Yohanɛɛsɩ 5 - New Testament

Yesu laba nɛ kalɩkalaɣ nakɛyɛ yɔɔ cɛ

¹ Pʋwayɩ lɛ, Yesu wolo Yeruusalɛm Yuda ñɩma kazandʋ natʋyʋ yɔɔ.

² Lɩm kujomuu nakʋyʋ wɛ Yeruusalɛm tɛtʋ kámaɣ́ yɔɔ nɔnɔɔ ŋgá payaɣ se Heŋ Nɔnɔɔ yɔ kɔ-cɔlɔ. Paasiɣ kʋ-cɔlɔ laŋasɩ kagbaanzɩ nɛ pɛɛ. Payaɣ peeɖe nɛ Ebree taa se Betɛsda.

³ Kʋdɔndɩnaa sakɩyɛ hɛnaɣ laŋasɩ ńzɩ́ sɩ-tɛɛ: yʋlʋmaa nɛ tala tɩnaa nɛ kalɩkalasɩ. [Paɖaŋaa se lɩm eciɣdi.

⁴ Mbʋ́ pʋyɔɔ yɔ, Kɩpaɣlʋ tiyiyu nɔɔyʋ lɩɣaɣnɩ ɛsɔdaa wiɖiyi wiɖiyi nɛ etiki kɩ-taa nɛ eciɣdiɣ lɩm nɛ kʋdɔndʋ weyi ɛcalɩɣ tibu pɩ-taa alɩwaatʋ ńdʋ́ yɔ, ɛ-yɔɔ cɛkɩ. Paa ɛ-kʋdɔŋ ɛɛwɛ ɛzɩma.]

⁵ Abalʋ nɔɔyʋ kɛwɛ peeɖe. Pɩnzɩ niidozo nɛ lutozo yɔ, pɩwɩɣʋ-ɩ yɔ.

⁶ Pɩkɛdaa lɛ, Yesu na-ɩ, ɛhɛnaa nɛ ɛtɩlɩ se ɖooo lɔŋ ɛwɛ peeɖe. Pʋ-yɔɔ ɛpɔzɩ-ɩ se: «Ñe-liu wɛɛ se ñɔ-yɔɔ ɛcɛ naa we?»

⁷ Kʋdɔndʋ ɛnʋ ecosi-i se: «Hayɩ Đajaa! Mɛnfɛyɩ nɔɔyʋ se ɛkpaɣ-m nɛ etisi-m lɩm taa alɩwaatʋ ndʋ́ peciɣdiɣ-pʋ yɔ. Mañakɩ pana se mowoki lɛ, nɔɔyʋ ñɛtɛm-m layʋʋ.»

⁸ Peeɖe Yesu heyi-i se: «Kʋyɩ ŋkpaɣ ña-ñalʋʋ nɛ ŋɖɔ!»

⁹ Ɛtɩyɔɔdɩ ḿbʋ́ lɛ, abalʋ ɛnʋ ɛ-yɔɔ cɛ nɛ ɛkpaɣ ɛ-ñalʋʋ nɛ ɛpazɩ ɖɔm. Ŋgʋ́, pɩɩkɛ kɩyakʋ kɩhɛzʋʋ wiye.

¹⁰ Pʋ-yɔɔ Yuda ñɩma awiya heyi-i se: «Sɔnɔ pɩkɛ kɩyakʋ kɩhɛzʋʋ, ɖa-paɣtʋ taha nʋmɔʋ se ŋsɩɣlɩ ña-ñalʋʋ.»

¹¹ Abalʋ ɛnʋ ecosi-wɛ se: «Weyi ɛlaba nɛ mɔ-yɔɔ cɛ yɔ, eheyi-m se mankpaɣ ma-ñalʋʋ nɛ mɔnɖɔ.»

¹² Peeɖe pɔpɔzɩ-ɩ se: «Anɩ ñeheyi-ŋ se ŋkpaɣ ña-ñalʋʋ nɛ ŋɖɔ?»

¹³ Abalʋ ɛnʋ ecosi-wɛ se ɛtasɩm-ɩ. Toovenim lɛ, ɛtapɩzɩɣ se ɛsɩm-ɩ. Mbʋ́ pʋyɔɔ yɔ, ɛyáa samaɣ kɛwɛ peeɖe nɛ Yesu sʋʋ ka-taa nɛ ɛɖɛɛ.

¹⁴ Pʋwayɩ lɛ, Yesu wolo Ɛsɔ ɖɩɣa taa nɛ ɛmaɣnɩ abalʋ weyi ɛ-yɔɔ cɛba ḿbʋ́ yɔ. Peeɖe eheyi-i se: «Welesi ŋnɩɩ, lɛɛlɛɛyɔ, ñɔ-yɔɔ cɛba. Taatasɩ kɩwɛɛkɩm labʋ nɛ nabʋyʋ tasɩ-ŋ labʋ nɛ pɩkɩlɩ ḿbʋ́.»

¹⁵ Peeɖe abalʋ ɛnʋ ewobi eheyi Yuda ñɩma awiya se Yesu labɩna nɛ ɛ-yɔɔ cɛ.

¹⁶ Pʋ-yɔɔ pakʋyɩ ɛ́lɛ́ yɔɔ, mbʋ́ pʋyɔɔ yɔ, kɩyakʋ kɩhɛzʋʋ wiye ɛlabɩ ḿbʋ́.

¹⁷ Peeɖe Yesu heyi-wɛ se: «Man-Caa Ɛsɔ lakɩ tʋmɩyɛ tam, ma ɖɔɖɔ ḿbʋ́.»

¹⁸ Ɛyɔɔdɩ ḿbʋ́ lɛ, Yuda ñɩma awiya tɛzɩɣ ñɩnʋʋ se pakʋ-ɩ. Mbʋ́ pʋyɔɔ yɔ, pɩtasɩɩnɩ se ɛtɔɖɔ kɩyakʋ kɩhɛzʋʋ paɣtʋ yɔɔ, ɛlɛ́, ɛtɔm ɖɔɖɔ se Ɛsɔ lɛ ɛ-Caa nɛ pɩwɩlɩɣ se ɛ nɛ ɩ pɛwɛ kɩmaŋ.

Caa cɛlɩ e-ɖoŋ tɩŋa ɛ-pɩyalʋ

¹⁹ Peeɖe Yesu kaɖɩ-wɛ se: «Toovenim lɛ, meheyiɣ-mɩ se ma Ɛsɔ Pɩyalʋ lɛ, maapɩzɩɣ mala nabʋyʋ yem man-tɩ yɔɔ. Mbʋ́ man-Caa Ɛsɔ lakɩ nɛ manaɣ yɔ, pi-ɖeke koŋ malakɩ. Mbʋ́ pɩtɩŋa payɩ man-Caa lakɩ yɔ, ḿbʋ́ ɖɔɖɔ malakɩ.

²⁰ Mbʋ́ pʋyɔɔ yɔ, Caa Ɛsɔ sɔɔlɩ ɛ-Pɩyalʋ ma nɛ ɛwɩlɩɣ-m mbʋ́ pɩtɩŋa payɩ ɛlakɩ yɔ. Ɛkɔŋ-m wɩlʋʋ tʋma sɔsɔna wena akɩlɩ wena malaba ɛzʋnɔ yɔ nɛ mala nɛ pɩɖɩɣzɩ-mɩ.

²¹ Toovenim lɛ, ɛzɩma mbʋ́ efeziɣ sɩɖaa nɛ ɛhaɣ-wɛ wezuu yɔ, ḿbʋ́ ɖɔɖɔ ɛ-Pɩyalʋ ma, mahaɣ mbá me-liu wɛɛ yɔ wezuu.

²² Đɔɖɔ lɛ, Caa ɛɛhʋʋnɩ nɔɔyʋ. Ɛlɛ́, ɛha ɛ-Pɩyalʋ ma waɖɛ se mahʋʋnɩ ɛyáa tɩŋa payɩ tɔm

²³ nɛ piyele patɩŋa paɖʋ Ɛsɔ Pɩyalʋ hɩɖɛ ɛzɩ paɖʋʋ Caa Ɛsɔ yɔ. Weyi ɛɛɖʋʋ Ɛsɔ Pɩyalʋ hɩɖɛ yɔ, ɛɛɖʋʋ-ɖɩ ɖɔɖɔ Caa Ɛsɔ weyi etiyi-i yɔ.

²⁴ Toovenim lɛ, meheyiɣ-mɩ se weyi ewelesiɣ mɔn-tɔm nɛ ɛwɛnɩ lidaʋ weyi etiyi-m yɔ ɛ-yɔɔ yɔ, ehiɣ wezuu maatɛŋ. Paahʋʋnɩ-ɩ. Ɛtɛm lɩʋ sɩm taa nɛ ehiɣ wezuu maatɛŋ.

²⁵ Toovenim lɛ, meheyiɣ-mɩ se alɩwaatʋ natʋyʋ kɔŋ, halɩ tɩtɛm talʋʋ. Tɩ-taa sɩɖaa kɔŋ nɩʋ Ɛsɔ Pɩyalʋ nɔɔ nɛ mbá panɩɣ yɔ, pehiɣ wezuu.

²⁶ Ɛzɩma mbʋ́ wezuu lɩɣnɩ Caa Ɛsɔ cɔlɔ yɔ, ḿbʋ́ ɖɔɖɔ eyebi se kɩlɩɩnɩ ɛ-Pɩyalʋ ma mɔn-cɔlɔ.

²⁷ Ɛha-m waɖɛ se mahʋʋnɩ ɛyáa tɔm, mbʋ́ pʋyɔɔ yɔ, ma lɛ Ɛyʋ Pɩyalʋ.

²⁸ Pɩtaaɖɩɣzɩ-mɩ. Alɩwaatʋ natʋyʋ kɔŋ nɛ pɩlaŋ taa ñɩma tɩŋa payɩ nɩɩ mɔ-nɔɔ

²⁹ nɛ pefe. Mbá palabɩ mbʋ́ pʋwɛ ɖeu yɔ pe-wezuu caɣʋ taa yɔ, pehikiɣ wezuu maatɛŋ nɛ piyele mbá paba labɩ kɩdɛkɛdɩm yɔ, pahʋʋnɩ-wɛ nɛ pakʋ pɔ-tɔm.»

Ɛsɔ pɩyalʋ wɛnɩ aseɣɖe tɩnaa sakɩyɛ

³⁰ Yesu tasɩ yɔɔdʋʋ ɖɔɖɔ se: «Maapɩzɩɣ mala nabʋyʋ yem man-tɩ yɔɔ. Mahʋʋnɩ ɛyáa ɛzɩ Ɛsɔ heyuu-m yɔ. Mɔn-tɔm hʋʋ tʋʋzaa, mbʋ́ pʋyɔɔ yɔ, maacaɣ se mala me-liu ñɩm. Ɛlɛ́, malakɩ mbʋ́ weyi etiyi-m yɔ e-liu wɛɛ yɔ.»

³¹ Yesu tasɩ yɔɔdʋʋ ɖɔɖɔ se: «Yee men-ɖeke maalɩzaɣnɩ man-tɩ tɩŋa ma-aseɣɖe yɔ, pɩɩwɩlaa se pɩtɛkɛ toovenim.

³² Ɛlɛ́, nɔɔyʋ lɩzɩɣnɩ ma-aseɣɖe. Manawa se aseɣɖe nɖɩ́ ɛlɩzɩɣ mɔ-yɔɔ yɔ, ɖɩkɛ toovenim.

³³ Itiyi ɛyáa Yohanɛɛsɩ cɔlɔ se powolo pɔpɔzɩ-ɩ mɔn-tɔm nɛ ɛ́lɛ́ lɩzɩ ma-aseɣɖe toovenim.

³⁴ Ma lɛ, pɩtɛkɛnɩ kɩcɛyʋʋ se ɛyáa ɩlɩzɩ ma-aseɣɖe. Ɛlɛ́, mɔyɔɔdɩ Yohanɛɛsɩ tɔm se pɩya mɩ-ñʋʋ.

³⁵ Yohanɛɛsɩ lɛ, ɛ́lɛ́ ñaawɛ ɛzɩ kanɖʋ ŋgʋ́ pɔsɔba nɛ kɩ-ñalɩmɩyɛ ñalɩ mɩ-yɔɔ yɔ. Pʋ-yɔɔ mɩ-laŋa hʋlʋmɩnɩ ñalɩmɩyɛ ńɖɩ́ alɩwaatʋ pazɩ.

³⁶ Ma lɛ, malɩzɩɣ aseɣɖe nɖɩ́ ɖɩkɩlɩ Yohanɛɛsɩ ñɩnɖɛ yɔ. Mbʋ́ pʋyɔɔ yɔ, tʋma wena man-Caa ɖʋ-m nɛ malakɩ yɔ, a-maɣmaɣ alɩzɩɣnɩ ma-aseɣɖe se Caa Ɛsɔ tiyini-m.

³⁷ Man-Caa weyi etiyi-m yɔ, ɛ-tɩ tɩŋa ɛlɩzɩ ma-aseɣɖe ɖɔɖɔ. Ŋgʋ́, wiɖiyi ɩtanɩɩ ɛ-nɔɔ, ɩtana ɛ-ɛsɩndaa ɖɔɖɔ kaʋ.

³⁸ Ɩɩɖɔkʋʋ ɛ-tɔm camɩyɛ, mbʋ́ pʋyɔɔ yɔ, ɩfɛyɩnɩ lidaʋ weyi ma Caa Ɛsɔ tiyaa yɔ mɔ-yɔɔ.

³⁹ Ɩtazɩɣ tɔm ndʋ́ pama Ɛsɔtɔm Takayaɣ taa yɔ tɩ-taa, mbʋ́ pʋyɔɔ yɔ, ɩmaɣzɩɣ se tɩhaɣ-mɩ wezuu maatɛŋ. Meheyiɣ-mɩ se ńdʋ́ lɩzɩɣnɩ ma-aseɣɖe!

⁴⁰ Ŋgʋ́, ɩɩcaɣ se ɩkɔɔ mɔn-cɔlɔ nɛ ihiɣ wezuu ŋ́gʋ́!

⁴¹ Pɩtɛkɛ ɛyáa samtʋ mañɩnɩɣ.

⁴² Mansɩm-mɩ: Ɛsɔ sɔɔlɩm fɛyɩ mɩ-taa!

⁴³ Mɔnkɔm man-Caa lone taa, ɛlɛ́, ɩɩcaɣ se ɩmʋ-m. Ŋgʋ́, yee nɔɔyʋ ɛkɔmnɩ ɛ-maɣmaɣ e-ɖoŋ yɔ, ɩmʋʋ-ɩ nesi naalɛ.

⁴⁴ Mbá mɩ ɩyɩɣyɩɣ ɖama nɛ ɩɩcaɣ se Ɛsɔ ɖeke koŋ ɛyɩɣyɩnɩ-mɩ yɔ, ɛzɩma ɩpɩzɩɣ ɩwɛnɩ lidaʋ mɔ-yɔɔ?

⁴⁵ Paa ḿbʋ́ yɔ, ɩtaamaɣzɩ se mowoki man-Caa Ɛsɔ cɔlɔ nɛ mankʋyɩ mɩ-yɔɔ. Ɛlɛ́, Mooyiizi weyi ɩtaɣ-ɩ liu yɔ, ɛnʋ wokina nɛ ɛkʋyɩ mɩ-yɔɔ.

⁴⁶ Mɔyɔɔdʋʋ ḿbʋ́, mbʋ́ pʋyɔɔ yɔ, mɔn-tɔm ɛmawa. Toovenim lɛ, yee iitisi ɛ-tɔm yɔ, iitisi ma-ñɩndʋ ɖɔɖɔ.

⁴⁷ Ɛlɛ́, yee itetisi tɔm ndʋ́ Mooyiizi mawa yɔ lɛ, ɛzɩma ɩpɩzɩɣ itisi ma-ñɩndʋ yɔ?»