Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 SAMUEL 5 - BUKUIT NE TILIIL Sireet ne Dutero Kanon


Koegu Daudi laitoryat eng' Israel ak Judah
(1A.Pet 11:1-9; 14:1-7)

1 Ki pwa anyun pororyosyek tugul che po Israel ole mi Daudi eng' Hebron ak komwachi koleenji, “Keero, acheek anyun ko ki koweguk ak poortang'ung'.

2 Eng' peetuusyek che ki kosiirto ye ki laitoryat Saulo ne kiboiywech, ko inyee ne ki indochini Israel ye kimandoi ak komang'u eng' lugoosyek tugul. Ak ki leenjin `Kamuktaindet ne Toroor, ‘Ibae piikyuk Israel ak iegu pounindetap Israel.’ ”

3 Ki pwa anyun poisyek tugul che po Israel ole mi laitoryat eng' Hebron; ak ki yai `Laitoryat Daudi arorutyet kobooto icheek eng' Hebron eng' taitap Kamuktaindet ne Toroor, ak ki iil `icheek Daudi koek laitoryat koboi Israel.

4 Ki po Daudi kenyiisyek sosom ye ki tau kolaitorani, ak ki laitoran kenyiisyek artam.

5 Ki laitoran eng' Hebron kobou Judah kenyiisyek tisap ak arawek lo, ak ki laitoran eng' Jerusalem kenyiisyek sosom ak somok kobou Israel tugul ak Judah.

6 Yeityo kwo laitoryat ak piikyik kobookchi Jerusalem. Ki ibwaati `Jebusik che ki menyei emonooto koleen ma imuuch Daudi kobar icheeget. Ara ki mwachi `icheek Daudi koleenji, “Me muuchi inyoo ko nganasennyo. Agot kipkoratinik ak che ing'waldos ko kerin si menyo ko.”

7 Ago ki nam Daudi irimeetap Zion, nooto ko nganaseetap Daudi.

8 Eng' peetuunooto kole `Daudi, “Chii age tugul ne parei Jebusik, ko ingotogosta kwo kereruutap peek si kwo kobar che ing'waldos ak kipkoratinik che puunigap Daudi.” Nooto amu nee si kimwaei keleen, “Ma imuuchi kobwa ko kipkoratinik ak che ing'waldos.”

9 Ki meny anyun `Daudi irimonooto ak koguure nganaseetap Daudi. Ki teech `ineendet komoswek tugul kong'etee Milo agoi oriit.

10 Ki eet Daudi kotesak amu ki mi Kamuktaindet ne Toroor, Kamuktaindetap lugoosyek, kobooto ineendet.

11 Ki iyookto `Iram laitoryatap Tyro piik koba kap Daudi koibei taragonik, kobooto musogik ak che waei koik, che kiteekyi koot Daudi.

12 Ak ki nai Daudi kole kigogimiit `Kamuktaindet ne Toroor ineendet koek laitoryat ne pou Israel, ki nai kora kole ki kotoroor ineendet laitornatennyi agobo piikyik Israel.

13 Kingwo Daudi eng' Hebron, komutyigei chebaigeinik alak ak osotik alak eng' Jerusalem, ak ki kisikyi Daudi weeriik ak tiibiik alak.

14 Chu ko kainaigap che ki kisikyi ineendet eng' Jerusalem; Shamua, Shobab, Nathan, Solomon,

15 Ibar, Elishua, Nepeg, Japhia,

16 Elishama, Eliada ak Eliphelet.


Koterteeri `Daudi Philistiik
(1A.Pet 14:8-17)

17 Kingo kas Philistiik kole ki kiil Daudi koek laitoryat koboi Israel, kotogosta tugul koba kocheeng' Daudi, ago ki kas Daudi ak kichoortagei kwo irimeet.

18 Kingo pwa Philistiik ak koyom atebweetap Repaim,

19 koteebe `Daudi Kamuktaindet ne Toroor koleenji, “Awe kebargei ak Philistiik? Tos indoi icheek eunnyu?” Ak ki leenji `Kamuktaindet ne Toroor Daudi, “Togoste, amu andoi iman Philistiik eung'ung'.”

20 Ki it `Daudi Baal-perasim ak ki par icheek eng' yooto. Ki le, “Kagotui Kamuktaindet ne Toroor puunikyuk eng' tainnyu, ko uu mogoochek.” Kiguure anyun yooto Baal-perasim.

21 Ki pagaakta kanamonikwak Philistiik eng' yooto ak ki ip Daudi ak piikyik.

22 Ki togos Philistiik kogeny ne po aeng' ak koyom atebweetap Repaim.

23 Ak ye kingo teebee `Daudi Kamuktaindet ne Toroor, kowolji koleenji ineendet, “Metogoste, ago alagu patennywa ak iyem yeityo ibookyi icheek eng' ye itoorchingei keetiigap logoek.

24 Ye igas cheetap panda eng' keetichooto po logoek parak, ing'eet ichakte, amu kagondoenen Kamuktaindet ne Toroor kobar lugeetap Philistiik.”

25 Ara ki yai Daudi ko uu nooto ko uu ye ki ng'at Kamuktaindet ne Toroor, ak ki par `ineendet Philistiik kobooch Geba agoi koit Gezer.

Kalenjin Revised Bible Catholic Edition © Bible Society of Kenya, 2015.

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ