Wɩlʋʋ 5 - New Testament

Heɣa ɖeke koŋ pɩzɩɣnɩ kokuli takayaɣ

¹ Mana ɖɔɖɔ weyi ɛcaɣ kewiyaɣ kpelaɣ yɔɔ yɔ e-nesi kɩbanzɩ taa takayaɣ nakɛyɛ, pama ka-taa nɛ ka-wayɩ nɛ pataaɖɩ-kɛ nɛ nesi ñɩɣʋ tam lʋbɛ taa.

² Mana ɖɔɖɔ Ɛsɔ tiyiyu ɖoŋ tʋ nɔɔyʋ, ɛpɔzaɣnɩ hola se: «Amʋnaa se ɛkpɛzɩ ɖenɖe ɖenɖe pañɩɣ nesi yɔ nɛ ekuli takayaɣ ŋ́gá»

³ Ɛlɛ́, nɔɔyʋ fɛyɩ: paa ɛsɔdaa yaa tataa yaa tɛtɛɛ se ɛpɩzɩɣ ekuli-kɛ yaa ɛcɔnɩ ka-taa.

⁴ Peeɖe mewilaa siŋŋ. Mbʋ́ pʋyɔɔ yɔ, nɔɔyʋ tamʋnɩ se ɛpɩzɩɣ ekuli-kɛ yaa ɛcɔnɩ ka-taa.

⁵ Ɛlɛ́, sɔsaa taa lɛlʋ heyi-m se: «Taawii! Na, Yuda cejewiye taa tɔɔyʋʋ Daaviidi liɖe taa tʋ waba: ɛpɩzɩɣ ɛkpɛzɩ nesi ñɩɣʋ ḿbʋ́ pʋ-lʋbɛ nɛ ekuli takayaɣ ŋ́gá.»

⁶ Peeɖe mana ɖɔɖɔ Heɣa nakɛyɛ sɩŋ kewiyaɣ kpelaɣ nɛ kpɩna ana a-naanza nɛ sɔsaa pɛ-hɛkʋ taa. Kɛwɛ ɛzɩ pala-kɛ yɔ. Kɔñɔ hɩŋ lʋbɛ nɛ kɛwɛnɩ ɛsɛ lʋbɛ. Ana lɛ Ɛsɔ feziŋ lʋbɛ weyi etiyi-i kedeŋa kpeekpe yɔɔ yɔ.

⁷ Pɩkɛdaa lɛ, Heɣa ŋ́gá kowolo kamʋ takayaɣ weyi ɛcaɣ kewiyaɣ kpelaɣ yɔɔ yɔ e-nesi kɩbanzɩ taa.

⁸ Kamʋ-kɛ lɛ, kpɩna ana a-naanza nɛ sɔsaa ḿbá pa-nɩɩlɛ nɛ naanza poluŋ kɛ-ɛsɩndaa. Paa weyi ɛɖɔkɩ cɩmʋʋ nɛ sika caɖasɩ, sɩ-taa nɛ tɩlaaɖɩnaa mbá pɔhɔkɩ yɔ ɖo. Ḿbá lɛ Ɛsɔ ñɩma Ɛsɔ sɛtʋ.

⁹ Peteɣaɣ hendu kɩfatʋ natʋyʋ. Ńdʋ́ lɛ se: «Heɣa, ŋmʋnaa se ŋmʋ takayaɣ nee. Ŋmʋnaa se ŋkpɛzɩ ɖenɖe pataaɖaa yɔ. Mbʋ́ pʋyɔɔ yɔ, ña Ɛsɔ yeba nɛ palaa nɛ pɩtɩŋnɩ ña-calɩm yɔɔ nɛ ŋya ɛyáa ñʋʋ cejewee tɩŋa taa, kʋnʋmɩŋ tɩŋa taa, samaɣ tɩŋa taa, ajɛya tɩŋa taa nɛ ŋwoni-wɛ Ɛsɔ cɔlɔ.

¹⁰ Ŋyeba nɛ pɛkɛ kewiyaɣ taa ñɩma. Ŋyeba nɛ pɛkɛ cɔjɔnaa ɖɛ-Ɛsɔ tʋmɩyɛ taa. Pɔkɔŋ tɔɔʋ kewiyaɣ tataa.»

¹¹ Mɔncɔnaa lɛ, mana ɖɔɖɔ Ɛsɔ tiyiyaa sakɩyɛ nɛ manɩɩ pɔ-nɔɔ. Pɔcɔ kewiyaɣ kpelaɣ nɛ kpɩna nɛ sɔsaa pata. Pɔɖɔwa pɩfɛyɩ kalʋʋ, pɛwɛ kutokiŋ ɛgbaŋ ɛgbaŋ.

¹² Poholaɣ se: «Heɣa ŋgá Ɛsɔ yeba nɛ palaa yɔ, kamʋnaa se ɛha-kɛ ɖoŋ nɛ ñɩm, nɛ lɔŋsɩnɖɛ, nɛ abalɩtʋ, nɛ ɛɖʋ-kɛ hɩɖɛ, nɛ eyele kɛwɛɛ koboyaɣ taa nɛ pasam-kɛ.»

¹³ Manɩ ɖɔɖɔ mbʋ́ pʋwɛ ɛsɔdaa nɛ tataa nɛ tɛtɛɛ nɛ teŋgu taa nɛ mbʋ́ pɩtɩŋa payɩ pʋwɛ kedeŋa yɔɔ yɔ, pɔyɔɔdaɣ se: «Pasa weyi ɛcaɣ kewiyaɣ kpelaɣ yɔɔ yɔ nɛ Heɣa nɛ paɖʋ-wɛ hɩɖɛ, ḿbá tɩnɩ koboyaɣ nɛ ɖoŋ pɩnzɩ ɛgbaŋ ɛgbaŋ!»

¹⁴ Peeɖe kpɩna ana a-naanza acosaa se: «Pɩla ḿbʋ́!» Nɛ sɔsaa ñoluŋ pa-nɩmbɔla yɔɔ nɛ pasaŋ-wɛ.