Wɩlʋʋ 14 - New Testament

Mbá heɣa yaba pa-ñʋʋ yɔ pe-hendu

¹ Pʋwayɩ lɛ, mantasɩ cɔnaʋ nɛ manaɣ Heɣa sɩŋ Siiyɔɔ pʋʋ yɔɔ, ka nɛ ɛyáa kutokiŋ mɩnʋʋ nɛ nɩɩnaza nɛ naanza. Pama ka-hɩɖɛ nɛ ka-Caa ñɩnɖɛ pe-kila taa.

² Đɔɖɔ lɛ, manɩ pʋyɔɔdʋʋnɩ ɛsɔdaa ɛzɩ lɩm sɔsɔm falʋʋ yɔ yaa ɛzɩ tɛʋ nazʋʋ ɖoŋ yɔ. Kɔkɔɖɛ nɖɩ́ manɩɣaɣ yɔ, ɖɩwɛ ɛzɩ cɩmɩŋ maɖaa makʋʋ cɩmɩŋ yɔ.

³ Ɛyáa ḿbá, peteɣ hendu kɩfatʋ kewiyaɣ kpelaɣ nɛ kpɩna ana a-naanza nɛ sɔsaa pɛ-ɛsɩndaa. Nɔɔyʋ tapɩzɩɣ se ɛkpɛlɩkɩ-tʋ nɛ pɩtasɩnɩ-wɛ. Pa-ñʋʋ paayabɩnɩ tataa.

⁴ Pɩtɛ ɛyáa ḿbá lɛ mbá petepisi pa-tɩ nɛ halaa yɔ, pototukuni-wɛ kaʋ. Paa Heɣa ewoki le yɔ, patɩŋɩɣ-kɛ. Payabɩ pa-ñʋʋ nɛ ɛyáa hɛkʋ taa se pɛkɛ ɛzɩ kajalaɣ kʋmtʋ ndʋ́ pahaɣ Ɛsɔ nɛ Heɣa yɔ.

⁵ Cɛtɩm tɔm talɩɩ pɔ-nɔsɩ taa wiɖiyi kaʋ, natʋyʋ fɛyɩ se paawanɩ-wɛ.

Ɛsɔ tiyiyaa susuu se Ɛsɔ kɔŋ ɛyáa tɔm hʋnaʋ

⁶ Pʋwayɩ lɛ, mana Ɛsɔ tiyiyu lɛlʋ, ɛkʋyaɣ ɖooo ɛsɔdaa. Ɛɛwɛnɩ Laŋhɛzɩyɛ Tɔm ndʋ́ tɩwɛ tam yɔ se esusuu kedeŋa yɔɔ ɛyáa nɛ ajɛya tɩŋa nɛ cejewee tɩŋa nɛ kʋnʋmɩŋ tɩŋa nɛ samaɣ tɩŋa.

⁷ Eholaɣ ɖoŋ se: «Ɩsɔɔndɩ Ɛsɔ nɛ ɩɖʋ-ɩ hɩɖɛ, mbʋ́ pʋyɔɔ yɔ, ɛ-tɔm hʋʋ alɩwaatʋ talaa. Iluŋ ɛ-tɛɛ! Ɛnʋ labɩnɩ ɛsɔdaa nɛ tɛtʋ nɛ teŋgu nɛ hila.»

⁸ Pʋwayɩ lɛ, mantasɩ lɛlʋ naʋ, ɛtɩŋaɣ ɛ-wayɩ nɛ ɛtɔŋ se: «Tɩtɔlaa! Babilooni tɛtʋ sɔsɔtʋ tɔlaa kpem! Ńdʋ́ ñɔzɩnɩ ajɛya kpeekpe taa ɛyáa tɩ-sʋlʋm nɛ pʋkʋʋ-wɛ, ḿbʋ́ lɛ tɩ-acɛyɛ ndʋ́ tɩlakɩ yɔ.»

⁹ Peeɖe mana tozo tʋ, ɛtɩŋaɣ kajalaɣ ñɩma wayɩ nɛ eholuu ɖoŋ se: «Yee nɔɔyʋ eluŋ kpɩnɛ nɛ ɖɩ-sɩʋ kpelaɣ pɛ-tɛɛ nɛ pala e-kiɖe taa yaa e-nesi yɔɔ yʋsaɣ yɔ,

¹⁰ pʋdʋ kɔŋ ñɔʋ Ɛsɔ pana sʋlʋm mbʋ́ papɩyɩ ɛ-pana caɖaɣ taa nɛ pataca pɩ-taa pʋyʋ kaʋ se pu-ɖoŋ ɛpasɩ yɔ: pɩtɛ ɛyáa kɔŋ tɔɔʋ kʋñɔŋ siŋŋ miŋ sɔsɔŋ nɛ tɩm pa-taa, Ɛsɔ tiyiyaa cɩɖɩcɩɖɩ ñɩma nɛ Heɣa pɛ-ɛsɩndaa.

¹¹ Miŋ sɔsɔŋ ɛnʋ, ɛ-ñɔsɩ ñɛyɩɣ pɩnzɩ ɛgbaŋ ɛgbaŋ. Mbá poluŋuu kpɩnɛ nɛ ɖɩ-sɩʋ kpelaɣ pɛ-tɛɛ yɔ nɛ mbá palabɩ pɔ-yɔɔ ɖɩ-hɩɖɛ yʋsaɣ yɔ, paahɛzɩɣ wɩsɩ nɛ ɖoó.»

¹² Cɩnɛ panaɣ ɛzɩma mbʋ́ Ɛsɔ ñɩma mbá pɔɖɔŋ ɛ-paɣtʋ yɔɔ nɛ pɛwɛnɩ lidaʋ Yesu yɔɔ yɔ pɔɖɔkɩ pa-tɩ yɔ.

¹³ Peeɖe manɩ pʋyɔɔdʋʋnɩ-m nɛ ɛsɔdaa se: «Ma se pɩkpaɣʋnɩ lɛɛlɛɛyɔ yɔ, mbá pasɩkɩ pa nɛ Kɩpaɣlʋ pɛ-kpɛndʋʋ taa yɔ, pehiɣ pa-tɩ!» Ɛlɛ́, Fezuu Kiɖeɖeu tisi se: «Ḿbʋ́ lɛ! Piyeki nɛ pɛhɛzɩnɩ pa-tʋma: pɔkɔŋ-wɛ hɛyʋʋ a-yɔɔ.»

Ɛsɔ hʋʋ kedeŋa yɔɔ ɛyáa tɔm

¹⁴ Mantasɩ cɔnaʋ lɛ, mana ɛsɔmɩnʋʋ kʋhʋlʋmʋʋ nakʋyʋ. Nɔɔyʋ caɣ kʋ-yɔɔ, ɛpam sika hulaɣ nɛ ɛɖɔkɩ loozo ŋgʋ́ kɩpɩɣ camɩyɛ yɔ e-nesi taa.

¹⁵ Ɛsɔ tiyiyu lɛlʋ ñalɩnɩ Ɛsɔ ɖɩɣa taa nɛ ɛmakɩ kubusi ɖoŋ nɛ ɛyɔɔdʋʋnɩ weyi ɛcaɣ ɛsɔmɩnʋʋ yɔɔ yɔ se: «Tisi ño-loozo nɛ ŋkʋ. Alɩwaatʋ talaa se pakʋ, mbʋ́ pʋyɔɔ yɔ, tɔɔnaɣ pɩ kedeŋa yɔɔ kpem!»

¹⁶ Peeɖe weyi ɛcaɣ mɩnʋʋ yɔɔ yɔ, etisi e-loozo nɛ ɛkʋ kedeŋa yɔɔ tɔɔnaɣ tɩŋa.

¹⁷ Pʋwayɩ lɛ, lɛlʋ lɩɩnɩ Ɛsɔ ɖɩɣa ŋgá kɛwɛ ɛsɔdaa yɔ ka-taa, ɛɖɔkɩ ɖɔɖɔ loozo ŋgʋ́ kɩpɩɣ yɔ.

¹⁸ Tiyiyu lɛlʋ weyi ɛwɛnɩ ɖoŋ miŋ yɔɔ yɔ, ɛ́lɛ́ ñalɩnɩ tɩlaaɖɩ ɖɩhɔɖɛ nɛ eholuuni weyi ɛɖɔkɩ loozo ŋgʋ́ kɩpɩɣ yɔ se: «Tisi ño-loozo ŋgʋ́ kɩpɩɣ yɔ nɛ ŋkoyi tɩŋ weyi popuu i-pee sʋlʋm yɔ i-pee kedeŋa yɔɔ, mbʋ́ pʋyɔɔ yɔ, apɩwa.»

¹⁹ Peeɖe Ɛsɔ tiyiyu ɛnʋ etisi e-loozo nɛ ekoyi tɩŋ ɩnʋ i-pee kedeŋa yɔɔ nɛ ɛlɔ-yɛ Ɛsɔ pana pulone sɔsɔɖɛ taa ɖenɖe pɔhɔyʋʋ-yɛ yɔ.

²⁰ Ɛlɛ́, palɩzɩ pulone ńɖɩ́ nɛ tɛtʋ wayɩ nɛ pɔhɔyɩ-yɛ nɛ calɩm lɩɩnɩ ɖɩ-taa nɛ pikpe nɛ pɩtalɩ kiloomɛtanaa nasidozo nɛ cukaŋ taa ñɛwɛ ɛzɩ mɛta nɛ hɔɔlʋʋ yɔ.