Yohanɛɛsɩ 21 - New Testament

Yesu wɩlɩ ɛ-tɩ Tiberiyaadɩ teŋgu nɔɔ

¹ Pɩlabɩ kɩyakɩŋ cabɩ lɛ, Yesu tasɩ ɛ-tɩ wɩlʋʋ ɛ-tɔmkpɛlɩkɩyaa Tiberiyaadɩ teŋgu nɔɔ. Ɩna ɛzɩma ɛwɩlɩ-wɛ ɛ-tɩ yɔ:

² Siimɔɔ Pɩyɛ nɛ Tomaa weyi payaɣ se Đom yɔ nɛ Nataanayɛɛlɩ weyi ɛwɛ Kana Galilee egeetiye taa yɔ nɛ Zebedee pɩyalaa nɛ Yesu tɔmkpɛlɩkɩyaa lɛlaa naalɛ, paawɛ ɖoli kʋɖʋm.

³ Pɩkɛdaa lɛ, Siimɔɔ Pɩyɛ heyi-wɛ se: «Mowoki mankpa kpakpasɩ.» Ɛlɛ́, peheyi-i se: «Đa nɛ ŋ ɖiwolo.» Peeɖe pakʋyɩnɩ ɖoó pakpa kpɩyʋʋ taa nɛ powolo, ɛlɛ́, patakpa pʋyʋ.

⁴ Pɩwɩzɩ ñandʋʋ lɛ, Yesu lɩɩ teŋgu nɔɔ. Ɛlɛ́, tɔmkpɛlɩkɩyaa teɖiɣzini se ɛnʋ.

⁵ Pɩkɛdaa lɛ, ɛpɔzɩ-wɛ se: «Men-piya! Ɩkpa kpakpasɩ naa we?» Pocosi-i se: «Aayɩ.»

⁶ Ɛlɛ́, eheyi-wɛ se: «Ɩlɔ piyuu nɛ kpɩyʋʋ nɩwaŋ yɔɔ, ɩkpaɣ.» Peeɖe pɔlɔ-kʋ nɛ pakpa kpakpasɩ nɛ pusu kɩ-taa ɖo, halɩ paapɩzɩɣ se palɩzɩ-kʋ.

⁷ Peeɖe tɔmkpɛlɩkɩyʋ weyi Yesu kɩlɩ sɔɔlʋʋ yɔ, eheyi Pɩyɛ se: «Naze Kɩpaɣlʋ!» Siimɔɔ Pɩyɛ nɩwa se Kɩpaɣlʋ, ŋgʋ́, ɛɛhɔzɩ e-toko nɛ ɛsɩɩ. Pʋ-yɔɔ ɛkpaɣ-kʋ esuu nɛ ɛfalɩ lɩm taa se ewoki ɛ-cɔlɔ.

⁸ Pataakɩlɩ posinaʋ kidiiliŋ, pɩɩsɛɣ-wɛ ɛzɩ mɛtanaa mɩnʋʋ ḿbʋ́ yɔ. Lɛlaa talɩnɩ kpɩyʋʋ, pɔhɔŋaɣ piyuu, kɩ-taa su kpakpasɩ ɖo.

⁹ Petibini kpɩyʋʋ taa lɛ, pamaɣnɩ miŋ nɩɩyɩ, ɛ-yɔɔ nɛ kpakpasɩ nɛ tindine.

¹⁰ Ɛlɛ́, Yesu heyi-wɛ se: «Ɩkɔnɩ kpakpasɩ nzɩ́ ɩkpawa yɔ sɩ-taa nasɩyɩ.»

¹¹ Ɛlɛ́, Siimɔɔ Pɩyɛ kpa kpɩyʋʋ taa nɛ ɛhɔ piyuu nɛ ɛpɛɖɩ tataa, kɩ-taa nɛ kpakpasɩ sɔsɔsɩ ɖo: sɩɩwɛ mɩnʋʋ nɛ nɩɩnʋwa nɛ naadozo. Sɩɩɖɔ piyuu taa siŋŋ, ɛlɛ́, kɩtacɩyɩ.

¹² Peeɖe Yesu ya-wɛ se: «Ɩkɔɔ ɩtɔɔ.» Ɛlɛ́, pa-taa nɔɔyʋ tacazɩ-ɩ pɔzʋʋ se: «Ña anɩ?» Mbʋ́ pʋyɔɔ yɔ, paatɛm naʋ se ɛnʋ lɛ Kɩpaɣlʋ.

¹³ Ɛya-wɛ lɛ, ɛkpaɣ tindine ńɖɩ́ nɛ kpakpasɩ ńzɩ́ nɛ ɛcɛlɩ-wɛ.

¹⁴ Đooo Yesu fem nɛ ɛlɩɩnɩ sɩɖaa taa yɔ, tam naadozo ñɩmbʋ ɛwɩlɩ ɛ-tɩ ɛ-tɔmkpɛlɩkɩyaa ɛzʋnɔ yɔ.

Yesu nɛ Pɩyɛ pɔ-tɔm

¹⁵ Pɛtɛm tɔɔʋ lɛ, Yesu pɔzɩ Siimɔɔ Pɩyɛ se: «Yohanɛɛsɩ pɩyalʋ Siimɔɔ! Ŋsɔɔlɩ-m nɛ pɩkɩlɩ tɔmkpɛlɩkɩyaa lɛlaa sɔɔlʋʋ-m yɔ yaa we?» Ɛ́lɛ́ cosi-i se: «Ɛɛɛ, Kɩpaɣlʋ! Ŋnawa se mɔnsɔɔlɩ-ŋ.» Yesu heyi-i se: «Yee ḿbʋ́ cɔnɩ me-heɣsi yɔɔ camɩyɛ.»

¹⁶ Ɛlɛ́, ɛtasɩ-ɩ pɔzʋʋ se: «Yohanɛɛsɩ pɩyalʋ Siimɔɔ! Ŋsɔɔlɩ-m yaa we?» Pɩyɛ cosi-i se: «Ɛɛɛ, Kɩpaɣlʋ! Ŋnawa se mɔnsɔɔlɩ-ŋ.» Ɛlɛ́, eheyi-i se: «Yee ḿbʋ́ cɔnɩ me-heŋ yɔɔ camɩyɛ.»

¹⁷ Yesu tasɩ-ɩ pɔzʋʋ tozo ɖeɖe se: «Yohanɛɛsɩ pɩyalʋ Siimɔɔ! Ŋsɔɔlɩ-m yaa we?» Ɛtasɩ Pɩyɛ pɔzʋʋ tozo ɖeɖe ḿbʋ́ lɛ, ɛ́lɛ́ laŋɩyɛ wɛɛkɩ nɛ ecosi-i se: «Kɩpaɣlʋ! Ŋsɩm pɩtɩŋa payɩ. Ŋna ḿbʋ́ se mɔnsɔɔlɩ-ŋ!» Peeɖe Yesu heyi-i se: «Yee ḿbʋ́ cɔnɩ me-heŋ yɔɔ camɩyɛ.»

¹⁸ Toovenim lɛ, meheyiɣ-ŋ se: «Ŋŋkɛ evebu lɛ, ŋñɔɔzaɣ ña-tɩ nɛ ŋwoki ɖenɖe ñe-liu wɛɛ yɔ. Ɛlɛ́, ŋkɔŋ ŋkpadɩyɩ lɛ, ŋposuu ñe-nesi nɛ nɔɔyʋ tɔɔlɩ-ŋ tambaɖɛ nɛ ewoni-ŋ ɖenɖe ñe-liu fɛyɩ yɔ.»

¹⁹ Tɔm tʋnɛ Yesu wɩlɩnɩ ɛzɩma mbʋ́ Pɩyɛ kɔŋ sɩbʋ nɛ Ɛsɔ hɩɖɛ sɛɛ yɔ. Ɛtɛm yɔɔdʋʋ ḿbʋ́ lɛ, eheyi Pɩyɛ se: «Tɩŋ ma-wayɩ.»

Yesu nɛ e-tiyiyu weyi ɛkɩlɩ sɔɔlʋʋ yɔ

²⁰ Yesu yɔɔdɩ ḿbʋ́ lɛ, Pɩyɛ kisi ɛ-wayɩ nɛ ɛna tɔmkpɛlɩkɩyʋ weyi Yesu kɩlɩ sɔɔlʋʋ yɔ, ewokaɣ pɔ-cɔlɔ. Ɛnʋ kɛwɛlɩnɩ ɛ-tɩ nɛ Yesu yɔɔ alɩwaatʋ ndʋ́ pɔtɔkaɣ tɔɔnaɣ yɔ nɛ ɛpɔzɩ-ɩ se: «Kɩpaɣlʋ! Akɔŋ-ŋ ɖʋzʋʋ koyindinaa nesi taa?»

²¹ Pɩyɛ na-ɩ ḿbʋ́ lɛ, ɛpɔzɩ Yesu se: «Kɩpaɣlʋ! Nɛ ɛnɛ yɔ, ɛ́lɛ́ tɛŋnɩ we?»

²² Ɛlɛ́, Yesu pɩsɩnɩ-ɩ se: «Yee me-liu ɛwɛɛ se ɛcaɣ wezuu nɛ pɩsɩɩnɩ alɩwaatʋ ndʋ́ manpɩsɩɣ mɔnkɔɔ yɔ lɛ, pɩna-ŋ nɛ we? Ña lɛ, tɩŋ-m!»

²³ Pʋ-yɔɔ tɔm ńdʋ́ tɩyɛlɛ haɖaa ḿbá pa-taa se tɔmkpɛlɩkɩyʋ ɛnʋ ɛɛsɩkɩ. Ŋgʋ́, Yesu taaheyi Pɩyɛ se: «Tɔmkpɛlɩkɩyʋ ɛnʋ ɛɛkaɣ sɩbʋ.» Ɛlɛ́, ɛɛpɔzɩ-ɩ se: «Yee me-liu ɛwɛɛ se ɛcaɣ wezuu nɛ pɩsɩɩnɩ alɩwaatʋ ndʋ́ manpɩsɩɣ mɔnkɔɔ yɔ lɛ, pɩna-ŋ nɛ we?»

²⁴ Tɔmkpɛlɩkɩyʋ ɛnʋ, ɛ-maɣmaɣ ɛlɩzɩnɩ aseɣɖe nɛ ɛma tɔm ndʋ́ tɩlabɩ ḿbʋ́ yɔ. Đa lɛ, ɖɩnawa se ɛ-aseɣɖe kɛ toovenim.

²⁵ Mbʋ́ Yesu tasɩ labʋ yɔ, pʋɖɔ sakɩyɛ. Ɛlɛ́, yee paatɔm se pamaɣ pʋ-tɔm piye piye yɔ, takayɩsɩ nzɩ́ sɩ-taa pamaɣ-tʋ yɔ, sɩtaamaɣ kedeŋa kpeekpe yɔɔ.