Yohanɛɛsɩ 15 - New Testament

Yesu lɛ tɩʋ ŋgʋ́ popuu ki-pee sʋlʋm yɔ kɩ-maɣmaɣ

¹ Yesu tasɩ yɔɔdʋʋ se: «Ma lɛ tɩʋ ŋgʋ́ popuu ki-pee sʋlʋm yɔ kɩ-maɣmaɣ nɛ man-Caa lɛ kʋ-tʋ.

² Ɛsɛtɩɣ pilinzi nzɩ́ sɩwɛ mɔ-yɔɔ nɛ sɩɩlʋlʋʋ yɔ nɛ piyele ɛñɔɔzɩ nzɩ́ sɩlʋlʋʋ yɔ camɩyɛ nɛ sɩtɛzɩ lʋlʋʋ.

³ Tɔm ndʋ́ mawɩlɩ-mɩ yɔ, tɩtɛm-mɩ ñɔɔzʋʋ nɛ ɩwɛɛ cɩɖɩcɩɖɩ.

⁴ Pʋwɛɛ se ma nɛ mɩ ɖɩkpɛndɩ ɖama ḿbʋ́ nɛ ɖɩwɛɛ tam. Yee piliŋa ɛwɛɛ nɛ kɛfɛyɩ tɩʋ yɔɔ yɔ, kaapɩzɩɣ kalʋlɩ. Ḿbʋ́ ɖɔɖɔ pʋwɛnɩ-mɩ, yee ɩtɛkpɛndɩ mɔ-yɔɔ ḿbʋ́ tam yɔ, ɩɩpɩzɩɣ ɩwɛnɩ wazaɣ.

⁵ Ma lɛ tɩʋ ŋgʋ́ popuu ki-pee sʋlʋm yɔ nɛ mɩ lɛ pilinzi. Weyi ma nɛ ɩ ɖɩkpɛndɩ ɖama tam yɔ, ɛwɛɣ wazaɣ siŋŋ. Mbʋ́ pʋyɔɔ yɔ, pɩtɛkɛ mɔ-yɔɔ yɔ, ɩɩpɩzɩɣ ɩla pʋyʋ.

⁶ Weyi ɛtɛkpɛndɩ mɔ-yɔɔ tam yɔ, pɔlɔ-ɩ nɛ awayɩ ɛzɩ piliŋa yɔ nɛ ɛwɩlɩ. Pilinzi nzɩ́ sɩwɩlaa yɔ, pɔtɔzʋʋ-sɩ nɛ paɖʋ miŋ taa nɛ sɩñaɣ.

⁷ Yee ɩkpɛndɩ mɔ-yɔɔ tam nɛ ɩɖɔŋ mɔn-tɔm yɔɔ yɔ, paa ɛbɛ mi-liu ɛwɛɛ nɛ ɩpɔzɩ yɔ, pahaɣ-mɩ-pʋ.

⁸ Alɩwaatʋ ndʋ́ ɩwɛɣ wazaɣ siŋŋ nɛ ɩwɩlɩɣ se ɩkɛ mɔn-tɔmkpɛlɩkɩyaa yɔ, man-Caa hɩɖɛ sɛɣ.

⁹ Mɔnsɔɔlɩ-mɩ ɛzɩ Caa sɔɔlʋʋ-m yɔ. Pʋ-yɔɔ lɛ, iyele nɛ mɔnsɔɔlɩ-mɩ tam.

¹⁰ Yee ɩɖɔŋ man-paɣtʋ yɔɔ yɔ, mɔnsɔɔlʋʋ-mɩ tam ɛzɩ mɔnɖɔm man-Caa ñɩndʋ yɔɔ nɛ ɛ́lɛ́ sɔɔlɩ-m tam yɔ.

¹¹ Meheyi-mɩ ḿbʋ́ se mɩ-taa ɛhʋlʋmɩ ɛzɩ ma yɔ nɛ mɩ-taa tɛzɩ hʋlʋmʋʋ.

¹² Paɣtʋ ndʋ́ manɖʋʋ-mɩ yɔ lɛ se: ɩsɔɔlɩ ɖama ɛzɩ mɔnsɔɔlʋʋ-mɩ yɔ.

¹³ Weyi etisiɣ nɛ ɛsɩ ɛ-ɛgbaɣdɩnaa yɔɔ yɔ, ɛsɔɔlɩ-wɛ siŋŋ. Sɔɔlɩm nabʋyʋ fɛyɩ nɛ pɩkɩlɩ ḿbʋ́.

¹⁴ Yee ɩlakɩ mbʋ́ manɖʋʋ-mɩ yɔ yɔ, ɩkɛɣ mɛ-ɛgbaɣdɩnaa.

¹⁵ Maatasɩɣ-mɩ yaʋ se man-tʋmlaɖaa, mbʋ́ pʋyɔɔ yɔ, tʋmlaɖʋ tasɩ mbʋ́ ɛ-caa lakɩ yɔ. Mayaɣ-mɩ se mɛ-ɛgbaɣdɩnaa, mbʋ́ pʋyɔɔ yɔ, mɛnkpɛlɩkɩ-mɩ mbʋ́ pɩtɩŋa payɩ man-Caa wɩlɩ-m yɔ.

¹⁶ Pɩtɛkɛ mɩlɩzɩnɩ-m, ɛlɛ́, ma malɩzɩnɩ-mɩ nɛ mentiyi-mɩ se iwolo ɩla tʋmɩyɛ nɛ ɩwɛnɩ wazaɣ nɛ kɛwɛɛ ḿbʋ́. Peeɖe man-Caa haɣ-mɩ mbʋ́ pɩtɩŋa payɩ ɩpɔzʋʋ-ɩ nɛ mɔ-nɔɔ yɔ.

¹⁷ Pʋ-yɔɔ lɛ, mbʋ́ manɖʋʋ-mɩ yɔ lɛ se: ɩsɔɔlɩ ɖama.»

Kedeŋa ñɩma paɖɩɣ Yesu nɛ ɛ-taabalaa

¹⁸ Yesu tasɩ yɔɔdʋʋ se: «Yee kedeŋa ñɩma ɛpaɖɩɣ-mɩ yɔ, ɩtɩlɩ se papaɖɩ-m nɛ pʋcɔ pɩtalɩɣnɩ-mɩ.

¹⁹ Yee ɩɩkɛ pa-taa ñɩma yɔ, paasɔɔlɩ-mɩ se ɩkɛ pa-ñɩma. Ɛlɛ́, malɩzɩ-mɩ pa-taa nɛ mɩ nɛ wɛ ɩɩyaɣ ɖama pʋyʋ, pʋ-yɔɔ papaɖɩɣ-mɩ ḿbʋ́.

²⁰ Ɩtɔzɩ tɔm ndʋ́ meheyi-mɩ yɔ tɩ-yɔɔ. Ńdʋ́ lɛ se: ‹Tʋmlaɖʋ nɔɔyʋ fɛyɩ se ɛkɩlɩɣ ɛ-caa.› Yee ɛyáa ɩwɛ ma-wayɩ kaŋ kaŋ yɔ, pɔkɔŋ mɩ-wayɩ wɛʋ ɖɔɖɔ ḿbʋ́. Yee pɔɖɔm mɔn-tɔm yɔɔ yɔ, pɔkɔŋ ɖɔm ɖɔɖɔ mɩ-ñɩndʋ yɔɔ.

²¹ Ɛlɛ́, mɔ-yɔɔ pɔkɔŋ-mɩ labʋ pɩtɩŋa payɩ ḿbʋ́. Mbʋ́ pʋyɔɔ yɔ, patasɩ weyi etiyi-m yɔ.

²² Yee mantaakɔɔ nɛ mɔyɔɔdɩnɩ-wɛ yɔ, pataakʋ pɔ-tɔm se palakɩ kɩwɛɛkɩm. Ɛlɛ́, lɛɛlɛɛyɔ, pɛfɛyɩnɩ natʋyʋ se paaɖezini pa-tɩ pa-kɩwɛɛkɩm yɔɔ.

²³ Weyi ɛpaɖɩɣ-m yɔ, ɛpaɖɩɣ ɖɔɖɔ man-Caa.

²⁴ Yee mantaala tʋma wena nɔɔyʋ tala pɛ-hɛkʋ taa kaʋ yɔ yɔ, pataakʋ pɔ-tɔm. Ŋgʋ́, lɛɛlɛɛyɔ pana man-tʋma, ɛlɛ́, papaɖɩɣ ma nɛ man-Caa.

²⁵ Pɩlakɩ ḿbʋ́ se tɔm ndʋ́ pama pa-paɣtʋ takayaɣ taa yɔ, tɩla. Ńdʋ́ lɛ se: ‹Papaɖɩ-m ɖulum yem.›

²⁶ Sɩnɩyʋ kaɣ kɔm: ɛnʋ lɛ toovenim Fezuu ŋgʋ́ kɩlɩɣnɩ Caa cɔlɔ yɔ. Caa cɛlɩɣnɩ-m-kʋ nɛ mentiyini-mɩ, ŋ́gʋ́ kɔŋnɩ lɩzʋʋ ma-aseɣɖe.

²⁷ Mɩ ɖɔɖɔ lɛ, ɩkɔŋ lɩzʋʋ ma-aseɣɖe, mbʋ́ pʋyɔɔ yɔ, ma nɛ mɩ ɖɩɩwɛna ɖooo ɛzɩ manpazʋʋ man-tʋmɩyɛ labʋ yɔ.