BARUK 1 - BUKUIT NE TILIIL Sireet ne Dutero Kanon

Baruk ak Yahudik eng' Babilon

¹ Chu ng'aleek che mi kitabuutap Baruk weeriitap Neriah, weeriitap Mahseiah, weeriitap Zedekiah, weeriitap Hasadiah, weeriitap Hilkiah che ki sirei eng' Babilon,

² eng' peetuutap tisap ne po kenyiitap muut, eng' peetuusyek che kiga iluul `Kaldaek nganaseetap Jerusalem ak kobeel eng' maat.

³ Ki somanji `Baruk ng'aleegap kitabuuni Jekoniah, weeriitap Jehoiakim laitoryatap Judah, ak piik tugul che ki pwa koepchi iit kitabuuni

⁴ piik che taagunotiin ak pounik, ak poisyek tugul ak piik tugul, che mengech ak che eech, tugul che ki menyei Babilon ye neegitee aineetap Sud.

⁵ Ki toi koriiryo ak korugutkei ak kosa eng' taitap Kiptaiyat;

⁶ ki iyum chepkondok che tee che ki imuuchi chii kogoon,

⁷ ak koyookyto keip koba Jerusalem keipchi Jehoiakim tisiindet ne oo weeriitap Hilkiah, weeriitap Shallum ak tisiik tugul ak piik tugul che ki mi tugul.

⁸ Eng' peetuutap taman ne po arawetap Sivan, konam Baruk tuguuk che po kootap Kiptaiyat, che kiga keip kimaanda eng' hekaluut, koweekta koba emetap Judah - tuguugap fedha che ki yaei Zedekiah weeriitap Josiah, laitoryatap Judah,

⁹ ye kagoisto `Nebukadnezar laitoryatap Babilon laitoryat Jekoniah, ineendet ak pounik kobooto kimonjororinik, piik che taagunotiin kobooto piigap emet, ak komut icheek kong'etee Jerusalem komut koba Babilon.

Parweet ne po piigap Jerusalem

¹⁰ Ak ki mwa kole icheek: Kagiyaagu chepkondok, ara oalee chepkondochu kagoochinoik che kibeelei ak kagoochinoik che po tengekto ak nyamdutik che kibeelei, ak yeityo ochop kagoochinoik che po peek che ng'ootiin yeityo ogoite eng' kaptisisyetap Kiptaiyat Kamuktaindennyo;

¹¹ ak osaa agobo sabeetap laitoryat Nebukadnezar, ak agobo sabeetap weeriinnyi Belshazzar, si kogergeit peetuusyekwak eng' ng'wony ak che po kipsengwet.

¹² Koonech `Kiptaiyat kimnateet, ak lapkeiyet eng' konyekyok; ki meng'iisyei koriibech laitoryat Nebukadnezar ne po Babilon ak koriibech kora weeriinnyi Belshazzar, ak keboisyechini icheek peetuusyek che chaang' asi kenyooru chameet eng' tainnywa.

¹³ Osaaiwech kora acheek eng' taitap Kiptaiyat Kamuktaindennyo, amu ki kemaaste eng' taitap Kiptaiyat Kamuktaindennyo.

¹⁴ Kisoomok oip kitabuuni kiyakwok ak osooman eng' tuugeet ne oo eng' kootap Kiptaiyat eng' peetuusyegap igoorwek ak eng' peetuusyek che ki king'at.

¹⁵ Omwae oleen: Tinyei imanda Kiptaiyat Kamuktaindennyo, ago kagonyiech teweernateet rani acheek che ki mi Judah ak meng'iigap Jerusalem,

¹⁶ ak laitorinikyok, pounikyok, tisiikyok, maotikyok ak aguiywogikyok,

¹⁷ ki keyai ng'oogi eng' taitap Kiptaiyat.

¹⁸ Ki kengelelji ineendet, keesye kegas iit tuugeetap Kiptaiyat Kamuktaindennyo, kebendatee ng'atuutigap Kiptaiyat che king'atwech.

¹⁹ Kong'eetee egosyek che ki imut Kiptaiyat aguiywogikyok komang'unee emetap Misiri agoi ra, ko ki kingelelji Kiptaiyat Kamuktaindennyo, ak ki kisas ak keesye kegas tuugeennyi.

²⁰ Nooto amu nee si kota ketinye piruutik ak chubuutik che ki koon Kiptaiyat kobun kiboityonnyi Musa eng' egosyek che ki saru aguiywogikyok komang'unee Misiri asi kogoochi emet ne nyiitaat cheego ak kumik.

²¹ Ma ki kas tuugeetap Kiptaiyat Kamuktaindennyo eng' ng'aleek tugul che ki iarorwech kobun maotik che ki iyaakwech,

²² ago ki kisup acheek tugul maguutik che yaach che po mugulelwekyok, ye ki kioot kamuktaik alak ak keyai nooto ya eng' taitap Kiptaiyat Kamuktaindennyo.