BARUK 5 - BUKUIT NE TILIIL Sireet ne Dutero Kanon

¹ Ee Jerusalem, ireegu ngoryeeng'ung' ne po arageneet ak kanyaliilet, ilaakyigei koigeny korooronindo ne po toroornatetap Kamuktaindet.

² Ilaach ngoryeet ne po imandap Kamuktaindet, inde metit naaryeetap kalasunetap ineendet ne po koigeny,

³ amu machei Kamuktaindet koboorchi toroornateng'ung' pororyosyek tugul che mi kurereetap kipsengwet,

⁴ koonin Kamuktaindet koigeny kainani; “Kaalyeetap imanda, ak toroornatet ne po kayweetap Kamuktaindet.”

⁵ Ng'eet, ee Jerusalem, tonon eng' ye toroor ak igusgong' igeer kong'asiis, keer weeriiguk che kiga kiyum kong'eetee kong'asiis ak cherongo eng' ng'olyootap Inee ne tiliil; poipoi amu ki ibwaat `Kamuktaindet icheek.

⁶ Nganda ki pa kobunei keelyek ak komuti `icheek puunikwak, koweegun nguno `Kamuktaindet icheek kimutu eng' toroornatet ko uu eng' ng'echeretap pounatet ne po laitornat.

⁷ Amu kang'at Kamuktaindet kole; kiribriip tulweet age tugul ne toroor, ak kinyiit tembonok si kobiit kowendot Israel komyee eng' toroornatetap Kamuktaindet.

⁸ Ki kouur Israel keetiik ak keet age tugul ne ng'utoi ne anyiny eng' ng'atuutyetap Kamuktaindet;

⁹ indoochin Kamuktaindet Israel eng' poiboiyet; kobun lapkeiyetap toroornatennyi; kotinyei rireenet ak imanda ne punu ineendet.