Wɩlʋʋ 13 - New Testament

Kpɩnɛ nɖɩ́ ɖɩlɩnɩ teŋgu taa yɔ ɖɩ-tɔm

¹ Pʋwayɩ lɛ, mana kpɩnɛ naɖɩyɛ, ɖɩlɩɣaɣnɩ teŋgu taa. Đɩñɔ hɩŋ hiu nɛ ɖɩwɛnɩ ñʋŋ lʋbɛ. Paa hɩlʋʋ ŋgʋ́ kʋ-nɔɔ taa nɛ awiya hulaɣ, pama paa ñʋʋ ŋgʋ́ kʋ-yɔɔ hɩla wena atʋʋ Ɛsɔ yɔ.

² Kpɩnɛ nɖɩ́ manawa yɔ, ɖɩwɛ ɛzɩ kpou yɔ. Đɩ-naŋgbanzɩ wɛ ɛzɩ kpemiɣa ñɩnzɩ yɔ nɛ ɖɩ-nɔɔ ñɛwɛɛ ɛzɩ tɔɔyʋʋ ñɩŋga yɔ. Coojo ha-ɖɩ e-ɖoŋ nɛ ɛ-abalɩtʋ sɔsɔtʋ nɛ ɛcɛlɩ-ɖɩ e-kewiyaɣ kpelaɣ.

³ Ɛlɛ́, mana ɖɩ-ñʋʋ lɛɛkʋ, pʋkʋ-kʋ sɩm yɔɔ sɩm yɔɔ nɛ pʋwaa. Ɛyáa tɩŋa na-ɖɩ lɛ, pɩɖɩɣzɩ-wɛ nɛ patɩŋɩɣ-ɖɩ.

⁴ Poluŋaɣ coojo tɛɛ, mbʋ́ pʋyɔɔ yɔ, ɛnʋ hanɩ kpɩnɛ ńɖɩ́ ɖoŋ. Poluŋaɣ ɖɔɖɔ kpɩnɛ ńɖɩ́ ɖɩ-tɛɛ nɛ pɔtɔŋ se: «Anɩɣzɩnɩ kpɩnɛ ɖɩnɛ? Apɩzɩɣ eyoni-ɖɩ?»

⁵ Coojo sɔsɔ ɛnʋ, ɛha-ɖɩ nɔɔ nɛ ɖɩyɔɔdʋʋ cɛjɛyɛ tɔm nɛ ɖɩtʋʋ Ɛsɔ. Paha-ɖɩ ɖɔɖɔ ɖoŋ se ɖɩlabɩnɩ tʋmɩyɛ fenasɩ nɩɩnaza nɛ naalɛ.

⁶ Peeɖe kpɩnɛ ńɖɩ́ ɖikuli ɖɩ-nɔɔ nɛ ɖɩtʋʋ Ɛsɔ. Đɩwɛɛkɩ ɛ-hɩɖɛ nɛ ɖɩkpɛndɩnɩ ɖenɖe ɛwɛɛ yɔ nɛ mbá pɛwɛ ɛsɔdaa yɔ.

⁷ Đɔɖɔ lɛ, ɛha-ɖɩ waɖɛ se ɖiyooni Ɛsɔ ñɩma nɛ ɖɩwabɩ-wɛ. Ɛha-ɖɩ ɖɔɖɔ ɖoŋ cejewee tɩŋa nɛ samaɣ tɩŋa nɛ kʋnʋmɩŋ tɩŋa nɛ ajɛya tɩŋa pa-taa ñɩma yɔɔ.

⁸ Pʋ-yɔɔ kedeŋa yɔɔ ɛyáa kpeekpe kɔŋ luŋuu ɖɩ-tɛɛ. Ḿbá lɛ mbá patɩŋa payɩ patama pa-hɩla wezuu takayaɣ taa ɖooo ɛzɩ Ɛsɔ labʋ kedeŋa yɔ. Takayaɣ ŋ́gá lɛ Heɣa ŋgá palawa yɔ ka-ñɩŋga.

⁹ Weyi ɛwɛnɩ nɩŋgbaaŋ lɛ, ɛnɩɩ!

¹⁰ Yee pʋɖʋwa se nɔɔyʋ ɛsʋʋ salaka yɔ, ɛsʋʋ ka-taa ɖɔɖɔ. Yee pʋɖʋwa se pakʋ nɔɔyʋ nɛ sɩɣa yɔ, pakʋʋ-ɩ nɛ kɛ ɖɔɖɔ. Pʋnɛ pɩ-taa panaɣ Ɛsɔ ñɩma tɩ ɖɔkʋʋ nɛ pe-lidaʋ wɛnaʋ.

Kpɩnɛ nɖɩ́ ɖɩlɩnɩ tɛtɛɛ yɔ ɖɩ-tɔm

¹¹ Pʋwayɩ lɛ, mana kpɩnɛ lɛɛɖɛ, ɖɩlɩɣaɣnɩ tɛtɛɛ. Đɩñɔ hɩŋ naalɛ ɛzɩ heɣa yɔ nɛ ɖɩyɔɔdʋʋ ɛzɩ coojo yɔ.

¹² Đɩɩwɛnɩ kajalaɣ ñɩnɖɛ ɖoŋ tɩŋa nɛ ɖɩlakɩ tʋmɩyɛ nɛ ɖɩ-nɔɔ ɖɩ-ɛsɩndaa. Điyekaɣ nɛ kedeŋa nɛ kɔ-yɔɔ ñɩma poluŋuu kajalaɣ ñɩnɖɛ nɖɩ́ ɖɩ-kɩcɩkpʋʋ kɔŋaɣnɩ-ɖɩ sɩm nɛ kʋwaa yɔ ɖɩ-tɛɛ.

¹³ Đɩlakaɣ hama lakasɩ sɔsɔsɩ nɛ halɩ ɖɩkɔɔ ɖɩla nɛ miŋ nɩɩyɩ lɩɩnɩ ɛsɔdaa nɛ etii tataa nɛ ɛyáa na.

¹⁴ Đɩcɛzaɣ kedeŋa yɔɔ ɛyáa nɛ hama lakasɩ nzɩ́ coojo ha-ɖɩ waɖɛ se ɖɩla kajalaɣ ñɩnɖɛ ɛsɩndaa yɔ. Điheyaɣ-wɛ ɖɔɖɔ se pama sɩʋ kpelaɣ nakɛyɛ nɛ paɖʋnɩ kpɩnɛ nɖɩ́ paalom sɩɣa nɛ ɖɩɖaɣnɩ wɛʋ wezuu yɔ hɩɖɛ.

¹⁵ Ɛha-ɖɩ waɖɛ se ɖɩla nɛ sɩʋ kpelaɣ ŋgá pama ɛzɩ kajalaɣ kpɩnɛ ńɖɩ́ yɔ, kɛwɛɛ wezuu nɛ kɔyɔɔdɩ nɛ kala nɛ mbá patɩŋa payɩ paaluŋuu kɛ-tɛɛ yɔ, pasɩ.

¹⁶ Điiyeba nɛ payʋsɩ ajamaa nɛ ɖoŋ tɩnaa nɛ ñɩm tɩnaa nɛ kʋñɔndɩnaa nɛ mbá pɛwɛ pa-tɩ yɔɔ yɔ nɛ yomaa patɩŋa payɩ pe-nesi kɩbanzɩ yɔɔ yaa pe-kila taa.

¹⁷ Yee yʋsaɣ ŋ́gá yaa kpɩnɛ ńɖɩ́ ɖɩ-hɩɖɛ yaa ɖɩ-hɩɖɛ ñʋʋ ɛfɛyɩ nɔɔyʋ yɔɔ yɔ, ɛɛpɩzɩɣ ɛya pʋyʋ yaa ɛpɛdɩ.

¹⁸ Cɩnɛ panaɣ lɔŋsɩnɖɛ: weyi ɛwɛnɩ lɛɣtʋ yɔ, ɛla kpɩnɛ ńɖɩ́ ɖɩ-hɩɖɛ ñʋʋ akɔnta. Mbʋ́ pʋyɔɔ yɔ, kɩkɛ ɛyʋ mayaɣ. Ŋ́gʋ́ lɛ taŋga nɛ mɩnʋʋ nɛ nɩɩnʋwa nɛ hiu nɛ loɖo.