Room 9 - New TestamentƐsɔ lɩzɩ Izrɛɛlɩ ñɩma 1 Mɔyɔɔdʋʋ toovenim, mɛnkɛ Krɩstʋ tʋ, maacɛtɩɣ. Fezuu Kiɖeɖeu wɩlɩɣ-m se pɩkɛ toovenim, ma-laŋɩyɛ ɛɛmaɣ: 2 toovenim ḿbʋ́ lɛ se: mɔ-hɔyɛ pɩsaa siŋŋ nɛ pʋwɛɛ pɩcɛyɩɣ-m. 3 Mbʋ́ pʋyɔɔ yɔ, yee pʋwɛɛ se Ɛsɔ ɛwɩlɩ ma-maɣmaɣ kpalʋʋ nɛ ma nɛ Krɩstʋ ɖɛ-hɛkʋ taa tayɩ nɛ pɩsɩnɩ man-taabalaa Yuda ñɩma yɔ, pɩkɛdɩɣnɩ-m. 4 Pɛkɛ Izrɛɛlɩ ñɩma: Ɛsɔ pɩsɩ-wɛ e-piya nɛ eyele nɛ pɛwɛɛ e-koboyaɣ taa. Ɛha-wɛ nɔsɩ nɛ ɛɖʋ-wɛ paɣtʋ nɛ ɛwɩlɩ-wɛ ɛzɩma mbʋ́ poluŋ ɛ-tɛɛ yɔ nɛ ɛɖʋ mbʋ́ mbʋ́ ɛlakɩ-wɛ yɔ. 5 Pɛkɛ Abraham nɛ Izaakɩ nɛ Yakɔɔbʋ pa-sayɩnaa. Đɩkpaɣ Krɩstʋ ɛsɛ yɔɔ yɔ, ɛkɛ pe-liɖe taa tʋ. Ŋgʋ́, ɛnʋ lɛ Ɛsɔ weyi ɛkɩlɩ pɩtɩŋa payɩ yɔ. Pasam-ɩ tam. Pɩla ḿbʋ́! 6 Ŋgʋ́, pɩtɛkɛ mɔntɔŋ se mbʋ́ Ɛsɔ ɖʋwa se ɛlakɩ yɔ pɩsayaa. Mbʋ́ pʋyɔɔ yɔ, pɩtɛkɛ Izrɛɛlɩ ñɩma tɩŋa kɛnɩnɩ Ɛsɔ ñɩma siŋŋ. 7 Ḿbʋ́ ɖɔɖɔ Abraham liɖe taa ñɩma tɛkɛ Ɛsɔ piya patɩŋa. Mbʋ́ pʋyɔɔ yɔ, Ɛsɔ heyi Abraham se: «Izaakɩ liɖe taa ñɩma ɖeke pakaɣ yaʋ se ñe-piya.» 8 Pʋ-tɔbʋʋ se pɩtɛkɛ Abraham piya tɩŋa lɛ Ɛsɔ piya, mbʋ́ pʋyɔɔ yɔ, Ɛsɔ tɔm se e-piya maɣmaɣ lɛ nzɩ́ palʋlɩ-sɩ ɛzɩ ɛɖʋʋ yɔ. 9 Mbʋ́ pʋyɔɔ yɔ, Ɛsɔ kaɖʋwa se: «Pɩɩtalɩɣ alɩwaatʋ tʋnɛ tɩ-yɔɔ nɛ manpɩsɩɣ lɛ, Saara lʋlɩ abalɩbɩɣa.» 10 Pɩtasɩɩnɩ pi-ɖeke. Abalɩbiya naalɛ nzɩ́ Rebeka lʋlaa yɔ, sɩ-caa kʋɖʋm, ɛnʋ lɛ ɖɔ-cɔzɔ Izaakɩ. 11-13 Pataatɩɩlʋlɩda piya ńzɩ́ nɛ pʋcɔ paatɔ se sɩlabɩ mbʋ́ pʋwɛ ɖeu yɔ yaa mbʋ́ pɩfɛyɩ ɖeu yɔ. Ɛlɛ́, Ɛsɔ heyi Izaakɩ se: «Kajalaɣ ñɩŋga kaɣ ka-tɩ luzuu cikpelaɣ tɛɛ». Pʋwɛ ɛzɩ pamaʋ Ɛsɔtɔm Takayaɣ taa se: «Mɔnsɔɔlɩ Yakɔɔbʋ nɛ manpaɖɩ Ezaayuu» yɔ. Pɩlaba ḿbʋ́ se mbʋ́ Ɛsɔ ɖʋwa se pɩlakɩ yɔ, pɩla. Yee ḿbʋ́ ɛnʋ ɖʋna ɛzɩma mbʋ́ ɛlɩzɩɣ ɛyʋ weyi ɛsɔɔlaa yɔ. E-liu wɛna nɛ ɛlɩzɩ-ɩ. Pɩtɛkɛ pʋdʋ tʋma yɔɔ ɛlɩzɩ-ɩ. 14 Se we ɖɩyɔɔdʋʋ yɔ? Đɩyɔɔdʋʋ se Ɛsɔ kɛ weyi ɛtatʋʋzɩ yɔ yaa we? Đɩɩtɩɩyɔɔdʋʋ ḿbʋ́ kpem! 15 Mbʋ́ pʋyɔɔ yɔ, eheyi Mooyiizi se: weyi me-liu wɛɛ se manaɣ ɛ-pʋtɔdɩyɛ nɛ malabɩ-ɩ ɖeu yɔ, manaɣ ɛ-pʋtɔdɩyɛ nɛ malabɩ-ɩ ɖeu. 16 Pʋ-yɔɔ lɛ, pɩtalɩɩnɩ mbʋ́ ɛyʋ liu wɛɛ yɔ pʋ-cɔlɔ yaa pana wena ɛñakɩ yɔ a-cɔlɔ. Ɛlɛ́, Ɛsɔ weyi ɛnaɣ ɛyáa pʋtɔdɩyɛ yɔ, e-ɖeke koŋ ɛ-cɔlɔ pɩlɩnaa. 17 Pama Ɛsɔtɔm Takayaɣ taa se Ɛsɔ heyi Ejiptɩ wiyaʋ sɔsɔ se: «Ña-maɣmaɣ mɛncɛlɩ kewiyaɣ se mantɩŋnɩ ñɔ-yɔɔ nɛ mawɩlɩ ɛyáa mon-ɖoŋ nɛ ma-hɩɖɛ sɛɛ kedeŋa kpeekpe yɔɔ.» 18 Pʋ-yɔɔ lɛ, yee pɩmaɣ Ɛsɔ se ɛnaɣ nɔɔyʋ pʋtɔdɩyɛ yɔ, ɛnaɣ-ɖɩ. Pɩmaɣ-ɩ se ɛlakɩ nɛ nɔɔyʋ ɛtaakemni-i yɔ, ɛlakɩ ɖɔɖɔ, pʋdʋ eekeŋni-i. Ɛsɔ lɩzɩɣ mbá e-liu wɛɛ yɔ 19 Pʋtɔmaɣ yɔ, pɔpɔzʋʋ-m se: «Yee pʋwɛ ḿbʋ́ lɛ, ɛbɛ yɔɔ Ɛsɔ kalɩɣ ɛyáa yɔ? Mbʋ́ pʋyɔɔ yɔ, apɩzɩɣ ekizi mbʋ́ Ɛsɔ liu wɛɛ yɔ?» 20 Ña ɛyʋ lɛ, ña anɩ nɛ ŋtɔ se ŋkɛlɛsɩɣ Ɛsɔ? Cʋʋ ñanaɣ pɔzʋʋ weyi ɛma-kɛ yɔ se: pɩlabɩ ɛzɩma nɛ ŋma-m ḿbʋ́ yaa we? 21 Cʋʋ mayʋ pɩzɩɣ ɛlabɩnɩ cʋʋ mbʋ́ e-liu wɛɛ yɔ: ɛpɩzɩɣ ɛkpaɣ cʋʋ kʋɖʋmʋʋ nɛ ɛmanɩ ñanaɣ kɩbaŋga ŋgá kɛwɛ liidiye siŋŋ yɔ nɛ yem ñɩŋga ŋgá kɛfɛyɩ liidiye yɔ. 22 Ḿbʋ́ ɖɔɖɔ pʋwɛnɩ Ɛsɔ, ɛcaɣaɣ se ɛwɩlɩ ɛzɩma mbʋ́ ɛ-pana kpawa yɔ. Ɛcaɣaɣ ɖɔɖɔ se patɩlɩ e-ɖoŋ. Ɛlɛ́, ɛɖɔkɩ ɛ-hɔyɛ siŋŋ nɛ ɛ́ɖɔ́kɩ mbá pɩɩwɛɛ se ɛ-pana ɛkpanɩ-wɛ nɛ pasʋʋ asayʋʋ taa yɔ. 23 Ɛcaɣaɣ ɖɔɖɔ se ɛwɩlɩ ɛzɩma mbʋ́ e-koboyaɣ paɣlaa yɔ. Ɛ nɛ mbá ɛna pa-pʋtɔdɩyɛ yɔ, pɛwɛɣnɩ ka-taa. Ɛlɩzɩ-wɛ ɖooo lɔŋ se pasʋʋ ka-taa. 24 Toovenim lɛ, ɖa lɛ ɛyáa ḿbá. Paa ɖɩkɛ Yuda ñɩma yaa ɖɩtɛkɛ Yuda ñɩma yɔ, ɖa ɛyawa. 25 Pʋwɛ ɛzɩ ɛyɔɔdʋʋ nɛ náyʋ Ozee ma ɛ-takayaɣ taa yɔ. Ɛmawa se: «Ɛyáa mbá pataakɛ ma-ñɩma yɔ, mɔnkɔŋ-wɛ yaʋ se “ma-ñɩma” nɛ ɛjaɖɛ nɖɩ́ mantaasɔɔlɩ ɖɩ-taa ñɩma yɔ, mayaa ɖɩɖɩ se “ɛjaɖɛ nɖɩ́ mɔnsɔɔlɩ ɖɩ-taa ñɩma siŋŋ” yɔ. 26 Nɛ ɖenɖe paaheyi ɛyáa se: ‹Ɩtɛkɛ ma-ñɩma yɔ,› peeɖe maɣmaɣ pɔkɔŋ-wɛ yaʋ se Ɛsɔ weyi ɛwɛ wezuu yɔ e-piya.» 27 Ezaayii lɛ, Izrɛɛlɩ ñɩma tɔm ɛ́lɛ́ susaa. Ńdʋ́ lɛ se: «Paa Izrɛɛlɩ ñɩma ɛɛɖɔ sakɩyɛ ɛzɩ teŋgu nɔɔ kañɩŋa yɔ yɔ, pa-taa ɛyáa pazɩ ɖeke ñʋʋ payakɩ. 28 Mbʋ́ pʋyɔɔ yɔ, Kɩpaɣlʋ Ɛsɔ kɔŋ kedeŋa yɔɔ cɩnɛ ɛyáa tɩŋa hʋnaʋ kɛlɛʋ.» 29 Ḿbʋ́ ɖɔɖɔ Ezaayii ɛnʋ ɛɛyɔɔdɩ ɖooo lɔŋ se: «Yee Ɛsɔ Caabiyuu ɛtaakazɩ ɖe-liɖe taa ñɩma nabɛyɛ yɔ, ɖɩɩpɩsɩ ɛzɩ Sodom ñɩma yɔ. Đɩɩnɩɣzɩnɩ Gomɔɔrɩ ñɩma.» Ɛsɔ pɩsɩɣ mbá pɛwɛnɩ lidaʋ Yesu Krɩstʋ yɔɔ yɔ kʋtʋʋzaa 30 Se we ɖɩtasɩɣ yɔɔdʋʋ yɔ? Đɩyɔɔdʋʋ se: mbá pɛtɛkɛ Yuda ñɩma nɛ pataacaɣ se papɩsɩ kʋtʋʋzaa Ɛsɔ ɛsɩndaa yɔ, pɩtɩŋnɩ lidaʋ ŋgʋ́ pɛwɛnɩ ɛ-yɔɔ yɔ kʋ-yɔɔ nɛ papɩsɩ kʋtʋʋzaa ɛ-ɛsɩndaa. 31 Pɩsɛɣ Izrɛɛlɩ ñɩma mbá pañakaɣ pana siŋŋ se pɔɖɔ paɣtʋ yɔɔ nɛ papɩsɩ kʋtʋʋzaa Ɛsɔ ɛsɩndaa yɔ, pɔtɔlɩ nʋmɔʋ taa. 32 Pɩlabɩ ɛzɩma nɛ pɩlabɩ-wɛ ḿbʋ́? Mbʋ́ pʋyɔɔ yɔ, patañɩnɩɣ se pɛwɛnɩ lidaʋ Ɛsɔ yɔɔ. Ɛlɛ́, pañɩnaɣ se pɩtɩŋnɩ pa-tʋma yɔɔ nɛ papɩsɩ kʋtʋʋzaa ɛ-ɛsɩndaa. Peeɖe powobi poyoni pɩyɛ nɖɩ́ ɖituuluu ɛyáa yɔ. 33 Đɩ-tɔm pama Ɛsɔtɔm Takayaɣ taa se: «Ɩɩnaɣ, mansɩɣ Siiyɔɔ tɛtʋ taa pɩyɛ nɖɩ́ ɖituuluu ɛyáa yɔ nɛ, ɛwaɣ ŋgá kɛpɛɖɩɣ-wɛ yɔ. Ɛlɛ́, weyi ɛwɛɣnɩ lidaʋ weyi ɛkɛ pɩyɛ ńɖɩ́ yɔ ɛ-yɔɔ yɔ, ɛɛkaɣ fɛyɛ tɔɔʋ.» |