo kuinoik taman che ki mi metinnyi, kobooto kuinet age ne ki mong', kobooto kuutiit ne ki mwaei tuguuk che eecheen, ne ki eet itoondanyi kosiir ne po chuun alak.

²¹ Ki ageer koyai lugeet kuinonooto kobooto piik che tiliileen, ak koterteer kuinonooto icheek;

²² agoi konyo Ineendet ne po Keny, ak korwooch agobo piik che tiliileen che po Ineendet Ne Toroor Miising', ak koit peetuut ne punjin pounateet piik che tiliileen.

²³ Ki mwa anyun ko uu ni kole, “Egu tyonyooto po ang'wan pounateet ne po ang'wan eng' ng'wony, ne egu ne teer eng' pounatosyek tugul, ak amei ng'wony komugul, ak kotyekyi ak kotonaton.

²⁴ Ak agobo eng' kuinoichuuto taman, komong'une pounatoniito laitorinik tamanu, ak ye ibata komong' age ne isubu icheek. Egu ne teer eng' che po tai, ak koterteer laitorinik somok.

²⁵ Mwaei ng'aleek che kirindoi Ineendet Ne Toroor Miising', ak koim miising' piik che tiliileen che po Ineendet Ne Toroor Miising', ak ki leen ineendet kowal peetuusyek ak ng'atuutik; ak kigoochi ineendet koboi icheek agoi kobek kenyiit, ak kenyiisyek, ak kebebertap kenyiit.

²⁶ Ago ki chobei kirwooget, ak kerebe pounatennyi, si kogees ak kong'em agoi kagesunet.

²⁷ Laitornateet ak pounateet, ak ooindap laitornatosyek che mi kurereetap kipsengwet komugul ko tuun kigoochin piigap piik che tiliileen che po Ineendet Ne Toroor Miising'. Laitornatennyi ko laitornateet ne po koigeny, ak tuun otei ineendet pounatosyek tugul ak kogase iit.”

²⁸ Igesunegei yuto ng'olyoondonooto. Ki iima miising' kabwatutikyuk, anee Daniel, ak ki walak togeennyu; ago ki agonoree muguleldanyu ng'olyoondonooto.