Wɩlʋʋ 9 - New Testament

Pahʋlɩ ɛgandɩyɛ kagbaanzɩ ñɩnɖɛ

¹ Kagbaanzɩ ñɩnʋ hʋlɩ ɛgandɩyɛ lɛ, mana tɩɩŋa nakɛyɛ, kɛkpɛzɩnɩ ɛsɔdaa nɛ kɔtɔlɩ kedeŋa yɔɔ. Pɛcɛlɩ-kɛ asayʋʋ pɔʋ nɔnɔɔ ñɩmɩyɛ.

² Peeɖe katʋlɩ kʋ-nɔɔ nɛ kokuli nɛ ñɔsɩ nasɩyɩ lɩɣnɩ kɩ-taa. Sɩwɛ ɛzɩ momoɖe sɔsɔɖɛ naɖɩyɛ taa ñɩnzɩ yɔ nɛ sɩñɛyɩ nɛ sihuuzi wɩsɩ yɔɔ kpemm.

³ Peeɖe kudoloŋ nakʋyʋ lɩnɩ sɩ-taa nɛ kusu kedeŋa yɔɔ. Paha-kʋ ɖoŋ ɛzɩ pɩcasɩ yɔ.

⁴ Peheyi-kʋ se kɩtaatukuni kedeŋa yɔɔ ñɩyʋʋ nakʋyʋ yaa tɩʋ nakʋyʋ yaa mbʋ́ pʋñɔwa yɔ, pɩ-taa nabʋyʋ. Ɛlɛ́, kɩ-ɛsɩyɛ ɛsɛɛnɩ mbá pe-kila taa fɛyɩ Ɛsɔ nesi ñɩɣʋ yɔ.

⁵ Peheyi-kʋ se kɩtaakʋ-wɛ, ɛlɛ́, kɩnazɩ-wɛ fenasɩ kagbaanzɩ. Nazʋʋ mbʋ́ kɩnazɩɣ-wɛ yɔ, pʋwɛ ɛzɩ pɩcaka yakʋʋ ɛyʋ nɛ ɛnɩɣ siziŋ yɔ.

⁶ Kɩyakɩŋ ɩnʋ ɩ-taa lɛ, ɛyáa kɔŋ ñɩnʋʋ sɩm, ɛlɛ́, paanaɣ-pʋ kpem. Pe-liu wɛɣ se pasɩ, ɛlɛ́, sɩm seɣ-wɛ nɛ puwolo poliŋ.

⁷ Kutoloŋ ŋ́gʋ́, kɩnɩɣzɩnɩ kpaŋnaŋ weyi pɔñɔɔzɩ-ɩ se ɩɖɛɛ you yɔ. Nabʋyʋ kɛwɛ kʋ-ñʋŋ taa ɛzɩ sika hulasi yɔ nɛ kɩ-ɛsɩndaa wɛɛ ɛzɩ ɛyáa yɔ.

⁸ Kʋ-ñɔsɩ wɛ ɛzɩ halaa ñɔsɩ yɔ nɛ ki-kela ñɛwɛɛ ɛzɩ tɔɔyɩŋ ñɩna yɔ.

⁹ Nabʋyʋ wɛ kɩ-laŋa taa, pʋwɛ ɛzɩ ñɩ́ɣ́yʋ́ʋ ŋgʋ́ pohuuzuu lotu yɔɔ you taa yɔ. Kʋkʋyaɣ nɛ ki-keŋ taa wiɣ ɛzɩ you lɔɔɖa wena kpaŋnaŋ sakɩyɛ hɔŋ alɩwaatʋ ndʋ́ iseɣ you taa yɔ.

¹⁰ Kʋñɔ suŋ ɛzɩ pɩcasɩ yɔ nɛ ɩ-nɔsɩ taa wɛɛ ɖɔɖɔ ḿbʋ́. Ɩ-nɔsɩ taa peeɖe ku-ɖoŋ weyi kɩnazɩɣnɩ ɛyáa fenasɩ kagbaanzɩ yɔ, ɛwɛɛ.

¹¹ Kɩwɛnɩ wiyaʋ nɔɔyʋ, ɛnʋ lɛ asayʋʋ tiyiyu. Payaɣ-ɩ nɛ Ebree taa se: Abaadɔɔ nɛ Grɛɛkɩ taa se: Apoliyɔɔ.

¹² Kajalaɣ kʋñɔŋ ɖɛwa. Kʋ-wayɩ lɛ, kʋñɔmɩŋ naalɛ tasɩɣ kɔm.

Pahʋlɩ ɛgandɩyɛ loɖo ñɩnɖɛ

¹³ Tɩlaaɖɩ ɖɩhɔɖɛ nɖɩ́ palabɩnɩ sika nɛ ɖɩwɛɛ Ɛsɔ ɛsɩndaa yɔ, ɖɩɩwɛnɩ hɩŋ naanza. Tiyiyu loɖo ñɩnʋ hʋlɩ ɛgandɩyɛ lɛ, manɩɣ pʋyɔɔdʋʋnɩ tɩlaaɖɩ ɖɩhɔɖɛ taa.

¹⁴ Pʋyɔɔdaɣnɩ tiyiyu ɛnʋ se: «Yɛɖɩ Ɛsɔ tiyiyaa naanza mbá paɖɩ-wɛ yoŋgbasɩ pɔɔ sɔsɔɔ ŋgá payaɣ se Efraatɩ yɔ kɔ-nɔɔ yɔɔ yɔ.»

¹⁵ Peeɖe pɛhɛɖɩ pa-naanza. Paañɔɔzɩ pa-tɩ nɛ paɖaŋ ñɩ́ɣ́yʋ́ʋ ŋ́gʋ́, kɩyakʋ ŋ́gʋ́, fenaɣ ŋ́gá, pɩnaɣ ŋ́gá ka-taa se yee patayɩ kedeŋa yɔɔ ɛyáa tam naadozo yɔ, pakʋ hɔɔlʋʋ kʋɖʋmʋʋ.

¹⁶ You laɖaa mbá pacakɩ kpaŋnaŋ yɔ, manɩwa se pɛkpɛndɩ ɛgbaŋ nasɩlɛ.

¹⁷ Ɩɩnaɣ ɛzɩma mbʋ́ mana kpaŋnaŋ nɛ ɩ-yɔɔ caɣyaa mon-ɖoziye taa yɔ: posu ñɩɣtʋ wondu ndʋ́ tɩsɛ ɛzɩ miŋ nɛ tipiyi ɛzɩ tɛʋ piyuu yɔ nɛ tɩwɛɛ ɖɔɖɔ ɛzɩ kazɩnzɩŋa yɔ. Kpaŋnaŋ ɩnʋ, ɩ-ñʋŋ wɛ ɛzɩ tɔɔyɩŋ ñʋŋ yɔ, miŋ nɛ ñɔsɩ nɛ tɩm palɩɣaɣnɩ ɩ-nɔsɩ taa.

¹⁸ Yee patayɩ kedeŋa kpeekpe ɛyáa tam naadozo yɔ, miŋ nɛ ñɔsɩ nɛ tɩm mbʋ́ pɩlɩɣaɣnɩ kpaŋnaŋ ɩnʋ ɩ-nɔsɩ taa yɔ, pʋkʋ hɔɔlʋʋ kʋɖʋmʋʋ.

¹⁹ Kpaŋnaŋ ɩnʋ, i-ɖoŋ wɛ ɩ-nɔsɩ nɛ i-suŋ pa-taa. I-suŋ wɛ ɛzɩ ɖʋmaa yɔ: ɩwɛnɩ ñʋŋ nɛ ɩnʋ ɩnazɩɣnɩ ɛyáa.

²⁰ Piyele ɛyáa mbá pɩkazɩ kedeŋa yɔɔ se kʋñɔmɩŋ ɩnʋ ɩtakʋ-wɛ yɔ, peteyele mbʋ́ palaɣkaɣ yɔ. Peteyele aleewaa nɛ sɩʋ kpelisi nzɩ́ palabɩnɩ sika nɛ nzɩ́ palabɩnɩ liidiye nɛ nzɩ́ palabɩnɩ ñɩ́ɣ́yʋ́ʋ kazɩnzɩŋa ñɩŋgʋ yɔ nɛ nzɩ́ pasaɣnɩ pɛɛ nɛ nzɩ́ pasaɣnɩ ɖasɩ yɔ, sɩ-tɛɛ luŋuu. Ŋgʋ́, sɩɩpɩzɩɣ sɩna yaa sɩnɩɩ yaa sɩɖɔ.

²¹ Peteyele ɖɔɖɔ ɛyáa kʋʋ, nɛ pe-efeletu nɛ pa-acɛyɛ nɛ pa-mɩlɩm se pɛlɛɣzɩ wɛtʋ.