Yohanɛɛsɩ 16 - New Testament

¹ Meheyiɣ-mɩ ḿbʋ́ se ɩtaatɔlɩ lidaʋ nʋmɔʋ taa.

² Pɔkɔŋ-mɩ ɖaŋʋʋ se ɩtaatasɩ wobu Ɛsɔ ɖɩsɛyɛ naɖɩyɛ taa. Halɩ alɩwaatʋ natʋyʋ kɔŋ nɛ mbá pakʋʋ-mɩ yɔ, pamaɣzɩ se Ɛsɔ tʋmɩyɛ palakɩ ḿbʋ́.

³ Pɔkɔŋ labʋ ḿbʋ́, mbʋ́ pʋyɔɔ yɔ, patasɩ Caa yaa ma.

⁴ Ɛlɛ́, meheyi-mɩ ḿbʋ́ se yee pɔkɔm palakɩ ḿbʋ́ lɛ, ɩtɔzɩ se maatɛm-mɩ-tʋ heyuu. Mantaaheyi-mɩ tɔm ńdʋ́ ɖooo ɛzɩ manpazʋʋ man-tʋmɩyɛ labʋ yɔ, mbʋ́ pʋyɔɔ yɔ, ma nɛ mɩ ɖɩɩwɛna.»

Toovenim Fezuu kaɣ kɔm

⁵ Yesu tasɩ yɔɔdʋʋ se: «Lɛɛlɛɛyɔ, mowoki weyi etiyi-m yɔ ɛ-cɔlɔ nɛ mɩ-taa nɔɔyʋ ɛɛpɔzʋʋ-m se: ‹Le ŋwoki?›

⁶ Meheyi-mɩ ḿbʋ́ yɔɔ mɩ-laŋa wɛɛkaa pɩtɩɩfɛyɩ.

⁷ Paa ḿbʋ́ yɔ, meheyiɣ-mɩ toovenim se: yee mɛnɖɛwa yɔ, pɩkɩlɩɣ-mɩ sɛʋ. Mbʋ́ pʋyɔɔ yɔ, mɛntɛɖɛɛ yɔ, Sɩnɩyʋ ɛɛkɔŋ mɩ-cɔlɔ. Ɛlɛ́, yee mɛnɖɛwa yɔ, mentiyiɣni-mɩ-ɩ.

⁸ Alɩwaatʋ ndʋ́ ɛkɔŋ yɔ, ɛwɩlɩɣ kedeŋa ñɩma mbʋ́ pɩkɛ kɩwɛɛkɩm yɔ nɛ mbʋ́ pʋtʋʋzaa yɔ nɛ ɛzɩma mbʋ́ Ɛsɔ hʋʋ tɔm yɔ.

⁹ Ɛwɩlɩɣ-wɛ mbʋ́ pɩkɛ kɩwɛɛkɩm yɔ, ḿbʋ́ lɛ se pɛfɛyɩnɩ lidaʋ mɔ-yɔɔ.

¹⁰ Ɛwɩlɩɣ-wɛ mbʋ́ pʋtʋʋzaa yɔ, ḿbʋ́ lɛ se mowoki Caa cɔlɔ nɛ ɩɩtasɩɣ-m naʋ.

¹¹ Ɛwɩlɩɣ-wɛ ɛzɩma mbʋ́ Ɛsɔ hʋʋ tɔm yɔ, ḿbʋ́ lɛ se ɛtɛm hʋnaʋ kedeŋa wiyaʋ.

¹² Mantasɩ wɛnaʋ tɔm sakɩyɛ se meheyiɣ-mɩ, ɛlɛ́, ɩɩpɩzɩɣ ɩnɩɩ tɩ-tɔbʋʋ lɛɛlɛɛyɔ.

¹³ Toovenim Fezuu ŋ́gʋ́, kʋkɔŋ lɛ, kɩwɩlɩ-mɩ toovenim nʋmɔʋ tɩŋa. Pɩtɛkɛ ki-ɖoŋ ɖeke kʋyɔɔdʋʋna. Ɛlɛ́, ndʋ́ tɩtɩŋa payɩ kɩnɩɣ yɔ, kɩkɛdɩɣ-mɩ nɛ kiheyi-mɩ mbʋ́ pʋkɔŋ labʋ yɔ.

¹⁴ Kʋkɔŋ yebu nɛ ma-hɩɖɛ sɛɛ, mbʋ́ pʋyɔɔ yɔ, tɔm ndʋ́ mɔyɔɔdaa yɔ, ńdʋ́ kʋkɔŋ-mɩ heyuu.

¹⁵ Mbʋ́ pɩtɩŋa payɩ Caa wɛna yɔ, pɩkɛ ma-ñɩm. Pʋ-yɔɔ mɔntɔm se tɔm ndʋ́ mɔyɔɔdaa yɔ, ńdʋ́ Fezuu Kiɖeɖeu kɔŋ-mɩ heyuu.»

¹⁶ Yesu tasɩ yɔɔdʋʋ se: «Pɩkazɩ pazɩ, ɩɩtasɩɣ-m naʋ nɛ pɩtasɩ labʋ pazɩ lɛ, ɩtasɩ-m naʋ.»

¹⁷ Peeɖe ɛ-tɔmkpɛlɩkɩyaa taa lɛlaa pɔzaɣ ɖama se: «Tɔm ndʋ́ ɛyɔɔdɩ ḿbʋ́ yɔ, tɩ-tɔbʋʋ se we? Nɛ ndʋ́ ɛtasɩ yɔɔdʋʋ se ewoki Caa cɔlɔ yɔ, tʋtʋ tɔbʋʋ se we?

¹⁸ Alɩwaatʋ pazɩ ndʋ́ ɛyɔɔdʋʋ tɩ-tɔm yɔ, tɩ-tɔbʋʋ se we? Đɩɩsɩŋ ndʋ́ ɛcaɣ yɔɔdʋʋ yɔ.»

¹⁹ Yesu kanawa se pacaɣ-ɩ tɔm pɔzʋʋ. Pʋ-yɔɔ ɛpɔzɩ-wɛ se: «Mɔyɔɔdaa se: ‹Pɩkazɩ pazɩ ɩɩtasɩɣ-m naʋ nɛ pɩtasɩ labʋ pazɩ lɛ, ɩtasɩ-m naʋ› yɔɔ ɩwɛɛ ɩpɔzʋʋ ɖama tɔm naa we?

²⁰ Toovenim lɛ, mankaɖɩɣ-mɩ se: ɩkɔŋ wiluu nɛ ɩtɩmɩ. Ɛlɛ́, kedeŋa ñɩma laŋa hʋlʋmʋʋ. Mɩ-laŋa kɔŋ wɛɛkʋʋ, ɛlɛ́, mɩ-laŋwɛɛkɩyɛ ńɖɩ́, ɖɩkɔŋ pɩsʋʋ laŋhʋlʋmɩyɛ.

²¹ Alɩwaatʋ ndʋ́ halʋ lʋlʋʋ yɔ, ɛ-laŋɩyɛ wɛɛkɩɣ. Mbʋ́ pʋyɔɔ yɔ, pɩtalaa se ɛtɔɔ kʋñɔŋ. Ɛlɛ́, ɛtɛŋ lʋlʋʋ lɛ, ɛsɔɔ ɛ-kʋñɔŋ yɔɔ, mbʋ́ pʋyɔɔ yɔ, ɛ-taa hʋlʋmaa se ɛlʋlɩ pɩɣa.

²² Mɩ ɖɔɖɔ lɛ, mɩ-laŋa wɛɛkɩ lɛɛlɛɛyɔ. Ɛlɛ́, mankaɣ-mɩ tasʋʋ naʋ nɛ ahʋlʋmɩ, nɔɔyʋ ɛɛpɩzɩɣ ɛwɛɛkɩ-yɛ ɖɔɖɔ kaʋ.

²³ Puwiye ńɖɩ́ lɛ, ɩɩtasɩɣ-m pɔzʋʋ natʋyʋ. Toovenim lɛ, meheyiɣ-mɩ se: mbʋ́ pɩtɩŋa payɩ ɩsʋlʋmʋʋ Caa nɛ mɔ-nɔɔ yɔ, ɛhaɣ-mɩ-pʋ.

²⁴ Halɩ nɛ sɔnɔ ɩtatɩɩsʋlʋmɩda nabʋyʋ nɛ mɔ-nɔɔ. Pʋ-yɔɔ lɛ, ɩsʋlʋmɩ-ɩ, ɛhaɣ-mɩ nɛ mɩ-laŋa tɛzɩ hʋlʋmʋʋ.»

Yesu wabɩ kedeŋa

²⁵ Yesu tasɩ ɛ-tɔmkpɛlɩkɩyaa heyuu se: «Meheyi-mɩ tɔm ńdʋ́ tɩtɩŋa nɛ aduwa taa. Alɩwaatʋ natʋyʋ kaɣ kɔm nɛ maatasɩɣ-mɩ yɔɔdɩnaʋ ḿbʋ́. Ɛlɛ́, meheyiɣ-mɩ Caa tɔm kpayɩ.

²⁶ Pɩtalɩ puwiye ńɖɩ́ lɛ, ɩpɔzɩ Caa nɛ mɔ-nɔɔ. Ɛlɛ́, maaheyiɣ-mɩ se mankaɣ-ɩ tenduu mɩ-yɔɔ.

²⁷ Mbʋ́ pʋyɔɔ yɔ, ɛ-maɣmaɣ ɛsɔɔlɩ-mɩ se ɩsɔɔlɩ-m nɛ ɩwɛnɩ lidaʋ se ɛ-cɔlɔ malɩnaa.

²⁸ Caa cɔlɔ malɩnaa nɛ mɔnkɔɔ kedeŋa yɔɔ. Lɛɛlɛɛyɔ, mankʋyʋʋ kɔ-yɔɔ nɛ manpɩsɩ ɛ-cɔlɔ.»

²⁹ Peeɖe ɛ-tɔmkpɛlɩkɩyaa heyi-i se: «Lɛɛlɛɛyɔ ŋyɔɔdʋʋ kpayɩ, ŋŋtasɩɣ yɔɔdʋʋnɩ aduwa taa.

³⁰ Lɛɛlɛɛyɔ ɖɩnawa se ŋsɩm pɩtɩŋa payɩ, pɩtacazɩ pɔzʋʋ se pɔpɔzɩ-ŋ natʋyʋ. Pʋ-yɔɔ ɖɩwɛnɩ lidaʋ se Ɛsɔ cɔlɔ ŋlɩnaa.»

³¹ Peeɖe Yesu pɔzɩ-wɛ se: «Ɩtɔŋ se lɛɛlɛɛyɔ ɩwɛnɩ lidaʋ mɔ-yɔɔ yaa?

³² Tɔ! Alɩwaatʋ natʋyʋ kɔŋ, halɩ tɩtɛm talʋʋ. Tɩ-taa ɩmɩzɩɣ ɖama nɛ paa weyi ekpe ɛ-tɛ nɛ iyele men-ɖeke. Paa ḿbʋ́ yɔ, piiyeki men-ɖeke koŋ, Caa wɛɣ mɔn-cɔlɔ.

³³ Meheyi-mɩ tɔm ńdʋ́ tɩtɩŋa payɩ se ɩwɛɛ laŋhɛzɩyɛ taa ma nɛ mɩ ɖɛ-kpɛndʋʋ taa. Ɩkɔŋ nɩʋ siziŋ kedeŋa yɔɔ cɩnɛ. Ɛlɛ́, ɩɖɔkɩ mɩ-tɩ kpam! Mbʋ́ pʋyɔɔ yɔ, mɛntɛm kɔ-yɔɔ ɖoŋ tɩŋa wabʋ!»