Wɩlʋʋ 15 - New Testament

Ɛsɔ tiyiyaa lʋbɛ nɛ kɛtɛzaɣ kʋñɔmɩŋ pɔ-tɔm

¹ Pʋwayɩ lɛ, mana yʋsaɣ sɔsɔɔ lɛɛka nakɛyɛ ɛsɔdaa, kɛfɛyɩ yɔɔdʋʋ: Ɛsɔ tiyiyaa lʋbɛ nabɛyɛ ɖɔkɩ kɛtɛzaɣ kʋñɔmɩŋ lʋbɛ. Ɩnʋ tɛŋna nɛ Ɛsɔ pana hɛɛ.

² Đɔɖɔ lɛ, mana nabʋyʋ, pʋwɛ ɛzɩ teŋgu yɔ, pɩñɩlɩzɩɣ ɛzɩ ñɩnʋʋ yɔ, pisidini miŋ. Mana ɖɔɖɔ mbá pawabɩ kpɩnɛ nɛ ɖɩ-sɩʋ kpelaɣ nɛ ɖɩ-hɩɖɛ ñʋʋ yɔ, pasɩŋ teŋgu ŋ́gʋ́ kʋ-nɔɔ. Pɔɖɔkɩ pe-nesi taa Ɛsɔ cɩmɩŋ.

³ Peteɣaɣ hendu ndʋ́ Ɛsɔ tʋmlaɖʋ Mooyiizi ketewa yɔ. Ńdʋ́ ɖɔɖɔ Heɣa ketewa. Ńdʋ́ lɛ se: «Kɩpaɣlʋ Ɛsɔ, Đoŋ Tɩŋa Tʋ! Tʋma wena ŋlakɩ yɔ, apaɣlaa kpem, pɩfɛyɩ yɔɔdʋʋ! Ajɛya Wiyaʋ! Ña-nʋmɔŋ tʋʋzaa, ɩnʋ lɛ nʋmɔŋ siŋŋ.

⁴ Kɩpaɣlʋ! Awɛɛ se ɛɛsɔɔndʋʋ-ŋ nɛ eeyeki se ña-hɩɖɛ ɛsɛɛ? Ñe-ɖeke koŋ lɛ cɩɖɩcɩɖɩ tʋ. Ajɛya kpeekpe taa ɛyáa kaɣ kɔm nɛ poluŋ ñɛ-tɛɛ, mbʋ́ pʋyɔɔ yɔ, pana ɛzɩma mbʋ́ ŋtʋʋzɩ ña-lakasɩ taa yɔ.»

⁵ Pʋwayɩ lɛ, manaɣ Ɛsɔ ɖɩɣa ŋgá kɛwɛ ɛsɔdaa nɛ ka-taa nɛ kɩɖanɖʋʋ ŋgʋ́ kɩlɩzɩɣ aseɣɖe yɔ, kɔ-nɔnɔɔ tʋlaa

⁶ nɛ Ɛsɔ tiyiyaa lʋbɛ mbá pɔɖɔkɩ kʋñɔmɩŋ lʋbɛ yɔ, palɩɣnɩ ka-taa. Posu wondu ndʋ́ tɩwɛ cɩɖɩcɩɖɩ nɛ tɩñɩlɩzɩɣ siŋŋ yɔ nɛ pata tambala pa-laŋa taa.

⁷ Peeɖe kpɩna naanza ana a-taa lɛɛɖɛ cɛlɩ Ɛsɔ tiyiyaa ḿbá pa-lʋbɛ sika caɖasɩ lʋbɛ. Sɩ-taa su Ɛsɔ pana ɖo. Ɛsɔ ɛnʋ ɛwɛnɩ wezuu pɩnzɩ ɛgbaŋ ɛgbaŋ.

⁸ Ɛlɛ́, Ɛsɔ koboyaɣ nɛ e-ɖoŋ peyele nɛ ñɔsɩ nasɩyɩ ñɛyɩ ɖɩɣa ŋ́gá ka-taa. Nɔɔyʋ tapɩzɩɣ se ɛsʋʋ nɛ pʋkɔɔ pɩsɩɩnɩ alɩwaatʋ ndʋ́ kʋñɔmɩŋ lʋbɛ weyi tiyiyaa ḿbá pɔkɔnɩ pa-lʋbɛ yɔ, ɩtɛma yɔ.