BARUK 6 - BUKUIT NE TILIIL Sireet ne Dutero Kanon

Parweetap Jeremiah

¹ Ni ko kebeberta ne po parweet ne ki ipchin Jeremiah piik che ki neegit kouto laitoryat ne po piigap Babilon koba otwoknatet eng' Babilon, si komwachi kiit ne ki ng'at Kamuktaindet:

² Iutook Nebukanezzar laitoryatap piigap Babilon obe otwoknatet eng' oliin po Babilon amu tengekwogik che ki oyai eng' taitap Kamuktaindet.

³ Tuun ndoit Babilon, otebee yuundo kenyiisyek che chaang' kot kobata ibinweek tisabu, ye ibata koweekwok Kamuktaindet oweege kaa eng' kaalyeet.

⁴ Ye omi Babilon ogeere kanamonigap thahabu ak fedha ak che po keetiik, che kiibee tigigoik ak che kimue che ma ingen Kamuktaindet.

⁵ Oriipkei amoyaniegei pichooto po pororyosyek alak, amat oaragense anan otabotye ye kooro icheek kogutung'dos eng' taitap kanamonichooto.

⁶ Ago, omwachigei eng' mugulelwogikwok ole, inyeegei kityo ee Kiptaiyat ne nyolu kegutung'ji!

⁷ Amu mi kobootok malaikaiyannyu; ak riibook ineendet.

Ma tinyei kimnon kamuktaik alage

⁸ Eng' iman kotinyei kutusweek kamuktaichu, nga ki ichaboi musoogik; eng' iman ko ki iliige thahabu ak fedha nga ma imuuchi kong'alaal.

⁹ Chopchin piik kuutweetap naaryeetap thahabu metoegap kamuktaichu ko uu chepto ne chamei lelesta.

¹⁰ Choorei tisiikwak thahabu ak fedha asi kobaisye eng' poisyennywa.

¹¹ Igoochin agot chepkugoniotap hekaluut thahabu ak fedha. Ilelesaani kanamonichooto po fedha ak po thahabu ak che po keetiik eng' ngoroik kot ko uu yo kipkosabei.

¹² Agot nda kagilaakyi ngoroik che aruus ne piriir, koamei kutu ak koamei toek.

¹³ Uusyin piik togoochikwak ye kaibutyi temburyek.

¹⁴ Namei kamuktaichu kirokto ne po pounatet kot ko uu yo kandoin nga ma imuuch kogergong' kiplelutyo.

¹⁵ Namei rotweet ak aiywet eng' eunekwak nga ma imuuchi kosargei eng' chemargeet anan ko chooriik.

¹⁶ Ibooru chu kole kamuktaichu koma Kamuktaindet ne po iman, ara moiywei.

¹⁷ Ko uu ye uu tereet ne kaiye, ko uu nooto agine kamuktaigap icheek che ma ingen Kamuktaindet, kamuktaik che ki kitonoon eng' hekaluut ak ki konyi puiwet konyekwak che ityorchin kelyegap icheek che chutu ko.

¹⁸ Riibegei tisiigap kamuktaichu, kerei kurgotik eng' kariik asi koriibegei rebiik eng' kiimnon ko uu ole kiratitoi ak kerwookyi kome chiito ne kileelji laitoryat.

¹⁹ Inaamjini taisyek che chaang' kosiir che mache icheeget, ago ma imuuchi kogeer agot kiy.

²⁰ Kergei ak petbetyet ne po hekalut ne ki koam kuutik che punu ng'ung'unyek ago ng'em kobooto ngoroikwak che korooron.

²¹ Kigotuegitu togoochikwak agobo iyetap hekaluut.

²² Siirei ak koterebi reresik ak cheptugenik ak toriitik alak paragutap poorwek ak metoekwak, tebee inee agot pusiit.

²³ Ibooru chu tugul kole kamuktaichu koma Kamuktaik che po iman. Ara mat iywei.

²⁴ Ma liildoi thahabuini ki kiliige asi kolelesaan ngot koma siny chii. Kingechobei koma kas kiy!

²⁵ Agot eng' alyet age tugul ne kialee kanamonichooto, koma imuuchi kobuus.

²⁶ Keseni piik eng' tigigoikwak amu ma tinyei keelyek che pendatee. Eng' niito koboorchingei piik kole ma tinyei kamanuut.

²⁷ Amu ngo putyi ng'wony, koma ng'eetos kanamonik ngot ko meng'eet che kutung'jin. Ma imuuchi kotelelso yo kagitonoon anan kotononso yo kebutyo; nga indoi piik konunoik ko uu yo kindoi tabandap muuswek.

²⁸ Aldoi tisiikyik korosek che kagicher asi konyoor keljiin. Indoi agot kwonyiikwak munyuk kebeberwegap pendo nga ma pchechin kibanania anan ko chii ne memuuchegei;

²⁹ Kichamjin ngot chepyoso ne katyech ingwony anan chepyoso ne kota kotuumei kotiiny konunaik che po kanamonichooto. Ibooru chu tugul kole kamuktaichu koma Kamuktaik che po iman. Ara mat oywei.

³⁰ Kogeny, imuktoi ano keguuree kamuktaik, ngot ko rootyin agot kabagorisyek koot kamuktaichu po fedha, thahabu, ak keetiik?

³¹ Teptoos ng'wony tisiik kolaachi mararenik, ko kagotil suumeek ama kotuchei met eng' hekaluusyekwak.

³² Iteitos ak kowaaktos tisiik eng' taitap kamuktaichu ko uu piich che mi riiregap meiya.

³³ Ibei alage ngoroik che po kamuktaichu asi koolakyi kwonyiik ak lagokwak.

³⁴ Ngeyachi che myach anan ko che yaach kamuktaichu ko memuuchi kopchei konunotyot. Ma imuuchi koyaaktachigei mugetuut. Ma imuuchi kotoroor laitorya anan koisto eng' ng'echereet.

³⁵ Ma imuuchi koipchi chii mogornateet anan robiinik; ngot koyasyo ama isulda ko memuuchi koteebee.

³⁶ Ma imuuchi koosap chii iman eng' meet amagoi sar chii ne ma imuuchigei eng' eunegap ngelelyo;

³⁷ Ma koi yai chii ne koraat kogeerto, amagoi inya chii ne mi eng' nyalilda.

³⁸ Ma koi riiree mosok anan kotoret lagok che ma tinye sigiik.

³⁹ Kergei ak koik che ki kiwai eng' tuloonook; ko uu nooto kanamonik che po keetiik che tinyei peerik che po thahabu ak fedha; kiboitinikwak kogerchingei kalilanet.

⁴⁰ Ara imuktoi ano piich kobwaat kole kamuktain anan koguuree kamuktain?

Perberyetap kegutung'ji kanamonik

⁴¹ Ma koonyiti agot Kaldeik icheeget. Ngot ko nyoor chii ne ming'aat ak ko namaat kuut, komuti kwo taitap Bel ak kosoom kotoret kotwek ko uu yo imuuchi kanamwet kogas.

⁴² Amemuuchi kobwaat ak kowiirchi ole loo kamuktaichooto amu kabwaatutikwak koyaach.

⁴³ Rategei anook kabagorisyek ak kotebee peesyop oor kobeeljingei tuguuk che ng'uu ak koyaei kugoinatennywa. Komuti age muren asi ip koruiyo tuwai, yeityo koweek inyo kororechi niin ka kang'et koleenji ma tinyei itoon ko uu inee, nooto amu nee asi ma kilewen.

⁴⁴ Tugul che yaaksei agobo kamuktaichooto ko kaberberisyet, ara imuuktoi ano kibwaat anan kemwa keele kamuktain?

⁴⁵ Ki chop musoogindet ak kitang'igap thahabu; ma imuuchi koek kiy age kobaatee kit ne kimaktoi kitang'ichooto.

⁴⁶ Kora ko nwach sabeetap kitang'ichooto! Ara imuuktoi ano tuguuchu kichobei kitang'ik koek kamuktain?

⁴⁷ Uu ni ole pagaakyindeitoi `piik iyotennywa lembech ak teweernat.

⁴⁸ Ye ngo mong'ji pooryeet anan ko mburyet, korwoochi tisiik ole ung'egei ak kamuktaik chootochwai.

⁴⁹ Ma imuuchi koeetkei kamuktaichu ye kait pooryeet anan ko mburyet. Imuuktoi ano asi ma naaksei keele ma kamuktai kanamonichu?

⁵⁰ Amu kamuktaichu ko tugun kityo che ki kiyae keetiik, ak keliigee thahabu ak fedha. Itei peetuut agenge kenai keele lembech chu tugul.

⁵¹ Naei pororyosyek tugul ak laitorinik kole kanamonichooto koma kamuktaik, ago tugun kityo che ki kiyaee euun. Oriitinwa koma mi poisyo ne po Kamuktaindet.

⁵² Ng'oo anyun ne ma keerei kole chuuto koma kamuktai?

⁵³ Amu ma imuuchi koteleel laitoryat eng' emet, anan kogoochi piik ropta.

⁵⁴ Amagoi irwookyi ng'aleekwak anan konya chii ne myani amu ma tinyei kamuget, uu chepkugit eng' kween ne po soet.

⁵⁵ Ngo putyi maatap hekaluut ne po kanamonichooto che po keetiik che ki kiliigee thahabu anan ko fedha komweitos tisiik asi kosargei ak kemeto kolalyo ko uu petpetyet.

⁵⁶ Ma imuuchi kobelgei ak laitoryat anan ko puunyoot.

⁵⁷ Kamuktaik che ki kiliige thahabu ak fedha koma imuuchi koeetkei eng' eunegap chooriik anan rebiik.

Nyalulnatetap kamuktaigap lembech

⁵⁸ Pwoonei chorigap thahabu ak fedha ak koip koibee agot ngoroik che ki kilokyin. Ma imuuchi koeetkei ne po iman.

⁵⁹ Nga kaigai iegu laitoryat anan ko kiy ne koboisyee chii eng' ko kosiir kamuktaichu po lembech. Kaigai kurgetap koot ne riibei tuguuk tugul che mi ko kosiir kamuktaichu po lembech. Toloita agenge eng' kaplaitoryat ko kaigai kosiir kamuktaichu po lembech.

⁶⁰ Liildoi Asiista, arawet ak taboik ko uu ye ng'atei Kamuktaindet.

⁶¹ Ko uu nooto ileet ak usoonet. Ngo lyel kotaagu eng' komaswek tugul ak ngo us, kousyin komoswek tugul.

⁶² Isuldae poolik ak icheek ng'atuutyet ne ki igoochi Kamuktaindet ne wendatee emet tugul.

⁶³ Uu ole ki kiarorto maat ne kiwiiru kobeel tuloonook ak timwoogik. Ma imuuchi kanamonigap kamuktaik che po lembech ko koyai tugun che uu chu. Ma imuuchi agot kotyem tuguuchuuto.

⁶⁴ Ma kimuuchi kibwaat anan kemwa anyun keele kamuktain iman, amu temenee koorwoch anan koipchi piik keljinet.

⁶⁵ Ara amu kaonai ole kanamonik koma kamuktaik, ko mogonyit.

⁶⁶ Ma imuuchi kochup anan ko koberuur kamuktaichu laitorinik.

⁶⁷ Amagoi imaangu kaborunet eng' kipsengwet eng' taitap piik, amagoi komoong' lapkeyet anan koliilda ko uu asiista anan arawet.

⁶⁸ Kaigai tyony ne po timiin kosiir kanamwoni po kamuktain amu imuuch komwei ye katiritiit.

⁶⁹ Ma mi ooreet age tugul ne ibooru kanamwani ko kamuktain, ara moiywei agot kitigin.

⁷⁰ Kergei ak kanamwetap kamuktaindet tuguuk che kimue toriitik eng' mbar. Ma imuuchi koriip chii agot kitigin.

⁷¹ Kanamonik chooto ko keetin che ki kisalee thahabu ak fedha ak ko uu timdo ne mi mbar, ne kimetoi asi kegetee toriitik ma am peek. Ee, uu muusyo ne kagiwiirchi ye imeen.

⁷² Kalaksennyi ne po parak konunjin paragutap kamuktaichooto; ak noot ne onaee ole ma kamuktain agot kitigin. Eng' let ko amei toik ak koek kiy puch eng' ng'wony ne kisasei.

⁷³ Ara kaigai chii age tugul ne ma tinyei kanamwet, ma koi kisas chiichoo.