Yohanɛɛsɩ 10 - New Testament

Yesu lɛ ninɖiɣyu kɩbanʋ

¹ Pɩkɛdaa lɛ, Yesu yɔɔdɩ se: «Toovenim lɛ, meheyiɣ-mɩ se: yee nɔɔyʋ ɛtatɩŋnɩ heŋ kaɖaɣ nɔnɔɔ nɛ ɛsʋʋ nɛ ɛmanɩ koloŋa yɔ, ɛkɛ mɩ́lʋ́ nɛ ɛtɛ ɛkɛ ɛzaɣ́ʋ.

² Ɛlɛ́, weyi ɛtɩŋɩɣnɩ nɔnɔɔ yɔ, ɛnʋ lɛ heŋ ɖiyiyu.

³ Kaɖaɣ yɔɔ ɖaŋɩyʋ tʋlʋʋ-ɩ nɔnɔɔ nɛ ɛ́yáa paa e-heu weyi ɛ-hɩɖɛ nɛ ɛ́lɛ́ nɩɩ ɛ-nɔɔ nɛ ɛlɩɩnɩ kaɖaɣ taa.

⁴ Ɩlɩɣ ɩtɩŋa payɩ lɛ, ɛɖɛɛ-ɩ nɔɔ nɛ ɛ́lɛ́ tɩŋɩɣ ɛ-wayɩ, mbʋ́ pʋyɔɔ yɔ, ɩsɩm ɛ-nɔɔ.

⁵ Ɩɩtɩŋɩɣ weyi ɩtasɩm-ɩ yɔ kaʋ, ɛlɛ́, iseɣ-i kiseu, mbʋ́ pʋyɔɔ yɔ, ɩtasɩ ɛ-nɔɔ.»

⁶ Yesu tuu-wɛ eduuye ńɖɩ́, ɛlɛ́, patanɩɩ ndʋ́ ɛcaɣaɣ-wɛ heyuu yɔ.

⁷ Yesu tasɩ yɔɔdʋʋ se: «Toovenim lɛ, mankaɖɩɣ-mɩ se ma lɛ heŋ kaɖaɣ nɔnɔɔ.

⁸ Mbá patɩŋa payɩ palayɩ-m kɔm yɔ, pɛkɛ mɩ́láa nɛ azaɣ́a. Heŋ tanɩɩnɩ-wɛ.

⁹ Ma lɛ nɔnɔɔ. Weyi ɛtɩŋɩɣnɩ mɔ-yɔɔ nɛ ɛsʋʋ yɔ, pɩyakɩ ɛ-ñʋʋ. Ɛpɩzɩɣ ɛsʋʋ nɛ ɛlɩɩ nɛ ehiɣ tɔɔnaɣ.

¹⁰ Mɩlʋʋ nɛ kʋʋ nɛ wɛɛkʋʋ pe-ɖeke pɔ-yɔɔ mɩ́lʋ́ kɔŋ. Ma lɛ, mɔnkɔm se ɛyáa ihiɣ wezuu nɛ wezuu ŋ́gʋ́ kʋtɔyɩnɩ-wɛ.

¹¹ Ma lɛ ninɖiɣyu kɩbanʋ. Ninɖiɣyu kɩbanʋ tisiɣ nɛ ɛsɩ e-heŋ yɔɔ.

¹² Weyi ɛ́lɛ́ tɛkɛ ninɖiɣyu nɛ ɛtatɩɣyɩ heŋ nɛ ɛlakɩ tʋmɩyɛ liidiye ɖeke yɔɔ yɔ, yee ɛna kpemtɔɔyaɣ woki heŋ wayɩ yɔ, eseɣ eyebi-i nɛ kowolo kakpa lɛɛŋ nɛ kamɩzɩ lɛɛŋ nɛ ñɩtʋ.

¹³ Eseɣ, mbʋ́ pʋyɔɔ yɔ, liidiye yɔɔ ɖeke ɛlakɩ tʋmɩyɛ, ɛ-paa fɛyɩnɩ heŋ.

^14-15 Ma lɛ Ninɖiɣyu kɩbanʋ. Ɛzɩma mbʋ́ Caa sɩm-m nɛ mansɩm-ɩ yɔ, ḿbʋ́ ɖɔɖɔ mansɩm me-heŋ nɛ ɛ́lɛ́ sɩm-m. Ɩ-yɔɔ mansɩkɩ.

¹⁶ Mɛwɛnɩ ɖɔɖɔ heŋ lɛɛŋ, ɩfɛyɩ kaɖaɣ kanɛ ka-taa. Pʋwɛɛ se menɖiyi-i ɖɔɖɔ. Ɩkɔŋ nɩʋ mɔ-nɔɔ nɛ ɩkpɛndɩ ɩnɛ ɩ-yɔɔ nɛ ɩpɩsɩ tikaɣ kʋɖʋmaɣ nɛ ninɖiɣyu kʋɖʋm ɖiyi-i.

¹⁷ Caa sɔɔlɩ-m, mbʋ́ pʋyɔɔ yɔ, mentisiɣ se mansɩ nɛ piyele manɖaɣnɩ hiɣu wezuu.

¹⁸ Nɔɔyʋ ɛɛpɩzɩɣ ɛlɩzɩ me-wezuu. Ɛlɛ́, ma-maɣmaɣ mentisiɣna nɛ mansɩ. Manpɩzɩɣ mansɩ nɛ manpɩzɩ manɖaɣnɩ wezuu hiɣu. Ḿbʋ́ man-Caa ɖʋ-m se mala.»

¹⁹ Tɔm ńdʋ́ tɩ-yɔɔ lɛ, Yuda ñɩma hɛkʋ taa ɖaɣnɩ tayʋʋ.

²⁰ Pa-taa sakɩyɛ tɔŋaɣ se: «Ekem aleewaa! Ɛsʋ kpaaŋ! Ɛbɛ yɔɔ ɩnɩɣnɩ-ɩ?»

²¹ Lɛlaa se: «Eekem aleewaa yɔ, ɛtaayɔɔdɩ ḿbʋ́. Eleeu pɩzɩɣ ekuli yʋlʋmaa ɛsɛ naa we?»

Nabɛyɛ tisi Yesu tɔm, lɛlaa ñekizi-tʋ

²² Nakʋyʋ wiye pɔtɔkaɣ Ɛsɔ Đɩɣa Đaɣnʋʋ Kazandʋ Yeruusalɛm. Pɩɩkɛ niŋkaɣ alɩwaatʋ.

²³ Pɩkɛdaa lɛ, Yesu cɔʋ ka-taa Salomɔɔ Hɔɔlʋʋ taa.

²⁴ Peeɖe Yuda ñɩma cɔ-ɩ pata nɛ pɔpɔzɩ-ɩ se: «Ŋyeki-ɖʋ se ɖɩwɛɛ pʋtʋʋ taa ḿbʋ́ nɛ pɩsɩɩnɩ ɖooye? Yee ña lɛ Weyi Ɛsɔ Lɩzaa Yɔ yɔ, ŋheyi-ɖʋ ḿbʋ́ kpayɩ.»

²⁵ Yesu cosi-wɛ se: «Mɛntɛm-mɩ heyuu ḿbʋ́, ɛlɛ́, iitisiɣ. Tʋma wena malakɩ man-Caa ɖoŋ taa yɔ, ana lɩzɩɣnɩ ma-aseɣɖe.

²⁶ Mɩ miitisiɣ, mbʋ́ pʋyɔɔ yɔ, ɩfɛyɩ me-heŋ taa.

²⁷ Me-heŋ nɩɣ mɔ-nɔɔ. Ma mansɩm-ɩ nɛ ɛ́lɛ́ ñatɩŋɩɣ-m.

²⁸ Mahaɣ-ɩ wezuu maatɛŋ, ɩɩtɛŋɛlɩɣ kaʋ. Nɔɔyʋ ɛɛkaɣ-ɩ lɛɣʋ me-nesi taa.

²⁹ Man-Caa cɛlɩnɩ-m-ɩ, ɛkɩlɩ pɩtɩŋa payɩ, nɔɔyʋ ɛɛpɩzɩɣ ɛlɛɣ nabʋyʋ e-nesi taa.

³⁰ Ma nɛ man-Caa ɖɩkɛ kʋɖʋm.»

³¹ Peeɖe Yuda ñɩma ɖaɣnɩ kpaɣʋ pɛɛ se payakɩ-ɩ.

³² Pʋ-yɔɔ eheyi-wɛ se: «Malabɩ Caa tʋma kɩbana sakɩyɛ mɩ-ɛsɩndaa. A-taa nɖɩ́ yɔɔ ɩcaɣ se ɩyaɣ-m pɛɛ nɛ mansɩ yɔ?»

³³ Paba cosi-i se: «Pɩtɛkɛ tʋmɩyɛ kɩbanɖɛ naɖɩyɛ yɔɔ ɖɩcaɣ se ɖɩkʋ-ŋ nɛ pɛɛ. Ɛlɛ́, ɖɩkʋʋ-ŋ se ŋwɛɛkɩ Ɛsɔ hɩɖɛ: ŋkɛ ɛyʋ yem nɛ ŋyaɣ ña-tɩ se Ɛsɔ.»

³⁴ Peeɖe Yesu heyi-wɛ se: «Paɖʋ mɩ-paɣtʋ taa se: ‹Ɛsɔ tɔm se ɩkɛ ɛsɔnaa.›

³⁵ Đɩnawa se paapɩzɩɣ pahɩzɩ tɔm ndʋ́ pama Ɛsɔtɔm Takayaɣ taa yɔ. Ŋgʋ́, tɩ-taa Ɛsɔ ya mbá ɛyɔɔdaɣnɩ-wɛ yɔ se ɛsɔnaa.

³⁶ Yee ḿbʋ́ lɛ, pɩlabɩ ɛzɩma mɔntɔ se: ma lɛ Ɛsɔ Pɩyalʋ nɛ ɩtɔŋ se mɛwɛɛkɩɣ ɛ-hɩɖɛ yɔ? Ŋgʋ́, ma ɛlɩzaa nɛ etiyi kedeŋa yɔɔ.

³⁷ Yee maalakɩ man-Caa tʋma yɔ, ɩtaawɛnɩ lidaʋ mɔ-yɔɔ!

³⁸ Ɛlɛ́, paa malakɩ-yɛ nɛ ɩfɛyɩnɩ lidaʋ mɔ-yɔɔ yɔ, itisi tʋma wena malakɩ yɔ a-yɔɔ. Peeɖe ɩnaɣ nɛ ɩtɩlɩ kpaagbaa se ma nɛ Caa ɖɩwɛ ɖama taa.»

³⁹ Ɛyɔɔdɩ ḿbʋ́ lɛ, paɖaɣnɩɣ ñɩnʋʋ se pakpa-ɩ, ɛlɛ́, ɛtʋlɩ, petehiɣ-i.

⁴⁰ Peeɖe Yesu ɖaɣnɩ tɛzʋʋ Yɔɔrdaŋ pɔɔ wayɩ ɖenɖe Yohanɛɛsɩ kalabɩ ɛyáa lɩm sɔʋ sɔnzɩ yɔ nɛ ɛcaɣ peeɖe.

⁴¹ Ɛyáa sakɩyɛ wokaɣ ɛ-cɔlɔ nɛ pɔtɔŋ se: «Yohanɛɛsɩ tala hama lakasɩ nasɩyɩ. Ɛlɛ́, tɔm ndʋ́ tɩtɩŋa ɛyɔɔdɩ abalʋ ɛnɛ ɛ-yɔɔ yɔ, tɩkɛ toovenim.»

⁴² Pʋ-yɔɔ ɛyáa sakɩyɛ wɛnɩ lidaʋ Yesu yɔɔ.