Yohanɛɛsɩ 12 - New Testament

Maarɩɩ pɩyɩ tɩlaaɖɩ Yesu naŋgbanzɩ yɔɔ

¹ Pɩsɛɣ kɩyakɩŋ loɖo se pɔtɔɔ Paska Kazandʋ. Ɛlɛ́, Yesu wolo Betaanii ɖenɖe Lazaarɩ weyi efezi-i nɛ sɩɖaa taa yɔ, ɛwɛɛ yɔ.

² Peeɖe palabɩ-ɩ tɔɔnaɣ nɛ Maarta wona. Lazaarɩ kɛwɛ mbá pa nɛ Yesu paacaɣ ɖɩtɔɔyɛ yɔ pa-taa.

³ Pɩkɛdaa lɛ, Maarɩɩ kpaɣ tɩlaaɖɩ ŋgʋ́ palabɩnɩ naarɩ nɛ petesidi kɩ-taa pʋyʋ yɔ ɛzɩ litri hɔɔlʋʋ yɔ nɛ ɛpɩyɩ Yesu naŋgbanzɩ yɔɔ. Ɛtɛma lɛ, ɛmɛlɩ sɩ-yɔɔ nɛ ɛ-ñɔsɩ nɛ sɔzɩŋ ñɛyɩnɩ ɖɩɣa. Tɩlaaɖɩ ŋ́gʋ́, kɩwɛ liidiye pɩtɩɩfɛyɩ.

⁴ Peeɖe Yesu tɔmkpɛlɩkɩyaa taa lɛlʋ weyi payaɣ se Yudaasɩ Iskarɩyɔɔtɩ nɛ ɛkɔŋ-ɩ ɖʋzʋʋ koyindinaa nesi taa yɔ, ɛtɔm se:

⁵ «Tɩlaaɖɩ ŋ́gʋ́, kɩtalɩ kɩyakɩŋ nasidozo tʋmɩyɛ liidiye! Pɩlabɩ ɛzɩma pɛtɛpɛdɩ-kʋ se patayɩ kʋñɔndɩnaa?»

⁶ Pɩtɛkɛ kʋñɔndɩnaa yɔɔ ɛmaɣzaɣ nɛ ɛyɔɔdɩ ḿbʋ́. Ɛlɛ́, ɛkɛ mɩ́lʋ́ yɔɔ ɛyɔɔdaɣ ḿbʋ́: ɛnʋ ɖɔkaɣnɩ liidiye huyuu nɛ ɛmɩlɩɣ mbʋ́ paɖʋwaɣ kɩ-taa yɔ.

⁷ Ɛlɛ́, Yesu heyi-i se: «Yele halʋ ɛnʋ ɖiɣ ɖiɣ! Ɛɛsɩ tɩlaaɖɩ ŋ́gʋ́ nɛ ɛɖaŋnɩ kɩyakʋ ŋgʋ́ pepiŋ-m yɔ.

⁸ Mɩ nɛ kʋñɔndɩnaa ɩwɛnɩ tam. Ɛlɛ́, ma maawɛɣ mɩ-cɔlɔ ḿbʋ́.»

Cɔjɔnaa sɔsaa tam Lazaarɩ yɔɔ nɔɔ

⁹ Yuda ñɩma sakɩyɛ kanɩwa se Yesu wɛ Betaanii. Pʋ-yɔɔ pakʋyaa powolo. Pɩtɛkɛ e-ɖeke ɛ-yɔɔ paawoba. Pacaɣaɣ se pana ɖɔɖɔ Lazaarɩ weyi ɛsɩba nɛ efezi-i yɔ.

¹⁰ Ŋgʋ́, cɔjɔnaa sɔsaa lakaɣ lɩmaɣza se pakʋ Lazaarɩ ɖɔɖɔ.

¹¹ Mbʋ́ pʋyɔɔ yɔ, ɛ-yɔɔ Yuda ñɩma sakɩyɛ seɣaɣ pɔ-cɔlɔ nɛ pɛwɛɣnɩ lidaʋ Yesu yɔɔ.

Yesu sʋ Yeruusalɛm tɛtʋ taa

¹² Tɛʋ fema lɛ, ɛyáa samaɣ sɔsɔɔ ŋgá kowobi Paska Kazandʋ tɔɔʋ yɔ, kanɩɩ se Yesu woki Yeruusalɛm.

¹³ Ɛlɛ́, pakpaɣ paatʋ nɛ pakatɩɣ-ɩ nɛ pokou se: «Ozaana! Ɛsɔ ɛ́wazɩ weyi ɛkɔŋ Kɩpaɣlʋ lone taa yɔ ɛ-yɔɔ! Ɛsɔ ɛ́wazɩ Izrɛɛlɩ ñɩma wiyaʋ sɔsɔ yɔɔ!»

¹⁴ Peeɖe Yesu na kpaŋaɣ piye naɖɩyɛ nɛ ɛkpa ɛcaɣ ɖɩ-yɔɔ. Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:

¹⁵ «Siiyɔɔ ñɩma mɩ! Sɔɔndʋ ɛtaakpa-mɩ! Ɩcɔnɩ ɩna, mi-wiyaʋ sɔsɔ caɣ kpaŋaɣ piye nɛ ɛkɔŋ.»

¹⁶ Ɛ-tɔmkpɛlɩkɩyaa taatɩnɩda mbʋ́ pɩlakaɣ ḿbʋ́ yɔ pʋ-tɔbʋʋ. Ɛlɛ́, alɩwaatʋ ndʋ́ Ɛsɔ yeba nɛ Yesu hɩɖɛ sɛɛ yɔ, pɔtɔzaa se ɛ-tɔm paama ḿbʋ́. Samaɣ laba ɛzɩ pamaʋ Ɛsɔtɔm Takayaɣ taa yɔ.

¹⁷ Mbá pa nɛ Yesu paawɛ alɩwaatʋ ndʋ́ ɛya Lazaarɩ nɛ pɩlaʋ taa nɛ efezi-i nɛ ɛlɩɩ yɔ, pɛkɛdaɣ ɛyáa mbʋ́ panawa yɔ.

¹⁸ Pʋ-yɔɔ ɛyáa samaɣ kʋyaa se pakatɩɣ-ɩ, mbʋ́ pʋyɔɔ yɔ, panɩwa se ɛlabɩ hama lakasɩ ńzɩ́.

¹⁹ Ḿbʋ́ yebina nɛ Farɩsɩ ñɩma yɔɔdʋʋnɩ ɖama se: «Ɩnaɣ, ɩlakɩ yem: ɛyáa tɩŋa tɩŋɩɣ-ɩ!»

Weyi ɛcaɣ se ɛkɛ Yesu tʋmlaɖʋ yɔ, pʋwɛɛ se ɛtɩŋ ɛ-wayɩ

²⁰ Grɛɛkɩ ñɩma nabɛyɛ kowobi Yeruusalɛm kazandʋ alɩwaatʋ taa ɖɔɖɔ se poluŋ Ɛsɔ tɛɛ.

²¹ Pɩkɛdaa lɛ, powolo Filiipu weyi ɛ-tɛ wɛ Bɛtsayɩda Galilee egeetiye taa yɔ ɛ-cɔlɔ nɛ peheyi-i se: «Đajaa! Đɩcaɣ ɖɩna Yesu.»

²² Peeɖe ɛ́lɛ́ woba eheyi Andree nɛ ɛ nɛ ɩ powolo Yesu cɔlɔ pa-naalɛ nɛ peheyi-i ḿbʋ́.

²³ Yesu cosi-wɛ se: «Lɛɛlɛɛyɔ, alɩwaatʋ talaa se Ɛyʋ Pɩyalʋ hɩɖɛ ɛsɛɛ.

²⁴ Toovenim lɛ, mankaɖɩɣ-mɩ se: yee potoɖuu mɩɖɛ piye nɛ ɖɩsɩ yɔ, ɖɩwɛɣ ɖi-ɖeke ḿbʋ́. Ɛlɛ́, yee poɖu-ɖɩ nɛ ɖɩsɩ yɔ, ɖɩlʋlʋʋ pee sakɩyɛ.

²⁵ Weyi ɛsɔɔlɩ e-wezuu yɔ, ɛtɛŋnɩ-kʋ lesuu. Weyi ɛ́lɛ́ takpaɣ ɛ-ñɩŋgʋ nɛ ɛ́yáa pʋyʋ kedeŋa yɔɔ cɩnɛ yɔ, eelesiɣ-kʋ, ehikiɣ wezuu maatɛŋ.

²⁶ Yee nɔɔyʋ liu ɛwɛɛ se ɛlabɩ-m tʋmɩyɛ yɔ, ɛtɩŋ-m. Ḿbʋ́ man-tʋmlaɖʋ kɔŋ wɛʋ ɖenɖe mɛwɛɣ yɔ. Yee nɔɔyʋ ɛlakɩ-m tʋmɩyɛ yɔ, man-Caa ɖʋʋ-ɩ hɩɖɛ.»

Yesu yɔɔdʋʋ ɛ-sɩm tɔm

²⁷ Yesu tɛm yɔɔdʋʋ ḿbʋ́ lɛ, ɛtɔ se: «Lɛɛlɛɛyɔ, ma-laŋɩyɛ wɛɛkaa. Ɛlɛ́, se we mɔyɔɔdʋʋ? Mɔyɔɔdʋʋ se: Caa! Taayele nɛ mansʋʋ kʋñɔŋ alɩwaatʋ tʋnɛ tɩ-taa yaa we? Ŋgʋ́, pɩ-maɣmaɣ pʋ-yɔɔ kpem mɔnkɔma.

²⁸ Caa! Yele nɛ ña-hɩɖɛ sɛɛ!» Peeɖe pʋyɔɔdɩnɩ ɛsɔdaa se: «Mɛntɛm yebu nɛ ɖɩsɛɛ, ɛlɛ́, meyeki nɛ ɖɩtasɩ sɛʋ!»

²⁹ Ɛyáa samaɣ ŋgá kaawɛ peeɖe yɔ, kanɩ ḿbʋ́ lɛ, kɔtɔ se: «Tɛʋ nazɩna!» Lɛlaa se: «Ɛsɔ tiyiyu nɔɔyʋ yɔɔdɩnɩnɩ-ɩ!»

³⁰ Pʋ-yɔɔ Yesu kaɖɩ-wɛ se: «Pʋyɔɔdʋʋ ḿbʋ́ yɔ, pɩtɛkɛ mɔ-yɔɔ yɔɔ pʋyɔɔdʋʋ, ɛlɛ́, mɩ-yɔɔ yɔɔ pʋyɔɔdʋʋ.

³¹ Lɛɛlɛɛyɔ, alɩwaatʋ talaa se pahʋʋnɩ kedeŋa ñɩma. Lɛɛlɛɛyɔ, pʋwɛɛ se pɔɖɔɔnɩ kedeŋa wiyaʋ.

³² Ma lɛ, alɩwaatʋ ndʋ́ pakpazɩɣ-m ɖaʋ yɔɔ yɔ, meyeki nɛ ɛyáa tɩŋa kɔɔ mɔn-cɔlɔ.»

³³ Ɛyɔɔdɩ ḿbʋ́ se ɛwɩlɩ-wɛ sɩm mbʋ́ ɛkɔŋ sɩbʋ yɔ.

³⁴ Peeɖe ɛyáa samaɣ cosi-i se: «Đɩkalɩ ɖa-paɣtʋ takayaɣ taa se Weyi Ɛsɔ Lɩzaa yɔ, ɛwɛɣ wezuu tam lɛ, ɛzɩma ñɔtɔŋ se pʋwɛɛ se pakpazɩ Ɛyʋ Pɩyalʋ ɖaʋ yɔɔ yɔ? Ɛ́lɛ́ lɛ anɩ?»

³⁵ Yesu heyi-wɛ se: «Ñalɩmɩyɛ wɛ mɩ-hɛkʋ taa ḿbʋ́, ɛlɛ́, alɩwaatʋ pazɩ ɖɩwɛɣ. Ɩɖɔ alɩwaatʋ ndʋ́ ñalɩmɩyɛ wɛ mɩ-cɔlɔ yɔ nɛ cɩkpɛndʋʋ ɛtaatudi-mɩ. Mbʋ́ pʋyɔɔ yɔ, weyi ɛɖɔŋ cɩkpɛndʋʋ taa yɔ, ɛɛsɩŋ ɖenɖe ewoki yɔ.

³⁶ Pʋ-yɔɔ lɛ, ɩwɛnɩ lidaʋ ñalɩmɩyɛ yɔɔ alɩwaatʋ ndʋ́ ɖɩwɛ mɩ-cɔlɔ yɔ nɛ ɩpɩsɩ ɖɩ-taa ñɩma.» Yesu tɛm yɔɔdʋʋ ḿbʋ́ lɛ, ɛɖɛɛ poliŋ nɛ ɛmɛlɩ.

«Kɩpaɣlʋ, atisi tɔm ndʋ́ ɖɩɩyɔɔdaa yɔ?»

³⁷ Ɛɛlaba hama lakasɩ ndɩ ndɩ Yuda ñɩma ɛsɩndaa, paa ḿbʋ́ yɔ, pɛfɛyɩnɩ lidaʋ ɛ-yɔɔ.

³⁸ Pɩlabɩ ḿbʋ́ se tɔm ndʋ́ náyʋ Ezaayii ma ɖooo lɔŋ yɔ, tɩla. Ńdʋ́ lɛ se: «Kɩpaɣlʋ! Atisi tɔm ndʋ́ ɖɩyɔɔdaa yɔ? Anɩ Kɩpaɣlʋ wɩlɩ e-ɖoŋ weyi ɛɛwɛ mɛsaɣ tɛɛ yɔ?»

³⁹ Patapɩzɩɣ se petisi, mbʋ́ pʋyɔɔ yɔ, Ezaayii mawa ɖɔɖɔ se:

⁴⁰ «Ɛsɔ yʋlɩsɩ pɛ-ɛsɛ se pataana nɛ ehuuzi pa-lɩmaɣza yɔɔ se pataanɩɩ pʋ-tɔbʋʋ. Ɛlaba ḿbʋ́ se, pɛ-ɛsɛ ɛtaatasɩ naʋ, pataatasɩ natʋyʋ taa nɩʋ, paapɩzɩɣ papɩsɩnɩ Ɛsɔ yɔɔ, nɛ ɛla nɛ pɔ-yɔɔ cɛ.»

⁴¹ Ezaayii kana Kɩpaɣlʋ koboyaɣ yɔɔ ɛma ɛ-tɔm ḿbʋ́.

⁴² Paa ḿbʋ́ yɔ, Yuda ñɩma awiya maɣmaɣ taa sakɩyɛ kɛwɛnɩ lidaʋ Yesu yɔɔ. Ɛlɛ́, Farɩsɩ ñɩma yɔɔ lɛ, pataasusuu-tʋ. Pɩtɛkɛ ḿbʋ́, paɖaŋɩɣ-wɛ se pataatasɩ wobu Ɛsɔ ɖɩsɛyɛ taa.

⁴³ Paasɔɔlaa se ɛyáa ɛyɩɣyɩ-wɛ nɛ pɩkɩlɩ Ɛsɔ yɩɣyʋʋ-wɛ yɔ.

Yesu kɛ ñalɩmɩyɛ

⁴⁴ Pɩkɛdaa lɛ, Yesu holi se: «Weyi ɛwɛnɩ lidaʋ mɔ-yɔɔ yɔ, pɩtɛkɛ men-ɖeke mɔ-yɔɔ ɛwɛnɩ-kʋ, ɛwɛnɩ-kʋ weyi etiyi-m yɔ ɛ-yɔɔ.

⁴⁵ Weyi ɛnaɣ-m yɔ, ɛnaɣ weyi etiyi-m yɔ.

⁴⁶ Ma lɛ, mɔnkɔm kedeŋa yɔɔ ɛzɩ ñalɩmɩyɛ yɔ se nɔɔyʋ ɛwɛnɩ lidaʋ mɔ-yɔɔ lɛ, ɛtaawɛɛ cɩkpɛndʋʋ taa.

⁴⁷ Yee nɔɔyʋ ɛnɩ mɔn-tɔm nɛ ɛɛɖɔŋ tɩ-yɔɔ yɔ, pɩtɛkɛ mankʋʋnɩ ɛ-tɔm. Mbʋ́ pʋyɔɔ yɔ, mɔntɔkɔɔ kedeŋa yɔɔ se mankʋ ɛyáa tɔm, ɛlɛ́, mɔnkɔm se maya pa-ñʋʋ.

⁴⁸ Weyi ɛlɔʋ-m nɛ ekizi mɔn-tɔm yɔ, ɛnaɣ mbʋ́ pʋkʋʋ ɛ-tɔm yɔ: tɔm ndʋ́ mawɩlaa yɔ, ńdʋ́ kʋʋnɩ ɛ-tɔm kɛtɛzaɣ kɩyakʋ wiye.

⁴⁹ Mbʋ́ pʋyɔɔ yɔ, pɩtɛkɛ mon-ɖoŋ ɖeke mɔyɔɔdɩnaa. Ɛlɛ́, Caa weyi etiyi-m yɔ, ɛ-maɣmaɣ ɛɖʋnɩ tɔm ndʋ́ pʋwɛɛ se mɔyɔɔdɩ nɛ mawɩlɩ yɔ.

⁵⁰ Manawa se tɔm ndʋ́ ɛɖʋwa se meheyi ɛyáa yɔ, tɩhaɣ wezuu maatɛŋ. Pʋ-yɔɔ lɛ, tɔm ndʋ́ man-Caa heyi-m yɔ, ńdʋ́ mɔyɔɔdʋʋ.»