Tiiti 3 - New Testament

Krɩstʋ ñɩma wezuu kɩfalʋʋ caɣʋ tɔm

¹ Tɔzɩ Krɩstʋ ñɩma se pʋwɛɛ se poluzi pa-tɩ mbá pɔcɔŋnɩ ajɛya yɔɔ yɔ nɛ ñʋndɩnaa pɛ-tɛɛ. Pʋwɛɛ se pañam-wɛ nɛ paɖaŋ se pala paa tʋmɩyɛ kɩbanɖɛ nɖɩ́.

² Pataawɛɛkɩ nɔɔyʋ hɩɖɛ, pataacaa tɔm. Ɛlɛ́, pʋwɛɛ se pɔ́ɖɔ́kɩ pɔ-hɔ nɛ pa nɛ lɛlaa pʋwɛɛ leleŋ tam.

³ Mbʋ́ pʋyɔɔ yɔ, ɖooo lɛ, ɖa ɖɔɖɔ ɖɩɩkɛ kɩmɛlɛmɩŋ nɛ kaañamtʋ tɩnaa, ɖiilebi nʋmɔʋ. Đɩɩwɛ ɛzɩ yomaa yɔ, mbʋ́ pʋyɔɔ yɔ, pɩɩkɛnɩ-ɖʋ kɩcɛyʋʋ se ɖɩla mbʋ́ mbʋ́ ɖe-liu wɛɛ yɔ nɛ mbʋ́ mbʋ́ pɩkɛdɩnɩ-ɖʋ yɔ. Đɩɩwɛ kañatʋ nɛ ɛsɛ naɣnaɣ pa-taa. Ɛyáa paɖaɣ-ɖʋ nɛ ɖɩpaɖɩɣ ɖama ɖɔɖɔ.

⁴ Ɛlɛ́, alɩwaatʋ ndʋ́ ɖa-ñʋʋ yaɖʋ Ɛsɔ yeba nɛ ɛyáa na se ɛwɛ ɖeu nɛ ɛsɔɔlɩ-wɛ yɔ

⁵ ɛyabɩ ɖa-ñʋʋ. Pɩtɛkɛ se ɖɩlabɩ tʋma kɩbana yɔɔ ɛlabɩ-ɖʋ ḿbʋ́. Ɛlɛ́, ɛna ɖa-pʋtɔdɩyɛ yɔɔ ɛlabɩ-ɖʋ ḿbʋ́. Ɛyabɩ ɖa-ñʋʋ nɛ pɩtɩŋnɩ lɩm mbʋ́ pʋ-yɔɔ Fezuu Kiɖeɖeu tɩŋnaa se ɖɩpɩsɩ ɛyáa kɩfama yɔ. Pɩlabɩ ḿbʋ́ se ɖihiɣ wezuu caɣʋ kɩfam.

⁶ Mbʋ́ pʋyɔɔ yɔ, Ɛsɔ tɩŋnɩ ɖa-ñʋʋ yaɖʋ Yesu Krɩstʋ yɔɔ nɛ ɛha-ɖʋ e-Fezuu Kiɖeɖeu nɛ pʋwɛɛ ɛzɩ ehuuzi-kʋ ɖɔ-yɔɔ kuhuuzuu kpem yɔ.

⁷ Ɛlabɩ ḿbʋ́ se pɩtɩŋnɩ e-lootiye yɔɔ nɛ ɖɩpɩsɩ kʋtʋʋzaa ɛ-ɛsɩndaa nɛ ɛha-ɖʋ wezuu maatɛŋ ŋgʋ́ ɖɩɖaŋaa yɔ.

Pɔɔlɩ tasɩɣ Tiiti lɛɣtʋ

⁸ Tɔm ńdʋ́, tʋmʋnaa se pataa-tʋ liu. Mancaɣ se ŋwɛɛ tɩ-yɔɔ ɖoŋ nɛ mbá pɛwɛnɩ lidaʋ Ɛsɔ yɔɔ yɔ, paka ñʋʋ nɛ pala tʋma kɩbana ɛzɩma mbʋ́ pʋpɔzʋʋ yɔ. Ŋnawa, ḿbʋ́ wɛnɩ ɖeu nɛ pʋwɛɛ ɛyáa wazaɣ.

⁹ Ɛlɛ́, koli cɔzɔnaa hɩla wena afɛyɩ kalʋʋ yɔ a-tɔm, mbʋ́ pʋyɔɔ yɔ, tɩkɛ kɩmɛlɛndʋ. Koli ɖɔɖɔ you nɛ Mooyiizi paɣtʋ yɔɔ tɔm hɔm. Pɩfɛyɩ wazaɣ nakɛyɛ, pɩfɛyɩ kɛzɛɣa ɖɔɖɔ.

¹⁰ Paɣ́ weyi eyozuu ɛyáa yɔ kajalaɣ ɖeɖe nɛ nabʋlɛ ɖeɖe, pʋwayɩ lɛ ŋɖɔɔnɩ-ɩ.

¹¹ Ŋsɩm ɖeu se pɩtɛ ɛyʋ ɛnʋ ɛwɛɛkaa kpem nɛ ɛ-maɣmaɣ ɛ-kɩwɛɛkɩm wɩlɩɣ se ɛ-tɔm sɩba.

Sɛtʋ

¹² Mentiyiɣ Artemaasɩ yaa Ticiiki ñɔ-cɔlɔ. Pa-taa weyi ɛtalaa lɛ, ŋñaɣ pana nɛ ŋkatɩ-m Niikopoliisi. Mbʋ́ pʋyɔɔ yɔ, manɖʋwa se mancakɩ peeɖe niŋkaɣ alɩwaatʋ taa.

¹³ Pʋwɛɛ se ŋsɩnɩ paɣtʋ sɩnɖʋ Zenaasɩ nɛ Apoloosi pa-nʋmɔʋ ɖɔm taa. Taayele se nabʋyʋ ɛtɛɖɩ-wɛ.

¹⁴ Pʋwɛɛ ɖɔɖɔ se ɖa-taa ñɩma ɛkpɛlɩkɩ ɛzɩma mbʋ́ paaka pa-ñʋŋ nɛ pala tʋma kɩbana ɛzɩ pʋpɔzʋʋ yɔ nɛ papɩzɩ pala ɛyáa mbʋ́ pʋpɔzʋʋ-wɛ yɔ. Ḿbʋ́ yekina nɛ paakɛɣ mbá pɛfɛyɩ wazaɣ yɔ.

¹⁵ Mbá patɩŋa payɩ pɛwɛ mɔn-cɔlɔ yɔ, pɛsɛ-ŋ. Sɛɛ mbá pɛwɛnɩ lidaʋ Krɩstʋ yɔɔ nɛ pɔsɔɔlɩ-ɖʋ yɔ. Ɛsɔ ɛla mɩtɩŋa payɩ lootiye.