Wɩlʋʋ 6 - New Testament

Heɣa kpɛzɩ nesi ñɩɣʋ loɖo

¹ Mantasɩ cɔnaʋ lɛ, mana Heɣa kpɛzɩ nesi ñɩɣʋ ḿbʋ́ pʋ-lʋbɛ taa kajalaɣ ñɩmbʋ nɛ manɩɣ kpɩna ana a-naanza a-taa lɛɛɖɛ yɔɔdʋʋ ɛzɩ tɛʋ nazʋʋ yɔ se: «Kɔɔ!»

² Peeɖe mana kpaŋnɔ kʋhʋlʋm nɔɔyʋ. Weyi ɛcaɣ-ɩ yɔ, ɛɖɔkɩ tɔʋ nɛ mana pɛcɛlɩ-ɩ wabɩyɛ hulaɣ nɛ ɛɖɛɛ ɛzɩ waɖʋ yɔ se ɛwɛɛ wabʋ yɔɔ.

³ Pʋwayɩ lɛ, kɛkpɛzɩ nesi ñɩɣʋ naalɛ ñɩmbʋ nɛ manɩɣ kpɩna ana a-taa naalɛ ñɩnɖɛ tɔŋ se: «Kɔɔ!»

⁴ Peeɖe kpaŋnɔ lɛlʋ lɩwa, ɛsɛ ɛzɩ miŋ yɔ. Weyi ɛcaɣ-ɩ yɔ, pɛcɛlɩ-ɩ sɩɣa sɔsɔɔ nakɛyɛ nɛ paha-ɩ ɖoŋ se ɛla nɛ ɛyáa ɛtaatasɩ wɛʋ laŋhɛzɩyɛ taa kedeŋa yɔɔ nɛ piyele pakʋ ɖama.

⁵ Pʋwayɩ lɛ, kɛkpɛzɩ nesi ñɩɣʋ tozo ñɩmbʋ nɛ manɩɣ tozo ñɩnɖɛ tɔŋ se: «Kɔɔ!» Mɔncɔnaa lɛ, mana kpaŋnɔ kɩkpɛdʋ nɔɔyʋ. Weyi ɛcaɣ-ɩ yɔ, ɛɖɔkɩ ñɩ́ɣ́yʋ́ʋ kɩmaɣzʋʋ e-nesi taa

⁶ nɛ manɩɣ pʋyɔɔdʋʋnɩ kpɩna ana a-naanza a-hɛkʋ taa se: «Payakɩ mɩla kiiloo kɩyakʋ kʋɖʋmʋʋ tʋmɩyɛ liidiye nɛ saamɩla kiiloonaa naadozo kɩyakʋ kʋɖʋmʋʋ tʋmɩyɛ liidiye ɖɔɖɔ. Piyele num nɛ sʋlʋm lɛ, taawɛɛkɩ-wɛ.»

⁷ Pʋwayɩ lɛ, kɛkpɛzɩ nesi ñɩɣʋ naanza ñɩmbʋ nɛ manɩɣ kpɩnɛ naanza ñɩnɖɛ ñɔtɔŋ se: «Kɔɔ!»

⁸ Mɔncɔnaa lɛ, mana kpaŋnɔ nɔɔyʋ, epiyaa ɛzɩ tɩŋ hatʋ yɔ. Weyi ɛcaɣ-ɩ yɔ, payaɣ-ɩ se Sɩm nɛ ɖenɖe sɩɖaa wɛɛ yɔ pɩtɩŋɩɣ ɛ-wayɩ. Patayɩ kedeŋa tam naanza yɔ, paha-wɛ hɔɔlʋʋ kʋɖʋmʋʋ se pakʋ kɩ-taa ɛyáa. Pakʋʋ-wɛ nɛ sɩɣa nɛ ñɔɔsɩ nɛ kʋdɔmɩŋ nɛ tɛtɛ kpɩna wena awɛ kedeŋa yɔɔ yɔ.

⁹ Pʋwayɩ lɛ, Heɣa ŋ́gá kɛkpɛzɩ nesi ñɩɣʋ kagbaanzɩ ñɩmbʋ nɛ manaɣ lone nɖɩ́ palaɣ ɖɩ-taa yɔ, ɖɩ-tɛɛ mbá paakʋ-wɛ yɔ pa-ciyamnaa. Ɛsɔtɔm nɛ aseɣɖe nɖɩ́ palɩzaa yɔ, pɔ-yɔɔ paakʋ-wɛ.

¹⁰ Pa-ciyamnaa makaɣ kubusi ɖoŋ se: «Hayɩ Caa cɩɖɩcɩɖɩ tʋ nɛ toovenim tʋ! Đooye ŋcaɣ se ŋkʋyɩ kedeŋa yɔɔ ñɩma mbá pakʋ-ɖʋ yɔ pɔ-yɔɔ nɛ ŋhʋʋnɩ-wɛ nɛ ŋhɔ pa-nɩŋgbaaŋ»

¹¹ Peeɖe pɛcɛlɩ paa pa-taa weyi toko kʋhʋlʋmʋʋ kitibuu waaa. Ɛlɛ́, peheyi-wɛ se pɛwɛɛ pe-ɖeɖe nɛ pʋkɔɔ pɩsɩɩnɩ alɩwaatʋ ndʋ́ pɛtɛzɩ kʋʋ pa-taabalaa nɛ mbá pa nɛ wɛ palakɩ tʋmɩyɛ, nɛ pɩɩwɛɛ se pakʋ-wɛ ɛzɩ ḿbá yɔ.

¹² Mantasɩ cɔnaʋ lɛ, mana kɛkpɛzɩ nesi ñɩɣʋ loɖo ñɩmbʋ, peeɖe tɛtʋ ñamsɩ siŋŋ nɛ wɩsɩ piyi ɛzɩ kʋñɔŋ wondu yɔ nɛ fenaɣ sɛɛ katɩŋa payɩ ɛzɩ calɩm yɔ.

¹³ Tɩɩnzɩ kpɛzaɣnɩ ɛsɔdaa nɛ sɩtɔlʋʋ tataa ɛzɩ heɣlim sɔsɔm ñamsʋʋ hiyuú ɖoŋ nɛ ki-hiwee kazɩŋ tɔʋ yɔ.

¹⁴ Ɛsɔdaa pazɩ mʋʋ́ʋ ɛzɩ pekpiyuu ñalʋʋ yɔ nɛ pʋŋ tɩŋa nɛ tɛtʋ ndʋ́ ndʋ́ lɩm cɔ-tʋ pɩta yɔ, pɛkpɛzɩɣ po-lona taa.

¹⁵ Piyele kedeŋa yɔɔ awiya sɔsɔna nɛ ñʋndɩnaa nɛ sɔɔjanaa ñʋndɩnaa nɛ ñɩm tɩnaa nɛ ɖoŋ tɩnaa nɛ yomaa nɛ mbá pɛwɛ pa-tɩ yɔɔ yɔ, patɩŋa payɩ pɛmɛlɩɣ pɔŋ nɛ pʋŋ ɛwasɩ pa-taa.

¹⁶ Peheyaɣ pʋŋ nɛ ɛwasɩ se: «Ɩkpɛzɩ ɩɖa ɖɔ-yɔɔ nɛ ihuuzi ɖɔ-yɔɔ nɛ weyi ɛcaɣ kewiyaɣ kpelaɣ yɔɔ yɔ, ɛtaana-ɖʋ. Đɔɖɔ lɛ, Heɣa pana ɛtaakpanɩ-ɖʋ.

¹⁷ Mbʋ́ pʋyɔɔ yɔ, kɩyakʋ sɔsɔʋ ŋgʋ́ pa-pana kpaɣ yɔ, kɩtalaa. Apɩzɩɣ ɛlɩɩ pɩ-taa»