Wɩlʋʋ 21 - New Testament

Ɛsɔdaa kɩfalʋʋ nɛ tɛtʋ Kɩfatʋ pɔ-tɔm

¹ Pʋwayɩ lɛ, mana ɛsɔdaa kɩfalʋʋ nakʋyʋ nɛ tɛtʋ kɩfatʋ natʋyʋ. Kajalaɣ ɛsɔdaa nɛ kajalaɣ tɛtʋ pamʋwaa, teŋgu tatasɩ wɛʋ.

² Mana ɖɔɖɔ Ɛsɔ tɛtʋ: Yeruusalɛm kɩfalʋʋ, kɩlɩnɩ ɛsɔdaa Ɛsɔ cɔlɔ nɛ kitiki, kɩɩcanɩ kɩ-tɩ ɛzɩ pɛlɛ canʋʋ ɛ-tɩ se ewoki walʋʋ yɔ.

³ Pɩkɛdaa lɛ, manɩɩ puholuuni kewiyaɣ kpelaɣ yɔɔ se: «Lɛɛlɛɛyɔ Ɛsɔ ɖɩɣa wɛ ɛyáa cɔlɔ! Ɛcakɩ pɔ-cɔlɔ nɛ pɛkɛ ɛ-ñɩma. Ɛ-maɣmaɣ ɛwɛɣ pɔ-cɔlɔ.

⁴ Ɛhɛzɩɣ pɛ-ɛsɩtɛɣlɩm tɩŋa. Sɩm yaa leɣa caɣʋ yaa atɩma yaa wɩzasɩ pa-taa nabʋyʋ ɛɛtasɩɣ wɛʋ. Mbʋ́ pʋyɔɔ yɔ, kajalaɣ wondu mʋwaa.»

⁵ Peeɖe weyi ɛɛcaɣ kewiyaɣ kpelaɣ yɔɔ yɔ, ɛtɔm se: «Na! Malakɩ wondu tɩŋa payɩ nɛ tɩpɩsɩ kɩfatʋ. Ma tɔm ńdʋ́, mbʋ́ pʋyɔɔ yɔ, tɩkɛ toovenim, tɩlakɩ ḿbʋ́.»

⁶ Ɛtasɩ-m heyuu se: «Pɩlabɩ ḿbʋ́! Ma lɛ Nʋmɔɖɛyʋ nɛ Ɛɖɩɣyɛ, manpazɩnɩ pɩtɩŋa payɩ, mɛntɛzɩɣnɩ-pʋ. Weyi lɔkɔtʋ ɖɔkɩ-ɩ yɔ, mahaɣ-ɩ hiɖe nɖɩ́ ɖɩ-taa lɩm haɣ wezuu yɔ ɖɩ-taa lɩm falaa.

⁷ Weyi ɛwakɩ yɔ, malakɩ-ɩ kʋjɔʋ ŋ́gʋ́. Mɛnkɛɣ ɛ-Ɛsɔ nɛ ɛkɛ man-pɩɣa.

⁸ Piyele sɔɔndʋ tɩnaa nɛ mbá paañaŋ Ɛsɔ yɔ nɛ kʋsɔɔtʋ tɩnaa nɛ ɛyáa kʋyaa nɛ acɛyɛ laɖaa nɛ fadɩŋ laɖaa nɛ agɔlɩma layaa nɛ cɛtɩyaa tɩŋa payɩ pe-ɖeɖe lɛ miŋ sɔsɔŋ weyi ɛ-taa nɛ tɩm nɛ ɛmʋʋ siŋŋ yɔ ɛ-taa: ḿbʋ́ lɛ sɩm naalɛ ñɩmbʋ.»

Yeruusalɛm kɩfalʋʋ tɔm

⁹ Pʋwayɩ lɛ, Ɛsɔ tiyiyaa lʋbɛ mbá paaɖɔkɩ kɛtɛzaɣ kʋñɔmɩŋ lʋbɛ caɖasɩ lʋbɛ taa ɖo yɔ, pa-taa lɛlʋ kɔɔ ɛya-m se: «Kɔɔ mawɩlɩ-ŋ halɩmvalʋ, ɛnʋ lɛ Heɣa halʋ.»

¹⁰ Ɛlɛ́, Fezuu Kiɖeɖeu tii mɔ-yɔɔ nɛ e-tiyiyu ɛnʋ ɛkpaɣ-m nɛ ɛkpazɩ-m pʋʋ sɔsɔʋ nakʋyʋ ñʋʋ taa. Peeɖe ɛwɩlɩ-m Ɛsɔ tɛtʋ, Yeruusalɛm ŋgʋ́ kɩlɩnɩ ɛsɔdaa Ɛsɔ cɔlɔ nɛ kitiki yɔ.

¹¹ Ɛsɔ koboyaɣ kɛwɛ kɩ-taa nɛ kɩñɩlɩsɩɣ siŋŋ ɛzɩ ñɩɣlɩ́m pɩyɛ kpem yɔ. Kɩñɩlɩsaɣ ɖɔɖɔ ɛzɩ ñɩɣlɩ́m pɩyɛ nɖɩ́ ɖɩwɛ maɖʋ maɖʋ nɛ ɖɩñɩlɩzɩɣ ɛzɩ ñɩnʋʋ yɔ.

¹² Pama koloŋa sɔsɔɔ kʋkʋyaɣ nakɛyɛ nɛ pakʋ nɔnɔsɩ sɔsɔsɩ hiu nɛ naalɛ nɛ Ɛsɔ tiyiyu sɩŋ paa ŋgá ka-taa. Paama paa ŋgá kɔ-yɔɔ hɩɖɛ naɖɩyɛ. Hɩla ana lɛ Izrɛɛlɩ ñɩma cejewee hiu nɛ naalɛ hɩla.

¹³ Paakʋm nɔnɔsɩ naadozo nɛ wɩsɩ ɖɩlɩyɛ nɛ naadozo nɛ hayo kiŋ nɛ naadozo nɛ hadɛ kiŋ nɛ naadozo nɛ wɩsɩ ɖɩɖʋyɛ.

¹⁴ Tɛtʋ ńdʋ́, ti-koloŋa kɛwɛnɩ tigila hiu nɛ naalɛ, pama a-yɔɔ Heɣa tiyiyaa hiu nɛ naalɛ hɩla.

¹⁵ Ɛsɔ tiyiyu weyi ɛyɔɔdaɣnɩ-m yɔ, ɛɖɔkɩ sika ɖaʋ kɩmaɣzʋʋ se ɛmaɣzɩ tɛtʋ nɛ tɩ-nɔnɔsɩ nɛ ti-koloŋa.

¹⁶ Tɛtʋ ńdʋ́, tɩ-ɖaɣlɩkɩŋ nɛ tɩ-walaanzɩ paawɛ kɩmaŋ. Ɛmaɣzɩ-tʋ nɛ ɖaʋ ŋ́gʋ́ lɛ, ɖaɣlɩkɩŋ wɛ kiloomɛtanaa kutokiŋ naalɛ nɛ nasɩlɛ. Walaanzɩ nɛ kʋkʋyɩŋ paawɛ kɩmaŋ ɖɔɖɔ.

¹⁷ Ɛmaɣzɩ koloŋa lɛ, pɩlɩɩ mɛtanaa nɩɩnʋwa nɛ hiu nɛ kagbaanzɩ. Mbʋ́ ɛyáa maɣzɩɣna yɔ, ḿbʋ́ ɛmaɣzɩnɩ-tʋ.

¹⁸ Pama koloŋa ŋ́gá nɛ pɛɛ wena payaɣ se yaaspɩ yɔ nɛ pama tɛtʋ ńdʋ́ tɩ-taa ɖɩsɩ nɛ sika siŋŋ nɛ pɩñɩlɩzɩɣ ɛzɩ ñɩnʋʋ yɔ.

¹⁹ Pacanɩ ti-koloŋa tigila nɛ ñɩɣlɩ́m pɛɛ ndɩ ndɩ: wena pasɩ kiɖe tɛɛ yɔ, payaɣ-yɛ se yaaspɩ, wena patɩnɩ a-yɔɔ yɔ, payaɣ alɛ se saafiirɩ, tozo ɖeɖe lɛ, patɩnɩ wena payaɣ se agaatɩ yɔ nɛ naza ɖeɖe wena payaɣ se emeroodɩ yɔ,

²⁰ kagbaanzɩ ɖeɖe wena payaɣ se oniksɩ yɔ nɛ loɖo ɖeɖe wena payaɣ se saardowanɩ yɔ nɛ lʋbɛ ɖeɖe wena payaɣ se krizooliitɩ yɔ nɛ lutozo ɖeɖe wena payaɣ se beeriilɩ yɔ nɛ nakʋ ɖeɖe wena payaɣ se toopaazɩ yɔ nɛ hiu ɖeɖe wena payaɣ se krizoopraazɩ yɔ nɛ hiu nɛ kʋɖʋm ɖeɖe wena payaɣ se iyaasɛntɩ yɔ nɛ hiu nɛ naalɛ ɖeɖe wena payaɣ alɛ se ameetiistɩ yɔ.

²¹ Piyele nɔnɔsɩ hiu nɛ naalɛ ńzɩ́ lɛ lɩtʋ hiu nɛ naalɛ. Paa ŋgá lɛ, palabɩ-kɛ nɛ lɩyʋʋ kʋɖʋmʋʋ koŋ. Pɔpɔ tɛtʋ ńdʋ́ tɩ-taa samaɣ ɖikpeɣliye sika siŋŋ nɛ pɩñɩlɩzɩɣ ɛzɩ ñɩnʋʋ yɔ.

²² Ɛsɔ ɖɩɣa fɛyɩ tɛtʋ ńdʋ́ tɩ-taa, mbʋ́ pʋyɔɔ yɔ, Kɩpaɣlʋ Ɛsɔ Đoŋ Tɩŋa Tʋ nɛ Heɣa lɛ tɩ-ɖɩɣa.

²³ Pɩtatasɩ pɔzʋʋ se wɩsɩ yaa fenaɣ ɛñaɣ tɛtʋ ńdʋ́ tɩ-taa. Mbʋ́ pʋyɔɔ yɔ, Ɛsɔ koboyaɣ ñalɩmɩyɛ ñalɩɣ, tɩ-kanɖʋ lɛ Heɣa.

²⁴ Ajɛya taa ñɩma kɔŋ ɖɔm tɩ-ñalɩmɩyɛ taa nɛ kedeŋa yɔɔ awiya ñowoni pa-ñɩm tɩ-taa.

²⁵ Paakaɣ ɖɩɣʋ tɩ-nɔnɔsɩ, mbʋ́ pʋyɔɔ yɔ, ɖoó ɛɛkaɣ yuu tɩ-taa.

²⁶ Pɔkɔŋ wonaʋ ñɩm nɛ mbʋ́ pʋɖʋʋ ajɛya hɩɖɛ yɔ tɩ-taa.

²⁷ Azuluma pʋyʋ yaa weyi ɛlakɩ kʋsɔɔtʋ yɔ yaa weyi ɛcɛtɩɣ yɔ, ɛɛkaɣ sʋʋ tɛtʋ ńdʋ́ tɩ-taa. Ɛlɛ́, mbá pama pa-hɩla wezuu takayaɣ ŋgá kɛkɛ Heɣa ñɩŋga yɔ ka-taa yɔ, pe-ɖeke koŋ pasʋʋna.