Yohanɛɛsɩ 13 - New Testament

Yesu kɔ e-tiyiyaa naŋgbanzɩ lɩm

¹ Kifeŋaɣ se pɔtɔɔ Paska Kazandʋ. Ɛlɛ́, Yesu na se ɛ-alɩwaatʋ talaa se ɛkʋyɩ kedeŋa kanɛ kɔ-yɔɔ nɛ ewolo ɛ-Caa cɔlɔ. Ɛɛsɔɔlɩ ɛ-ñɩma mbá pɛwɛ kɔ-yɔɔ yɔ kámaɣ́ fɛyɩ.

² Đanaɣ ɖanaa lɛ, ɛ nɛ ɛ-tɔmkpɛlɩkɩyaa pɔtɔkɩ tɔɔnaɣ. Naze lɛ, Satanɩ tɛm ɖʋʋ Siimɔɔ Iskarɩyɔɔtɩ pɩyalʋ Yudaasɩ taa se ɛkpa-ɩ nɛ ɛ́ɖʋzɩ koyindinaa nesi taa.

³ Yesu kɛtɛm naʋ se Caa Ɛsɔ cɔlɔ ɛlɩnaa nɛ ɛ-cɔlɔ ɛkɔŋ pɩsʋʋ. Ɛnawa ɖɔɖɔ se ɛɖʋzɩ e-nesi taa pɩtɩŋa payɩ.

⁴ Pʋ-yɔɔ ɛkʋyɩ tɔɔnaɣ ɖɩtɔɔyɛ nɛ ɛhɔzɩ e-toko sɔsɔʋ nɛ ɛkpaɣ pɔpɔʋ ɛtɔɔlɩ

⁵ nɛ ɛɖʋ lɩm ñanaɣ sɔsɔɔ nakɛyɛ taa nɛ ɛpazɩ ɛ-tɔmkpɛlɩkɩyaa naŋgbanzɩ kɔʋ nɛ ɛhɛzɩɣnɩ pɔpɔʋ ŋgʋ́ ɛtɔɔlaa yɔ.

⁶ Ɛtalɩ Siimɔɔ Pɩyɛ lɛ, ɛ́lɛ́ pɔzɩ-ɩ se: «Kɩpaɣlʋ! Ña pʋwɛɛ se ŋkɔ ma-naŋgbanzɩ lɩm naa we?»

⁷ Ecosi-i se: «Mbʋ́ malakɩ lɛɛlɛɛyɔ yɔ, ŋŋnɩɣ pʋ-tɔbʋʋ. Ɛlɛ́, pʋwayɩ lɛ, ŋkɔŋ nɩʋ.»

⁸ Pɩyɛ heyi-i se: «Pɩtatɩɩwɛʋ kpem se ŋkɔ-m ma-naŋgbanzɩ lɩm!» Yesu cosi-i se: «Yee mɔntɔkɔ-ŋ-sɩ ḿbʋ́ yɔ, ma nɛ ŋ ɖɩɩpɩzɩɣ ɖɩkpɛndɩ pʋyʋ.»

⁹ Siimɔɔ Pɩyɛ heyi-i se: «Kɩpaɣlʋ! Yee ḿbʋ́ taakɔ ma-naŋgbanzɩ ɖeke. Ɛlɛ́, kɔ-m ɖɔɖɔ me-nesi nɛ ma-ñʋʋ!»

¹⁰ Yesu heyi-i se: «Weyi ɛtɛm lɩm sɔʋ yɔ, ɛɛtasɩɣ ñɩnʋʋ se ɛsɔ-pʋ. Ɛlɛ́, ɛ-naŋgbanzɩ ɖeke ɛkɔʋ, mbʋ́ pʋyɔɔ yɔ, ɛ-yɔɔ wɛ cɩɖɩcɩɖɩ. Mɩ mɔn-tɔmkpɛlɩkɩyaa lɛ, ɩwɛ cɩɖɩcɩɖɩ, ɛlɛ́, pɩtɛkɛ mɩtɩŋa.»

¹¹ Yesu kɛtɛm sɩm weyi ɛkɔŋ-ɩ ɖʋzʋʋ koyindinaa nesi taa yɔ, pʋ-yɔɔ ɛtɔm se: «Pɩtɛkɛ mɩtɩŋa ɩwɛnɩ cɩɖɩcɩɖɩ.»

¹² Ɛtɛm ɛ-tɔmkpɛlɩkɩyaa naŋgbanzɩ kɔʋ lɛ, esuu e-toko nɛ ɛpɩsɩ ɛcaɣ tɔɔnaɣ ɖɩtɔɔyɛ nɛ ɛpɔzɩ-wɛ se: «Ɩnɩ mbʋ́ malabɩ-mɩ yɔ pʋ-tɔbʋʋ naa we?

¹³ Ɩyaɣ-m se: ‹Wɩlɩyʋ› nɛ ‹Kɩpaɣlʋ.› Ɩwɛnɩ toovenim, mbʋ́ pʋyɔɔ yɔ, mɛnkɛ ḿbʋ́.

¹⁴ Yee weyi ma mɛnkɛ mɩ-Kɩpaɣlʋ nɛ mɩ-Wɩlɩyʋ yɔ, mɔnkɔ mɩ-naŋgbanzɩ lɩm yɔ, pʋwɛɛ se mɩ ɖɔɖɔ, ɩkɔ ɖama naŋgbanzɩ.

¹⁵ Mawɩlɩ-mɩ mbʋ́ pʋwɛɛ se ɩla yɔ se ɩpɩzɩ ɩla ɛzɩ malabʋ-mɩ yɔ.

¹⁶ Toovenim lɛ, mankaɖɩɣ-mɩ se: tʋmlaɖʋ nɔɔyʋ takɩlɩ ɛ-caa, tiyiyu nɔɔyʋ takɩlɩ weyi etiyi-i yɔ.

¹⁷ Lɛɛlɛɛyɔ, ɩsɩm mbʋ́ pʋwɛɛ se ɩla yɔ. Yee ɩñɩtaa ɩlabɩ-pʋ yɔ, ihikiɣ mɩ-tɩ!

¹⁸ Pɩtɛkɛ mɩtɩŋa mɔyɔɔdʋʋ, mansɩm mbá malɩzaa yɔ. Ɛlɛ́, pʋwɛɛ se tɔm ndʋ́ pama Ɛsɔtɔm Takayaɣ taa yɔ, tɩla. Ńdʋ́ lɛ se: ‹Weyi ma nɛ ɩ ɖɩtɔkaɣ yɔ, ɛpɩsaa ɛkʋyʋʋ mɔ-yɔɔ.›

¹⁹ Meheyiɣ-mɩ tɔm ńdʋ́ lɛɛlɛɛyɔ nɛ pʋcɔ tɩla. Ḿbʋ́ yekina nɛ itisi alɩwaatʋ ndʋ́ tɩlakɩ yɔ se: ‹Ma lɛ weyi mɛnkɛnaa yɔ.›

²⁰ Toovenim lɛ, mankaɖɩɣ-mɩ se: weyi ɛmʋʋ weyi mentiyi-i yɔ, ɛmʋʋ-m. Weyi ɛ́lɛ́ mʋ́ʋ-m yɔ, ɛmʋʋ weyi etiyi-m yɔ.»

Yudaasɩ kɔŋ ɖʋzʋʋ Yesu koyindinaa nesi taa

²¹ Yesu tɛm yɔɔdʋʋ ḿbʋ́ lɛ, ɛ-laŋɩyɛ wɛɛkɩ nɛ ɛtɔ se: «Toovenim lɛ, mankaɖɩɣ-mɩ se: mɩ-taa nɔɔyʋ kɔŋ-m kpaʋ nɛ ɛ́ɖʋzɩ koyindinaa nesi taa.»

²² Peeɖe papazɩ ɖama ɛsɛ taa cɔnaʋ nɛ pɔpɔzʋʋ ɖama se: «Ɛzɩ anɩ ɛtɔŋ?»

²³ Alɩwaatʋ ńdʋ́ lɛ, pa-taa weyi Yesu kɩlɩ sɔɔlʋʋ yɔ, ɛɛwɛlɩ hʋyʋʋ yɔɔ ɛ-cɔlɔ tɔɔnaɣ ɖɩtɔɔyɛ.

²⁴ Ɛlɛ́, Siimɔɔ Pɩyɛ hadɩ-ɩ nesi nɛ eheyi-i se: «Pɔzɩ-ɩ se anɩ ɛtɔŋ?»

²⁵ Peeɖe ɛ́lɛ́ tɛzɩ ɛ-tɩ wɛlʋʋ nɛ Yesu yɔɔ nɛ ɛpɔzɩ-ɩ se: «Kɩpaɣlʋ! Anɩ ŋtɔŋ?»

²⁶ Yesu cosi-i se: «Ɛnʋ lɛ weyi malɩzɩɣ tindine hɔɔlaɣ melii num nɛ mɛncɛlɩ-ɩ yɔ.» Peeɖe ɛkpaɣ tindine hɔɔlaɣ elii num nɛ ɛcɛlɩ Siimɔɔ Iskarɩyɔɔtɩ pɩyalʋ Yudaasɩ.

²⁷ Ɛtɩmʋ-kɛ lɛ, eke Satanɩ. Peeɖe Yesu heyi-i se: «La mbʋ́ pʋwɛɛ se ŋla yɔ lɔŋ!»

²⁸ Mbá paawɛ tɔɔnaɣ ɖɩtɔɔyɛ peeɖe yɔ, pa-taa nɔɔyʋ tana mbʋ́ pʋ-yɔɔ eheyaɣ Yudaasɩ ḿbʋ́ yɔ.

²⁹ Yudaasɩ ɖɔkaɣnɩ pe-liidiye huyuu. Pʋ-yɔɔ pa-taa nabɛyɛ maɣzaɣ se Yesu heyaɣ-ɩ se ewolo ɛya kazandʋ wondu ndʋ́ pʋpɔzʋʋ-wɛ yɔ. Lɛlaa ñamaɣzaɣ se yaa eheyaɣ-ɩ se ɛlɩzɩ nabʋyʋ nɛ ɛha kʋñɔndɩnaa.

³⁰ Yudaasɩ mʋ tindine hɔɔlaɣ ḿbʋ́ lɛ, ɛtɩkʋyɩ ɛlɩɩ. Alɩwaatʋ ńdʋ́ lɛ, ɖoó koyuwa.

Paɣtʋ kɩfatʋ tɔm

³¹ Yudaasɩ lɩwa lɛ, Yesu yɔɔdɩ se: «Lɛɛlɛɛyɔ Ɛyʋ Pɩyalʋ hɩɖɛ sɛwa nɛ pɩtɩŋnɩ ɛ-yɔɔ nɛ Ɛsɔ ñɩnɖɛ sɛɛ.

³² Yee pɩtɩŋnɩ ɛ-yɔɔ nɛ Ɛsɔ hɩɖɛ sɛɛ yɔ, ɛ́lɛ́ ñeyeki nɛ pɩtɩŋnɩ ɛ-maɣmaɣ ɛ-yɔɔ nɛ ɛnʋ ñɩnɖɛ ñɛsɛɛ. Pɩkazɩ alɩwaatʋ pazɩ, ɛlakɩ ḿbʋ́.

³³ Men-piya! Ma nɛ mɩ ɖɩtasɩɣ caɣʋ pazɩ yem nɛ pʋcɔ mɛnɖɛɛ. Ɩkɔŋ-m ñɩnʋʋ, ɛlɛ́, lɛɛlɛɛyɔ meheyiɣ-mɩ tɔm ndʋ́ meheyi Yuda ñɩma sɔsaa yɔ. Ńdʋ́ lɛ se: ɩɩpɩzɩɣ iwolo ɖenɖe mowoki yɔ.

³⁴ Manɖʋʋ-mɩ paɣtʋ kɩfatʋ. Ńdʋ́ lɛ se: ɩsɔɔlɩ ɖama. Ɩsɔɔlɩ ɖama ɛzɩ mɔnsɔɔlʋʋ-mɩ yɔ.

³⁵ Yee ɩsɔɔlɩ ɖama yɔ, pʋbʋ ɛyáa tɩŋa naɣ se ɩkɛ mɔn-tɔmkpɛlɩkɩyaa.»

Yesu yɔɔdaa se Pɩyɛ kɔŋ kpɛzʋʋ se ɛtasɩm-ɩ

³⁶ Yesu yɔɔdɩ ḿbʋ́ lɛ, Siimɔɔ Pɩyɛ pɔzɩ-ɩ se: «Kɩpaɣlʋ! Le ŋwoki?» Ecosi-i se: «Lɛɛlɛɛyɔ, ŋŋpɩzɩɣ ŋtɩŋ-m ɖenɖe mowoki yɔ. Ɛlɛ́, pʋwayɩ ŋkɔŋ-m tɩŋʋʋ.»

³⁷ Peeɖe Pɩyɛ pɔzɩ-ɩ se: «Kɩpaɣlʋ! Pɩlabɩ ɛzɩma nɛ maapɩzɩɣ mantɩŋ-ŋ lɛɛlɛɛyɔ? Paa sɩm yɔ, mansɩkɩ ñɔ-yɔɔ!»

³⁸ Yesu pɔzɩ-ɩ se: «Paa sɩm, ŋsɩkɩ mɔ-yɔɔ yaa? Toovenim lɛ, mankaɖɩɣ-ŋ se: pʋcɔ kalɩmɔʋ koo lɛ, ŋkpɛzɩɣ tam naadozo se ŋtasɩm-m.»