Yohanɛɛsɩ 2 - New Testament

Yesu laba nɛ lɩm pɩsɩ sʋlʋm Kana tɛtʋ taa

¹ Kɩyakɩŋ naalɛ wayɩ lɛ, palakaɣ halɩkpaɣyɛ kazandʋ Kana, Galilee egeetiye taa. Yesu ɖoo kɛwɛ peeɖe.

² Paaya Yesu nɛ ɛ-tɔmkpɛlɩkɩyaa kazandʋ ńdʋ́ ti-ɖeɖe.

³ Pɩkɛdaa lɛ, sʋlʋm tɛ. Peeɖe Yesu ɖoo woba nɛ eheyi-i se: «Sʋlʋm tɛm ɛyáa cɔlɔ.»

⁴ Yesu cosi-i se: «Halʋ! Pɩtɛkɛ ñeheyiɣni-m mbʋ́ pʋwɛɛ se mala yɔ. Ma-alɩwaatʋ tatalɩda.»

⁵ Peeɖe e-ɖoo heyi tʋmlaɖaa mbá pɛwɛ peeɖe yɔ se: «Ɩla mbʋ́ pɩtɩŋa payɩ ɛpɔzʋʋ-mɩ yɔ.»

⁶ Pulona naayɛ loɖo kɛwɛ peeɖe nɛ Yuda ñɩma ɖʋʋ a-taa lɩm nɛ palakɩna pa-cɩɖɩcɩɖɩ wɛtʋ sɔnzɩ. Papɩzaɣ se paɖʋ paa nɖɩ́ ɖɩ-taa ɛzɩ lɩm litanaa mɩnʋʋ yɔ.

⁷ Pɩkɛdaa lɛ, Yesu heyi tʋmlaɖaa se polu lɩm nɛ papɩyɩ a-taa nɛ pusu. Peeɖe paba luwa nɛ pusu a-taa ɖo.

⁸ Pɛtɛma lɛ, eheyi-wɛ se pocozi lɩm ḿbʋ́ pazɩ nɛ powoni pɛcɛlɩ halɩkpaɣyɛ kazandʋ yɔɔ cɔnɩyʋ nɛ ɛɖɩŋ. Ɛlɛ́, pala ḿbʋ́ ɖɔɖɔ.

⁹ Powonaa pɛcɛlɩ ɛ́lɛ́ nɛ ɛɖɩŋ lɛ, lɩm ḿbʋ́ pɩpɩsɩ sʋlʋm. Ɛtana ɖenɖe pɩlɩnaa yɔ. Ɛlɛ́, tʋmlaɖaa mbá pocozi-pʋ nɛ pɛcɛlɩ-ɩ yɔ, paba sɩm ɖenɖe pɩlɩnaa yɔ. Peeɖe ɛya halɩkpaɣyʋ

¹⁰ nɛ eheyi-i se: «Sʋlʋm kɩbam ɛyáa calɩɣnɩ ñɔʋ. Pahakɩ lɛ, palɩzɩ mbʋ́ pɩfɛyɩ ɖeu yɔ. Ɛlɛ́, sʋlʋm kɩbam ñɛwɛɛ ñɔ-cɔlɔ nɛ pɩtalɩ alɩwaatʋ tʋnɛ tɩ-yɔɔ!»

¹¹ Ḿbʋ́ Yesu labɩ ɛ-kajalaɣ hama lakasɩ. Kana tɛtʋ ndʋ́ tɩwɛ Galilee egeetiye taa yɔ, tɩ-taa ɛlabɩ-sɩ. Ḿbʋ́ ɛwɩlɩnɩ e-ɖoŋ koboyaɣ ñɩŋ nɛ ɛ-tɔmkpɛlɩkɩyaa wɛnɩ lidaʋ ɛ-yɔɔ.

¹² Pʋwayɩ lɛ, ɛ nɛ e-ɖoo nɛ e-newaa nɛ ɛ-tɔmkpɛlɩkɩyaa pakʋyɩ powolo Kapɛrnayum nɛ pacaɣ kɩyakɩŋ pazɩ.

Yesu ɖɔɔnɩ tadɩyɛ tɩnaa Yeruusalɛm Ɛsɔ ɖɩɣa taa

¹³ Yuda ñɩma Paska Kazandʋ ñɔtaa. Pʋ-yɔɔ Yesu kʋyaa nɛ ewolo Yeruusalɛm.

¹⁴ Ɛtalaa lɛ, ɛsʋʋ Ɛsɔ ɖɩɣa kadaɣ taa nɛ ɛmaɣnɩ ɛyáa nabɛyɛ, pɛpɛdaɣ naŋ nɛ heŋ nɛ halikukunaa nɛ lɛlaa ñacaɣ kpelisi yɔɔ nɛ pɔyɔkʋʋ liidiye.

¹⁵ Peeɖe ɛkpaɣ nimee nɛ ɛlʋʋ ɛgbazɩyɛ nɛ ɛɖɔɔnɩnɩ-wɛ ka-taa, pa nɛ pe-heŋ nɛ pa-naŋ nɛ pese palɩɩ nɛ piyele etuzi pa-taabɩlɩnaa ɛpɛɖɩ nɛ liidiye mɩzɩ.

¹⁶ Ɛlɛ́, eheyi halikukunaa pɛdɩyaa se: «Ɩkpaɣ mɩ-halikukunaa nɛ ɩɖɛɛ lɔŋ. Ɩtaapɩsɩ man-Caa ɖɩɣa kɩyakʋ.»

¹⁷ Peeɖe ɛ-tɔmkpɛlɩkɩyaa tɔzɩ tɔm ndʋ́ pama Ɛsɔtɔm Takayaɣ taa yɔ tɩ-yɔɔ. Ńdʋ́ lɛ se: «Hayɩ Ɛsɔ, mɔnsɔɔlɩ ña-ɖɩɣa sɔɔlʋʋ mbʋ́ yɔ, pʋkɔŋ-m kʋʋ.»

¹⁸ Ɛlɛ́, Yuda ñɩma awiya pɔzɩ-ɩ se: «Hama lakasɩ nzɩ́ ŋpɩzɩɣ ŋla nɛ ŋwɩlɩnɩ-ɖʋ se pʋwɛɛ se ŋla ḿbʋ́?»

¹⁹ Yesu cosi-wɛ se: «Yee ɩyɔkɩ Ɛsɔ ɖɩɣa kanɛ yɔ, mamaɣ-kɛ nɛ kɩyakɩŋ naadozo.»

²⁰ Peeɖe pɔpɔzɩ-ɩ se ɛzɩma ɛpɩzɩɣ ɛma ɖɩɣa ŋgá pama-kɛ nɛ pɩnzɩ nɩɩnaza nɛ loɖo yɔ nɛ kɩyakɩŋ naadozo?

²¹ Ŋgʋ́, Yesu yɔɔdʋʋ Ɛsɔ ɖɩɣa tɔm yɔ, ɛ-maɣmaɣ ɛ-tɔm ɛyɔɔdaɣ ḿbʋ́.

²² Pʋ-yɔɔ Yesu femnɩ sɩm taa lɛ, ɛ-tɔmkpɛlɩkɩyaa tɔzɩ se eeheyi-wɛ ḿbʋ́ nɛ petisi tɔm ndʋ́ eheyi-wɛ yɔ nɛ ndʋ́ pama Ɛsɔtɔm Takayaɣ taa yɔ se tɩkɛ toovenim.

Yesu sɩm ɛyáa lɩmaɣza

²³ Paska Kazandʋ talaa lɛ, ɛyáa na hama lakasɩ nzɩ́ Yesu labɩ Yeruusalɛm yɔ nɛ pɛwɛnɩ lidaʋ ɛ-yɔɔ.

²⁴ Ɛlɛ́, ɛnʋ tataa-wɛ liu, mbʋ́ pʋyɔɔ yɔ, ɛsɩm patɩŋa payɩ pa-lɩmaɣza.

²⁵ Pɩtaapɔzɩ se pacazɩ-ɩ heyuu ɛyáa tɔm. Mbʋ́ pʋyɔɔ yɔ, ɛ-maɣmaɣ ɛsɩm mbʋ́ pʋwɛ pa-taa yɔ.