BARUK 3 - BUKUIT NE TILIIL Sireet ne Dutero Kanon

¹ Ee Kiptaiyat ne po kamuktaet, Kamuktaindetap Israel, riirchin inyee saboonwek che iimege ak ko nyalulyotin.

² Kas ee Kiptaiyat amu ii Kamuktaindet ne po rireenet ak irirenech acheek che ki kelelun,

³ amu neng'ung' kamuget eng' koigeny ago ki kelusye koigeny.

⁴ Ee Kiptaiyat ne po kamuktaet, Kamuktaindetap Israel weeriigap icheek che ki yai tengek eng' inyee, ma kas icheek tuugeetap kiptaiyat Kamuktaindennywa ak ki konamchechkei che yaach.

⁵ Amebwaat nguno yautik che yaach che ki yai kwanisyekyok ago eung'ung' ak kaineng'ung'.

⁶ Amu ii Kiptaiyat Kamuktaindennyo, ak eng' inyee ee Kiptaiyat kilasun.

⁷ Eng' niito inde nyogoryet mugulelwekyok eng' inyee, asi kobiit keguur kaineng'ung' ak kilasun eng' emennyo ne po otwoknatet. Ki keiste eng' mugulelwekyok yaitwogigap kwanisyekyok che ki lelun inyee.

⁸ Namech ra eng' puunikyok eng' ole ki iserchech, asi kebirech ak kechubech kosupkei ak leluutigap aguiywogikyok che kiistoegei Kiptaiyat Kamuktaindet.

Utaatyet eng' kandoinatetap Israel

⁹ Kas ee Israel ng'atuutigap sabeet. Oep iit ak onai chigilet.

¹⁰ Amu nee wee Israel, asi omi emetap puunikwok, ak oosegitu eng' emetap saang'. ak omurwonitkei ak che ki kobek?

¹¹ Amu nee si ki ititook che kobek.

¹² Ki obagaakte kondametuutap utaatyet.

¹³ Nda kigosup ooreetap Kamuktaindet, ta ki omenye eng' kaalyeet ne ma pegu.

¹⁴ Oneetkei ole mi utaatyet, ole mi kimnateet ak ole mi kaguiyet, asi kobiit onai kogeny ole mi kakwautigap peetuusyegak sabeet, ole mi lapkeiyet ne iluuchin konyek ak kaalyeet.

¹⁵ Ng'oo ne kigonyor ole mi ng'omnateet, ng'oo ne kigochut ole mi mogornatosyekyik?

¹⁶ Mi ano kandoigap pororyosyek, ak icheek che pou tyong'igap ng'wony eng' kimnateet?

¹⁷ Mi ano chooto che urerendos ak toriitigap parak; icheek che iyumi fedha ak thahabu che imang'u piik, ak ma mi ole igeesunengei kayumennywa?

¹⁸ Mi ano che ki tet ole siktoi fedha ak koimegei ago ma mi kaboorunetap poisyonikwak?

¹⁹ Ki kolusyi ole mi che ki kobek ak kong'eetyo alak eng' itoondonywa.

²⁰ Kigooro lapkeiyet ibinwek che rubei ak komeng'iis eng' emet, ago kotom konai ooreetap kaguyet, tomo koguiyo ortinwekyik anan konam ineendet.

²¹ Ki komasta iyotennywa eng' ineendet.

²² Tom kogos inee eng' Kanan anan kotook eng' Teman.

²³ Cheeng'ei `weeriigap Hagar naet eng' ng'wony, chemung'arainigap Merran ak Teman, mwagap atindonik ak cheeng'iigap ng'omnateet, kotomo koneetgei ooreetap utaatyet anan kogoochigei kobwaat ortinwekyik

²⁴ Ee Israel paraa ne tya kootap Kamuktaindet tebes ne tya katuiyetap kandoinatennyi.

²⁵ Paraa ama kimuuchi kiyum, toroor ak ma kimuuchi kekwa

²⁶ Ki kisikyin chemosin oli, che ki naatiin kong'etee keny, che ki eecheen ak ko kiimeen eng' lugeet.

²⁷ Ma chu che ki lewen Kamuktaindet, anan kogoochi ooreet konai,

²⁸ kilusyo anyun icheek amu ki ma kotinyei utaatyet, kolusyo agobo perberyennywa.

²⁹ Ng'oo ne ki kotogosta kipsengwet ak komut ineendet, anan komut ineendet korek eng' poolik?

³⁰ Ng'oo ne ki kosiir araraita ak konyoor ineendet, koalee inee `thahabu che korooron.

³¹ Ma mi ne ingen ooreet ne ityin inee, ama mi ne ki koguiyo ortinwekyik.

³² Ago anyun ne ingen kiy tugul kongen ineendet. Ki koteebsee inee eng' ng'omnatennyi ineendet ne ki chop turguito eng' kasarwek tugul.

³³ Ineendet ne imuuch koyookto lapkeiyet, ak kwo lapkeiyet, kuurei kogeny ak ko kase iit ineendet, kobotananu.

³⁴ Ki iluu kogelik eng' kebeberwekwak ak ko poiboen; ki kuur `inee icheek ak kole, “Ki mi yu!” Ki iluu icheek eng' poiboiyet agobo ineendet ne ki yae icheek.

³⁵ Ni ko Kamuktaindennyo; ma mi age ne kergei ak ineendet.

³⁶ Ki nyoor inee ooreet komugul ne po naet, ak kogoochi ineendet Jakobo kiboityonnyi, ak kogoochi Israel weeriinnyi ne chamaat.

³⁷ Kong'eetee yooto anyun ko ki komong'ji ng'wony ak komeng'iis ak piik.