Wɩlʋʋ 18 - New Testament

Babilooni tɛtʋ yɔkaa

¹ Pʋwayɩ lɛ, mana Ɛsɔ tiyiyu lɛlʋ, ɛlɩnɩ ɛsɔdaa nɛ etiki. Ɛwɛnɩ ɖoŋ siŋŋ nɛ e-koboyaɣ ñalɩmɩyɛ ñalɩ kedeŋa yɔɔ.

² Eholaɣ ɖoŋ se: «Tɩtɔlaa! Babilooni tɛtʋ sɔsɔtʋ tɔlaa! Tɩpɩsɩ aleewaa ɖɩjaɣyɛ. Peeɖe feziŋ kɩdɛkɛdɩŋ tɩŋa nɛ sumasɩ kɩdɛkɛdɩsɩ nɛ nzɩ́ ɛyáa ɛɛcaɣ kpem yɔ patɩŋa pɛwɛɛ.

³ Mbʋ́ pʋyɔɔ yɔ, ajɛya kpeekpe taa ɛyáa ñɔ tɩ-acɛyɛ sʋlʋm nɛ pʋkʋʋ-wɛ. Tɩ nɛ kedeŋa yɔɔ awiya palabɩ acɛyɛ nɛ kɔ-yɔɔ tadɩyɛ laɖaa hiɣ ñɩm tɩ-ajana kadadaɣyaɣ yɔɔ.»

⁴ Peeɖe mantasɩ nɩʋ nɔɔ lɛɛka nɛ ɛsɔdaa se: «Ma-ñɩma! Ɩlɩɩ tɩ-taa nɛ ɩtaakɔɔ ɩɖʋ mi-nesi tɩ-kɩwɛɛkɩm taa. Kʋñɔmɩŋ weyi ɩkɔŋ-tʋ talʋʋ yɔ, ɩ-taa nakʋyʋ ɩtaatalɩ-mɩ.

⁵ Mbʋ́ pʋyɔɔ yɔ, tɩ-kɩwɛɛkɩm ka huuye nɛ pɩkpa ɛsɔdaa nɛ Ɛsɔ na mbʋ́ tɩlaba nɛ pɩtatʋʋzɩ yɔ.

⁶ Mɩ lɛ, ɩlabɩ-tʋ ɛzɩ tɩlabʋ lɛlaa yɔ, ɩkpa-tʋ kɩmɩyɛ pʋ-tam naalɛ. Ɩpɩyɩ-tʋ sʋlʋm ɖoŋ ñɩmbʋ mbʋ́ pɩpɩyɩ lɛlaa se pʋkʋ-wɛ yɔ pʋ-tam naalɛ.

⁷ Ɩcɔzɩ-tʋ nɛ iyele tɩ-ɛsɛ ñɩŋ tam ɛzɩma mbʋ́ tɩkʋndaa nɛ tɩsʋʋ ajana taa yɔ! Mbʋ́ pʋyɔɔ yɔ, tɩmaɣzɩɣ tɩ-taa se: ‹Weyi ma mɛnkɛ abiɖe yɔ, mancaɣnɩ cɩnɛ. Mɛntɛkɛ lelu, maakaɣ caɣʋ leɣa nakɛyɛ kaʋ.›

⁸ Pʋ-yɔɔ tɩ-kʋñɔmɩŋ kaɣ kɔm kɩyakʋ kʋɖʋmʋʋ. Ɩnʋ lɛ: sɩm nɛ leɣa caɣʋ nɛ ñɔɔsɩ. Miŋ kɔŋ-tʋ ñaɣʋ, mbʋ́ pʋyɔɔ yɔ, Kɩpaɣlʋ Ɛsɔ weyi ɛhʋʋnɩ tɛtʋ ńdʋ́ yɔ, ɛwɛ ɖoŋ.

⁹ «Kedeŋa yɔɔ awiya wena a nɛ tʋ palabɩ acɛyɛ nɛ ajana yɔ, akɔŋ wiluu atɩŋa payɩ nɛ atɩmɩɣ tɩ-yɔɔ alɩwaatʋ ndʋ́ anaɣ miŋ weyi ɛñakɩ-tʋ yɔ ɛ-ñɔsɩ yɔ.

¹⁰ Kʋñɔŋ ŋgʋ́ kɩtalɩɣ-tʋ yɔ kʋ-sɔɔndʋ yɔɔ lɛ, pasɩŋɩɣ poliŋ nɛ pɔtɔŋ se: ‹Babilooni tɛtʋ sɔsɔtʋ, tɛtʋ ɖoŋ ñɩndʋ, pʋtɔɔ-ŋ! Pʋtɔɔ-ŋ! Pahʋʋnɩ-ŋ nɛ pakʋ ñɔ-tɔm yem kɛlɛʋ!›

¹¹ «Piyele kedeŋa yɔɔ tadɩyɛ laɖaa lɛ, pewiliɣ nɛ pacaɣ ti-leɣa. Mbʋ́ pʋyɔɔ yɔ, nɔɔyʋ ɛɛtasɩɣ po-wondu yabʋ.

¹² Mbʋ́ pɛpɛdaɣ yɔ lɛ: sika wondu nɛ ndʋ́ palabɩnɩ liidiye yɔ nɛ ñɩɣlɩ́m pɛɛ nɛ lɩtʋ nɛ pɩsaŋ fɛlɛ fɛlɛ ñɩŋ nɛ sotu ñɩŋ nɛ weyi iwobini sɛmɩŋ yɔɔ yɔ nɛ kɩsɛmɩŋ cɩɩɩ nɛ mbʋ́ pasaɣnɩ tɩŋ weyi ɩlɩɣ sɔzɩŋ yɔ nɛ weyi ɩwɛ liidiye yɔ nɛ mbʋ́ palabɩnɩ tu kela yɔ nɛ mbʋ́ palabɩnɩ ñɩ́ɣ́yʋ́ʋ kazɩnzɩŋa ñɩŋgʋ yɔ nɛ mbʋ́ palabɩnɩ ñɩɣtʋ yɔ nɛ mbʋ́ palabɩnɩ pɛɛ wena payaɣ se maarbɩɖɩ yɔ.

¹³ Pɛpɛdaɣ ɖɔɖɔ mbʋ́ pacanɩɣnɩ ɖozi yɔ nɛ tɩlaaɖɩnaa ndɩ ndɩ nɛ tɩlaaɖɩ ŋgʋ́ pɔhɔkɩ yɔ nɛ kɔyɛ nɖɩ́ payaɣ se miiri yɔ nɛ sʋlʋm nɛ num nɛ mʋlʋm nɛ mɩla nɛ naŋ nɛ heŋ nɛ kpaŋnaŋ nɛ lɔɔɖa wena kpaŋnaŋ hɔŋ yɔ nɛ yomaa nɛ ɛyáa lɛlaa.

¹⁴ Tadɩyɛ laɖaa ḿbá, paba heyiɣ tɛtʋ ńdʋ́ se: ‹Mbʋ́ pɩtɩŋa payɩ ñe-liu kɛwɛɛ kpem nɛ ŋwɛnɩ-pʋ yɔ, pʋmʋʋ ñɛ-tɛ. Ña-ñɩm tɩŋa payɩ nɛ ña-ajana peleba. Ŋŋtasɩɣ-wɛ naʋ kaʋ.›

¹⁵ Tadɩyɛ laɖaa mbá pɩtɩŋnɩ tɩ-yɔɔ nɛ pehiɣ ñɩm yɔ, tɩ-kʋñɔŋ sɔɔndʋ kɔŋ-wɛ kpaʋ nɛ pasɩŋ poliŋ nɛ pewili nɛ pacaɣ leɣa.

¹⁶ Pɔkɔŋ yɔɔdʋʋ se: ‹Pʋtɔɔ tɛtʋ sɔsɔtʋ! Pʋtɔɔ-tʋ! Tisu wondu fɛlɛ fɛlɛ ñɩndʋ nɛ ndʋ́ tiwobini sɛmɩŋ yɔɔ yɔ nɛ kɩsɛmtʋ cɩɩɩ nɛ tɩlɛɛ sika nɩŋgbacaɣlɩnaa nɛ ñɩɣlɩ́m pɛɛ nɛ lɩtʋ.

¹⁷ Ɛlɛ́, tɩ-ñɩm sakɩyɛ ḿbʋ́, pʋmʋʋ yem alɩwaatʋ pazɩ taa.› «Mɛlɛnaa sayaa tɩŋa payɩ nɛ pa-sʋyaa nɛ mbá palakɩ tʋmɩyɛ pa-taa yɔ nɛ mbá patɩŋa payɩ paba ñalakɩ tʋmɩyɛ teŋgu yɔɔ yɔ, pasɩŋ poliŋ

¹⁸ nɛ pamakɩ kubusi alɩwaatʋ ndʋ́ panaɣaɣ miŋ weyi ɛñakɩ-tʋ yɔ ɛ-ñɔsɩ yɔ se: ‹Tɛtʋ natʋyʋ taawɛɛ nɛ tɩtalɩ tɛtʋ sɔsɔtʋ tʋnɛ!›

¹⁹ Pokuwaɣ mʋzʋʋ nɛ paɖʋʋ pa-ñʋŋ taa nɛ pewiliɣ nɛ pacaɣ leɣa nɛ pamakɩ kubusi se: ‹Pʋtɔɔ tɛtʋ sɔsɔtʋ! Pʋtɔɔ-tʋ! Tɩ-ñɩm yɔɔ pɩtɩŋaɣnaa nɛ mbá patɩŋa payɩ pɛwɛnɩ mɛlɛnaa teŋgu taa yɔ, pehikiɣ ñɩm. Ɛlɛ́, alɩwaatʋ pazɩ pakpaɣ pɔyɔkɩnɩ-tʋ!› »

²⁰ Mbá mɩ ɩwɛ ɛsɔdaa yɔ, mɩ-taa ɛhʋlʋmɩ! Pɔyɔkɩ tɛtʋ ńdʋ́! Mɩ Ɛsɔ ñɩma nɛ Yesu tiyiyaa nɛ náyaa mɩ-taa ɛhʋlʋmɩnɩ tɩ-yɔkʋʋ! Mbʋ́ pʋyɔɔ yɔ, Ɛsɔ hʋnɩ-tʋ tɔm kɩdɛkɛdɩm mbʋ́ tɩlabɩ-mɩ yɔ tɩ-yɔɔ.

²¹ Peeɖe Ɛsɔ tiyiyu ɖoŋ tʋ nɔɔyʋ kpaɣ pɩyɛ nɖɩ́ ɖɩwɛ ɛzɩ namɩyɛ sɔsɔɖɛ yɔ nɛ ɛlɔ teŋgu taa nɛ ɛtɔ se: «Ḿbʋ́ pɔkɔŋ lɔʋ Babilooni tɛtʋ sɔsɔtʋ, nɛ tɩyɔɔkɩ tam kʋɖʋmʋm yem kɛlɛʋ! Paatasɩɣ-tʋ naʋ kaʋ.

²² Nɔɔyʋ ɛɛtasɩɣ nɩʋ tɩ-taa kogoye naɖɩyɛ kaʋ nɔɔyʋ ɛɛtasɩɣ nɩʋ cɩmɩŋ maɖaa taŋ nɔɔyʋ ɛɛtasɩɣ nɩʋ hɩsɩ hʋlɩyaa nɛ agandɛɛ hʋlɩyaa pa-taŋ Paatasɩɣ naʋ mbá palakɩ nesi tʋma yɔ pa-taa nɔɔyʋ kaʋ Paatasɩɣ nɩʋ ɖɔɖɔ se nɔɔyʋ naŋɩɣ.

²³ Kanɖʋnaa ñalɩmɩyɛ ɛɛtasɩɣ naʋ. Paatasɩɣ nɩʋ mbá pakpaɣ ɖama fam nɛ fam yɔ pa-taŋ. Mbʋ́ pʋyɔɔ yɔ: tɩ-taa tadɩyɛ laɖaa kɛkɛnɩ sɔsaa kedeŋa yɔɔ, nɛ tiyili ajɛya tɩŋa payɩ nɛ ti-efeletu.

²⁴ Ɖɔɖɔ lɛ, pana tɩ-taa náyaa nɛ Ɛsɔ ñɩma nɛ mbá patɩŋa payɩ pɛcɛbɩ pe-liŋ tɛɛ kedeŋa yɔɔ cɩnɛ yɔ pa-calɩm.»