Yoana 12 - Eriragano Erihya

Mariamu aramuhaka Yeesu amaguta

¹ Hanú gyatama eginsiku esansabha okuhika enyangi ya Epasaka, Yeesu akahika kweki Bhetania, mumugi gunú yaamuhyukya Rajaaro okurwa mubhaku.

² Mbe, abhantu bha eyo bhakamutekera ebhyakurya bhya mugoroobha. Maarita akamukorera Yeesu ebhyakurya, na Rajaaro yaaringa oumwi gati ya abhageni bhanú bheekara kumeja hamwi na Yeesu.

³ Mbe, Mariamu akagega enchupa ya amaguta ga obhurange aga obhuguri obhunene bhukongʼu, ganú gaabhirikirwanga ega, narido. Akamuhaka Yeesu kumaguru, akamweya kwa egintuukya gyaye. Enyumba yonsego ekeejura ekarangasira obhurange obhujomu.

⁴ Nawe, oumwi wa abheehigira bhaaye eriina ryaye Yuda Esikariote, unú eribhaga erindi yaamuriira eniku Yeesu, akagamba ega,

⁵ “Kwaki amaguta gayo gataaguribhwa kwa egidinari magana gasatu, na egimbirya giyo bhakaaheerwe abhatobhu?”

⁶ Yuda ataagamba ego kwa ekisigo kya okubhaabhira abhatobhu, nawe, kwa okubha yaaringa omwibhi. Weeki ngʼo yaaringa arabhiika ensaho ya egimbirya. Yaaringa areebha bhinú bhyaringa munsaho muyo.

⁷ Mbe, Yeesu akamukyukya Yuda ega, “Otamunyankya omukari unu, omutige, yanhakiri amaguta kurusumo rwa orusiku runú bharimbiika.

⁸ Abhatobhu bharingi hamwi na bheenyu eginsiku gyonsego, nawe, oni ntaribha hamwi na bheenyu eginsiku gyonsego.”

Abhatungi bha Abhayahudi bhareenda okumwita Rajaaro

⁹ Mbe, abhantu abhaaru bhakeegwa ega, Yeesu aringi Bhetania, bhakagya etaringi kwa okumurora weeki omwenego, nawe, na okumumaaha Rajaaro wonse, unú Yeesu yaamuhyukya okurwa mubhaku.

¹⁰ Nho, abhasyengeri abhakuru, bhakatuna enjira ya okumwita Rajaaro wonse,

¹¹ kwa okubha okurekana na okuhyukibhwa kwaye, Abhayahudi abhaaru bhaatiga abhatungi bhaabho, bhakamwikirirya Yeesu.

Abhantu bharamuturuungʼana Yeesu kwa obhujomerwa Yerusaremu

¹² Ejo wendeko, omuganda omunene gwa abhantu bhanú bhaaringa bhaajiri okurya enyangi ya Epasaka, bhakeegwa ega, Yeesu aringi kunjira araaja Yerusaremu.

¹³ Mbe, bhakagega amasagi ga emitende, bhakagya okumuturuungʼana Yeesu. Bhakagamba kwa eriisi erinene ega, “Hosana! Anonkerwe unú araaja kwa eriina rya Omukuru Waryubha! Anonkerwe Omukama wa Abhaisiraeri.”

¹⁴ Mbe, Yeesu akanyoora ekimoori kya entikiri, akariina kya ego yaangʼoorwa mu Mangʼoore Amarabhu ega,

¹⁵ “Bheenyu abhantu bha Sayuni, mutoobhoha! Maaha, omukama weenyu araaja, ariiniri kukimoori kya entikiri!”

¹⁶ Eribhaga riyo, abheehigira bha Yeesu bhataamanya gayo. Nawe, hanú Yeesu yaahyuka, mbe bhakahiituka ega, gayo gaaringa gangʼoorerwe eguru yaaye, na niigo bhaamukorera.

¹⁷ Abhantu bhanú bhaaringa na Yeesu, hanú yaamubhirikira Rajaaro okurwa mumbihira na okumuhyukya okurwa mubhaku, bhakanyaraganʼya amangʼana gayo.

¹⁸ Mbe, abhantu abhaaru bhakeegwa amangʼana ga ekika kinú yaakora, nkyo kyakora bhakarwa Yerusaremu bhakagya okumuturuungʼana Yeesu.

¹⁹ Nawe, Abhafarisaayo bhakabhuuranʼya ega, “Murarora? Tutakutura okukora kyokyonse! Maaha, abhantu bhonsego bharamuseeta.”

Yeesu arahaira eguru ya oruku rwaye

²⁰ Bhaaringa-ho abhantu bhanú bhataaringa Abhayahudi gati ya abhantu bhanú bhaagya Yerusaremu okumusyengera Waryubha kunyangi ya Epasaka.

²¹ Mbe, abhantu bhayo bhakagya ku Firipo unú yaarwa Bhetisaida mukyaro kya Gariraaya, bhakamukeerya ega, “Omusuukwa, turasabha tumaahane na Yeesu.”

²² Firipo akagya akakeerya Andurea amangʼana gayo, kimwi bhabhiri bhonsego bhakagya ku Yeesu, bhakamukeerya.

²³ Yeesu akabhakyukya ega, “Eribhaga rihikiri rya obhukuru bhwa Omwana wa Adamu okumaahikana aharabhu.

²⁴ Ndabhakeerya obhuheene ega, nyoore embusuro ya engano etarasiikiriribhwa mwirobha kya omuntu unú yaakwa, etakutura okumera, nawe, nyoore esiikiririibhwe, eramera na okwama emisumo emyaru.

²⁵ Omuntu wowonse unú areenda okwangararira obhuhoru bhwaye, aribhurwa obhuhoru bhwa koko, nawe, omuntu wowonse unú atakubhwangararira obhuhoru bhwa mukyaro kinu, uyo araangararira obhuhoru bhwaye, koko.

²⁶ Omuntu wowonse unú arankorera emirimu, ereenderwa yansoorane. Kweki hohonse hanú ndingi, hayo nho, omukori wa emirimu waani aribha. Taata arimusuuka omuntu wowonse unú arankorera emirimu.

²⁷ “Bhoono, naambiri okubhaabhahira bhukongʼu mumutima gwani. Bhoono, ngambe-ki? Bhoono, ngambe ega, ‘Ee Taata, ndakusabha untuurye kwibhaga rya enyanko inu?’ Tiigo-ha kora ahake, ntakutura okusabha ego, kwa okubha niijiri okunyanka mukyaro hanu.

²⁸ Ee Taata Waryubha, otubhure obhukuru bhwa eriina ryaho.” Mbe, eriisi rikagamba okurwa murwire ega, “Mbutubhwiri, kweki ndagendererya okubhutubhura.”

²⁹ Omuganda gwa abhantu bhanú bhaaringa harya, hanú bheegwa eriisi okurwa murwire, abhandi bhakagamba ega, “Orukubha rubharukiri,” na abhandi bhakagamba ega, “Maraika wa Waryubha arahaira nawe.”

³⁰ Nawe, Yeesu akabhakeerya abhantu bhayo ega, “Eringʼana rinú mwaringa mureegwa ritaringi kurusumo rwani, nawe, ryaringa kurusumo rwenyu.

³¹ Bhoono, rihikiri eribhaga rya Waryubha okubhabhuturira ekiina abhantu bha mukyaro kinu. Na rihikiri eribhaga rya Waryubha rya okukenyia Erisambwa rinú riratunga mukyaro hanu.

³² Oni hanú ndiriinibhwa, ndibharuta bhonsego, naho bhaaje kuoni.”

³³ Yeesu yaagamba ego, okoorokya kya ego arikwa.

³⁴ Mbe, omuganda gwa abhantu bhakamukyukya Yeesu ega, “Tureegwa mu Mangʼoore Amarabhu ega, Kiristu Omutuurya aribha omuhoru koko. Bhoono, kwaki oragamba ega, abhantu bharimuriinʼya Omwana wa Adamu? Mbe, Omwana wa Adamu niwi?”

³⁵ Yeesu akabhakeerya ega, “Endingaasi erabha hamwi na bheenyu kwa eribhaga ekego. Mugendererye okugenda mundingaasi inu eribhaga ekyari-ho, naho ekisunte kitariija okubhahiga, kwa okubha omuntu unú aragenda mukisunte, atakumanya enú aragya.

³⁶ Mwisigire endingaasi iyo, eribhaga mukyari nayo, naho mubhe abhaana bha endingaasi.” Hanú Yeesu yaagamba gayo, akatiga omuganda gurya, akagya okwibhisa.

Abhayahudi abhaaru bharaanga okumwikirirya Yeesu

³⁷ Onyoora Yeesu yaakora ebhika ebhyaru embere yaabho, kora ego abhantu abhaaru bhataamwikirirya.

³⁸ Yaabha ego, naho gakunaane amangʼana ganú omurooti Isaaya yaagamba ega, “Omukuru Waryubha, niwi unú yeekirirya amangʼana geetu? Kweki, Omukuru amoorokerye owi eginguru gyaye?”

³⁹ Bhataatura okwikirirya, kwa okubha Waryubha yaagamba okuhitira kumurooti Isaaya ega,

⁴⁰ “Ahokerye ameeso gaabho, na okugikora emitima gyabho gibhe emikongʼu, naho bhatarora kwa ameeso gaabho, bhatamanya kwa emitima gyabho, bhataaja bhanyihunjurire, naho mbatuurye.”

⁴¹ Isaaya yaagamba gayo, kwa okubha yaarora obhukuru bhwa Yeesu na okugamba amangʼana eguru yaaye.

⁴² Kora ego, abhatungi abhaaru bha Abhayahudi bhakamwikirirya Yeesu, nawe, kwa ekisigo kya Abhafarisaayo bhataagamba kubhurabhu ega, bhamwikiriirye, kwa okubha bhaaringa bharoobhoha okukenyibhwa mwisinagogi.

⁴³ Abhatungi bhayo, bhaaringa bhahanjiri bhukongʼu okusuukwa na abhantu, okukira okusuukwa na Waryubha.

Abhantu bharibhuturirwa ekiina kwa amangʼana ganú Yeesu agambiri

⁴⁴ Mbe, Yeesu akagamba kwa eriisi erinene ega, “Omuntu unú aranyikirirya oni, atakunyikirirya oni omwene, nawe, aramwikirirya na unú yantumiri.

⁴⁵ Hanú arandora oni, aramurora na unú yantumiri.

⁴⁶ Oni niijiri mukyaro munu kya endingaasi, naho kira omuntu unú aranyikirirya atige okubha mukisunte.

⁴⁷ “Omuntu wowonse unú areetegeerera amangʼana gaani, nawe, atakugagwata, oni ntakumubhuturira ekiina. Ndagamba ego, kwa okubha ntaaja mukyaro munu okubhabhuturira abhantu ekiina, nawe, naaja okubhatuurya.

⁴⁸ Omuntu wowonse unú aranyanga oni hamwi na amangʼana gaani, aribhuturirwa ekiina. Amangʼana ganú ndagamba, ngo garimubhuturira ekiina kurusiku rwa obhuteero.

⁴⁹ Ntakugamba kwa obhutungi bhwani omwene, nawe, Taata unú yantumiri, ngʼo yantumiri okugamba, kya ego ndagamba.

⁵⁰ Kweki, mmanyiri ega, eriragiriryo ryani rirabhahaana abhantu obhuhoru bhwa koko. Mbe, oni ndagamba ganú Taata yaantuma okugamba.”