Wɩlʋʋ 20 - New Testament

Krɩstʋ yɔɔ aseɣɖe lɩzɩyaa cakɩ ɛ-cɔlɔ nɛ ɛ nɛ wɛ pɔtɔɔ kewiyaɣ, pɩkazɩ paɖʋ Satanɩ yoŋgbasɩ

¹ Pʋwayɩ lɛ, mana Ɛsɔ tiyiyu nɔɔyʋ lɩnɩ ɛsɔdaa nɛ etiki. Ɛɖɔkɩ asayʋʋ pɔʋ nɔɔ ñɩmɩyɛ nɛ yoŋgbasɩ sɔsɔsɩ nasɩyɩ e-nesi taa.

² Etiba lɛ, ewolo ɛkpa coojo nɛ ɛhɔkɩ-ɩ-sɩ se ɛwɛɛ ḿbʋ́ pɩnzɩ kutoku. Ɛnʋ lɛ ɖʋm kɩbɩnʋ weyi payaɣ se eleeu nɛ pɛtɛ patasɩ-ɩ se Satanɩ yɔ.

³ Ɛhɔkɩ-ɩ lɛ, ɛpɛɖɩ-ɩ asayʋʋ pɔʋ taa nɛ ɛɖɩɣ ɛ-yɔɔ nɛ ɛtaaɖɩ nɛ ɛñɩɣ nesi ɛ-yɔɔ se ɛtaatasɩ lɩʋ nɛ epeɣzi ajɛya taa ñɩma. Ɛwɛɣ peeɖe nɛ pʋkɔɔ pɩsɩɩnɩ alɩwaatʋ ndʋ́ pɩnzɩ kutoku ɖɛwa yɔ. Pʋwayɩ lɛ, pʋwɛɛ se patʋlɩ-ɩ nɛ pɛyɛɖɩ-ɩ alɩwaatʋ pazɩ.

⁴ Mana ɖɔɖɔ kewiyisi kpelisi nasɩyɩ: mbá powokaɣ pacakɩ sɩ-yɔɔ yɔ, paha-wɛ ɖoŋ se pahʋʋnɩ ɛyáa tɔm. Đɔɖɔ lɛ, mana mbá pɛsɛtɩ pa-ñʋŋ yɔ pa-ciyamnaa. Paakʋ-wɛ, mbʋ́ pʋyɔɔ yɔ, palɩzaɣ Yesu aseɣɖe nɛ posusuu Ɛsɔtɔm. Ḿbá taaluŋni kpɩnɛ yaa ɖɩ-sɩʋ kpelaɣ pɛ-tɛɛ, patala pe-kila taa yaa pe-nesi yɔɔ ɖɩ-yʋsaɣ. Pefema nɛ pa nɛ Krɩstʋ pɔtɔɔ kewiyaɣ pɩnzɩ kutoku.

⁵ Ḿbʋ́ lɛ kajalaɣ fem. Piyele sɩɖaa lɛlaa yɔ, paafeŋ nɛ pʋkɔɔ pɩsɩɩnɩ alɩwaatʋ ndʋ́ pɩnzɩ kutoku ŋ́gʋ́ kɩtɛma yɔ.

⁶ Mbá pefeŋ kajalaɣ fem ḿbʋ́ pɩ-taa yɔ, pɛkɛ Ɛsɔ ñɩma, pehiɣ pa-tɩ! Sɩm naalɛ ñɩmbʋ fɛyɩnɩ ɖoŋ pɔ-yɔɔ. Ɛlɛ́, pɛkɛɣ Ɛsɔ nɛ Krɩstʋ pɔ-cɔjɔnaa nɛ pa nɛ Krɩstʋ ɛnʋ, pɔtɔɔ kewiyaɣ pɩnzɩ kutoku.

Pawabɩ Satanɩ ɖoŋ tɩŋa

⁷ Pɩnzɩ kutoku ŋ́gʋ́ kʋkɔŋ kɩɖɛɛ lɛ, palɩzɩ Satanɩ nɛ ɛ-salaka taa.

⁸ Ɛlɩɣ lɛ, epeɣzi Gɔɔgɩ nɛ Maagɔɔgɩ, pʋ-tɔbʋʋ se kedeŋa kpeekpe yɔɔ ajɛya taa ñɩma. Ekpeɣliɣ-wɛ se pala you. Pɔɖɔ ɛzɩ teŋgu nɔɔ kañɩŋa yɔ.

⁹ Pɩkɛdaa lɛ, manaɣ palɩ kedeŋa kpeekpe yɔɔ nɛ pɔcɔʋ Ɛsɔ ñɩma pɩlʋʋ nɛ tɛtʋ kʋsɔɔlɩtʋ nɛ pataŋ. Ɛlɛ́, miŋ nɩɩyɩ lɩɩnɩ ɛsɔdaa nɛ etii enezi-wɛ.

¹⁰ Eleeu weyi epeɣzaɣ-wɛ yɔ, pɛpɛɖɩ-ɩ miŋ sɔsɔŋ weyi ɛ-taa nɛ tɩm yɔ ɛ-taa. Peeɖe kpɩnɛ nɛ weyi ɛcɛtɩɣ se ɛkɛ náyʋ yɔ, pɛwɛɛ. Ḿbʋ́ panazɩɣ-wɛ wɩsɩ nɛ ɖoó pɩnzɩ ɛgbaŋ ɛgbaŋ.

Pahʋ sɩɖaa tɔm nɛ peɖezi sɩm

¹¹ Pʋwayɩ lɛ, mana kewiyaɣ kpelaɣ sɔsɔɔ kʋhʋlʋmaɣ nakɛyɛ nɛ weyi ɛcaɣ kɔ-yɔɔ yɔ. Ɛsɔdaa nɛ tɛtʋ pese ɛ-ɛsɩndaa, patatasɩ-wɛ naʋ.

¹² Mana ɖɔɖɔ sɩɖaa: ɖoŋ tɩnaa nɛ ajamaa pasɩŋ kewiyaɣ kpelaɣ ŋ́gá kɛ-ɛsɩndaa. Pukuli takayɩsɩ nasɩyɩ. Pukuli lɛɛka ɖɔɖɔ, ŋ́gá lɛ wezuu takayaɣ. Mbʋ́ sɩɖaa laba yɔ, pʋ-tɔm paama takayɩsɩ ńzɩ́ sɩ-taa, pʋ-yɔɔ pahʋʋnɩ-wɛ.

¹³ Teŋgu lɩzɩ sɩɖaa mbá paawɛ kɩ-taa yɔ nɛ sɩm nɛ ɖenɖe sɩɖaa wɛɛ yɔ, paba ñɛcɛlɩ mbá paawɛ pɔ-cɔlɔ yɔ nɛ pahʋʋnɩ paa weyi mbʋ́ ɛlaba yɔ pʋ-yɔɔ.

¹⁴ Pɛpɛɖɩ sɩm nɛ ɖenɖe sɩɖaa wɛɛ yɔ miŋ sɔsɔŋ taa. Miŋ sɔsɔŋ ɛnʋ lɛ: sɩm naalɛ ñɩmbʋ.

¹⁵ Weyi patana ɛ-hɩɖɛ wezuu takayaɣ taa yɔ, pɛpɛɖɩ-ɩ miŋ sɔsɔŋ taa.