Yohanɛɛsɩ 11 - New TestamentLazaarɩ sɩm tɔm 1 Abalʋ nɔɔyʋ kɛwɛɛ nɛ payaɣ-ɩ se Lazaarɩ, pɩwɩɣaɣ-ɩ. Ɛ nɛ ɛ-kɔɔnaa Maarɩɩ nɛ Maarta paawɛ tɛtʋ cikpetu ndʋ́ payaɣ se Betaanii yɔ tɩ-taa. 2 Maarɩɩ ɛnʋ ɛɛpɩyɩnɩ Kɩpaɣlʋ naŋgbanzɩ yɔɔ tɩlaaɖɩ nɛ ɛhɛzɩnɩ ɛ-ñɔsɩ. E-neu Lazaarɩ pɩwɩɣaɣ. 3 Pʋ-yɔɔ halaa ḿbá pa-naalɛ petiyaa se peheyi Yesu se: «Kɩpaɣlʋ! Pɩwɩɣ weyi ŋsɔɔlɩ-ɩ yɔ.» 4 Powobi peheyi-i ḿbʋ́ lɛ, ɛtɔ se: «Lazaarɩ ɛɛsɩkɩ. Ɛlɛ́, pɩwɩɣ-ɩ ḿbʋ́ se Ɛsɔ hɩɖɛ ɛsɛɛ nɛ piyele ɛ-Pɩyalʋ ñɩnɖɛ sɛɛ ɖɔɖɔ.» 5 Yesu kɔsɔɔlɩ Maarta nɛ e-neu, nɛ Lazaarɩ. 6 Paa ḿbʋ́ yɔ, ɛnɩwa se pɩwɩɣ Lazaarɩ lɛ, ɛtasɩ caɣʋ kɩyakɩŋ naalɛ ɖenɖe ɛɛwɛɛ yɔ. 7 Pɩkɛdaa lɛ, eheyi ɛ-tɔmkpɛlɩkɩyaa se: «Đɩpɩsɩ Yudee egeetiye taa.» 8 Paba cosi-i se: «Wɩlɩyʋ! Pɩtalabɩdɩ pʋyʋ yɔ, ɖɩ-taa ñɩma ñɩnaɣ se pakʋ-ŋ nɛ pɛɛ nɛ ŋcaɣ se ŋpɩsɩ peeɖe ɖɔɖɔ yaa we?» 9 Yesu cosi-wɛ se: «Tɛʋ feŋ lɛ, wɩsɩ lɩɣ yaa sɩɩlɩɣ? Yee nɔɔyʋ ɛɖɔŋ wɩsɩ taa yɔ, piituuluu-i, mbʋ́ pʋyɔɔ yɔ, ɛnaɣ ñalɩmɩyɛ kedeŋa yɔɔ. 10 Ɛlɛ́, yee nɔɔyʋ ɛɖɔŋ ɖoó taa yɔ, putuuluu-i, mbʋ́ pʋyɔɔ yɔ, ɛfɛyɩnɩ ñalɩmɩyɛ.» 11 Ɛyɔɔdɩ ḿbʋ́ lɛ, ɛtasɩ se: «Đɛ-ɛgbaɣdʋ Lazaarɩ ɖou, ɛlɛ́, mowoki menfezi-i.» 12 Peeɖe ɛ-tɔmkpɛlɩkɩyaa tɔm se: «Kɩpaɣlʋ! Yee eɖou yɔ, ɛ-yɔɔ cɛkɩ.» 13 Ŋgʋ́, Lazaarɩ sɩm tɔm Yesu yɔɔdaɣ, ɛlɛ́, ɛ-tɔmkpɛlɩkɩyaa ñamaɣzɩɣ se ɖom tɩtɩŋa tɔm ɛyɔɔdʋʋ. 14 Pʋ-yɔɔ ɛkaɖɩ kpayɩ se: «Lazaarɩ sɩba. 15 Mɩ-yɔɔ lɛ, man-taa hʋlʋmaa se mantaawɛɛ peeɖe alɩwaatʋ ńdʋ́. Pɩlabɩ ḿbʋ́ se ɩwɛnɩ lidaʋ mɔ-yɔɔ. Lɛɛlɛɛyɔ, ɖiwolo ɛ-cɔlɔ.» 16 Peeɖe Tomaa weyi payaɣ ɖɔɖɔ se Đom yɔ, eheyi tɔmkpɛlɩkɩyaa lɛlaa se: «Đa ɖɔɖɔ, ɖa nɛ Wɩlɩyʋ ɖiwolo nɛ paa sɩm yɔ ɖa nɛ ɩ ɖɩsɩ!» Yesu kɛ wezuu 17 Yesu talɩ Betaanii lɛ, ɛmaɣnɩ pɛtɛm Lazaarɩ pim nɛ pɩtɛ labʋ kɩyakɩŋ naanza. 18 Betaanii ñɔtɩnɩ Yeruusalɛm. Pɩtatalɩ kiloomɛtanaa naadozo. 19 Yuda ñɩma sakɩyɛ kowobi Maarta nɛ Maarɩɩ pɛ-tɛ se pɛsɛɛ-wɛ leɣa. 20 Ɛlɛ́, Maarta kanɩwa se Yesu woki nɛ ɛkʋyɩ ɛkatɩ-ɩ nɛ piyele Maarɩɩ caɣ ɖɩɣa. 21 Peeɖe eheyi Yesu se: «Kɩpaɣlʋ! Ŋŋwɛ cɩnɛ yɔ, me-neu taasɩ. 22 Ɛlɛ́, manawa se: lɛɛlɛɛyɔ, paa ŋpɔzɩ Ɛsɔ ɛbɛ yɔ, ɛhaɣ-ŋ-pʋ.» 23 Yesu heyi-i se: «Ñe-neu feŋ.» 24 Maarta cosi se: «Toovenim, manawa se ɛkɔŋ fem alɩwaatʋ ndʋ́ sɩɖaa feŋ kɛtɛzaɣ kɩyakʋ wiye yɔ.» 25 Yesu heyi-i se: «Mefeziɣni sɩɖaa nɛ mahaɣ-wɛ wezuu. Weyi ɛwɛnɩ lidaʋ mɔ-yɔɔ yɔ, paa ɛsɩba yɔ, ɛwɛɣ wezuu. 26 Weyi ɛ́lɛ́ wɛnɩ ɛ-ɛsɛ nɛ ɛwɛnɩ lidaʋ mɔ-yɔɔ yɔ, ɛɛsɩkɩ kaʋ. Ŋtisi ḿbʋ́ yaa we?» 27 Maarta cosi-i se: «Ɛɛɛ, Kɩpaɣlʋ! Mentisaa se ña lɛ Weyi Ɛsɔ Lɩzaa Yɔ. Ña lɛ ɛ-Pɩyalʋ, ña ɛɛɖʋwa se ŋkɔŋ kedeŋa yɔɔ.» Yesu wi Lazaarɩ 28 Maarta tɛm yɔɔdʋʋ ḿbʋ́ lɛ, ɛpɩsɩ nɛ ɛ́yáa e-neu Maarɩɩ nɛ eheyiɣ-i mɛsaɣ tɛɛ se: «Wɩlɩyʋ kɔma, ɛyaɣ-ŋ se ŋwolo.» 29 Maarɩɩ tɩnɩ ḿbʋ́ lɛ, ɛkʋyɩ kpaka se ɛkatɩ-ɩ. 30 Ŋgʋ́, Yesu taatɩtalɩda tɛtʋ taa, ɛlɛ́, ɛɛwɛ ɖenɖe Maarta kakatɩ-ɩ yɔ ḿbʋ́. 31 Yuda ñɩma mbá paawobi Maarɩɩ tɛ se pɛsɛɛ-ɩ leɣa yɔ, pana ɛtɩkʋyɩ ḿbʋ́ nɛ ɛlɩɩ lɛ, patɩŋ ɛ-wayɩ. Pamaɣzaɣ se ewoki pɩlaʋ yɔɔ se ewili. 32 Ɛtalɩ ɖenɖe Yesu kɛwɛɛ yɔ lɛ, ɛna-ɩ. Peeɖe eluŋ ɛ-tɛɛ nɛ eheyi-i se: «Kɩpaɣlʋ! Yee ŋŋwɛ cɩnɛ yɔ, me-neu taasɩ.» 33 Ɛlɛ́, Yesu na se Maarɩɩ wiliɣ nɛ Yuda ñɩma mbá patɩŋaɣ ɛ-wayɩ yɔ, pewiliɣ ɖɔɖɔ. Peeɖe pɩlabɩ-ɩ yem yaaa nɛ ɛ-laŋɩyɛ wɛɛkɩ siŋŋ 34 nɛ ɛpɔzɩ-wɛ se: «Le ipim-i?» Pocosi-i se: «Kɩpaɣlʋ! Kɔɔ nɛ ŋna.» 35 Peeɖe Yesu wilaa. 36 Pʋ-yɔɔ Yuda ñɩma tɔm se: «Ɩna ɛzɩma mbʋ́ ɛɛsɔɔlɩ-ɩ kpem yɔ!» 37 Ɛlɛ́, pa-taa lɛlaa se: «Ɛnʋ weyi ekuli yʋlʋm ɛsɛ yɔ, ɛtaapɩzɩɣ se ɛla ɖɔɖɔ nɛ Lazaarɩ ɛtaasɩ naa we?» Yesu fezi Lazaarɩ nɛ sɩm taa 38 Ɛlɛ́, Yesu laŋɩyɛ tasɩ wɛɛkʋʋ siŋŋ nɛ ɛkʋyɩ ewolo pɩlaʋ cɔlɔ. Ɛwaɣ taa kɩɩwɛɛ, paɖɩɣ kʋ-nɔɔ pɩyɛ. 39 Peeɖe ɛtɔm se: «Ɩtʋlɩ pɩyɛ.» Ɛlɛ́, sɩɖʋ ɛnʋ ɛ-kɔɔ Maarta heyi-i se: «Kɩpaɣlʋ! Paa pɩɩla ɛzɩma ɛpazɩ sɔŋ lɩʋ: pɩlabɩ kɩyakɩŋ naanza yɔ ɛzɩ pepim-i yɔ.» 40 Yesu pɔzɩ-ɩ se: «Menteheyi-ŋ se yee ŋwɛnɩ lidaʋ mɔ-yɔɔ yɔ ŋnaɣ Ɛsɔ koboyaɣ naa we?» 41 Peeɖe patʋlɩ pɩyɛ. Ɛlɛ́, Yesu kpazɩ ɛ-ɛsɛ ɛsɔdaa nɛ ɛtɔ se: «Caa! Mansaŋ-ŋ ɛzɩma mbʋ́ ŋnɩnɩ-m yɔ pʋ-yɔɔ. 42 Ma lɛ, manawa se ŋnɩɣnɩ-m tam. Ɛlɛ́, ɛyáa samaɣ ŋgá kɔcɔ-m kata yɔ, kɔ-yɔɔ mɔyɔɔdʋʋ ḿbʋ́ se papɩzɩ petisi se ñetiyini-m.» 43 Ɛtɛm Ɛsɔ sam ḿbʋ́ lɛ, eholi ɖoŋ se: «Lazaarɩ! Lɩɩ peeɖe!» 44 Kpaagbaa ḿbʋ́ lɛ, ɛ́lɛ́ fe nɛ ɛlɩɩ. Paahɔkɩ ɛ-naŋgbanzɩ nɛ e-nesi nɛ pɩsaʋ hɔɔlasɩ nɛ pohuuzi ɛ-ɛsɩndaa pɩsaʋ. Peeɖe Yesu heyi-wɛ se: «Ɩyɛɖɩ-ɩ nɛ iyebi-i ɛɖɛɛ.» Cɔjɔnaa sɔsaa tam Yesu yɔɔ nɔɔ (Mat 26.1-5; Mrk 14.1-2; Luk 22.1-2) 45 Yuda ñɩma mbá paawobi Maarɩɩ cɔlɔ yɔ, pana mbʋ́ Yesu laba yɔ. Pʋ-yɔɔ pa-taa sakɩyɛ wɛnɩ lidaʋ ɛ-yɔɔ. 46 Ɛlɛ́, pa-taa lɛlaa ñaakʋyaa powolo pana Farɩsɩ ñɩma nɛ peheyi-wɛ mbʋ́ ɛlaba yɔ. 47 Ḿbʋ́ yebina nɛ paba nɛ Yuda ñɩma cɔjɔnaa sɔsaa pekpeɣli tɔm hʋyaa sɔsaa nɛ pɔpɔzɩ-wɛ se: «Ɛbɛ pʋwɛɛ se ɖɩla? Abalʋ ɛnɛ, ɛlakɩ hama lakasɩ sakɩyɛ! 48 Yee ɖiyebi-i nɛ ɛlakɩ ḿbʋ́ yɔ, ɛyáa tɩŋa wɛɣnɩ lidaʋ ɛ-yɔɔ nɛ Room ñɩma kɔɔ pɔyɔkɩ ɖɛ-Ɛsɔ ɖɩɣa nɛ pɛkpɛndɩnɩ ɖɛ-ɛjaɖɛ!» 49 Payaɣ pa-taa lɛlʋ se Kayifu, ɛɛkɛ cɔjɔnaa ñʋʋdʋ pɩnaɣ ŋ́gá ka-taa. Ɛ́lɛ́ heyini-wɛ se: «Ɩɩnɩɣ natʋyʋ taa kpem! 50 Ɩtanɩɩ se pɩkɩlɩ-mɩ wee wee se ɛyʋ kʋɖʋm ɛsɩ nɛ ɛjaɖɛ kpeekpe ɛtaala asayʋʋ yaa we?» 51 Ŋgʋ́, pɩtɛkɛ ɛ-maɣmaɣ e-liu wɛna nɛ ɛyɔɔdɩ tɔm tʋnɛ. Ɛlɛ́, ɛɛkɛ cɔjɔnaa ñʋʋdʋ pɩnaɣ ŋ́gá ka-taa yɔɔ eheyi ɛyáa tɔm ndʋ́ tɩlɩnɩ Ɛsɔ cɔlɔ yɔ se pʋwɛɛ se Yesu ɛsɩ Yuda ñɩma yɔɔ. 52 Ɛlɛ́, pɩtɛkɛ pe-ɖeke pɔ-yɔɔ ɛsɩkɩ. Pɩɩwɛɛ se ɛsɩ ḿbʋ́ nɛ ɛkpɛndɩ Ɛsɔ piya mbá pamɩzɩ ɖama paa le yɔ nɛ papɩsɩ ɛyʋ kʋɖʋm. 53 Pɩkpaɣʋnɩ kɩyakʋ ŋ́gʋ́ yɔ, Yuda ñɩma sɔsaa ɖʋwa se pakʋʋ Yesu. 54 Pʋ-yɔɔ ɛtatasɩɣ cɔʋ Yuda ñɩma hɛkʋ taa keɣlee. Ɛlɛ́, ɛ nɛ ɛ-tɔmkpɛlɩkɩyaa pakʋyɩ powolo egeetiye nɖɩ́ ɖɩñɔtɩnɩ lakʋ yɔ ɖɩ-taa, tɛtʋ ndʋ́ payaɣ se Efrayim yɔ, tɩ-taa nɛ pacaɣ peeɖe. 55 Izrɛɛlɩ ñɩma Paska Kazandʋ kawɩzɩ talʋʋ. Pʋ-yɔɔ ɛjaɖɛ taa ɛyáa sakɩyɛ woba Yeruusalɛm se pala cɩɖɩcɩɖɩ wɛtʋ sɔnzɩ nɛ pʋcɔ tɩtalɩ. 56 Pañɩnaɣ Yesu Ɛsɔ ɖɩɣa taa nɛ pɔpɔzʋʋ ɖama se: «Ɩmaɣzɩɣ se we? Ɛkɔŋ kazandʋ naa ɛɛkɔŋ?» 57 Alɩwaatʋ ńdʋ́ʋ́ cɔjɔnaa sɔsaa nɛ Farɩsɩ ñɩma paha nɔɔ se: yee nɔɔyʋ ɛna ɖenɖe Yesu wɛɛ yɔ yɔ, eheyi nɛ powolo pakpa-ɩ. |