BARUK 2 - BUKUIT NE TILIIL Sireet ne Dutero Kanon

¹ Ara kagosuldae Kiptaiyat kergong'yet ne ki kang'at agobo acheek, agobo kirwoogikyok che ki indoochi Israel, agobo laitorinikyok, ak kandoikyok ak piigap Israel ak Judah.

² Tomo koyaaksei eng' kureretap kipsengwet kiy ne kergei ak ne kiyaak eng' Jerusalem, kotwoisyok ko uu kateunoik che siraatiin eng' ng'atuutyetap Musa.

³ Amu niito ko ki it kobar ak koam alak eng' acheek weeriikwak ak koam alage tiibiikwak.

⁴ Ki inde `inee icheek eunegap pounik tugul che kiga imuut, koek che kisasei ak che ki teweeri eng' pororyosyek tugul che kiga iyestachi Kiptaiyat.

⁵ Ki kichoorchi icheek ng'wony ama kieet, amu kiga yachi tengek `pororyennyo Kiptaiyandennyo ye ki eesyo koepchi iit kuursenyi.

⁶ Tinyei iman Kiptaiyandennyo ak kagonyiech teweernateet ko uu aguiywogikyok.

⁷ Ki kenyooru pireet tugul ko uu kateunoik che po Kiptayandenyo.

⁸ Nga no ko tomo ketyem kecheeng' myeeindap Kiptaiyat, ongewelel ak keistoegei chii age tugul kabwaatutigap mugulelndanyi ne ya.

⁹ Ara ki kochop Kiptaiyat piruutik, ak itwoisye age tugul ko uu ye ki kamwa, amu po iman Kiptaiyat eng' poisyonik che ki kong'atech kole keyai.

¹⁰ Ago ma kigas iit tuugeennyi, kebendatee ng'atuutikyik che ki koonech.

Saaet

¹¹ Ara ee Kiptaiyat Kamuktaindetap Israel, inyee ne ki imutuu piiguk eng' Misiri eng' eung'ung' ne kiim, eng' kaboorunoik ak kimnateet ne oo kobun eung'ung' ne kiim, ki itoroor kaineng'ung' ne teseitai agoi ra,

¹² kigeleel, kigeegu kiptengegiinik, kigechalwogen, ee Kiptaiyat Kamuktaindennyo, kebut ng'atuutiguk tugul.

¹³ Ara kisaae keele mata itestai inereekyech amu ki keng'etu che ng'ering' eng' pororyosyek che ki iyestachech.

¹⁴ Kas ee Kiptaiyat, saaennyo ak soomennyo, sarwech eng' kamugeng'ung', ak koonech chamyet eng' taitap icheeget che ki imutech keebe luulet;

¹⁵ asi konai ng'wony komugul kole inyee ko ii Kiptaiyat Kamuktaindennyo, amu kigurtoe kaineng'ung' pororyetap Israel ak iyotennyi.

¹⁶ Ee Kiptaiyat keerech acheek eng' ng'wony eng' oldang'ung' ole tiliil, ak igasech.

¹⁷ Toobenech, ee Kiptaiyat, ak igeerech. Amu muuswek che miitei ole mi che ki kobek, che ki komanda saboondo eng' poorwekwak, koma komuuchi kotoroorin anan koityi imanda Kiptaiyat.

¹⁸ Ago piik che saptos, che aragenotin, che pendoti kogeeroti ng'wony ak konyalulyotin, kipkoratinik ak che ame rubeet ko chooto che imuuchi kotoroorin ak komwaita imandang'ung', ee Kiptaiyat.

¹⁹ Ee Kiptaiyat Kamuktaindennyo, ma amu poisyonigap imanda che ki yai kwanisyekyok anan laitorinikyok ne kagoonech kebwa taing'ung' keibu saaennyo ne po riirge.

²⁰ Inyee ko ketokyech kergong'yeng'ung' ak nereegeguk ko uu ye ki mwa eng' kiboitiniguk maotik eng' tai ile:

²¹ Kamwa Kiptaiyat kole, oming'ing'ei ak ong'eetye oot laitoryatap Babilon asi omuuch omengiisye eng' emet ne kiga agoochi kwanisyekwok.

²² Ago ngot ko moepchi iit tuugeetap Kiptaiyat ak oeesye oot laitoryatap Babilon,

²³ aeesyoi anyun arorut age tugul ne po poiboiyet anan igoorwek eng' emetap Judah ak Jerusalem. Ma komiitei tweguunetap igoorwek anan ko katunisyet. Egu emet tugul melewet ak surkwen.

²⁴ Ago ki ma kigas iit acheek tuugeeng'ung', keoot laitoryatap Babilon, ak kaisuldae che ki imwa kobun kiboitiniguk maotik, ile ki weegu kawegap laitorinik ak kwanisyekyok komong' eng' kereeriisyek.

²⁵ Ago eng' iman kigewiirchi icheek lalang'yetap peet ak kaitityetap kemoi. Ki pek icheek eng' nyalilda ne oo, eng' rubeet ak rotwetap chok ak eng' myanwogik che yaacheen.

²⁶ Ak ki ing'em koot ne ki cham kesaee ko uu ye rani, amu tengekwogigap piigap Israel ak piigap Juda.

²⁷ Nga no, ee Kiptaiyat Kamuktaindennyo, ko ki imuitawech eng' karaaranindong'ung' ak rireeneng'ung' ne oo,

²⁸ ko uu ye ki mwa kobun maotyondeng'ung' Musa, ye ki keng'at kosir ng'atuutiguk eng' taitap piigap Israel imwae ile,

²⁹ “Ngot ko mogas iit kuursenyu, okweek anyun che ki oo chaang' ong'etu oegu che ng'ering' eng' pororyosyek, ole aiyestechini icheeget.

³⁰ Angen ale mo konyito icheek amu icheek ko piich che uueen metowek. Ago ye tuun mi ong'ateet ong'oomegitu,

³¹ ak oguiye ole anee ko aa Kiptaiyat Kamuktaindeng'wong'. Agoonok anee muguleldo ne po koondit ak iitik che kasei.

³² Ilaswo icheek eng' emet ne po luulennywa, ak kobwaat kainennyu.

³³ Weeksei eng' uuindonywa po met ak poisyonikwak che yaacheen, amu ibwaati ortinwegap kwanisyekwak, ye ki yai tengek eng' taitap Kiptaiyat.

³⁴ Ak aweekwok agoi emet ne ki ayosyechi agoochi aguiywogikwok, kayamiset ne ki agoochi Abraham, Isak ak Jakobo, asi kobunjook. Ak ayaak ochang'aitu ma ong'ering'itu kogeny.

³⁵ Ayae ak okweek kayamiset ne po koigeny aek Kamuktaindeng'wong', ak okweek oegu piikyuk. Ma aistook kogeny, okweek piikyuk Israel omong'u eng' emet nooto ki agoochi icheek.”