Yohanɛɛsɩ 20 - New Testament

Piyeba pɩlaʋ kpɛɖɛ

¹ Kujuka wiye tanaŋ tɛɛ cu Magdala Maarɩɩ kʋyaa nɛ ewolo Yesu pɩlaʋ cɔlɔ nɛ pʋcɔ kalɩmaŋ koo. Ewoba lɛ, ɛmaɣnɩ patʋlɩ pɩyɛ kʋ-nɔɔ nɛ pasɩɩ-ɖɩ kɩjaʋ.

² Peeɖe esewa nɛ ewolo Siimɔɔ Pɩyɛ nɛ tɔmkpɛlɩkɩyʋ weyi Yesu kɩlɩ sɔɔlʋʋ yɔ pɔ-cɔlɔ nɛ eheyi-wɛ se: «Palɩzɩ Kɩpaɣlʋ ɛ-pɩlaʋ taa nɛ ɖɩɩnaɣ ɖenɖe pasɩ-ɩ yɔ.»

³ Eheyi-wɛ ḿbʋ́ lɛ, paba kʋyɩ se powoki pɩlaʋ cɔlɔ.

⁴ Pɛɖɛɣaɣ lɛ, pakpaɣ seya nɛ tɔmkpɛlɩkɩyʋ ɛnʋ ɛlɛyɩ Pɩyɛ talʋʋ.

⁵ Ɛtalaa lɛ, eluŋ nɛ ɛcɔnɩ pɩlaʋ taa nɛ ɛna pɩsaŋ weyi paahuuzi Yesu yɔɔ yɔ tataa. Ɛlɛ́, ɛtasʋʋ kɩ-taa.

⁶ Siimɔɔ Pɩyɛ ñatalɩ wayɩ wayɩ lɛ, ɛ́lɛ́ sʋʋ pɩlaʋ taa nɛ ɛmaɣnɩ pɩsaŋ weyi paahuuzi Yesu yɔɔ yɔ tataa.

⁷ Ɛna ɖɔɖɔ pɩsaʋ ŋgʋ́ paahɔkɩ ɛ-ñʋʋ yɔ. Pekpiyi-kʋ nɛ pasɩɩnɩ nɖeke.

⁸ Peeɖe tɔmkpɛlɩkɩyʋ lɛlʋ weyi ɛcalɩ talʋʋ yɔ, ɛsʋ kɩ-taa ɖɔɖɔ nɛ ɛna ḿbʋ́ nɛ etisi.

⁹ Ɛlɛ́, pataanɩdɩ tɔm ndʋ́ pama Ɛsɔtɔm Takayaɣ taa se pʋwɛɛ se Yesu ɛsɩ nɛ efe yɔ tɩ-tɔbʋʋ.

¹⁰ Pʋwayɩ lɛ, tɔmkpɛlɩkɩyaa mbá pa-naalɛ papɩsɩ pɛ-tɛ.

Yesu wɩlɩ ɛ-tɩ Magdala tɛtʋ taa Maarɩɩ

¹¹ Magdala Maarɩɩ ñaasɩŋ pɩlaʋ cɔlɔ nɛ ewiliɣ. Pɩkɛdaa lɛ, eluŋ nɛ wiluu se ɛcɔŋnɩ kɩ-taa.

¹² Ɛcɔnaa lɛ, ɛna Ɛsɔ tiyiyaa naalɛ nabɛyɛ, posu wondu kʋhʋlʋmʋtʋ nɛ pacaɣ ɖenɖe paahɛzɩ Yesu yɔ: lɛlʋ ɛ-ñʋʋ ɖeɖe nɛ lɛlʋ ɛ-naŋgbanzɩ ɖeɖe.

¹³ Peeɖe pɔpɔzɩ-ɩ se: «Đɔ-kɔɔ! Pɩlabɩ ɛzɩma nɛ ŋwiliɣ ḿbʋ́?» Ecosi-wɛ se: «Palɩzɩ man-Kɩpaɣlʋ nɛ maanaɣ ɖenɖe pasɩ-ɩ yɔ.»

¹⁴ Ɛyɔɔdɩ ḿbʋ́ lɛ, ekisi ɛ-wayɩ nɛ ɛna Yesu sɩŋaa. Ɛlɛ́, eteɖiɣzini se ɛnʋ.

¹⁵ Peeɖe ɛ́lɛ́ pɔzɩ-ɩ se: «Đɔ-kɔɔ! Pɩlabɩ ɛzɩma nɛ ŋwiliɣ ḿbʋ́? Anɩ ŋñɩnɩɣ?» Ɛmaɣzaɣ se kaɖaɣ yɔɔ cɔnɩyʋ pɔzʋʋnɩ-ɩ ḿbʋ́. Pʋ-yɔɔ eheyi-i se: «Đajaa! Yee ñalɩzɩnɩ-ɩ yɔ, ŋheyi-m ɖenɖe ŋsɩ-ɩ yɔ nɛ mowolo mankpaɣ-ɩ.»

¹⁶ Peeɖe Yesu ya-ɩ se: «Maarɩɩ!» Ɛlɛ́, ekisini ɛ-yɔɔ nɛ ɛsɛɛnɩ Ebree taa se: «Rabuunii!» Pʋ-tɔbʋʋ se Wɩlɩyʋ.

¹⁷ Yesu heyi-i se: «Taalaɣzɩ-m, mbʋ́ pʋyɔɔ yɔ, mantakpadɩ man-Caa cɔlɔ. Ɛlɛ́, wolo ŋheyi mɛ-ɛgbaɣdɩnaa se mankpaɣ weyi ɛkɛ man-Caa nɛ ɛtɛ ɛkɛ mɛ-Ɛsɔ yɔ ɛ-cɔlɔ. Ɛnʋ ɖɔɖɔ lɛ mɩ-Caa nɛ mɩ-Ɛsɔ.»

¹⁸ Peeɖe Magdala Maarɩɩ ɛnʋ ewoba nɛ eheyi Yesu tɔmkpɛlɩkɩyaa se ɛna Kɩpaɣlʋ nɛ ɛkɛdɩ-wɛ ɖɔɖɔ ndʋ́ ɛ́lɛ́ keheyi-i yɔ.

Yesu wɩlɩ ɛ-tɩ e-tiyiyaa

¹⁹ Kujuka ŋ́gá ka-ɖanaɣ Yesu tɔmkpɛlɩkɩyaa woba pekpeɣli kuduyuu nakʋyʋ tɛɛ. Paakaɖɩ pɔ-yɔɔ, mbʋ́ pʋyɔɔ yɔ, peseɣaɣ Yuda ñɩma ñʋndɩnaa. Pɩkɛdaa lɛ, Yesu lɩɩ pɛ-hɛkʋ taa yem nɛ ɛsɩŋ nɛ eheyi-wɛ se: «Ɩwɛɛ laŋhɛzɩyɛ taa!»

²⁰ Ɛyɔɔdɩ ḿbʋ́ lɛ, ɛwɩlɩ-wɛ e-nesi nɛ ɛ-hʋyʋʋ. Pana ḿbʋ́ lɛ, pa-taa hʋlʋmɩ siŋŋ se pana Kɩpaɣlʋ.

²¹ Peeɖe Yesu tasɩ yɔɔdʋʋ se: «Ɩwɛɛ laŋhɛzɩyɛ taa! Mentiyiɣ-mɩ ɖɔɖɔ ɛzɩ man-Caa tiyuu-m yɔ.»

²² Ɛtɛm yɔɔdʋʋ ḿbʋ́ lɛ, efezi pɔ-yɔɔ fʋʋʋ nɛ ɛtɔ se: «Ɩmʋ maha-mɩ Fezuu Kiɖeɖeu!

²³ Mbá ikpeɣiɣ-wɛ pa-kɩwɛɛkɩm yɔ, Ɛsɔ kpeɣiɣ-wɛ ɖɔɖɔ. Mbá iikpeɣiɣ paba yɔ, eekpeɣiɣ-wɛ ɖɔɖɔ.»

Yesu wɩlɩ ɛ-tɩ Tomaa

²⁴ Yesu woba ɛ-tɔmkpɛlɩkɩyaa hɛkʋ taa ḿbʋ́ lɛ, Tomaa weyi ɛkɛ ɛ-tɔmkpɛlɩkɩyaa hiu nɛ naalɛ taa lɛlʋ nɛ payaɣ-ɩ se Đom yɔ, ɛtaawɛɛ.

²⁵ Pʋ-yɔɔ tɔmkpɛlɩkɩyaa lɛlaa heyi-i se: «Đɩna Kɩpaɣlʋ.» Ɛlɛ́, Tomaa heyi-wɛ se: «Yee mantana ñɩma pɔŋ e-nesi taa nɛ mɛlɛkɩ me-niye ɩ-taa nɛ mɛlɛkɩ ɖɔɖɔ me-nesi ɛ-hʋyʋʋ taa yɔ, maatisiɣ kaʋ.»

²⁶ Kɩyakʋ sɩŋaa lɛ, Yesu tɔmkpɛlɩkɩyaa ɖaɣnɩ kpeɣluu kuduyuu ŋ́gʋ́ kɩ-tɛɛ. Puwiye ńɖɩ́ lɛ, Tomaa kɛwɛ pɔ-cɔlɔ. Paaɖɩɣ nɔnɔsɩ nɛ pakaɖɩ. Ɛlɛ́, Yesu ɖaɣnɩ lɩʋ pɛ-hɛkʋ taa yem nɛ ɛsɩŋ nɛ eheyi-wɛ se: «Ɩwɛɛ laŋhɛzɩyɛ taa!»

²⁷ Pʋwayɩ lɛ, eheyi Tomaa se: «Cɔnɩ me-nesi taa, lɛkɩ ñe-niye, posi ñe-nesi nɛ ŋlɛkɩ ma-hʋyʋʋ taa. Yele ñɔ-hɔyɛ ɖoŋ nɛ ŋwɛnɩ lidaʋ mɔ-yɔɔ.»

²⁸ Peeɖe Tomaa cosi-i se: «Man-Kɩpaɣlʋ! Mɛ-Ɛsɔ!»

²⁹ Ɛlɛ́, Yesu pɔzɩ-ɩ se: «Ŋna-m yɔɔ ŋwɛnɩ lidaʋ mɔ-yɔɔ? Mbá patana-m nɛ pɛwɛnɩ lidaʋ mɔ-yɔɔ yɔ, pehiɣ pa-tɩ!»

Ɛbɛ yɔɔ pama takayaɣ kanɛ?

³⁰ Yesu kalabɩ hama lakasɩ lɛɛsɩ sakɩyɛ ɛ-tɔmkpɛlɩkɩyaa ɛsɩndaa, ɛlɛ́, patama sɩ-tɔm takayaɣ kanɛ ka-taa.

³¹ Piyele ndʋ́ tʋtʋ wɛ ka-taa yɔ, pama-tʋ se ɩwɛnɩ lidaʋ se Yesu lɛ Ɛsɔ Pɩyalʋ nɛ ɛtɛ ɛkɛ Weyi Ɛsɔ Lɩzaa Yɔ nɛ piyele pɩtɩŋnɩ ɛ-yɔɔ nɛ ihiɣ wezuu.