Wɩlʋʋ 22 - New Testament

¹ Ɛsɔ tiyiyu ɛnʋ, ɛwɩlɩ-m ɖɔɖɔ pɔɔ ŋgá ka-taa lɩm haɣ wezuu yɔ. Lɩm ḿbʋ́, pʋwɛ kele kele ɛzɩ ñɩnʋʋ yɔ. Pɩlɩɣaɣnɩ Ɛsɔ nɛ Heɣa pe-kewiyaɣ kpelaɣ tɛɛ.

² Pɔɔ ŋ́gá, kekpeŋaɣ tɛtʋ taa samaɣ ɖikpeɣliye hɛkʋ taa. Tɩŋ weyi ɩhaɣ wezuu yɔ, ɩɩwɛ ke-kidiilimiŋ yɔɔ nɛ ɩlʋlʋʋ pee tam hiu nɛ naalɛ pɩnaɣ taa. Ɩlʋlʋʋ tam kʋɖʋm fenaɣ taa. Pakpakɩɣ ɩ-hatʋ nɛ pawazɩɣnɩ ajɛya taa ɛyáa pa-kʋdɔmɩŋ.

³ Mbʋ́ Ɛsɔ wɩlɩ kpalʋʋ yɔ, pɩɩtasɩɣ wɛʋ tɩ-taa. Ɛsɔ nɛ Heɣa pe-kewiyaɣ kpelaɣ wɛɣ tɩ-taa. Ɛ-tʋmlaɖaa kɔŋ ɛ-tɛɛ luŋuu.

⁴ Pɔkɔŋ naʋ ɛ-ɛsɩndaa nɛ ɛ-hɩɖɛ wɛɛ pe-kila taa.

⁵ Đoo ɛɛtasɩɣ yuu. Paatasɩɣ tɛɖʋʋ kanɖʋ ñalɩmɩyɛ yaa wɩsɩ ñɩnɖɛ, mbʋ́ pʋyɔɔ yɔ, Kɩpaɣlʋ Ɛsɔ ñalɩmɩyɛ kɔŋ pɔ-yɔɔ ñalʋʋ. Đɔɖɔ lɛ, pɔkɔŋ tɔɔʋ kewiyaɣ pɩnzɩ ɛgbaŋ ɛgbaŋ.

Yesu tɔŋ se ɛwɩzɩ kɔm

⁶ Pʋwayɩ lɛ, Ɛsɔ tiyiyu ɛnʋ, eheyi-m se: «Tɔm tʋnɛ, tɩkɛ toovenim, tɩlakɩ ḿbʋ́. Kɩpaɣlʋ Ɛsɔ weyi ɛwɩlɩɣ náyaa ɛ-lɩmaɣza yɔ, etiyi e-tiyiyu se ɛwɩlɩ ɛ-tʋmlaɖaa mbʋ́ pʋwɛɛ se pala alɩwaatʋ pazɩ taa yɔ.»

⁷ Yesu tɔŋ se: «Na, pɩkazɩ pazɩ, mɔnkɔŋ! Weyi ɛɖɔŋ tɔm ndʋ́ tɩlɩnɩ Ɛsɔ cɔlɔ nɛ pama takayaɣ kanɛ ka-taa yɔ tɩ-yɔɔ yɔ, ehiɣ ɛ-tɩ!»

⁸ Ma Yohanɛɛsɩ, manɩnɩ wondu ńdʋ́ tɩ-tɔm. Manɩ tɩ-tɔm nɛ mana-tʋ lɛ, mɔntɔlɩ Ɛsɔ tiyiyu weyi ɛwɩlaɣ-m-tʋ yɔ ɛ-naŋgbanzɩ tɛɛ se moluŋ ɛ-tɛɛ.

⁹ Ɛlɛ́, eheyi-m se: «Taala ḿbʋ́! Mɛnkɛ Ɛsɔ tʋmlaɖʋ ɛzɩ ña nɛ ña-taabalaa náyaa nɛ mbá pɔɖɔŋ takayaɣ kanɛ ka-taa tɔm yɔɔ yɔ. Ɛsɔ tɛɛ pʋwɛɛ se ŋluŋ!»

¹⁰ Ɛlɛ́, ɛtasɩ-m heyuu se: «Taamɛsɩ tɔm ndʋ́ tɩlɩnɩ Ɛsɔ cɔlɔ nɛ pama takayaɣ kanɛ ka-taa yɔ ña-taa. Mbʋ́ pʋyɔɔ yɔ, alɩwaatʋ ndʋ́ tɔm ńdʋ́ tɩlakɩ yɔ, tɩwɩzɩ talʋʋ.

¹¹ Weyi ɛtatʋʋzɩ yɔ, ɛwɛɛ mbʋ́ pɩtatʋʋzɩ yɔ pɩ-labʋ yɔɔ ḿbʋ́ nɛ azuluma tʋ ñɛwɛɛ ɛ-azuluma taa ḿbʋ́. Ɛlɛ́, weyi ɛtʋʋzaa yɔ, ɛ́lɛ́ ɛwɛɛ mbʋ́ pʋtʋʋzaa yɔ pɩ-labʋ yɔɔ nɛ weyi ɛ́lɛ́ wɛ cɩɖɩcɩɖɩ yɔ, ɛ́lɛ́ ñɛwɛɛ ḿbʋ́!»

¹² Yesu tɔŋ se: «Na! Pɩkazɩ pazɩ, mɔnkɔŋ! Mɛnkpɛndɩɣnɩ kɩhɛyʋʋ nɛ mɛhɛyɩ paa weyi mbʋ́ ɛlaba yɔ pʋ-yɔɔ.

¹³ Ma lɛ Nʋmɔɖɛyʋ nɛ Ɛɖɩɣyɛ, manpazɩnɩ pɩtɩŋa payɩ, mɛntɛzɩɣnɩ-pʋ. Ma ɖɔɖɔ lɛ Đɩpazɩyɛ nɛ Đɩtɛzɩyɛ.

¹⁴ Mbá pɔcɔtʋʋ po-tokonaa se pɩha-wɛ waɖɛ nɛ pɔtɔɔ tɩʋ ŋgʋ́ kɩhaɣ wezuu yɔ ki-pee nɛ patɩŋnɩ nɔnɔsɩ nɛ pasʋʋ tɛtʋ taa yɔ, pehiɣ pa-tɩ!

¹⁵ Piyele kʋsɔɔtʋ laɖaa nɛ fadɩŋ laɖaa nɛ acɛyɛ laɖaa nɛ ɛyáa kʋyaa nɛ agɔlɩma layaa nɛ mbá pɔsɔɔlɩ cɛtʋʋ nɛ pɛcɛtɩɣ ɛyáa yɔ, paba ñɛwɛɣnɩ tɩ-wayɩ!

¹⁶ Ma Yesu lɛ, meheyi men-tiyiyu se ewolo ma-aŋgba taa nɛ ɛlɩzɩ-mɩ aseɣɖe ɖɩnɛ. Mɛnkɛ Daaviidi liɖe taa tʋ, ma lɛ tɩmbalʋʋ ŋgʋ́ kɩñɩlɩsɩɣ yɔ.»

¹⁷ Fezuu Kiɖeɖeu nɛ Halɩmvalʋ pɔtɔŋ se: «Kɔɔ!» Weyi ɛnɩɣ yɔ, ɛtɔ ɖɔɖɔ se: «Kɔɔ!» Weyi lɔkɔtʋ ɖɔkɩ-ɩ yɔ, ɛkɔɔ: weyi e-liu wɛ wezuu lɩm yɔ, ecozi-pʋ falaa!

Kɛtɛzaɣ tɔm

¹⁸ Mankaŋ paa weyi ɛnɩɣ tɔm ndʋ́ tɩlɩnɩ Ɛsɔ cɔlɔ nɛ pama-tʋ takayaɣ kanɛ ka-taa yɔ ɛ-ñʋʋ taa se: yee nɔɔyʋ ɛsɔzɩ tɩ-yɔɔ yɔ, Ɛsɔ sɔzʋʋ mbʋ́ pɩtɛŋnɩ pʋdʋ yɔ pʋ-yɔɔ kʋñɔmɩŋ weyi pama ɩ-tɔm takayaɣ kanɛ ka-taa yɔ.

¹⁹ Đɔɖɔ lɛ, yee nɔɔyʋ ɛpasɩ tɔm ndʋ́ tɩlɩnɩ Ɛsɔ cɔlɔ nɛ pama-tʋ takayaɣ kanɛ ka-taa yɔ tɩ-yɔɔ yɔ, Ɛsɔ pasɩɣ tɩʋ ŋgʋ́ kɩhaɣ wezuu yɔ kʋ-hɔɔlʋʋ ŋgʋ́ kɩkɛ pʋdʋ ñɩŋgʋ yɔ nɛ ɛ-tɛtʋ hɔɔlʋʋ ŋgʋ́ kɩkɛ pʋdʋ ñɩŋgʋ yɔ pɔ-yɔɔ. Tɩʋ ŋ́gʋ́ nɛ tɛtʋ ńdʋ́ pɔ-tɔm pama takayaɣ kanɛ ka-taa.

²⁰ Yesu weyi ɛtɔm se tɔm tʋnɛ tɩkɛ toovenim yɔ, ɛtɔm se: «Ɛɛ, pɩkazɩ pazɩ, mɔnkɔŋ.» Pɩla ḿbʋ́! Kɩpaɣlʋ Yesu, kɔɔ!

²¹ Kɩpaɣlʋ Yesu ɛla mɩtɩŋa payɩ lootiye!