Yohanɛɛsɩ 14 - New Testament

Yesu lɛ nʋmɔʋ ŋgʋ́ kiwoki Caa cɔlɔ yɔ

¹ Pʋwayɩ lɛ, Yesu tasɩ ɛ-tɔmkpɛlɩkɩyaa heyuu se: «Mɩ-laŋa ɛtaawɛɛkɩ, ɩwɛnɩ lidaʋ Ɛsɔ yɔɔ, ɩwɛnɩ-kʋ ɖɔɖɔ mɔ-yɔɔ.

² Đɩjaɣyɛ sakɩyɛ wɛ man-Caa ɖɩɣa taa. Mowoki mɔñɔɔzɩ-mɩ naɖɩyɛ. Pɩtaakɛ toovenim yɔ, mantaaheyi-mɩ ḿbʋ́.

³ Mɛntɛŋ-mɩ-ɖɩ ñɔɔzʋʋ lɛ, manpɩsɩ mɔnkɔɔ mankpaɣ-mɩ nɛ ma nɛ mɩ ɖiwolo ɖenɖe mɛwɛɛ yɔ nɛ mɩ ɖɔɖɔ ɩwɛɛ peeɖe.

⁴ Ɩsɩm nʋmɔʋ ŋgʋ́ kuwoki ɖenɖe mowoki yɔ.»

⁵ Peeɖe Tomaa cosi-i se: «Kɩpaɣlʋ! Đɩtasɩ ɖenɖe ŋwoki yɔ. Ɛzɩma ɖɩpɩzɩɣ ɖɩtɩlɩ peeɖe nʋmɔʋ yɔ?»

⁶ Ɛlɛ́, Yesu heyi-i se: «Ma lɛ nʋmɔʋ nɛ toovenim nɛ wezuu. Nɔɔyʋ fɛyɩ se ewoki Caa cɔlɔ nɛ ɛtatɩŋnɩ mɔ-yɔɔ.

⁷ Yee ɩsɩm-m yɔ, ɩsɩŋ ɖɔɖɔ man-Caa. Pɩkpaɣʋnɩ lɛɛlɛɛyɔ yɔ, ɩna-ɩ nɛ ɩsɩm-ɩ.»

⁸ Peeɖe Filiipu heyi-i se: «Kɩpaɣlʋ! Yee ŋwɩlɩ-ɖʋ Caa yɔ, pʋɖɔ-ɖʋ.»

⁹ Yesu cosi-i se: «Filiipu! Đooo ma nɛ mɩ ɖɩwɛʋ yɔ, ŋtasɩm-m yaa we? Weyi ɛna-m yɔ, ɛna Caa. Pɩlabɩ ɛzɩma nɛ ŋtɔŋ se mawɩlɩ-mɩ Caa yɔ?

¹⁰ Ŋtetisi se ma nɛ Caa ɖɩwɛ ɖama taa yaa we? Tɔm ndʋ́ meheyiɣ-mɩ yɔ, tɩtalɩɩnɩ mɔn-cɔlɔ. Ɛlɛ́, Caa wɛ mɔn-cɔlɔ, ɛnʋ lakɩnɩ ɛ-tʋmɩyɛ.

¹¹ Itisi se ma nɛ Caa ɖɩwɛ ɖama taa. Yee iitisiɣ ḿbʋ́ yɔ, tʋma wena malakɩ yɔ a-yɔɔ lɛ, itisi-tʋ.

¹² Toovenim lɛ, mankaɖɩɣ-mɩ se: weyi ɛtaɣ-m liu yɔ, ɛlakɩ ɖɔɖɔ tʋma wena malakɩ yɔ. Halɩ ɛlakɩ nɛ pɩkɩlɩ ḿbʋ́, mbʋ́ pʋyɔɔ yɔ, mowoki mɛwɛɛ man-Caa cɔlɔ.

¹³ Mbʋ́ pɩtɩŋa payɩ ɩpɔzʋʋ-ɩ nɛ mɔ-nɔɔ yɔ, malakɩ-pʋ se pɩtɩŋnɩ mɔ-yɔɔ nɛ man-Caa hɩɖɛ sɛɛ.

¹⁴ Mantasɩɣ-mɩ heyuu se: yee ɩpɔzɩ-m pʋyʋ nɛ mɔ-nɔɔ yɔ, malakɩ-mɩ-pʋ.»

Caa kaɣ tiyinaʋ Fezuu Kiɖeɖeu

¹⁵ Pʋwayɩ lɛ, Yesu tasɩ yɔɔdʋʋ se: «Yee ɩsɔɔlɩ-m yɔ, ɩɖɔŋ man-paɣtʋ yɔɔ.

¹⁶ Ma lɛ, mankaɣ tenduu Caa se ɛtasɩ-mɩ tiyinaʋ Sɩnɩyʋ nɔɔyʋ nɛ ɛwɛɛ mɩ-cɔlɔ tam:

¹⁷ ɛnʋ lɛ toovenim Fezuu. Mbá paañaŋ Ɛsɔ yɔ, paapɩzɩɣ pamʋ-ɩ, mbʋ́ pʋyɔɔ yɔ, paapɩzɩɣ pana-ɩ yaa pasɩm-ɩ. Ɛlɛ́ mɩ yɔ, mɩsɩŋ-ɩ, mbʋ́ pʋyɔɔ yɔ, ɛwɛɣ mɩ-cɔlɔ nɛ mɩ nɛ ɩ ɩwɛɛ ɖama taa.

¹⁸ Maayeki-mɩ mi-ɖeke ɛzɩ solisi yɔ, mankaɣ pɩsʋʋ mɩ-cɔlɔ.

¹⁹ Pɩkazɩ pazɩ, mbá paañaŋ Ɛsɔ yɔ, paatasɩɣ-m naʋ. Ɛlɛ́ mɩ yɔ, ɩkɔŋ-m naʋ, mbʋ́ pʋyɔɔ yɔ, mɛwɛ wezuu nɛ mɩ ɖɔɖɔ ɩkaɣ wɛʋ wezuu.

²⁰ Puwiye ńɖɩ́ ɩtɩlɩɣ se ma nɛ man-Caa ɖɩwɛ ɖama taa nɛ ma nɛ mɩ ɖɩwɛɛ ɖama taa ɖɔɖɔ.

²¹ Weyi ɛɖɔkʋʋ man-paɣtʋ nɛ ɛɖɔ tɩ-yɔɔ yɔ, ɛnʋ sɔɔlɩnɩ-m. Man-Caa sɔɔlʋʋ weyi ɛsɔɔlɩ-m yɔ. Ma ɖɔɖɔ mɔnsɔɔlʋʋ-ɩ nɛ malɩzɩ man-tɩ mawɩlɩ-ɩ.»

²² Yudaasɩ kɛwɛ peeɖe, ɛlɛ́, pɩtɛkɛ Iskarɩyɔɔtɩ pɩyalʋ. Ɛ́lɛ́ pɔzɩnɩ-ɩ se: «Kɩpaɣlʋ! Ɖa pʋwɛɛ se ŋlɩzɩ ña-tɩ nɛ ŋwɩlɩ, pɩtɛkɛ kedeŋa ñɩma. Se we nɛ ŋlakɩ ḿbʋ́?»

²³ Yesu cosi-i se: «Weyi ɛsɔɔlɩ-m yɔ, ɛɖɔŋ mɔn-tɔm yɔɔ. Man-Caa sɔɔlʋʋ-ɩ nɛ ma nɛ ɩ ɖiwolo ɖɩwɛɛ pʋdʋ tɛ.

²⁴ Weyi ɛtɔsɔɔlɩ-m yɔ, ɛɛɖɔŋ mɔn-tɔm yɔɔ. Ndʋ́ meheyiɣ-mɩ ɛzʋnɔ yɔ, tɩtalɩnɩ mɔn-cɔlɔ, ɛlɛ́, man-Caa cɔlɔ tɩlɩnaa. Ɛnʋ tiyini-m.

²⁵ Ma nɛ mɩ ɖɩwɛ alɩwaatʋ tʋnɛ yɔɔ meheyiɣ-mɩ-tʋ.

²⁶ Sɩnɩyʋ ɛnʋ lɛ Fezuu Kiɖeɖeu. Ŋ́gʋ́ Caa kɔŋ-mɩ tiyinaʋ nɛ mɔ-nɔɔ. Kɩkɔŋ-mɩ wɩlʋʋ pɩtɩŋa nɛ kɩtɔzɩ-mɩ mbʋ́ pɩtɩŋa payɩ meheyi-mɩ yɔ.

²⁷ Meyeki nɛ ɩwɛɛ laŋhɛzɩyɛ taa, mɛhɛzɩɣnɩ mɩ-laŋa. Maahɛzɩɣ-yɛ ɛzɩ kedeŋa ñɩma hɛzʋʋ yɔ. Mɩ-laŋa ɛtaawɛɛkɩ, sɔɔndʋ ɛtaakpa-mɩ.

²⁸ Meheyi-mɩ nɛ ɩnɩɩ se mowoki nɛ menkiti mɔnkɔɔ mɩ-cɔlɔ. Yee ɩɩsɔɔlɩ-m yɔ, mɩ-taa kahʋlʋmɩ alɩwaatʋ ndʋ́ ɩnɩwa se mowoki Caa cɔlɔ yɔ. Mbʋ́ pʋyɔɔ yɔ, ɛkɩlɩ-m.

²⁹ Meheyiɣ-mɩ tɔm ńdʋ́ lɛɛlɛɛyɔ nɛ pʋcɔ tɩtalɩ. Meheyiɣ-mɩ-tʋ se yee tɩtalaa lɛ, itisi-tʋ.

³⁰ Maatasɩɣ-mɩ yɔɔdɩnaʋ nɛ pʋɖɔɔ, mbʋ́ pʋyɔɔ yɔ, kedeŋa wiyaʋ ɛzaɣ́ʋ alɩwaatʋ talaa. Ɛfɛyɩnɩ ɖoŋ nɩɩyɩ mɔ-yɔɔ.

³¹ Ɛlɛ́, malakɩ ɛzɩ Caa heyuu-m yɔ se kedeŋa ñɩma ɩtɩlɩ se mɔnsɔɔlɩ-ɩ. Ɩkʋyɩ cɩnɛ nɛ ɖɩɖɛɛ!»