Wɩlʋʋ 12 - New Testament

Halʋ nɔɔyʋ nɛ coojo pɔ-tɔm

¹ Pɩwɩlɩ kawɩlɩsɩ sɔsɔsɩ nasɩyɩ ɛsɔdaa: halʋ nɔɔyʋ, wɩsɩ huuzi ɛ-yɔɔ ɛzɩ toko esuwa yɔ nɛ ɛsɩŋ fenaɣ yɔɔ nɛ ɛpa hulaɣ nakɛyɛ. Kɔ-yɔɔ nɛ tɩɩnzɩ hiu nɛ naalɛ.

² Ɛhaɣ howa nɛ ɛcaɣ lʋlʋʋ nɛ ɛnɩɣ siziŋ nɛ ɛmakɩ kubusi.

³ Ɩna! Pɩwɩlɩ ɖɔɖɔ kawɩlɩsɩ lɛɛsɩ ɛsɔdaa: coojo sɔsɔ nɔɔyʋ, ɛsɛ cɩɩɩ ɛzɩ miŋ yɔ. Ɛwɛnɩ ñʋŋ lʋbɛ nɛ hɩŋ hiu nɛ ɛpa hulaɣ paa ɛ-ñʋʋ ŋgʋ́ kɩ-taa.

⁴ E-suu kahazɩ tɩɩnzɩ nasɩyɩ nɛ kʋlɔ tataa. Yee patayɩ tɩɩnzɩ tɩŋa tam naadozo yɔ, pɩmakɩnɩ hɔɔlʋʋ kʋɖʋmʋʋ. Coojo ɛnʋ, ɛsɩŋ halʋ weyi ɛcaɣ lʋlʋʋ yɔ ɛ-ɛsɩndaa se ɛlʋlɩ ɛ-pɩɣa lɛ, ɛtɩŋ ɛsalɩ-kɛ.

⁵ Peeɖe halʋ ɛnʋ ɛlʋlɩ abalɩbɩɣa nɛ Ɛsɔ cobi-kɛ nɛ ɛkpazɩ ɛ nɛ e-kewiyaɣ kpelaɣ pɔ-cɔlɔ. Ŋ́gá kɔŋnɩ ɖiyuu ajɛya kpeekpe taa ñɩma nɛ awiya nɛ ɖaʋ ñɩ́ɣ́yʋ́ʋ ñɩŋgʋ.

⁶ Ɛlɛ́, halʋ ɛnʋ ese nɛ ɛsʋʋ lakʋ taa ɖenɖe Ɛsɔ kɔñɔɔzɩ-ɩ ɖɩjaɣyɛ se pɔcɔnɩ ɛ-yɔɔ kɩyakɩŋ kutoku nɛ nasɩlɛ nɛ nɩɩnʋwa nɛ hiu yɔ.

⁷ Peeɖe you nakʋyʋ pazɩ ɛsɔdaa. Miicɛɛlɩ nɛ e-tiyiyaa poyouni coojo nɛ coojo nɛ ɛ́lɛ́ ñɩma paba ñoyouni-wɛ.

⁸ Ɛlɛ́, Miicɛɛlɩ nɛ e-tiyiyaa pawabɩ-wɛ. Pʋ-yɔɔ pɔɖɔnɩ-wɛ ɛsɔdaa nɛ patatasɩ wɛnaʋ ɖɩjaɣyɛ peeɖe.

⁹ Coojo sɔsɔ ɛnʋ lɛ ɖʋm kɩbɩnʋ weyi payaɣ se Eleeu nɛ pɛtɛ patasɩ-ɩ se Satanɩ yɔ. Ɛnʋ cɛzɩɣnɩ ɛyáa kpeekpe kedeŋa yɔɔ. Potuzi ɛ nɛ e-tiyiyaa nɛ ɛsɔdaa nɛ pɛpɛɖɩ-wɛ kedeŋa yɔɔ.

¹⁰ Peeɖe manɩɣ puholuuni ɛsɔdaa ɖoŋ se: «Lɛɛlɛɛyɔ, ñʋʋ yabʋ alɩwaatʋ talaa! Pɩtalaa se ɖɛ-Ɛsɔ ɛwɩlɩ e-Kewiyaɣ ɖoŋ! Pɩtalaa ɖɔɖɔ se Weyi Ɛlɩzaa Yɔ, ɛwɩlɩ ɛ-abalɩtʋ. Mbʋ́ pʋyɔɔ yɔ, potuzi weyi ɛkʋyaɣ ɖa-taabalaa yɔɔ wɩsɩ nɛ ɖoó ɖɛ-Ɛsɔ ɛsɩndaa yɔ nɛ ɛsɔdaa nɛ pɛpɛɖɩ-ɩ kedeŋa yɔɔ.

¹¹ Pɩtɩŋnɩ Heɣa calɩm nɛ aseɣɖe nɖɩ́ ɖa-taabalaa lɩzaa yɔ pɔ-yɔɔ nɛ pawabɩ-ɩ. Đɔɖɔ lɛ, patakpaɣ pe-wezuu payaa pʋyʋ nɛ petisi se yee paa sɩm yɔ, pasɩ.

¹² Pʋ-yɔɔ lɛ, ɛsɔdaa nɛ mbá mɩ ɩwɛ peeɖe yɔ, mɩ-taa ɛhʋlʋmɩ! Mbá mɩ ɩwɛ tɛtʋ yɔɔ nɛ teŋgu taa yɔ, pʋtɔɔ-mɩ! Mbʋ́ pʋyɔɔ yɔ, eleeu tibi mɩ-cɔlɔ. Ɛnawa se alɩwaatʋ pazɩ yem pɩkazɩ-ɩ, pʋ-yɔɔ ɛ-pana kpawa pɩŋŋ.»

¹³ Coojo ɛnʋ, ɛnawa se potuzi-i nɛ pɛpɛɖɩ kedeŋa yɔɔ lɛ, ɛɖɔɔnʋʋ halʋ weyi ɛlʋlɩ abalɩbɩɣa yɔ.

¹⁴ Peeɖe pɛcɛlɩ halʋ ɛnʋ keziye naɖɩyɛ keŋ naalɛ se ɛkʋyɩ nɛ ewolo lakʋ taa e-lone taa nɛ pɔcɔnɩ ɛ-yɔɔ pɩnzɩ naadozo nɛ hɔɔlʋʋ nɛ ɖʋm ɛnʋ ɛtaana-ɩ.

¹⁵ Đʋm ɛnʋ, ɛlɩzaɣ lɩm nɛ ɛ-nɔɔ taa ɛzɩ pɔɔ sɔsɔɔ yɔ halʋ ɛnʋ ɛ-wayɩ se pɩkpaɣ-ɩ.

¹⁶ Ɛlɛ́, tɛtʋ sɩnɩ halʋ ɛnʋ: tɩha tɩ-nɔɔ nɛ tili lɩm mbʋ́ coojo lɩzaɣnɩ ɛ-nɔɔ taa yɔ, pɩtɩŋa.

¹⁷ Peeɖe ɛ-pana kpanɩ halʋ ɛnʋ nɛ ewolo eyouni e-liɖe taa ñɩma mbá pakazaa yɔ. Ḿbá ɖɔmnɩ Ɛsɔ paɣtʋ yɔɔ nɛ palɩzɩ Yesu yɔɔ aseɣɖe.

¹⁸ Coojo sɔsɔ ɛnʋ ɛsɩŋ teŋgu kañɩŋa yɔɔ.