Wɩlʋʋ 10 - New Testament

Ɛsɔ tiyiyu nɛ takayaɣ cikpelaɣ pɔ-tɔm

¹ Pʋwayɩ lɛ, mantasɩ Ɛsɔ tiyiyu nɔɔyʋ naʋ, ɛwɛ ɖoŋ. Ɛlɩnɩ ɛsɔdaa nɛ etiki, ehu ɛsɔmɩndʋ. Ɛ-ñʋʋ taa wɛ tɩŋgaɣyʋʋ nɛ ɛ-ɛsɩndaa wɛɛ ɛzɩ wɩsɩ yɔ nɛ ɛ-naŋgbanzɩ ñɛwɛɛ ɛzɩ miŋ sɔsɔŋ nzʋlʋmɛɛ yɔ.

² Ɛɖɔkɩ takayaɣ cikpelaɣ nakɛyɛ e-nesi taa, kokulaa. Ɛsɩ ɛ-nɩwaŋ naŋgbaŋaɣ teŋgu yɔɔ nɛ nɩmɩyɛ ñɩŋga tɛtʋ yɔɔ

³ nɛ eholi ɖoŋ ɛzɩ tɔɔyʋʋ wiluu yɔ. Eholi ḿbʋ́ lɛ, tɛʋ nazɩ tam lʋbɛ.

⁴ Kɩnaza ḿbʋ́ lɛ, manɩɩ pɩ-taa nɛ mancaɣ se mama. Ɛlɛ́, manɩɣ pʋyɔɔdʋʋnɩ-m nɛ ɛsɔdaa se: «Mɛsɩ tɛʋ nazʋʋ lʋbɛ tɔm ńdʋ́ ña-taa, taama-tʋ.»

⁵ Peeɖe Ɛsɔ tiyiyu weyi mana ɛsɩŋ teŋgu nɛ tɛtʋ pɔ-yɔɔ yɔ, ɛkpazɩ e-nesi kɩbanzɩ nɛ Ɛsɔ

⁶ nɛ eɖuuni weyi ɛwɛ wezuu pɩnzɩ ɛgbaŋ ɛgbaŋ yɔ. Ɛnʋ labɩnɩ ɛsɔdaa nɛ mbʋ́ pɩtɩŋa pʋwɛ kɩ-taa yɔ nɛ tɛtʋ nɛ mbʋ́ pɩtɩŋa pʋwɛ tɩ-yɔɔ yɔ nɛ teŋgu nɛ mbʋ́ pɩtɩŋa pʋwɛ kɩ-taa yɔ. Eɖuwaa se: «Paatasɩɣ pʋyʋ ɖaŋʋʋ ɖɔɖɔ.

⁷ Ɛlɛ́, alɩwaatʋ ndʋ́ Ɛsɔ tiyiyu lʋbɛ ñɩnʋ hʋlʋʋ ɛ-ɛgandɩyɛ yɔ, mbʋ́ Ɛsɔ ɖʋwa nɛ pʋwɛɛ mɛsaɣ tɛɛ yɔ, pɩtɛzɩɣ labʋ. Ḿbʋ́ eeheyi ɛ-tʋmlaɖaa mbá pɛkɛ náyaa yɔ.»

⁸ Pʋwayɩ lɛ, nɔɔ ŋgá kaayɔɔdɩnɩ-m nɛ ɛsɔdaa yɔ, katasɩ-m yɔɔdɩnaʋ se: «Wolo ŋmʋ takayaɣ cikpelaɣ ŋgá kokulaa yɔ, Ɛsɔ tiyiyu weyi ɛsɩŋ teŋgu nɛ tɛtʋ pɔ-yɔɔ yɔ e-nesi taa.»

⁹ Peeɖe mowobi ɛ-cɔlɔ nɛ meheyi-i se ɛcɛlɩ-m takayaɣ cikpelaɣ ŋ́gá. Ɛlɛ́, eheyi-m se: «Mʋ-kɛ nɛ ŋtɔɔ: keyeki nɛ ño-lotu taa wɛɛ ñaŋ. Ɛlɛ́, ñɔ-nɔɔ taa wɛɣ leleŋ ɛzɩ tʋŋ num yɔ.»

¹⁰ Peeɖe mamʋ-kɛ e-nesi taa mɔntɔɔ nɛ mɔ-nɔɔ taa wɛɛ leleŋ ɛzɩ tʋŋ num yɔ. Melibi-kɛ lɛ, mo-lotu taa kpa ñaŋ.

¹¹ Ɛlɛ́, nɔɔ ŋ́gá keheyi-m se: «Pʋwɛɛ se ŋɖaɣnɩ susuu samaɣ ndɩ ndɩ nɛ ajɛya sakɩyɛ nɛ kʋnʋmɩŋ sakɩyɛ nɛ awiya sakɩyɛ pɔ-tɔm ndʋ́ Ɛsɔ kɔŋ-ŋ heyuu yɔ.»