Wɩlʋʋ 16 - New Testament

Caɖasɩ lʋbɛ nzɩ́ sɩwɩlɩɣ Ɛsɔ pana yɔ

¹ Pʋwayɩ lɛ, manɩɩ pʋyɔɔdʋʋnɩ tiyiyaa ḿbá pa-lʋbɛ nɛ Ɛsɔ ɖɩɣa taa se: «Iwolo ihuti kedeŋa yɔɔ Ɛsɔ pana ana a-caɖasɩ lʋbɛ!»

² Peeɖe kajalaɣ tʋ woba nɛ ehuti ɛ-caɖaɣ kedeŋa yɔɔ nɛ piyele kɩcɩkpɩŋ kɩdɛkɛdɩŋ weyi ɩnazɩɣ ɛyáa yɔ, ɩkpa mbá palabɩ pɔ-yɔɔ kpɩnɛ yʋsaɣ nɛ poluŋuu ɖɩ-sɩʋ kpelaɣ tɛɛ yɔ.

³ Naalɛ tʋ ñohuti ɛ-caɖaɣ teŋgu taa nɛ lɩm pɩsɩ ɛzɩ sɩɖʋ calɩm yɔ nɛ mbʋ́ pɩtɩŋa pʋwɛ wezuu pɩ-taa yɔ, pɩsɩ.

⁴ Tozo tʋ ñohuti ɛ-ñɩŋga pɔsɩ nɛ hila pa-taa nɛ lɩm pɩsɩ calɩm.

⁵ Peeɖe manɩ Ɛsɔ tiyiyu weyi ɛcɔŋnɩ lɩm yɔɔ yɔ, ɛyɔɔdaɣ se: «Weyi ña ŋwɛɛ nɛ ŋŋwɛɛ yɔ, ŋtʋʋzaa. Weyi ña ŋwɛ cɩɖɩcɩɖɩ yɔ, mbʋ́ ŋlaba ɛzʋnɔ nɛ ŋhʋʋnɩ ɛyáa yɔ, pʋtʋʋzaa.

⁶ Mbʋ́ pʋyɔɔ yɔ, pakʋ Ɛsɔ ñɩma nɛ náyaa nɛ pɛkpɛdɩ pa-calɩm. Pʋ-yɔɔ ŋcɛlɩ-wɛ calɩm se pɔñɔɔ, pamʋnɩ ḿbʋ́.»

⁷ Ɛlɛ́, manɩɩ tɩlaaɖɩ ɖɩhɔɖɛ yɔɔdʋʋ se: «Ɛɛ, Kɩpaɣlʋ Ɛsɔ Đoŋ Tɩŋa Tʋ! Ŋhʋʋ tɔm nɛ toovenim, ñɔ-tɔm hʋʋ tʋʋzaa.»

⁸ Naanza tʋ ñohuti ɛ-ñɩŋga wɩsɩ yɔɔ nɛ paha-sɩ waɖɛ se sɩ-miŋ ɛñaɣ ɛyáa.

⁹ Peeɖe hohou sɔsɔʋ nakʋyʋ kpa-wɛ nɛ pɛwɛɛkɩɣ Ɛsɔ hɩɖɛ. Ŋgʋ́, ɛnʋ wɛnɩnɩ ɖoŋ kʋñɔmɩŋ ɩnʋ ɩ-yɔɔ. Ɛlɛ́, pɛtɛlɛɣzɩ wɛtʋ se peyele nɛ ɛ-hɩɖɛ sɛɛ.

¹⁰ Kagbaanzɩ tʋ ñohuti ɛ-ñɩŋga kpɩnɛ ńɖɩ́ ɖi-kewiyaɣ kpelaɣ yɔɔ nɛ cɩkpɛndʋʋ yu ɖi-kewiyaɣ yɔɔ. Ɛyáa nɩɣaɣ siziŋ nɛ pasalɩɣ pe-kela

¹¹ nɛ pɛwɛɛkɩɣ Ɛsɔ weyi ɛwɛ ɛsɔdaa yɔ ɛ-hɩɖɛ pe-siziŋ nɩʋ nɛ pa-kɩcɩkpɩŋ pɔ-yɔɔ. Ɛlɛ́, pɛtɛlɛɣzɩ wɛtʋ.

¹² Loɖo tʋ ñohuti ɛ-ñɩŋga pɔɔ sɔsɔɔ ŋgá payaɣ se Efraatɩ yɔ ka-taa nɛ lɩm sɔɔ se awiya wena alɩɣnɩ wɩsɩ ɖɩlɩyɛ yɔ, apɩzɩ akɔɔ.

¹³ Peeɖe mana feziŋ kɩdɛkɛdɩŋ nɩɩyɩ naadozo, ɩwɛ ɛzɩ sayɛɛ yɔ. Ɩlɩɣaɣnɩ coojo nɛ kpɩnɛ nɛ weyi ɛcɛtɩɣ se ɛkɛ náyʋ yɔ pɔ-nɔsɩ taa.

¹⁴ Ɩkɛ aleewaa feziŋ weyi ɩwɩlɩɣ kawɩlɩsɩ yɔ. Iwoki kedeŋa kpeekpe yɔɔ awiya cɔlɔ se ikpeɣli-wɛ nɛ pala you Ɛsɔ Đoŋ Tɩŋa Tʋ kɩyakʋ sɔsɔʋ wiye.

¹⁵ Ɛlɛ́, Kɩpaɣlʋ tɔ se: «Ɩna, montuduu-mɩ ɛzɩ mɩ́lʋ́ yɔ. Weyi ɛcakɩnɩ ɛ-ɛsɛ nɛ ɛɖaŋ e-wondu se ɛtaaɖɔ ndaakpeɖe nɛ pana ɛ-fɛyɛ yɔ, ehiɣ ɛ-tɩ!»

¹⁶ Piyele feziŋ ɩnɩ, ikpeɣli awiya ana lone nɖɩ́ payaɣnɩ Ebree taa se Armaagedɔɔ yɔ ɖɩ-taa.

¹⁷ Lʋbɛ tʋ ñohuti ɛ-ñɩŋga ɛsɔdaa nɛ puholuuni Ɛsɔ ɖɩɣa taa kewiyaɣ kpelaɣ cɔlɔ ɖoŋ se: «Pɩlabɩ ḿbʋ́!»

¹⁸ Peeɖe tɛʋ ñɩlɩsaa nɛ kɔkɔɖɛ ya nɛ tɛʋ nazɩ nɛ tɛtʋ ñamsɩ ñamsʋʋ nabʋyʋ kpem. Đooo ɛzɩ ɛyáa wɛʋ kedeŋa yɔɔ yɔ, wiɖiyi tɩtañamsɩ ḿbʋ́.

¹⁹ Tɛtʋ sɔsɔtʋ tayɩ tam naadozo taa nɛ ajɛya taa ñɩndʋ ñɛkpɛzɩɣ tɩɖakɩ. Ḿbʋ́ Ɛsɔ tɔzɩnɩ Babilooni tɛtʋ sɔsɔtʋ yɔɔ nɛ ɛñɔzɩ tɩ-taa ñɩma ɛ-pana sɔsɔna sʋlʋm caɖaɣ.

²⁰ Đɔɖɔ lɛ, ajɛya wena atɩŋa payɩ lɩm cɔ-yɛ pɩta yɔ, ase nɛ paatasɩɣ pʋŋ naʋ.

²¹ Đɔmbɛɛ sɔsɔna naayɛ lɩɣaɣnɩ ɛsɔdaa nɛ atɔlʋʋ ɛyáa yɔɔ. Kʋɖʋmɖɩyɛ yuŋ talɩ ɛzɩ kiiloonaa nɩɩnaza yɔ nɛ ɛyáa wɛɛkɩɣ Ɛsɔ hɩɖɛ kʋñɔŋ ŋgʋ́ ɖɔmbɛɛ kɔnɩ-wɛ yɔ kʋ-yɔɔ. Mbʋ́ pʋyɔɔ yɔ, kɩɩɖɛlɛsɩ niye.