Wɩlʋʋ 17 - New Testament

Pahʋ Babilooni tɛtʋ tɔm

¹ Pʋwayɩ lɛ, Ɛsɔ tiyiyaa lʋbɛ mbá pɔɖɔkɩ sʋlʋm caɖasɩ ńzɩ́ sɩ-lʋbɛ yɔ, pa-taa lɛlʋ kɔɔ ɛyɔɔdʋʋnɩ-m se: «Kɔɔ, mawɩlɩɣ-ŋ ɛzɩma mbʋ́ Ɛsɔ hʋʋnɩ abiɖe nɖɩ́ ɖɩpɛdɩɣ ɖɩ-tɩ yɔ. Ńɖɩ́ lɛ tɛtʋ sɔsɔtʋ ndʋ́ tɩwɛ pɔsɩ nɔsɩ yɔ.

² Tɩ nɛ kedeŋa yɔɔ awiya palabɩ acɛyɛ nɛ kɔ-yɔɔ ñɩma ñɔɔ ɖɩ-acɛyɛ sʋlʋm nɛ pʋkʋʋ-wɛ.»

³ Ɛlɛ́, Fezuu Kiɖeɖeu tii mɔ-yɔɔ nɛ e-tiyiyu ɛnʋ ɛkpaɣ-m nɛ ewoni lakʋ nakʋyʋ taa. Peeɖe mana halʋ nɔɔyʋ, ɛcaɣ kpɩnɛ kɩsɛmɖɩyɛ cɩɩɩ naɖɩyɛ yɔɔ. Đɩwɛnɩ hɩla wena atʋʋ Ɛsɔ yɔ ɖɩ-yɔɔ tɔtɔ nɛ ñʋŋ lʋbɛ nɛ hɩŋ hiu.

⁴ Halʋ ɛnʋ, esu wondu ndʋ́ tiwobini sɛmɩŋ yɔɔ yɔ nɛ ndʋ́ tɩsɛ cɩɩɩ yɔ nɛ ɛlɛɛ sika nɩŋgbacaɣlɩnaa nɛ ñɩɣlɩ́m pɛɛ nɛ lɩtʋ. Ɛɖɔkɩ sika caɖaɣ nakɛyɛ, ɛ-azuluma nɛ ɛ-acɛyɛ lakasɩ nzɩ́ sipisiɣ-i yɔ posuni ka-taa ɖo.

⁵ Pama e-kiɖe taa hɩɖɛ naɖɩyɛ. Paanɩɣ ɖɩ-tɔbʋʋ, ńɖɩ́ lɛ se: «Babilooni tɛtʋ sɔsɔtʋ, halaa mbá pɛpɛdɩɣ pa-tɩ yɔ nɛ kedeŋa yɔɔ azuluma po-ɖoo.»

⁶ Peeɖe manawa se halʋ ɛnʋ ɛñɔ Ɛsɔ ñɩma nɛ Yesu aseɣɖe tɩnaa mbá pakʋ-wɛ yɔ pa-calɩm nɛ pʋkʋʋ-ɩ ɛzɩ sʋlʋm yɔ. Mana-ɩ lɛ, pɩɖɩɣzɩ-m yem ɖɩɣ ɖɩɣ.

⁷ Ɛlɛ́, Ɛsɔ tiyiyu pɔzɩ-m se: «Pɩlabɩ ɛzɩma nɛ pɩɖɩɣzɩɣ-ŋ ḿbʋ́? Malɩzɩɣ-ŋ halʋ nɛ kpɩnɛ nɖɩ́ ɖɩwɛnɩ ñʋŋ lʋbɛ nɛ hɩŋ hiu nɛ ɛcaɣ-ɖɩ yɔ pɛ-mɛsaɣ tɛɛ tɔm tɔbʋʋ.

⁸ Kpɩnɛ nɖɩ́ ŋna ḿbʋ́ yɔ, ɖɩɩwɛɛ, ɛlɛ́, lɛɛlɛɛyɔ ɖɩfɛyɩ. Đɩkɔŋ lɩnaʋ asayʋʋ pɔʋ taa nɛ ɖiwolo tɛŋɛlʋʋ taa. Ɛlɛ́, kedeŋa yɔɔ ñɩma mbá patama pa-hɩla wezuu takayaɣ taa ɖooo ɛzɩ kedeŋa wɛʋ yɔ, panaɣ-ɖɩ lɛ, pɩɖɩɣzɩɣ-wɛ. Mbʋ́ pʋyɔɔ yɔ, ɖɩɩwɛɛ nɛ lɛɛlɛɛyɔ ɖɩfɛyɩ, ɛlɛ́, ɖɩkɔŋ ɖaɣnʋʋ lɩʋ.

⁹ «Pʋpɔzʋʋ cɩnɛ lɛɣtʋ nɛ lɔŋsɩnɖɛ: ñʋŋ lʋbɛ ɩnʋ lɛ pʋŋ lʋbɛ weyi ɩ-yɔɔ halʋ ɛnʋ ɛcaɣaɣ yɔ. Ɩnʋ ɖɔɖɔ lɛ awiya lʋbɛ:

¹⁰ a-taa kagbaanzɩ tɔm tɛm ɖɛʋ, lɛlʋ wɛ lɛɛlɛɛyɔ, lɛlʋ ñɔtɔkɔmda. Ɛkɔŋ lɛ, pʋwɛɛ se ɛcaɣ alɩwaatʋ pazɩ yem.

¹¹ Kpɩnɛ nɖɩ́ ɖɩɩwɛɛ nɛ lɛɛlɛɛyɔ ɖɩfɛyɩ yɔ, ɖɩ-maɣmaɣ ɖɩkɛ wiyaʋ lutozo ñɩnʋ. Đɩkɛ ɖɔɖɔ awiya lʋbɛ ana a-taa lɛlʋ nɛ ɖiwoki tɛŋɛlʋʋ taa.

¹² «Hɩŋ hiu weyi ŋnawa yɔ, ɩkɛ awiya sɔsɔna hiu wena pɛtɛcɛlɩdɩ-yɛ kewiyisi yɔ. Ɛlɛ́, a nɛ kpɩnɛ pɔkɔŋ tɔɔʋ kewiyaɣ alɩwaatʋ pazɩ yem.

¹³ Pɛwɛnɩ lɩmaɣzɩyɛ kʋɖʋmɖɩyɛ. Ńɖɩ́ lɛ se: paha kpɩnɛ po-ɖoŋ nɛ pa-abalɩtʋ.

¹⁴ Pɔkɔŋ yonaʋ Heɣa, ɛlɛ́, kawakɩ-wɛ. Mbʋ́ pʋyɔɔ yɔ, kɛkɛ kɩpaɣlaa taa Kɩpaɣlʋ nɛ awiya taa Wiyaʋ. Mbá Ɛsɔ ya-wɛ nɛ ɛlɩzɩ-wɛ nɛ pɔɖɔŋ ɛ-nʋmɔʋ taa nɛ pa nɛ kɛ pɛwɛɛ yɔ, pawakɩ-wɛ ɖɔɖɔ.»

¹⁵ Ɛlɛ́, Ɛsɔ tiyiyu ɛnʋ eheyi-m se: «Lɩm mbʋ́ ŋnawa nɛ halʋ weyi ɛpɛdɩɣ ɛ-tɩ yɔ ɛcaɣ pʋ-yɔɔ yɔ, ḿbʋ́ lɛ samaɣ nɛ ɛyáa tikasɩ nɛ ajɛya nɛ kʋnʋmɩŋ ndɩ ndɩ pa-taa ñɩma.

¹⁶ Piyele hɩŋ hiu weyi ŋnawa yɔ nɛ kpɩnɛ pɔkɔŋ halʋ ɛnʋ paɖʋʋ: pɔkɔŋ mʋ́ʋ mbʋ́ pɩtɩŋa payɩ ɛwɛna yɔ nɛ pɔhɔzɩ e-wondu nɛ piyebi-i ndaakpeɖe. Pɔkɔŋ tɔɔʋ ɛ-nandʋ nɛ pɩkazɩ pɔsɔ miŋ.

¹⁷ Mbʋ́ pʋyɔɔ yɔ, Ɛsɔ ɖʋ pa-taa se pala mbʋ́ e-liu wɛɛ yɔ. Ḿbʋ́ lɛ se panɩɩnɩ ɖama nɛ pɛcɛlɩ kpɩnɛ pe-kewiyisi nɛ pʋkɔɔ pɩsɩɩnɩ alɩwaatʋ ndʋ́ Ɛsɔtɔm laba yɔ.

¹⁸ «Halʋ weyi ŋnawa yɔ, ɛ́lɛ́ lɛ tɛtʋ sɔsɔtʋ ndʋ́ tinuutuu kedeŋa yɔɔ awiya yɔ.»