Wɩlʋʋ 11 - New Testament

Aseɣɖe tɩnaa naalɛ tɔm

¹ Pʋwayɩ lɛ, pɛcɛlɩ-m kañɩŋ́gbayaɣ́ ŋgá kɛwɛ ɛzɩ ɖaʋ kɩmaɣzʋʋ yɔ nɛ peheyi-m se: «Kʋyɩ ŋmaɣzɩ Ɛsɔ ɖɩɣa nɛ tɩlaaɖɩ ɖɩhɔɖɛ nɛ ŋkalɩ mbá poluŋuu Ɛsɔ tɛɛ ka-taa yɔ.

² Ɛlɛ́, taamaɣzɩ taɣ, yebi-kɛ nɛ hɔɔlʋʋ. Mbʋ́ pʋyɔɔ yɔ, peyebini-kɛ nɛ mbá paañaŋ Ɛsɔ yɔ, ḿbá kɔŋna yaɣʋ Ɛsɔ tɛtʋ naŋgbanzɩ fenasɩ nɩɩnaza nɛ naalɛ.

³ Meyeki nɛ ma-aseɣɖe tɩnaa naalɛ suu kʋñɔŋ wondu nɛ pɛkɛ náyaa kɩyakɩŋ kutoku nɛ nasɩlɛ nɛ nɩɩnʋwa nɛ hiu.»

⁴ Ḿbá lɛ somiŋ naalɛ nɛ kanɖʋnaa naalɛ mbá pasɩŋ kedeŋa yɔɔ Kɩpaɣlʋ ɛsɩndaa yɔ.

⁵ Yee po-koyindinaa ɛcaɣ se palabɩ-wɛ kɩdɛkɛdɩm nabʋyʋ yɔ, miŋ nɩɩyɩ lɩɣnɩ pɔ-nɔsɩ taa nɛ enezi-wɛ. Toovenim lɛ, yee nɔɔyʋ ɛcaɣ se ɛlabɩ-wɛ kɩdɛkɛdɩm yɔ, pʋwɛɛ se pʋkʋ-ɩ ḿbʋ́.

⁶ Náyaa ḿbá, pɛwɛnɩ ɖoŋ se paɖɩɣ ɛsɔdaa nɛ tɛʋ ɛtaanɩɩ kɩyakɩŋ weyi ɩ-taa posusuu pɔ-tɔm yɔ. Pɛwɛnɩ ɖoŋ ɖɔɖɔ se papɩsɩ lɩm calɩm nɛ peyele kʋñɔmɩŋ ndɩ ndɩ tɩŋa sʋʋ kedeŋa yɔɔ alɩwaatʋ ndʋ́ pɩmaɣ-wɛ yɔ.

⁷ Pɔkɔŋ pɛtɛ pa-aseɣɖe lɩzʋʋ lɛ, kpɩnɛ nɖɩ́ ɖɩlɩɣnɩ asayʋʋ pɔʋ taa yɔ, ɖiyooni-wɛ nɛ ɖɩwabɩ-wɛ nɛ ɖɩkʋ-wɛ pasɩ.

⁸ Po-tomnasɩ wɛɣ tɛtʋ sɔsɔtʋ ndʋ́ pamaɣzɩnɩ Sodom nɛ Ejiptɩ nɛ payaa-tʋ ḿbʋ́ yɔ tɩ-habɛɛ yɔɔ. Peeɖe pakam pa-Kɩpaɣlʋ kaamaŋkaɣ yɔɔ.

⁹ Samaɣ nɛ cejewee nɛ kʋnʋmɩŋ nɛ ajɛya pa-taa ɛyáa nabɛyɛ kɔŋ cɔnaʋ po-tomnasɩ kɩyakɩŋ naadozo nɛ hɔɔlʋʋ. Paakɔŋ haʋ nʋmɔʋ se pepim-wɛ.

¹⁰ Kedeŋa yɔɔ ñɩma taa hʋlʋmʋʋnɩ náyaa naalɛ ḿbá pa-sɩm nɛ pɛwɛɛ amaya yɔɔ. Pɔkɔŋ ɖama tiyinaʋ kʋjɔŋ, mbʋ́ pʋyɔɔ yɔ, pa-naalɛ panazaɣnɩ-wɛ.

¹¹ Ɛlɛ́, kɩyakɩŋ naadozo nɛ hɔɔlʋʋ ɩnʋ ɩ-wayɩ lɛ, wezuu fezuu nakʋyʋ lɩɩnɩ Ɛsɔ cɔlɔ nɛ kɩsʋʋ sɩɖaa naalɛ ḿbá pa-taa nɛ pakʋyɩ pasɩŋ pa-naŋgbanzɩ yɔɔ nɛ sɔɔndʋ kpa mbá pɔcɔŋaɣnɩ-wɛ yɔ siŋŋ.

¹² Peeɖe náyaa ḿbá, panɩ puholuuni ɛsɔdaa se: «Ɩkpa cɩnɛ!» Ɛlɛ́, pɩkpazɩ-wɛ ɛsɔdaa yem nɛ pasʋʋ mɩndʋ, po-koyindinaa cɔŋaɣnɩ-wɛ.

¹³ Alɩwaatʋ ńdʋ́ tɩ-yɔɔ tɛtʋ ñamsɩ siŋŋ nɛ yee patayɩ tɛtʋ ndʋ́ tɩ-taa paawɛɛ yɔ tam hiu yɔ, hɔɔlʋʋ kʋɖʋmʋʋ yɔkaa. Ɛyáa kutokiŋ lʋbɛ sɩbɩnɩ asayʋʋ ŋ́gʋ́ kɩ-taa. Piyele sɔɔndʋ kpa mbá palɩ kɩ-taa yɔ nɛ pasa Ɛsɔ weyi ɛwɛ ɛsɔdaa yɔ.

¹⁴ Kʋñɔŋ naalɛ ñɩŋgʋ ɖɛwa. Pɩkazɩ pazɩ, tozo ñɩŋgʋ kɔŋ.

Pahʋlɩ ɛgandɩyɛ lʋbɛ ñɩnɖɛ

¹⁵ Pɩkɛdaa lɛ, Ɛsɔ tiyiyu lʋbɛ ñɩnʋ hʋlɩ ɛgandɩyɛ nɛ puholuuni ɛsɔdaa kpaŋŋ kpaŋŋ se: «Pɛcɛlɩ kedeŋa kewiyaɣ ɖa-Kɩpaɣlʋ nɛ Weyi Ɛlɩzaa Yɔ. Ɛtɔkɩ-kɛ pɩnzɩ ɛgbaŋ ɛgbaŋ!»

¹⁶ Peeɖe sɔsaa nɩɩlɛ nɛ naanza mbá paacaɣ Ɛsɔ ɛsɩndaa pe-kewiyaɣ kpelisi yɔɔ yɔ, poluŋ ɛ-tɛɛ nɛ paka pɛ-ɛsɛ nɛ tɛtʋ

¹⁷ nɛ pasaŋ-ɩ se: «Kɩpaɣlʋ Ɛsɔ, Đoŋ Tɩŋa Tʋ! Ñɛwɛna, ñaawɛna, ɖɩsaŋ-ŋ se ŋtɔɔ ñe-kewiyaɣ nɛ ño-ɖoŋ sɔsɔŋ.

¹⁸ Ajɛya taa ñɩma pana kakpawa, lɛɛlɛɛyɔ ña-ñɩna ñakpawa! Pɩtalaa se ŋhʋʋnɩ sɩɖaa: ŋhɛyɩɣ ña-tʋmlaɖaa, ḿbá yɔ: náyaa nɛ ña-ñɩma nɛ mbá pañaŋ-ŋ yɔ, paa paakɛ ajamaa yaa ɖoŋ tɩnaa nɛ piyele ŋkʋ mbá paba wɛɛkɩɣ kedeŋa yɔ.»

¹⁹ Peeɖe Ɛsɔ ɖɩɣa ŋgá kɛwɛ ɛsɔdaa yɔ, kɔ-nɔnɔɔ tʋlaa nɛ panaɣ ɛ-nɔɔ haʋ aɖakaɣ ka-taa. Tɛʋ ñɩlɩsaa nɛ kɔkɔɖɛ ya nɛ tɛʋ nazɩ nɛ tɛtʋ ñamsɩ nɛ ɖɔmbɛɛ tɔlɩ siŋŋ.