Daniel - DAG 10 - BUKUIT NE TILIIL Sireet ne Dutero Kanon

Kogeerei Daniel ng'ang'utyet

¹ Ki king'aang'ji Daniel ne ki kiguure Belteshazzar kiy eng' kenyiit ne po somok ko laitorani Cyrus laitoryatap Persia. Ki po iman kioto, ak ki uui miising' kot kesich kaguiyet. Ki iguiyo ng'olyoondonooto, ak konyoor kaguiyetap ng'ang'utyet.

² Ki ariir anee Daniel eng' kasarato, wigisyek somok che nyiitootiin.

³ Ki ma am amitwogik che myach, ama am panyeek, ama ee divaik, ama aiilgei, agoi kogeskei wigisyechooto somogu.

⁴ Eng' peetuutap tiptem ak ang'wan ne po arawet ne po tai, ye ki ami ngeguutap aineet ne oo, ne nooto ko Tigris,

⁵ ang'eet met ak atabende, ageer chiito ne ilaachi ngoroigap katanit, ne kiga rategei thahabu ne karaaran ne po Upas.

⁶ Ki uu kogeny poortanyi berulo, ki uu togeennyi kalyeleet, ak ki uu konyekyik taisyek che po maat. Ki uu eunekyik ak kelyeekyik itoondap sugunwet ne sitaat, ak ki uu tweguunetap ng'aleekyik tweguunetap piik che chaang'.

⁷ Ak ki ageer ng'ang'utyet aneege, anee Daniel; ma keer ng'ang'utyonooto piik che ki kimi tugul; nganda ki potanso miising', ak komwei kounygei.

⁸ Ki ang'etu anyun aneege, ak ki ageer ng'ang'utyonooto oo. Ki ma kota atinye kimnateet, ak ki walak kararonindanyu kong'emak, ak ki ang'etu ko ma tinyei kimnon.

⁹ Ki agas anyun tweguunetap ng'aleekyik; ak kinga kas tweguunetap ng'aleekyik, abut asyep moo, ak anuuch.

¹⁰ Ak ogeero, kitwaa eunnyi ne ki nama agutuny ak atebendoe eunekyuk.

¹¹ Kileenjo, “Ee Daniel, inyee chiito ne ii chamat miising', iguiye ng'aleek che amwaun, ak itonon komyee; amu kagiyokwo anyo oli imi.” Kingo kagomwaiwo ng'olyoondoniito, atonon abotani.

¹² Koleenjo anyun, “Meiywei, Daniel; amu kobooch peetuut ne po tai ye ki imach iguiye eng' muguleldang'ung', ak iming'inge eng' taitap Kamuktaindeng'ung', kogi kigasun ng'aleeguk; ak kanyo amu ng'aleeguk.

¹³ Ago ki ranya pounindetap pounatetap Persia eng' peetuusyek tiptem ak agenge. Ago keero, ki nyo Mikael, age eng' pounik che eecheen kotoreta, ak ki abagaach eng' olooto kobooto laitorinigap Persia.

¹⁴ Kanyo anyun si kobiit aboorun iguiye tuguuk che tuun pwoonjin piiguk eng' peetuusyek che po let, amu po ng'ang'utyet peetuusyek che chaang'.”

¹⁵ Kingo kagong'alaalwo ng'aleechuuto, kogi ang'uruuge ak konamaga kuut.

¹⁶ Ak ogeero, ki twa kutinnyu age ne kergei ak weeriigap piik, ayaat kutinnyu anyun ang'alaal, ak aleenji ineendet ne ki tonon eng' tainnyu, “Ee kiptaiyandennyu, kagobwanjo aragenosyekyuk amu ng'ang'utyet, ak ma atinye kimnon.

¹⁷ Amu imuktoi ano otwogindetap kiptaiyandaninyu kong'alaal ak kiptaiyandennyu? Amu ne uu anee, ko ko mata atinye kimnateet ak kagogera tigiis.”

¹⁸ Yeityo kotwaa kogeny age ne uu chiito, ak kogimita.

¹⁹ Ak kile, “Ee inyee, chiito ne ii chamat miising' ameiywei, ingotebenen kaalyeet. Kimitu ak inyiganitu!” Kingo ng'alaalwo, agimiitu anyun ak ki ale, “Ingong'alaal kiptaiyandennyu; amu kaigimita.”

²⁰ Yeityo kole, “Tos ingen ile amu nee si anyoonjin? Kaweege anyun si kebarge ak pounindetap Persia, ak ye awe, keero, konyo pounindetap Greece.

²¹ Ago amwaun kiit ne siraat eng' siruutik che po iman. Ama mi age ne toreta agirinda chuuto kobatee Mikael, pounindeng'wong'.