Wɩlʋʋ 19 - New Testament

Peteɣ wabɩyɛ hendu ɛsɔdaa

¹ Pʋwayɩ lɛ, manɩɩ puholuuni ɛsɔdaa ɛzɩ samaɣ sɔsɔɔ nakɛyɛ nɔɔ yɔ se: «Aleluuya! Đɛ-Ɛsɔ tɩnɩ ñʋʋ yabʋ nɛ koboyaɣ nɛ ɖoŋ!

² Mbʋ́ pʋyɔɔ yɔ, ɛhʋʋ tɔm nɛ toovenim, ɛ-tɔm hʋʋ tʋʋzaa. Ɛhʋnɩ abiɖe nɖɩ́ ɖɩpɛdaɣ ɖɩ-tɩ nɛ ɖɩwɛɛkɩ tɛtʋ nɛ ɖi-acɛyɛ lakasɩ yɔ nɛ ɛkpa-ɖɩ kɩmɩyɛ ɛ-tʋmlaɖaa mbá ɖɩkʋwa yɔ pɔ-yɔɔ.»

³ Mantasɩ nɩʋ se: «Aleluuya! Miŋ weyi ɛñakɩ tɛtʋ sɔsɔtʋ yɔ, ɛ-ñɔsɩ kʋyʋʋ pɩnzɩ ɛgbaŋ ɛgbaŋ.»

⁴ Peeɖe sɔsaa ḿbá pa-nɩɩlɛ nɛ naanza nɛ kpɩna ana a-naanza poluŋ Ɛsɔ weyi ɛcaɣ kewiyaɣ kpelaɣ yɔɔ yɔ ɛ-tɛɛ nɛ pasaŋ-ɩ se: «Aleluuya! Pɩla ḿbʋ́!»

⁵ Pɩkɛdaa lɛ, manɩɣ pʋyɔɔdʋʋnɩ kewiyaɣ kpelaɣ yɔɔ se: «Mbá mɩ mɩtɩŋa payɩ ɩkɛ ɖɛ-Ɛsɔ tʋmlaɖaa nɛ ɩsɔɔndʋʋ-ɩ yɔ, ajamaa nɛ ɖoŋ tɩnaa ɩsam-ɩ!»

⁶ Pʋwayɩ lɛ, manɩɩ pʋyɔɔdʋʋ ɛzɩ samaɣ sɔsɔɔ nakɛyɛ nɔɔ yɔ yaa lɩm sɔsɔm falʋʋ yɔ yaa tɛʋ nazʋʋ ɖoŋ yɔ se: «Aleluuya! Mbʋ́ pʋyɔɔ yɔ, Kɩpaɣlʋ ɖɛ-Ɛsɔ Đoŋ Tɩŋa Tʋ sɩ e-Kewiyaɣ.

⁷ Đa-laŋa ɛhʋlʋmɩ, ɖɩmayɩ amaya nɛ ɖiyele ɛ-hɩɖɛ sɛɛ. Mbʋ́ pʋyɔɔ yɔ, Heɣa halɩkpaɣyɛ kazandʋ talaa nɛ ka-halʋ ñɔɔzɩ ɛ-tɩ.

⁸ Paha-ɩ waɖɛ se esuu wondu ndʋ́ tɩwɛ fɛlɛ fɛlɛ nɛ tɩñɩlɩzɩɣ nɛ tɩwɛɛ cɩɖɩcɩɖɩ yɔ.» Fɛlɛ fɛlɛ wondu ńdʋ́ lɛ tʋma kɩbana wena Ɛsɔ ñɩma laba yɔ.

⁹ Ɛlɛ́, Ɛsɔ tiyiyu heyi-m se: «Ma se: mbá paya-wɛ Heɣa halɩkpaɣyɛ kazandʋ tɔɔnaɣ ɖeɖe yɔ, pehiɣ pa-tɩ!» Ɛtasɩ-m heyuu se: «Tɔm ńdʋ́, tɩkɛ Ɛsɔtɔm maɣmaɣ siŋŋ.»

¹⁰ Peeɖe mɔntɔlɩ ɛ-naŋgbanzɩ tɛɛ se moluŋ ɛ-tɛɛ. Ɛlɛ́, eheyi-m se: «Taala ḿbʋ́! Mɛnkɛ Ɛsɔ tʋmlaɖʋ ɛzɩ ña nɛ ña-taabalaa mbá pɔɖɔkɩ aseɣɖe nɖɩ́ Yesu lɩzaa yɔ. Ɛsɔ tɛɛ pʋwɛɛ se ŋluŋ!» Aseɣɖe nɖɩ́ Yesu lɩzɩɣ yɔ, ńɖɩ́ seɣtiɣni náyaa.

Kpaŋnɔ kʋhʋlʋm caɣyʋ tɔm

¹¹ Pʋwayɩ lɛ, mana ɛsɔdaa tʋlaa nɛ kpaŋnɔ kʋhʋlʋm nɔɔyʋ lɩɩ. Weyi ɛcaɣ-ɩ yɔ, payaɣ-ɩ se Weyi Ɛlakɩ Mbʋ́ Ɛɖʋwa yɔ nɛ Toovenim Tʋ. Ɛhʋʋ tɔm nɛ ɛlakɩ you nɛ toovenim.

¹² Ɛ-ɛsɛ ɖeɣ miŋ pelu pelu ɛzɩ miŋ nzʋlʋmɩyɛ yɔ nɛ papam-ɩ awiya hulasi sakɩyɛ. Pama ɛ-yɔɔ hɩɖɛ naɖɩyɛ, nɔɔyʋ tasɩm-ɖɩ nɛ pɩtasɩnɩ-ɩ.

¹³ Esu toko sɔsɔʋ nakʋyʋ, peli-kʋ calɩm. Payaɣ-ɩ se: Ɛsɔtɔm.

¹⁴ Sɔɔjanaa sakɩyɛ mbá pɛwɛ ɛsɔdaa yɔ, posu wondu kʋhʋlʋmʋtʋ ndʋ́ tɩwɛ fɛlɛ fɛlɛ nɛ tɩwɛɛ cɩɖɩcɩɖɩ yɔ nɛ pacaɣ kpaŋnaŋ kʋhʋlʋmɩŋ nɛ patɩŋɩɣ-ɩ.

¹⁵ Sɩɣa ŋgá kɛwɛ lɔŋ yɔ, kalɩɣaɣnɩ ɛ-nɔɔ taa se ɛwabɩnɩ ajɛya taa ñɩma. Ɛ-maɣmaɣ ɛkɔŋ-wɛ ɖiyuu nɛ ɖaʋ ñɩ́ɣ́yʋ́ʋ ñɩŋgʋ. Ɛhɔyʋʋ-wɛ Ɛsɔ Đoŋ Tɩŋa Tʋ pana sɔsɔna pulone taa ɛzɩ pɔhɔyʋʋ tɩŋ weyi popuu i-pee sʋlʋm yɔ i-pee yɔ.

¹⁶ Pama e-toko sɔsɔʋ nɛ e-yuye pɔ-yɔɔ hɩɖɛ naɖɩyɛ. Ńɖɩ́ lɛ se: awiya taa Wiyaʋ nɛ kɩpaɣlaa taa Kɩpaɣlʋ.

¹⁷ Mana ɖɔɖɔ Ɛsɔ tiyiyu nɔɔyʋ, ɛsɩŋ wɩsɩ taa nɛ eholuuni sumasɩ nzɩ́ sɩkʋyaɣ ɖooo ɛsɔdaa yɔ sɩtɩŋa payɩ se: «Ɩkɔɔ ikpeɣli Ɛsɔ kazandʋ sɔsɔtʋ tɔɔnaɣ ɖeɖe!

¹⁸ Ɩkɔɔ ɩtɔɔ awiya sɔsɔna nɛ sɔɔjanaa sɔsaa nɛ ɖoŋ tɩnaa nɛ kpaŋnaŋ nɛ ɩ-yɔɔ caɣyaa nɛ mbá pɛwɛ pa-tɩ yɔɔ yɔ nɛ yomaa nɛ ajamaa nɛ ɖoŋ tɩnaa patɩŋa payɩ pa-nandʋ.»

¹⁹ Mana ɖɔɖɔ kpɩnɛ nɛ kedeŋa yɔɔ awiya sɔsɔna nɛ a-sɔɔjanaa pekpeɣlaa se poyouni weyi ɛcaɣ kpaŋnɔ yɔ nɛ ɛ-sɔɔjanaa.

²⁰ Peeɖe paba kpa kpɩnɛ nɛ weyi ɛcɛtɩɣ se ɛkɛ náyʋ nɛ ɛɛlaba hama lakasɩ ɖɩ-ɛsɩndaa yɔ. Sɩ-yɔɔ ɛtɩŋnaa nɛ ɛcɛtɩ mbá paalabɩ pɔ-yɔɔ kpɩnɛ yʋsaɣ nɛ poluŋuu ɖɩ-sɩʋ kpelaɣ tɛɛ yɔ. Pakpa-wɛ lɛ, pɔlɔ pa-naalɛ nɛ pɛ-ɛsɛ miŋ sɔsɔŋ weyi ɛ-taa wɛ tɩm nɛ ɛmʋʋ siŋŋ yɔ ɛ-taa.

²¹ Ɛlɛ́, weyi ɛcaɣ kpaŋnɔ yɔ, ɛkʋ lɛlaa mbá pɩkazaa yɔ patɩŋa payɩ nɛ sɩɣa ŋgá kalɩɣaɣnɩ ɛ-nɔɔ taa yɔ nɛ sumasɩ tɩŋa tɔɔ pa-nandʋ nɛ sɩhaɣ.