Wɩlʋʋ 8 - New Testament

Heɣa kpɛzɩ nesi ñɩɣʋ lʋbɛ ñɩmbʋ

¹ Pʋwayɩ lɛ, Heɣa ŋ́gá kɛkpɛzɩ nesi ñɩɣʋ lʋbɛ ñɩmbʋ nɛ pusu ɛsɔdaa ɖiɣ ɖiɣ nɛ pɩtalɩ ɛzɩ cacasɩ niidozo yɔ.

² Mɔncɔnaa lɛ, manaɣ Ɛsɔ tiyiyaa mbá pasɩŋɩɣ ɛ-ɛsɩndaa yɔ, pɛwɛ lʋbɛ. Pɛcɛlaɣaɣ-wɛ agandɛɛ lʋbɛ.

³ Ɛlɛ́, Ɛsɔ tiyiyu nɔɔyʋ wolo ɛsɩŋ tɩlaaɖɩ ɖɩhɔɖɛ. Ɛɖɔkɩ ñɩɣlɩ́m ñanaɣ ŋgá patɩɩhɔkɩ ka-taa tɩlaaɖɩ yɔ. Pɛcɛlɩ-ɩ tɩlaaɖɩnaa sakɩyɛ nɛ Ɛsɔ ñɩma Ɛsɔ sɛtʋ se ewoni ɛha Ɛsɔ peeɖe. Đɩhɔɖɛ ńɖɩ́, paalabɩ-ɖɩ nɛ sika nɛ ɖɩwɛɛ kewiyaɣ kpelaɣ ɛsɩndaa.

⁴ Peeɖe ɛhɔbɩ-kʋ nɛ ñɔsɩ ñɛyɩ e-nesi taa nɛ pɩkpɛndɩnɩ Ɛsɔ ñɩma Ɛsɔ sɛtʋ nɛ pɩkpa Ɛsɔ ɛsɩndaa.

⁵ Ɛlɛ́, tiyiyu ɛnʋ ɛkpaɣ tɩlaaɖɩ ñanaɣ nɛ ekuu tɩlaaɖɩ ɖɩhɔɖɛ miŋ ɖo nɛ ɛlɔ kedeŋa yɔɔ. Peeɖe tɛʋ nazaa nɛ kitili nɛ kɩñɩlɩsɩ nɛ tɛtʋ ñamsɩ.

Pahʋlɩ kajalaɣ agandɛɛ nanza

⁶ Peeɖe Ɛsɔ tiyiyaa lʋbɛ mbá pɔɖɔkɩ agandɛɛ lʋbɛ yɔ, pɔñɔɔzɩ pa-tɩ se pahʋlɩ-yɛ.

⁷ Ɛsɔ tiyiyu kajalaɣ ñɩnʋ hʋlɩ ɛgandɩyɛ lɛ, pɔlɔ ɖɔmbɛɛ nɛ miŋ kedeŋa yɔɔ, pisidini calɩm. Pʋtɔlʋʋ yɔ, yee pɩtayɩ tɛtʋ tam naadozo yɔ, pɩñaɣ hɔɔlʋʋ kʋɖʋmʋʋ. Yee pɩtayɩ ɖɔɖɔ tɩŋ ḿbʋ́ yɔ, pɩñaɣ hɔɔlʋʋ kʋɖʋmʋʋ, pɩñaɣ ɖɔɖɔ ñɩtʋ lɛŋ ñɩndʋ tɩŋa payɩ.

⁸ Naalɛ ñɩnʋ ñahʋlɩ ɛ-ñɩnɖɛ lɛ, pɩsɛlɩ nabʋyʋ, pʋwɛ ɛzɩ pʋʋ sɔsɔʋ nakʋyʋ yɔ nɛ pʋlɔ teŋgu taa, pɩɖaɣnɩ mʋ́ʋ miŋ. Yee pɩtayɩ teŋgu tam naadozo yɔ, hɔɔlʋʋ kʋɖʋmʋʋ taa lɩm pɩsɩ calɩm.

⁹ Yee pɩtayɩ mbʋ́ pɩtɩŋa payɩ Ɛsɔ laba nɛ pʋwɛɛ wezuu teŋgu taa yɔ tam naadozo yɔ, hɔɔlʋʋ kʋɖʋmʋʋ sɩba. Yee pekpeɣli mɛlɛnaa nɛ pɩtayɩ-wɛ ɖɔɖɔ tam naadozo yɔ, pʋwɛɛkɩ hɔɔlʋʋ kʋɖʋmʋʋ.

¹⁰ Naadozo ñɩnʋ hʋlɩ ɛ-ñɩnɖɛ lɛ, tɩɩŋa sɔsɔɔ nakɛyɛ kpɛzɩnɩ ɛsɔdaa nɛ miŋ ɛzɩ kooloŋa yɔ nɛ kɔtɔlɩ. Yee pɩtayɩ pɔsɩ nɛ hila tam naadozo yɔ, kɔtɔlɩ hɔɔlʋʋ kʋɖʋmʋʋ yɔɔ.

¹¹ Payaɣ-kɛ se: «Sɔtʋ ndʋ́ tɩwɛ ñaŋ yɔ». Yee pɩtayɩ pɔsɩ tam naadozo yɔ, hɔɔlʋʋ kʋɖʋmʋʋ taa lɩm wɛ ñaŋ nɛ mbá pɔñɔ-pʋ yɔ, pa-taa sakɩyɛ sɩba.

¹² Tiyiyu naanza ñɩnʋ ñahʋlɩ ɛ-ñɩnɖɛ lɛ, yee pɩtayɩ wɩsɩ tam naadozo yɔ, pʋtʋʋ hɔɔlʋʋ kʋɖʋmʋʋ. Yee pɩtayɩ fenaɣ nɛ tɩɩnzɩ ḿbʋ́ yɔ, pʋtʋʋ ɖɔɖɔ hɔɔlʋʋ kʋɖʋmʋʋ. Pɩlabɩ ḿbʋ́ se ñalɩmɩyɛ nɖɩ́ ɖɩwɛ evemiye taa yɔ, yee pɩtayɩ-ɖɩ tam naadozo yɔ, hɔɔlʋʋ kʋɖʋmʋʋ pɩsɩ cɩkpɛndʋʋ nɛ ɖoó taa ñɩnɖɛ ɖɔɖɔ ḿbʋ́.

¹³ Mantasɩ cɔnaʋ lɛ, manaɣ keziye naɖɩyɛ, ɖɩkʋyaɣ ɖooo ɛsɔdaa nɛ manɩɣ ɖɩyɔɔdʋʋ ɖoŋ se: «Pʋtɔɔ-wɛ! Pʋtɔɔ-wɛ! Pʋtɔɔ kedeŋa yɔɔ ñɩma, agandɛɛ wena Ɛsɔ tiyiyaa naadozo mbá pɩkazaa yɔ, pɔkɔŋ hʋlʋʋ yɔ a-yɔɔ!»