Daniel - DAG 3 - BUKUIT NE TILIIL Sireet ne Dutero Kanon

Kanamwetap thahabu

¹ Ki itany Nebukadnezar laitoryat kanamwet ne po thahabu, ne kooindap tononennyi kogi kakwautik tamanwogik lo che po euut ak tebeesindanyi ko kakwautik lo che po euut; ki lumda ineendet eng' warengetap Dura eng' emetap Babilon.

² Yeityo koyookto Laitoryat Nebukadnezar kiyum pounik, kandoik, kirwoogik che tilei ng'aleek, riibiigap tuguuk, piigap kapkirwok, ng'amotigap ng'atuutik ak tononjinik tugul che po ematinwek, kobwa katabaanetap kanamwet ne kiga lumda Laitoryat Nebukadnezar.

³ Koyumgei anyun pounik, kandoik, kirwoogik, tiligap ng'aleek, riibiigap tuguuk, piigap kapkirwok, ng'amotigap ng'atuutik ak tononjinik tugul che po emotinwek, koyumjigei katabaanetap kanamwet ne kiga lumda Laitoryat Nebukadnezar. Ye ki tonondos eng' taitap kanamwet ne kiga lumda Nebukadnezar,

⁴ komwa anyun ng'alaalindet ne mwaitoi ng'aleek eng' kuutiit ne oo, kole, “Kaging'atak, okweek piik, pororyosyek ak che oo po kutusweek che teer, keele,

⁵ eng' sait age tugul ne kogas cheetap igoondit, ndurerut, ketubet, chepkesemit, kibugandet, ndurerut ne oo ak tyenwogik alak tugul, obutyi ng'wony ak olasu kanamwetap thahabu ne ki lumda laitoryat Nebukadnezar.

⁶ Ak age tugul ne ma ibutyin ng'wony ak koloos, kewiirchin eng' sainooto maat ne oo ne lalei miising'.

⁷ Kingo kas anyun piik tugul cheetap igoondit, ndurerut, ketubet, chepkesemit, kibugandet ak tyenwogik alak tugul, kobutyi ng'wony piik tugul, pororyosyek, ak che po kutusweek che teer ak koloos kanamwetap thahabu ne kiga kolumda Laitoryat Nebukadnezar.

Kirwookyin choronogap Daniel

⁸ Ki riik anyun eng' sainooto Kaldeik alage koip kataamset ne kitaame Yahudik.

⁹ Komwachi `pichooto Laitoryat Nebukadnezar koleenji, “Ee laitoryat, iwe keny!

¹⁰ Ee laitoryat, koing'at inyee ile chii age tugul ne kasei cheetap igoondit, ndurerut, ketubet, chepkesemit, kibugandet, ak ndurerut ne oo kobooto tyenwogik alak tugul, kobutyi ng'wony ak koloos kanamwetap thahabu,

¹¹ ak age tugul ne ma ibutyin ng'wony ak koloos, kewiirchin maat ne oo ne lalei miising'.

¹² Miitei Yahudik alak che ki inde koboi ng'aleegap emetap Babilon, Shadrak, Meshak, ak Abednego; ma iitin pichuuto, ee laitoryat. Maotei kamuktaiguk, ama ilasu kanamwetap thahabu ne koilumde.

¹³ Ki ng'at anyun Nebukadnezar eng' koroomnatennyi ak nereegek che ng'woneen kole kimut Shadrak, Meshak, ak Abednego. Ki kimut anyun pichuuto kobwa taitap laitoryat.

¹⁴ Koteebe Nebukadnezar icheek koleenji, “Ee, Shadrak, Meshak ak Abednego, tos kootil iman ole moote kamuktaindennyu, anan olasu kanamwetap thahabu ne koalumde?

¹⁵ Ngot ochoboge anyun eng' sait ne kogas cheetap igoondit, ndurerut, ketubet, chepkesemit, kibugandet ak ndurerut ne oo, kobooto tyenwogik alak tugul, obutyi ng'wony ak olasu kanamwet ne koayai, komyeitu. Ago ngot ko molasu, kewiirjinok maat ne oo ne lalei miising' eng' sainooto. Ng'oo kamuktain ne tos sarwok eng' eunnyu?”

¹⁶ Kowolji anyun `Shadrak, Meshak ak Abednego laitoryat koleenji, “Ee Nebukadnezar, ma kimage kiy kewolun eng' ng'olyoondoni.

¹⁷ Ngot ko uu nooto, komuuchi Kamuktaindennyo ne keote kosarwech eng' maat ne oo ne lalei miising'; ak kosarwech ineendet eng' eung'ung', ee laitoryat.

¹⁸ Ago ngot koma uu nooto, ko kanyol inai inyee, ee laitoryat ile ma kiote kamuktaiguk anan kilasu kanamwetap thahabu ne koilumde.”

Maat ne lalei miising'

¹⁹ Konyi anyun nereegek che ng'woneen Nebukadnezar, ak kowalak togeennyi konereekyin Shadrak, Meshak ak Abednego. Kong'alaal anyun ak kong'at kole kilaal maat ne oo kotesak konyil tisap kosiir ye cham kilaali,

²⁰ ak kong'at piik alak che nyigoonen che ki po lugeennyi korat Shadrak, Meshak ak Abednego si kowiirchi maato oo lalei miising'.

²¹ Ki kiratita anyun pichooto ngoroikwak ak che taae metowekwak, ngoroikwak che kooen, kobooto ngoroikwak alak ak ki kiwiirchi maata oo kolalei miising'.

²² Ki par anyun liplibenetap maata pichooto ki namei Shadrak, Meshak ak Abednego, amu ki koroom ng'atuutyetap laitoryat ak ki lalei maata oo miising'.

²³ Ak pichuuto somogu, Shadrak, Meshak ak Abednego, ko ratotin, kogi ibutyi anyun maata oo lalei miising'.

Tyendap Azariah

²⁴ Ki pendaat eng' maata ki lalei, kotyendos ak kolaasu Kiptaiyat.

²⁵ Ki tonoon Azariah eng' kwenuutap maat ak kosa eng' tuugeet ne oo kole:

²⁶ I Iberuurot inyee ak ko ii ilasunot konyool, eeh Kiptaiyat Kamuktaindetap aguiwoogikyok, ak itoroorot koigeny kaineng'ung'.

²⁷ Amu i po iman eng' tuguuk tugul ki iyai; poisyoniguk tugul ko matinyei leluut ak ortinweguk tugul ko po iman, kirwoogutiguk tugul ko itiitaatin.

²⁸ Ko irwoch kirwoogutik che po iman eng' tugul che ki iyaiwech ak eng' Jersalem nganaseetet ne tiliil ne po aguiwogikyo. Eng' kirwooget ne po iman ko ki iyai tukyu tugul amu tengekwoogikyok;

²⁹ amu ki keleel ak kemaaste ngemete ortinweeguk, ak keyai yaitwogik alak tugul.

³⁰ Ki kebistoe kegas ak keriip ng'atuutik, anan keyai ko uu ye ki keng'atech asi kenyooru myein

³¹ Ko uu nooto ko tuguul tugul che ki iibwech tuguuk tugul che ki iyaiwech, koki iyaiwech eng' kirwooget ne po iman.

³² Ki igoitech igoochech puunikyok piich che ma tinyei ng'atuut, surubelinik che yaach; ki igoochech laitoryat ne ma ingen iman, laitoryat ne ya eng' ing'wony komugul.

³³ Inee ni nguno ma kimuuchi ketwegu; ki koitwech kaliilanet ak teweernatet, kiboitiiniguk che iywein.

³⁴ Eng' kaineng'ung' ko mewiirtech koigeny, anan igany kobet puch kaamiseng'ung'.

³⁵ Me istoenech riireneng'ung', amu Abraham, chamaneng'ung', Isak kiboityong'ung', ak Israel ne tiliil neng'ung',

³⁶ icheek che ki iyamisyi ile itese iyotennwa, ko uu kecheigap kipsengwet, anan ko uu ng'aniegap ngeguutyetap araraita.

³⁷ Amu ki kebarech Ee Kiptaiyat kosiir poror age tugul, kechoorweech eng' oloo tugul eng' ing'wony petuuni, amu tengektonyo.

³⁸ ma ketinye weeritap laitorya, maotyo anan ko kandoin, ma ketinye koroseek che kibelei, koros che kigoitoi, koros che kitumdoi anan ko nyamdut ma ketinye ole kigoitoe tongoanik, kecheeng'ee myein eng' inyee.

³⁹ Ago ingotaagak eng' inyee muguleldo ne soomei nyoetap kaat ak kotinyei kaming'iinetapkei.

⁴⁰ Ara ngotaagak koroyonnyo eng' taing'ung', ra ak konyoor chameet eng' taing'ung';

⁴¹ Ara nguno ko kagisubin eng' mugulelwogikyok tugul kiywein ak kecheeng'e togeeng'ung' metweerech

⁴² Ago keerech eng' ayebindang'ung' ak riireneng'unv ne oo

⁴³ sarweech ko uu eng' kwong'uutiguk ak itoroor kaineng'ung'.

⁴⁴ Ingiteweer icheek tugul che inyaliili kiboitiniguk Igany kiteweer ak kereny ak kebut kimnatoosyekwak

⁴⁵ Kany konai kole inyeegei kityo ne ii Kiptaiyat Kamuktaindet ne otoroorot eng' ing'wony komugul

⁴⁶ Ara ki testai kiboityotap laitoryat koywokyi maat, kondoi Nipthah, kwenik, tilaliik, simamik ak sigoorik

⁴⁷ ki togos maat mitainik artam ak sogool kong'eetee keriinget

⁴⁸ Ak ki iyaptagei kobeelei Kaldeik ko pa ma ak Azariah ak chronookyik, komang'u liplibenennyi konyo saang' ne po maat

⁴⁹ Ak kichoortage malaikaiyatap Kiptaiyat korekto kwo ma ak Azariah ak choronookyik, ak komong' liplibenonooto komong' eng' keriinget

⁵⁰ Ak koyai oriititap maat ko uu ngasitap poldetap maat ne lalei Ma tiiny maat icheek anan kogoochi icheek ng'wonin anan ko kaguoteno age tugul.

Tyendap yautik

⁵¹ Ara ki toi tugul eng' kibagenge koguur tyendo, kolaasu ak keberuuri Kamuktaindet:

⁵² I iberuurot ee Kiptaiyat Kamuktaindetap aguiwoogikyok, Ilasunot ak ko toroorot kosiir kiy tugul koigeny ak iberuurot kaineng'ung' ne tiliil ak kotoroor Ilasunot ak ko toroorot kosiir kiy tugul koigeny

⁵³ I iberuurot eng' Hekaluut ne po toroornateng'ung' ne tiliil Ilasunot ak ko toroorot kosiir kiy tugul koigeny

⁵⁴ I iberuurot eng' ng'echeeretap laitornateng'ung' Ilasunot ak ko toroorot kosiir kiy tugul koigeny

⁵⁵ I iberuurot inyee ne igeere oriit kong'eetee ng'echeeretap Kerubik ilasu ak itoroor inee kosiir tuguuk tugul koigeny

⁵⁶ I iberuurot eng' parak kipsengwet Ilasunot ak ko toroorot koigeny

⁵⁷ Otoroor Kiptaiyat, okweek posyonik tugul che po Kiptaiyat ilasu ak itoroor inee kosiir tuguuk tugul koigeny

⁵⁸ Malaikaisyegap kiptaiyat, otoroor Kiptaiyat; olasu ak otoroor inee kosiir tuguuk tugul koigeny

⁵⁹ Kipsengwetisyek tugul, otoroor Kiptaiyat; olasu ak otoroor inee kosiir tuguuk tugul koigeny

⁶⁰ Okweek peek tugul che mi kipsengwet, otoroor Kiptaiyat; olasu ak otoroor inee kosiir tuguuk tugul koigeny

⁶¹ Okweek kimnatoosyek tugul, otoroor Kiptaiyat; olasu ak otoroor inee kosiir tuguuk tugul koigeny

⁶² Asiista ak arawet, otoroor Kiptaiyat; olasu ak otoroor inee kosiir tuguuk tugul koigeny

⁶³ Kecheigap kipsengwet, otoroor Kiptaiyat; olasu ak otoroor inee kosiir tuguuk tugul koigeny

⁶⁴ Rop age tugul ak rewo, otoroor Kiptaiyat; olasu ak otoroor inee kosiir tuguuk tugul koigeny

⁶⁵ Koris age tugul, otoroor Kiptaiyat; olasu ak otoroor inee kosiir tuguuk tugul koigeny

⁶⁶ Maat ak lalang'yet, otoroor Kiptaiyat; olasu ak otoroor inee kosiir tuguuk tugul koigeny

⁶⁷ Koitityet ak koris, otoroor Kiptaiyat; olasu ak otoroor inee kosiir tuguuk tugul koigeny

⁶⁸ Rewoot ak roopta, otoroor Kiptaiyat; olasu ak otoroor inee kosiir tuguuk tugul koigeny

⁶⁹ Kibingweret ak chepkoset, otoroor Kiptaiyat; olasu ak otoroor inee kosiir tuguuk tugul koigeny

⁷⁰ Cheburetyet koigap roopta, otoroor Kiptaiyat; olasu ak otoroor inee kosiir tuguuk tugul koigeny

⁷¹ Kembousyek ak petuusyek, otoroor Kiptaiyat; olasu ak otoroor inee kosiir tuguuk tugul koigeny

⁷² Lapkeiyet ak imeenindo, otoroor Kiptaiyat; olasu ak otoroor inee kosiir tuguuk tugul koigeny

⁷³ Ileet ak poolik, otoroor Kiptaiyat; olasu ak otoroor inee kosiir tuguuk tugul koigeny

⁷⁴ ingotoroor ing'wony Kiptaiyat; ilasu ak itoroor inee kosiir tuguuk tugul koigeny

⁷⁵ Tuloonok che eech ak che mengech, otoroor Kiptaiyat; olasu ak otoroor inee kosiir tuguuk tugul koigeny

⁷⁶ Tuguuk tugul che piitos eng' ing'wony, otoroor Kiptaiyat; olasu ak otoroor inee kosiir tuguuk tugul koigeny

⁷⁷ Kondametuutap peek, otoroor Kiptaiyat; olasu ak otoroor inee kosiir tuguuk tugul koigeny

⁷⁸ Araraiwek ak ainosyek, otoroor Kiptaiyat; olasu ak otoroor inee kosiir tuguuk tugul koigeny

⁷⁹ Okweek mengiichigap peek ak tyong'iigap peek, otoroor Kiptaiyat; olasu ak otoroor inee kosiir tuguuk tugul koigeny

⁸⁰ Okweek toriitigap soet, otoroor Kiptaiyat; olasu ak otoroor inee kosiir tuguuk tugul koigeny

⁸¹ Okweek tyog'iik tugul, che po timiin anan ko che kiboei, otoroor Kiptaiyat; olasu ak otoroor inee kosiir tuguuk tugul koigeny

⁸² Okweek tugul che pegu, otoroor Kiptaiyat; olasu ak otoroor inee kosiir tuguuk tugul koigeny

⁸³ Inyee Israel, otoroor Kiptaiyat; ilasu ak itoroor inee kosiir tuguuk tugul koigeny

⁸⁴ Tisiigap Kiptaiyat, otoroor Kiptaiyat; olasu ak otoroor inee kosiir tuguuk tugul koigeny

⁸⁵ Kiboitinigap Kiptaiyat, otoroor Kiptaiyat; olasu ak otoroor inee kosiir tuguuk tugul koigeny

⁸⁶ Mugulelwek ak saboonwegap che po iman, otoroor Kiptaiyat; olasu ak otoroor inee kosiir tuguuk tugul koigeny

⁸⁷ Che tiliileen ak koming'initegei eng' mugulel, otoroor Kiptaiyat; olasu ak otoroor inee kosiir tuguuk tugul koigeny

⁸⁸ Hananiah, azariah, mishael, otoroor Kiptaiyat; olasu ak otoroor inee kosiir tuguuk tugul koigeny Amu kigomang'wech kemang'une oi ak kosarwech kong'eetee kimnateetap meet; Ki kosarwech kemang'une maat ne liplibeni ak kosarwech eng' maat.

⁸⁹ Iweekyi koongo kiptaiyat amu myee Mi rireenennyi koigeny

⁹⁰ Otoroor Kamuktaindetap kamuktaik, okweek tugul che oywei Kiptaiyat Olasu ak oweekyi koongoi, amu mi rireeneennyi koigeny.

Saruunetap Yahudik

⁹¹ Ki kwong' anyun Laitoryat Nebukadnezar ak kong'eet kochokyi. Ki ng'alaalji piikyik che po kapkirwok koleenji, “Tos, kama ki wiirchi ma piik somok ko ratotin?” Kowolji anyun `pichooto laitoryat koleenji, “Iman, ee laitoryat.”

⁹² Kowolji `ineendet icheek koleenji, “Ogeero, ageere piik ang'wan che ityagotin, kobendoti eng' ma, ama am kiy; ak kergei itoondap ne po ang'wan ak weeriitap kamuktaik.”

⁹³ Koriikyi anyun Nebukadnezar ole kibunei kebendi maata oo ki lalei miising' ak komwa kole, “Shadrak, Meshak ak Abednego, okweek otwogigap Kamuktaindet Ne Toroor Miising', omong'u obwa oli.” Komong' anyun Shadrak, Meshak ak Abednego eng' ma.

⁹⁴ Ak kogeer pounik, kandoik ak kirwoogik, ak piigap kapkirwok che po laitoryat, ko kagoyumgei pichuuto, kole ma peel maat poorwekwak, ama imel maat suumeekwak, amawalogis ngoroikwak, ama ng'uu maat eng' icheek.

Tyendap murenjooto somok

⁹⁵ Kong'alaal anyun Nebukadnezar komwa kole, “Iberurot Kamuktaindetap Shadrak, Meshak ak Abednego, ne kagoyok malaikaiyandennyi ak kosar otwogikyik che koimang'u ineendet. Kogobistoe `icheek ng'olyootap laitoryat, ak kogoito poorwekwak si maot anan koloos kamuktain age tugul kobatee Kamuktaindennywa ineegei.

⁹⁶ Kang'at ng'atuutyet anyun ale kitonatoni piik alak tugul, pororyet age tugul, ak piigap kuutiit age tugul, che mwaei kiy age tugul ne ya agobo Kamuktaindetap Shadrak, Meshak ak Abednego, ak keyai kooriikwak koek kapng'atat; amu ma mi kamuktain ne imuuchi kosor chii ko uu ni.

⁹⁷ Koeet anyun `laitoryat Shadrak, Meshak, ak Abednego, eng' emetap Babilon.

⁹⁸ Kaleenji laitoryat Nebukadnezar pororyosyek ak piik tugul che ng'alaali kuut age tugul eng' olda age tugul ole menyei: Ingotebenok kalyeng'wong'!

⁹⁹ Kagomyeit eng' ane asir kwong'uutichu ak kaborunoichu ki koyai Kamuktaindet ne toroor miising' eng' tainnyu.

¹⁰⁰ Eecheen kot kwong'uutikyik ak kogoromen miising' kaborunoikyik; laitornatennyi ko laitornatet ne po koigeny, ak pounatennyi ko tebyei eng' ibinwek tugul.