Tiiti 1 - New Testament

Sɛtʋ

¹ Ma Pɔɔlɩ weyi ɛkɛ Ɛsɔ tʋmlaɖʋ nɛ Yesu Krɩstʋ tiyiyu yɔ, mamaɣnɩ takayaɣ kanɛ. Paɖʋ-m se mala nɛ mbá Ɛsɔ lɩzaa yɔ, pɛwɛnɩ lidaʋ nɛ mawɩlɩ-wɛ nɛ patɩlɩ toovenim nɛ pacaɣ wezuu ɛzɩ Ɛsɔ liu wɛʋ yɔ.

² Ḿbʋ́ paɖaŋaa se pehiɣ wezuu maatɛŋ. Ɛsɔ weyi ɛɛcɛtɩɣ yɔ, pʋcɔ ɛla kedeŋa lɛ, ɛɛɖʋwa se ɛhaɣ-ɖʋ-kʋ.

³ Alɩwaatʋ ndʋ́ ɛɖʋwa yɔ tɩtalaa lɛ, ɛtɩŋnɩ ɛ-tɔm yɔɔ nɛ ɛwɩlɩ wezuu ŋ́gʋ́. Me-nesi taa ɖa-ñʋʋ yaɖʋ Ɛsɔ ɖʋzɩ-tʋ nɛ ɛha-m nɔɔ se monsusi-tʋ.

⁴ Tiiti weyi ña ŋkɛ man-pɩɣa mbʋ́ pʋyɔɔ yɔ ŋwɛnɩ lidaʋ ɛzɩ ma yɔ, ña mamaɣ takayaɣ kanɛ, mɛnsɛ-ŋ: Caa Ɛsɔ nɛ ɖa-ñʋʋ yaɖʋ Krɩstʋ Yesu palabɩ-ŋ lootiye nɛ pɛhɛzɩ ña-laŋɩyɛ.

Lɛɣtʋ ndʋ́ pʋwɛɛ se Krɩstʋ ŋgbɛyɛ ñʋʋdʋ ɛwɛna yɔ

⁵ Meyebi-ŋ Krɛɛtɩ se ŋñɔɔzɩ mbʋ́ pɩsɛɣa se pala yɔ nɛ paa tɛtʋ ndʋ́ tɩ-taa lɛ, ŋsɩɩ Yesu ŋgbɛyɛ taa sɔsaa. Ŋsɩɣ-wɛ lɛ, ŋtɔzɩ mbʋ́ mɛnkpɛlɩkɩ-ŋ yɔ pʋ-yɔɔ:

⁶ pɩfɛyɩ se pana kawanaɣ nakɛyɛ Yesu ŋgbɛyɛ taa sɔsɔ yɔɔ. Pʋwɛɛ se ɛwɛnɩ halʋ kʋɖʋm koŋ nɛ e-piya ñam-ɩ. Pataasam-sɩ nɛ yem yem lakasɩ yaa kaañamtʋ.

⁷ Mbʋ́ pʋyɔɔ yɔ, weyi ɛcɔŋnɩ Yesu ŋgbɛyɛ taa ñɩma yɔɔ yɔ, Ɛsɔ ɖʋnɩ-ɩ se ɛlabɩ-ɩ tʋmɩyɛ. Pʋ-yɔɔ lɛ, pɩtamʋnɩ se pana kawanaɣ nakɛyɛ ɛ-yɔɔ. Pɩfɛyɩ se ɛkpazɩ ɛ-tɩ yaa ɛkɛ pana tʋ yaa sʋlʋm kpaŋɩyʋ yaa weyi ɛwɛ helu helu yɔ yaa weyi emuluu ɛyáa se ehiɣ kɛzɛɣa yɔ.

⁸ Ɛlɛ́, pʋwɛɛ se ɛmʋ ɛyáa camɩyɛ nɛ ɛsɔɔlɩ mbʋ́ pʋwɛ ɖeu yɔ. Ɛkɛ weyi ɛmaɣzɩɣ ɛ-ñʋʋ taa camɩyɛ nɛ pʋcɔ ɛla pʋyʋ yɔ. Ɛkɛ ɖɔɖɔ ɛyʋ kʋtʋʋzʋ nɛ ɛ-tɔm kɛdɩnɩ Ɛsɔ nɛ ɛ́ɖɔ́kɩ ɛ-tɩ.

⁹ Pʋwɛɛ se ɛ́ɖɔ́kɩ tɔm kɩbandʋ ndʋ́ ɖɩwɩlɩɣ yɔ nesi naalɛ kpam. Tɩmʋnaa se pɛwɛnɩ lidaʋ tɩ-yɔɔ. Tɩ-yɔɔ ɛtɩŋɩɣna nɛ ɛsazɩ ɛ-taabalaa nɛ ɛwɩlɩ mbá paatisiɣ ɛ-tɔm yɔ ɖenɖe pucoɖi-wɛ yɔ.

Ɛyáa nabɛyɛ wɩlɩɣ cɛtɩm tɔm

¹⁰ Ɛyáa mbá paañaŋ nɛ peyiliɣ lɛlaa nɛ pa-kɩmɛlɛndʋ tɔm yɔ, pɔɖɔwa. Ɛlɛ́, Yuda ñɩma mbá papɩsɩ Krɩstʋ ñɩma yɔ, pɛ-hɛkʋ taa pakɩlɩ wɛʋ.

¹¹ Pʋwɛɛ se ŋɖɩɣ-wɛ nʋmɔʋ nɛ pataapɩzɩ pɔyɔɔdɩ. Mbʋ́ pʋyɔɔ yɔ, poyozuu hɔŋ taa ɛyáa tɩŋa payɩ nɛ pawɩlɩɣ mbʋ́ pɩtamʋna yɔ se pehiɣ kɛzɛɣa.

¹² Krɛɛtɩ ñɩma taa náyʋ maɣmaɣ yɔɔdɩnɩ se: «Paa ɖooye Krɛɛtɩ ñɩma kɛ cɛtɩyaa, pɛkɛ kpɩna kañadɩnaa nɛ fendinaa mbá pamaɣzɩɣ tɔkɩyɛ ɖeke yɔɔ yɔ.»

¹³ Tɔm ndʋ́ ɛyɔɔdʋʋ yɔ, tɩkɛ toovenim. Pʋ-yɔɔ pʋwɛɛ se ŋkalɩ-wɛ siŋŋ. Peeɖe pɛwɛɣnɩ lidaʋ kɩbaŋgʋ

¹⁴ nɛ paatasɩɣ nɩnaʋ Yuda ñɩma mʋya nɛ paɣtʋ ndʋ́ ɛyáa mbá paha toovenim siɣ́ye yɔ paɖʋwa yɔ.

¹⁵ Mbá pɛwɛ cɩɖɩcɩɖɩ yɔ, panaɣ pɩtɩŋa payɩ se pʋwɛ cɩɖɩcɩɖɩ. Ɛlɛ́, mbá pɛfɛyɩ cɩɖɩcɩɖɩ nɛ paañaŋ Krɩstʋ yɔ, nabʋyʋ fɛyɩ-wɛ cɩɖɩcɩɖɩ. Mbʋ́ pʋyɔɔ yɔ, ɛzaɣ́tʋ pisi pɛ-lɛɣtʋ nɛ pa-lɩmaɣza fɛyɩ a-ɖeɖe.

¹⁶ Pɔyɔɔdʋʋ se pasɩm Ɛsɔ, ɛlɛ́, pa-lakasɩ ɛɛwɩlɩɣ ḿbʋ́. Pɛwɛ sɔɔndʋ kpem, pɛkɛ kaañamtʋ tɩnaa, paapɩzɩɣ pala tʋmɩyɛ kɩbanɖɛ naɖɩyɛ.