Wɩlʋʋ 7 - New Testament

Paɖʋ mayaɣ nakɛyɛ Ɛsɔ tʋmlaɖaa kila taa

¹ Pʋwayɩ lɛ, mana Ɛsɔ tiyiyaa naanza, pasɩŋ kedeŋa hɔɔlɩŋ naanza kʋlɔmɩŋ taa. Paakpa kedeŋa yɔɔ heɣlim naanza mbʋ́ pʋwɛɛ yɔ se pɩtaama tataa yaa teŋgu yɔɔ yaa tɩʋ nakʋyʋ yɔɔ.

² Mana ɖɔɖɔ Ɛsɔ tiyiyu lɛlʋ, ɛlɩnɩ wɩsɩ ɖɩlɩyɛ nɛ ɛkpaɣ. Ɛɖɔkɩ Ɛsɔ wezuu tʋ nesi ñɩɣʋ. Peeɖe eholuuni Ɛsɔ tiyiyaa naanza mbá paha-wɛ ɖoŋ se pɛwɛɛkɩ mbʋ́ pʋwɛ tataa nɛ teŋgu taa yɔ se:

³ «Ɩtaawɛɛkɩ tataa yaa teŋgu taa yaa tɩŋ yɔɔ nabʋyʋ nɛ pʋkɔɔ pɩsɩɩnɩ alɩwaatʋ ndʋ́ ɖɩñɩɣ nesi ɖɛ-Ɛsɔ tʋmlaɖaa kila taa yɔ.»

⁴ Peeɖe manɩ mbá pañɩɣ pe-kila taa nesi yɔ pa-ñʋʋ. Pɛkpɛndɩ kutokiŋ mɩnʋʋ nɛ nɩɩnaza nɛ naanza. Pɛwɛ Izrɛɛlɩ cejewee tɩŋa taa:

⁵ Yuda liɖe taa lɛ, ɛyáa kutokiŋ hiu nɛ naalɛ kila taa pañɩɣ nesi. Rubɛɛnɩ ñɩnɖɛ taa kutokiŋ hiu nɛ naalɛ, Gaadɩ ñɩnɖɛ taa kutokiŋ hiu nɛ naalɛ.

⁶ Asɛɛrɩ ñɩnɖɛ taa kutokiŋ hiu nɛ naalɛ, Nɛftalii ñɩnɖɛ taa kutokiŋ hiu nɛ naalɛ, Manaasee ñɩnɖɛ taa kutokiŋ hiu nɛ naalɛ.

⁷ Siimeyɔɔ ñɩnɖɛ taa kutokiŋ hiu nɛ naalɛ, Leevi ñɩnɖɛ taa kutokiŋ hiu nɛ naalɛ, Isakaarɩ ñɩnɖɛ taa kutokiŋ hiu nɛ naalɛ.

⁸ Zabulɔɔ ñɩnɖɛ taa kutokiŋ hiu nɛ naalɛ, Yozɛɛfʋ ñɩnɖɛ taa kutokiŋ hiu nɛ naalɛ, Bɛnjamɛɛ ñɩnɖɛ taa ɖɔɖɔ kutokiŋ hiu nɛ naalɛ.

Ajɛya kpeekpe taa ɛyáa wɛ Ɛsɔ nɛ heɣa pɔ-cɔlɔ

⁹ Pʋwayɩ mantasɩ cɔnaʋ lɛ, manaɣ ɛyáa samaɣ nakɛyɛ, kɔɖɔwa pɩtɩɩfɛyɩ, kɛfɛyɩ kalʋʋ: ajɛya kpeekpe nɛ cejewee tɩŋa taa ɛyáa nɛ samaɣ tɩŋa nɛ kʋnʋmɩŋ tɩŋa. Pasɩŋ kewiyaɣ kpelaɣ nɛ Heɣa pɛ-ɛsɩndaa. Posu tokonaa kʋhʋlʋmaa waa waa nɛ pɔ́ɖɔ́kɩ paatʋ pe-nesi taa

¹⁰ nɛ poholuu ɖoŋ se: «Đɛ-Ɛsɔ weyi ɛcaɣ kewiyaɣ kpelaɣ yɔɔ yɔ nɛ Heɣa pɔ-cɔlɔ ñʋʋ yabʋ lɩɣna!»

¹¹ Ɛsɔ tiyiyaa tɩŋa kɔcɔ kewiyaɣ kpelaɣ nɛ sɔsaa nɛ kpɩna ana a-naanza nɛ pata. Peeɖe poluŋ Ɛsɔ tɛɛ kɛ-ɛsɩndaa nɛ paka pɛ-ɛsɛ nɛ tɛtʋ nɛ pasaŋ-ɩ

¹² se: «Pɩla ḿbʋ́! Đɛ-Ɛsɔ ɛtɩɣyɩ samtʋ nɛ koboyaɣ nɛ lɔŋsɩnɖɛ nɛ ɛsɩmɩyɛ nɛ hɩɖɛ ɖʋʋ nɛ ɖoŋ nɛ abalɩtʋ pɩnzɩ ɛgbaŋ ɛgbaŋ! Pɩla ḿbʋ́!»

¹³ Peeɖe sɔsaa taa lɛlʋ pɔzɩ-m se: «Mbá lɛ mbá posu tokonaa kʋhʋlʋmaa waa waa yɔ. Palɩnɩ le»

¹⁴ Ɛlɛ́, moncosi-i se: «Đajaa! Ñasɩmna.» Peeɖe eheyi-m se: «Ḿbá tɔɔnɩ kʋñɔŋ sɔsɔʋ. Pɔcɔtɩ po-tokonaa kitibaa waa waa nɛ pahʋlɩsɩ-wɛ Heɣa calɩm taa.

¹⁵ Pʋ-yɔɔ pasɩŋ Ɛsɔ kewiyaɣ kpelaɣ ɛsɩndaa nɛ palakɩ-ɩ tʋmɩyɛ wɩsɩ nɛ ɖoó ɛ-ɖɩɣa taa. Weyi ɛcaɣ kɔ-yɔɔ yɔ, ɛkɔŋ pɔ-yɔɔ kenduu.

¹⁶ Ñɔɔsɩ ɛɛtasɩɣ-wɛ wɩʋ nɛ lɔkɔtʋ ɛɛtasɩɣ-wɛ ɖɔkʋʋ kaʋ. Wɩsɩ ɛɛtasɩɣ-wɛ ñaɣʋ yaa soŋaɣ nakɛyɛ ɛɛtasɩɣ-wɛ kpaʋ kaʋ.

¹⁷ Mbʋ́ pʋyɔɔ yɔ, Heɣa ŋgá kɛwɛ kewiyaɣ kpelaɣ hɛkʋ taa yɔ, keɖiyiɣ-wɛ nɛ kowoni-wɛ wezuu lɩm hiɖe cɔlɔ nɛ Ɛsɔ hɛzɩ pɛ-ɛsɩtɛɣlɩm tɩŋa.»