1 LAITORINIK 9 - BUKUIT NE TILIIL Sireet ne Dutero Kanon

Kogasyin `Kamuktaindet ne Toroor Solomon saaet

¹ Kingo kagogees Solomon teekseetap kootap Kamuktaindet ne Toroor, kobooto kootap laitoryat ak tuguuk tugul che kimachei Solomon koyai,

² komong'ji anyun `Kamuktaindet ne Toroor Solomon ne po aeng', ko uu ye kiga komong'ji eng' Gibeon.

³ Ki leenji `Kamuktaindet ne Toroor ineendet, “Kaagas saaeng'ung' ak soomeng'ung' ne kaisa ak isoom eng' tainnyu. Kaatiliil kooi koiteech, si ande kainennyu yooto koigeny. Tebee yooto konyekyuk ak muguleldanyu peetuusyek tugul.

⁴ Ngiwendotee tainnyu inyee, ko uu ye kiwendotee Daudi kwandang'ung', eng' kagesunetapkei ne po muguleldo ak eng' imanda, iyai ko uu tugul che kaang'atiin, iriip ng'atuutikyuk ak kirwoogutikyuk;

⁵ agimiit anyun ng'echereetap laitornatet ne po pounateng'ung' eng' Israel koigeny, ko uu ye kigayomisyi Daudi kwandang'ung' aleenji, ‘Ma petenen chiito ne tebee ng'echereetap laitornatet ne po Israel.’

⁶ Ago ngot omaste ko mata osuba, okweek anan lagokwok, amoriip ng'atuutikyuk ak etanutikyuk, che ki ande taing'wong', ak obe oot kanamonik, ogutung'ji,

⁷ ang'etoi Israel anyun eng' emet ne ki agoochi, ak kooi ki atiliil agobo kainennyu, aistoi eng' tainnyu; si koek Israel kalewenet ak atindyot eng' piik tugul.

⁸ Agot nganda toroor kooi kot, ko tuun kwong'ee age tugul ne siirtoe yooto, ak kosasei; ak komwa icheek kole, ‘Amu nee si koyachi ko uu ni Kamuktaindet ne Toroor emoni ak kooi?’

⁹ Kowol piik kole, ‘Amu kimeto icheek Kamuktaindet ne Toroor Kamuktaindennywa, ne ki imut kwanisyekwak komong' eng' emetap Misiri, ak konamgei ak kanamonik, kogutung'ji ak koot icheek. Ki ipchi anyun `Kamuktaindet ne Toroor icheek yaityoni tugul amu nooto.’ ”

¹⁰ Ak kingo kagogeskei kenyiisyek tiptemu, che kiteege Solomon koorchooto aeng', kootap Kamuktaindet ne Toroor ak kootap laitoryat,

¹¹ (kiga kogoochi Hiram laitoryatap Tyro Solomon keetiigap taragonik ak keetiigap piribirinik, ak thahabu, ko uu tugul che kimachei,) kogoochi anyun `Laitoryat Solomon Hiram nganasook tiptem eng' emetap Galilaya.

¹² Ki nyo Hiram eng' Tyro konyo kogeer nganasochooto kiga kogoochi Solomon ineendet; ago kimacham.

¹³ Ki le ineendet, “Nee nganasochu kegono, tupchennyu?” Ak kiguure emet Kabul, agoi ra.

¹⁴ Kiga koiyookyi `Hiram Laitoryat Solomon keruutik eliphuusyek somok ak pogol lo che po thahabu.

Poisyonik alak che po Solomon

¹⁵ Ak ni arorunet ne ki igoochi Laitoryat Solomon koyum tuguuk si kobiit koteege kootap Kamuktaindet ne Toroor, koonnyi, Milo, irimeetap Jerusalem, ak Hasor, Megiddo ak Gezer.

¹⁶ Ki wo Pharaoh laitoryatap Misiri kwo konam Gezer, ak kobeel eng' maat, ak kobar Kanaanik che ki menyei nganasanooto, ak kogoochi cheptonyi, osotyotap Solomon, koek kagoochinet.

¹⁷ Ki teech anyun Solomon Gezer, ak Beth-horon ne mi komosta ne rektoot,

¹⁸ Baalat, ak Tamar ne mi surkwen, eng' emet,

¹⁹ ak nganasook tugul ole kigonoree Solomon tuguuk, nganasook che po kariisyekyik, ak nganasoogap murenik che ketei paraisisyek, ak ne kimachei Solomon koteekyigei eng' Jerusalem, eng' Lebanon ak eng' emet tugul ne po pounatennyi.

²⁰ Ak eng' piik tugul che kiga ng'et che po Amorik, Hitik, Perisik, Hibik ak Jebusik, che ki ma ko po Israel;

²¹ lagokwak che kiga ng'et eng' emet, che ki ma imuuch piigap Israel kobar kogees, ki iyum Solomon otwogik eng' pichooto, agoi rani.

²² Ago ma yai Solomon piigap Israel koek otwogik; ki ek icheek murenigap lugeet, kiboitiinikyik, pounikyik, kiptainikyik, kandoigap kariisyekyik che po lugeet ak murenikyik che ki laanyei paraisisyek.

²³ Chu ko kiptainikyik che ki pou poisyetap Solomon, piik pogol muut ak konom, che ki pou piik che kiboisyei.

²⁴ Ki togos cheptap Pharaoh eng' nganaseetap Daudi kwo koonnyi ne kiga teekyi Solomon; yeityo koteech Milo.

²⁵ Ki igoitoi Solomon kagoochinoik che kibeelei ak kagoochinoigap kaalyeet konyil somok eng' kenyiit eng' kaptisisyet ne kiteekyi Kamuktaindet ne Toroor, kitesta chooto nyamdutik che kibeelei, eng' taitap Kamuktaindet ne Toroor. Kogees anyun koot.

²⁶ Ki yai Laitoryat Solomon melisyek che po lugeet eng' Esion-geber ye neegitee Elot, eng' ngeguutap Araraita ne Piriir, eng' emetap Edom.

²⁷ Ak ki iyookto Hiram otwogikyik, piigap moinget, che ingen nyanjet, kobooto otwogigap Solomon.

²⁸ Ki pa icheek Opir, ak koip thahabu che po keruutik eliphuusyek taman ak sisiit eng' olooto, koipchi Laitoryat Solomon.