BARUK 4 - BUKUIT NE TILIIL Sireet ne Dutero Kanon

¹ Utaatyet ko kitabuut ne po ng'atuutigap Kamuktaindet, ak ko ng'atuutyet ne tebyei koigeny. Icheeget che namjingei kitabuni ko saptos, ago che istoegei ko pegu.

² Weege ee inye Jakobo ak inamjigei, otakyigei kaluunetap lapkeiyennyi.

³ Amegoochi chii age perurtang'ung', anan igoochi pororyosyek alak perurwagikwok.

⁴ Kiboiboen acheek ee Israel, amu ki keng'ang'wech tuguuk che iboiboi Kamuktaindet.

Kagaigaetap Jerusalem

⁵ Piikyuk onyiganiitu, okweek che oteeche kainetap Israel kotestai konaak.

⁶ Ki ma kialdochook piigap pororyosyek kemachei kebarak oomis, ki kindeak eunegap puunikwok amu ki oyai Kamuktaindet konereekyok.

⁷ Ki ongeleelji ineendet ne ki yaak, ye kingo koite koroseek ogooochi oik ne kata Kamuktaindet.

⁸ Ki outyee Kamuktaindet ne po koigeny ne ki riibok, ak ogoochi riirek Jerusalem, ineendet ne ki riibok.

⁹ Ki iro Jerusalem kergong'yet ne ki ityok kobun Kamuktaindet, ak kole; Ogas oo, okweek nganasook che neegite Zion, Kagoibwo Kamuktaindet aragenet ne oo;

¹⁰ Ki ageer luuletap weeriikyuk ak tiibiikyuk, nooto kiipchi icheek Kamuktaindet ne po koigeny.

¹¹ Ki ariip icheek eng' kagasetapkei, ak ko ki agoite koba eng' riirek ak arageneet.

¹² Amat kobaibait chii agobo anee mosok, anee ne kigosiirtoe lagok che chaang', Ki kimeto aguber amu tengektap lagokyuk, amu ki ingelelji ng'atuutyetap Kamuktaindet.

¹³ Ki ma igoochi konyit ng'atuutikyik, ama pendatee ortinwegap ng'atuutigap Kamuktaindet, anan kosuup ooreet ne kaiaroorchi imandanyi.

¹⁴ Ingobwa nganasook tugul che neegiten Zion, ak obwaat luuletap weeriikyuk ak tiibiikyuk, luulet ne ki imutyi Kamuktaindet ne sabei koigeny.

¹⁵ Amu ki imutyi icheek pororyet ne loo, pororyet ne po piik che koroomen ak kuut age, nooto ki ma tinyei teegis eng' piich che oseen, ak koma riiree lakwa.

¹⁶ Ki imut agot weeriik che ki chamanigap mosook, ak komutee chepyoso ne panan tibiikyik.

¹⁷ Ago tos atoretitoin ano anee?

¹⁸ Ineendet ne ki ibwook kanyaliilani, kosarwok eng' euutap puunikwok.

¹⁹ Oba lagokyuk, obechigei, amu kagebagaakta aguber.

²⁰ Karegu ngoryeet ne po kaalyeet, ak alaach kuniet amu riirekyuk. Ariirchini ineendet ne sabei koigeny kotee asabe.

²¹ Onyiganitu lagokyuk ak oriirchi Kamuktaindet. ak sarwok inee eng' kimnateet ak eng' euutap puunyoot.

²² Kaande kayanennyu ale sarwok Kamuktaindet ne po koigeny, ak kagonyonja poiboiyet ne punu ineendet ne Tiliil, ak amu riirge nooto wendi ko sarwok kobun saruunindetap koigeny.

²³ Ki ametook ki mutaak obe atinye riirek ak kaimetapkei, ago iwekwok Kamuktaindet ak koyaa abaibait koigeny.

²⁴ Ko uu ye kagogeer nganasook che neegitee Zion kenomook, ko keerok onyooru katyaget kong'etee Kamuktaindet, ne tuun nyoonjinok eng' toroornatet ne oo ak eng' korooronindap Inee ne po koigeny.

²⁵ Lagokyuk, omuite eng' nereegek che kaitwak kobun Kamuktaindet. ki koterteraak puunikwok, ago koma tyanit, ogeere icheeget keng'emei, ak obendi otyegoti katwekwak.

²⁶ Ki kobun ortinwek che pichiien lagokyuk che nyalulyotin, ki kikweri icheek koba ko uu akweet ne kanam puunyoot.

²⁷ Onyiganitu anyun, ee lagokyuk ak oriirchi Kamuktaindet, amu agoi kobwaataak ineendet ne kaibwok neeregechu.

²⁸ Ko uu ole ki kimasaak oistoegei Kamuktaindet, owekyigei ineendet eng' kagiletapkei konyil taman.

²⁹ Ineendet ne ki ibwook nyalilwogichu, ko ineendet kora ne tuun koibwok poiboiyetap koigeny ak saruuneng'wong'.

Ki yamisyin Jerusam toreteet

³⁰ Nyiganitu, ee Jerusalem, amu ineendet ne ki koonin kainet ko agoi koibun kagaigaet.

³¹ Pwo eng' icheek che ki inyaliilok ak che ki poibochin nyalildangwong'.

³² Pwo eng' nganasook che ki yai lagokwok koek mutworiik; ak eng' nganaseet nooto ki nam ioteng'ung'.

³³ Ko uu ye kibaibait ineendet eng' kabuteng'ung' ak kobaibait eng' ng'emeng'wong' ko agoi tuun koaragen ineendet agobo kubernatennyi.

³⁴ Aistoi kolooit lasennyi ne ting'e chaang'indonywa, ak egu lasennyi ne pogei rireek.

³⁵ Nyoonjin inee maat ne punu ineendet ne po koigeny eng' peetuusyek che chaang'. ak tuun menyei inee oik eng' kasarta ne koi.

³⁶ Keer kong'asiis, ee Jerusalem, ak iroo poiboiyet ne ibuun Kamuktaindet.

³⁷ Keero, pwanei kaa lagoguk che kiga ioon, Pwoonei ki yumu kong'etee kong'asiis agoi cherongo, eng' ng'olyootap Ineendet ne Tiliil, igasanugei eng' toroornatetap Kamuktaindet.